1. Linog

“May mabaskog nga mga linog.”—LUCAS 21:11.

● Si Winnie, nga mga isa ka tuig kag tunga, naluwas sang naglinog sa Haiti. Nabatian sang isa ka reporter sa TV ang iya paghibi. Nakaluwas sia, pero ang iya mga ginikanan napatay.

ANO ANG GINAPAKITA SANG MGA REPORT? Sang ang linog nga may kabaskugon nga 7.0 naghalit sa Haiti sang Enero 2010, sobra sa 300,000 ka tawo ang napatay. Mga 1.3 ka milyon ang nadulaan sang balay. Pero, ining linog sa Haiti isa lamang sa mga 18 ka mabaskog nga linog nga natabo sa bilog nga kalibutan halin sang Abril 2009 asta Abril 2010.

ANO ANG PILA KA PAGPATI? Indi matuod nga madamo ang linog. Mas nahibaluan lang naton ini subong bangod sa moderno nga teknolohiya.

HUSTO BALA INA NGA PAGPATI? Binagbinaga ini: Ang Biblia wala nagasiling kon daw ano kadamo nga linog ang mahanabo sa katapusan nga mga adlaw. Pero, nagsiling ini nga may “mabaskog nga mga linog” nga mahanabo “sa nagkalainlain nga duog,” nga isa sa talalupangdon nga mga hitabo sa aton panahon.—Marcos 13:8; Lucas 21:11.

ANO SA BANTA MO? May mabaskog gid man bala nga mga linog suno sa gintagna sang Biblia?

Ang mga linog isa lamang sa mga tagna nga nagakatuman kag nagapamatuod nga yara na kita sa katapusan nga mga adlaw. Binagbinaga ang ikaduha nga tagna.

[Blurb sa pahina 4]

“Ginatawag namon [mga geophysicist] ini nga mabaskog nga mga linog. Ginakabig ini sang tanan nga makakulugmat.”—KEN HUDNUT, U.S. GEOLOGICAL SURVEY.

[Picture Credit Line sa pahina 4]

© William Daniels/Panos Pictures