Ginapakamalaut Bala sang Biblia ang Pagsugal?

GINAPAKITA pirme sang mga pelikula kag palaguaon sa telebisyon nga ang pagsugal, ilabi na gid sa mga kasino, kalingawan sang mga matahom, manggaranon, kag maalam. Siempre, bal-an sang mga nagatan-aw nga indi amo sini ang realidad.

Ang matuod, kakompetensia man sang mga kasino ang lotto, pustahanay sa hampang, kag sugal sa internet. Ang pagsugal amo “ang bisyo sa bilog nga kalibutan nga tuman kadasig ang paglapnag,” siling sang libro nga Internet Gambling. Halimbawa, ang poker panguna na subong nga hampang sa telebisyon kag sa Internet. Suno sa isa ka pamantalaan, ginapakita sang pagtuon nga sa Estados Unidos, nagdoble ang kadamuon sang mga nagahampang sang poker sa sulod lamang sang 18 ka bulan.

Ang pagsugal nagakahulugan sang pagpusta sang kuarta sa butang nga wala sing kasiguruhan ang resulta. Madamo ang nagarason nga wala sing malain sa pagsugal basta ang kuarta iya man sang nagasugal kag indi sia maadik. Nagsiling pa gani ang New Catholic Encyclopedia nga ang pagsugal “indi sala basta indi masablagan ang mga obligasyon sang nagasugal.” Pero ini nga ideya wala ginasuportahan sang Biblia. Gani, paano ini dapat tamdon sang mga Cristiano? Ginabaton bala ini sang Biblia ukon ginapakamalaut?

Wala ginasambit sang Biblia ang pagsugal. Pero indi buot silingon nga wala kita sing pagsulundan parte sa sini. Sa baylo nga maghatag sing sugo para sa tagsa ka sitwasyon, ginalaygayan kita sang Biblia nga “padayon [naton] nga hantupon kon ano ang kabubut-on ni Jehova.” (Efeso 5:17) Suno sa isa ka iskolar sa Biblia nga si E. W. Bullinger, ang Griego nga tinaga para sa “hantupon” nagakahulugan sing pagtingob sang mga ideya sang isa ka topiko paagi sa “pagpamensar, ang ihibalo nga nakuha paagi sa pagbinagbinag sing maayo.” Gani, mahantop sang isa ka Cristiano ang pagtamod sang Dios paagi sa pagtingob sang mga ideya kag pagbinagbinag sang mga prinsipio sang Biblia parte sa pagsugal. Samtang ginabasa mo ang mga bersikulo sa sini nga artikulo, pamangkuta ang imo kaugalingon: ‘Ginasuportahan bala sini nga bersikulo ang pagsugal? Ano ang ginapakita sang Pulong sang Dios parte sa iya pagtamod sa sini nga butang?

Ang Ganyat sang Suerte

Bangod ang pagsugal pagpasimpalad, daku ang papel sang suerte, ukon misteryuso nga gahom nga nagakontrol kuno sa mga hitabo, labi na gid kon may kuarta nga ginapusta. Halimbawa, may suerte kuno nga mga numero kon magtaya sa lotto; may tinaga nga indi  puede ihambal kon nagahampang sang madyong; kag ginahuypan anay ang dais antes iitsa. Ngaa? Kay nagapati ang mga sugarol nga kon himuon nila ini basi pa lang suertehon sila.

Wala bala sing malain kon magsalig sa suerte? Amo sini ang pagpati sang pila ka tawo sa Israel sang una. Abi nila, magamanggaranon sila bangod sa suerte. Ano ang pagtamod ni Jehova sa sini? Paagi sa iya propeta nga si Isaias, ang Dios nagsiling: “Kamo nga nagabiya sa GINOO, nga nagakalipat sang akon bukid nga balaan, nga nagaaman sing latok sa Kapalaran kag nagapuno sang nasimbog nga alak sa Suerte.” (Isaias 65:11) Para sa Dios, ang pagpati sa suerte isa ka sahi sang pagsimba nga wala niya ginakahamut-an. Pagsalig ini sa indi makita nga puersa sa baylo nga sa matuod nga Dios. Makasalig kita nga wala nagabag-o ang pagtamod sang Dios.

Kon Paano Nagadaug

Nagapusta man sa Internet, nagabakal sing tiket sa lotto, nagataya sa hampang, ukon nagasugal sa kasino, pirme nalipatan sang mga nagasugal kon diin nagahalin ang premyo nga gusto nila madag-an. Ang pagsugal lain sangsa legal nga transaksion ukon pagbakal kay gusto makuha sang nagasugal ang kuarta nga napierde sang iban. * “Sa tagsa ka nagadaug sa lotto kag nagamilyonaryo,” siling sang Canada’s Centre for Addiction and Mental Health, “minilyon man ka tawo ang nagakapierde!” Ano nga mga prinsipio sang Biblia ang makabulig sa isa ka Cristiano nga maintiendihan ang pagtamod sang Dios sa sini?

Ang katapusan sang Napulo ka Sugo sa Israel nagasiling: “Dili ka magkaibog sang asawa sang imo isigkatawo, ukon sang iya alagad nga lalaki, ukon sang iya alagad nga babayi, ukon sang iya baka, ukon sang iya asno, ukon ano nga butang nga iya sang imo isigkatawo.” (Exodo 20:17) Ang pagkaibog sa mga butang sang imo isigkatawo—ang iya pagkabutang, manggad, kag kuarta—isa ka mabug-at nga sala pareho sa pagkaibog sa iya asawa. Siniglo sang ulihi, ginsulit ni apostol Pablo ini nga sugo sa mga  Cristiano: “Indi ka magkaibog.” (Roma 7:7, APD) Ang Cristiano bala nga gusto magdaug paagi sa kapierdihan sang iban masiling nga nagakaibog?

“Batunon man nila [mga sugarol] ukon indi,” sulat sang kolumnista nga si J. Phillip Vogel, “sa wala pa mag-umpisa ang hampang, ginaimadyin na nila nga daku ang ila madaug bisan pa pila lang ka dolyar ang ila gintaya.” Ini nga mga sugarol nagahandum nga magmanggaranon dayon. Supak gid ini sa laygay sang Biblia nga ang isa ka Cristiano dapat ‘magpangabudlay sing lakas, nga nagahimo sang maayo nga buhat paagi sa iya mga kamot, agod may mahatag sia sa isa nga nagakinahanglan.’ (Efeso 4:28) Kag nagsiling man si apostol Pablo: “Kon ang bisan sin-o indi luyag mag-obra, indi man sia pagpakan-a.” Nagsiling pa sia: “Dapat sila magkaon sang kalan-on nga ila mismo ginpangabudlayan.” (2 Tesalonica 3:10, 12) Makabig bala nga legal nga trabaho ang pagsugal?

Matuod, indi mahapos magsugal, pero ang premyo nga kuarta dinag-an lang, kag wala ginpangabudlayan ukon ginserbisyuhan. Sa sugal, nagataya ka sang kuarta, kag ang resulta nagadepende sa tsansa nga basi pa lang magdaug ka. Sa simple nga hambal, gusto sang isa ka sugarol nga makuha ang wala niya ginpangabudlayan. Pero ang matuod nga mga Cristiano ginalaygayan nga pangabudlayan ang kuarta sa husto nga paagi. “Wala na sing maayo pa sa tawo sang sa magkaon sia kag mag-inum, kag magkalipay ang iya kalag sing kaayohan sa iya kinabudlayan,” sulat sang maalam nga si Hari Solomon. Dayon nagsiling sia: “Ini nagagikan sa kamut sang Dios.” (Manugwali 2:24) Ang mga alagad sang Dios wala nagapahapos ukon nagasalig sa mga butang nga wala sing kapat-uran kundi nagasalig sila sa kalipay kag pagpakamaayo nga halin sa Dios.

“Siod” nga Dapat Likawan

Bisan pa magdaug ang sugarol, dapat niya pensaron indi lang ang temporaryo nga kalipay sang iya pagdaug kundi ang nagadugay nga epekto sang pagsugal. “Ang manggad nga nakuha mo sing dalidali,” siling sang Hulubaton 20:21 (MB), “indi makahatag sa imo sing kaayuhan.” Narealisar sang madamo nga nagdaug sa lotto kag sang iban pa nga sugarol nga ang ila nadag-an wala gid nakahatag sa ila sing kalipay. Maayo gid nga sundon naton ang laygay sang Biblia nga indi magsalig sa “wala kapat-uran nga manggad, kundi sa Dios, nga bugana nga nagahatag sa aton sang tanan nga butang agod malipay kita.”—1 Timoteo 6:17.

May malain pa gid nga epekto ang pagsugal. “Ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga kailigbon, nga nagatugdang sang mga tawo sa kalaglagan kag kapahamakan,” siling sang Pulong sang Dios. (1 Timoteo 6:9) Ang siod gindesinyo para masalawid ang biktima. Madamo nga tawo nga sang primero tigdiutay lang ang ginataya ukon talagsa lang nagasugal ang nasiod kag indi na makapanginpadlos. Bangod sini, nadulaan sila sing trabaho, naguba ang ila pamilya, kag nasakit ang balatyagon sang ila pinalangga.

Sa tapos naton mabinagbinag ang mga bersikulo parte sa pagsugal, nahantop mo bala ang pagtamod sang Dios sa sini? Ginsugo ni apostol Pablo ang pareho niya nga mga Cristiano: “Untati ninyo ang pagpauyon sa sining sistema sang mga butang, kundi magbalhin kamo paagi sa pagbag-o sang inyo hunahuna, agod mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Ang kabubut-on sang Dios amo dapat ang maggiya sa kabuhi sang isa ka Cristiano, imbes nga ang opinyon sang kalabanan. Bilang “malipayon nga Dios,” gusto ni Jehova nga magkalipay kita, nga wala nagaantos sang masakit nga mga resulta sang pagsugal.—1 Timoteo 1:11.

[Nota]

[Blurb sa pahina 14]

Ang mga alagad sang Dios nagapangita sang kuarta sa husto nga paagi

[Kahon sa pahina 13]

Ang Kalipay kon Magdaug

Makaaladik bala ang pagsugal? Base sa pagtuon parte sa reaksion sang mga sugarol kon magdaug sila kag mapierde, si Dr. Hans Breiter nagsiling: “Ginapakita sang isa ka eksperimento nga pareho sa sugal nga ang epekto sa utok sang premyo nga kuarta pareho gid sa epekto sang cocaine sa utok sang adik nga bag-o lang nakasuyop.”

[Retrato sa pahina 13]

Kay sin-o kuarta ang gusto makuha sang mga sugarol?