Ano ang “Katapusan”?

“. . . kag ugaling magaabut ang katapusan.”—MATEO 24:14.

KADAMO gid sang istorya parte sa katapusan sang kalibutan. Ara ini sa mga libro, pelikula, kag mga magasin. Ang iban sini makahalam-ot kag ang iban naman base sa siensia. Maguba kuno ang kalibutan paagi sa nuklear nga inaway, pagbungguanay sang mga asteroid, makamamatay nga virus, indi mapaktan nga pagbag-o sang klima, ukon pagsalakay sang mga alien.

Sarisari man ang ginatudlo sang mga relihion. Madamo sa ila ang nagasiling nga ang “katapusan” amo ang magatapos sa tanan nga nagakabuhi sa duta. Parte sa Mateo 24:14, ang isa ka teologo nagsulat: “Isa ini sa pinakaimportante nga mga bersikulo sa Pulong sang Dios . . . Ang aton henerasyon nagaatubang sing grabe nga kalaglagan amo nga diutay lang sa aton ang nagapensar sining makahaladlok nga katunayan.”

Pero, nalipatan na ining importante nga kamatuoran: ‘Ginpalig-on’ ni Jehova nga Dios ang duta; “wala sia magtuga sini nga walay pulus, [kundi] naghuman sini nga pagpuy-an.” (Isaias 45:18) Gani sang ginsambit ni Jesus ang “katapusan,” indi niya buot silingon nga maguba ang duta; ukon mapapas ang tanan nga tawo. Buot niya silingon nga ang mga malaut, ukon ang mga nagapamatok sa mahigugmaon nga mga kasuguan ni Jehova, pagalaglagon.

Sa pag-ilustrar: Ibutang ta nga may matahom ka nga balay kag ginpaistaran mo ini sing libre sa mga tawo. Ang iban sa ila nagakabuhi sing malinong kag ginaatipan gid ang imo balay. Pero ang iban magamo, pirme lang nagainaway, kag ginahalitan ang maayo nga mga nagaistar. Ginaguba nila ang imo propiedad bisan ginasaway mo na sila.

Ano ang himuon mo para masolbar ini? Gub-on mo bala ang imo balay? Siempre indi. Mahimo nga pahalinon mo ang malain nga mga nagaistar kag kay-uhon ang ila ginpangguba.

 Amo man sini ang himuon ni Jehova. Gingiyahan niya ang salmista sa pagsulat: “Utdon ang mga manughikot sing malaut; apang ang mga nagahulat sa GINOO magapanubli sang duta. Kay sa diotay pa nga tion, kag ang malauton wala na; bisan talupangdon mo sing makugihon ang iya duug, wala na sia didto. Apang ang mapainubuson magapanubli sang duta, kag magakalipay sila sa kabuganaan sang paghidait.”—Salmo 37:9-11.

Parte sa sini, si apostol Pedro gingiyahan man sa pagsulat: “Sang una may langit kag isa ka duta nga nagatindog sing malig-on gikan sa tubig kag sa tunga sang tubig paagi sa pulong sang Dios; kag paagi sini ang kalibutan sadto nalaglag sang gin-anaw ini sang tubig.” (2 Pedro 3:5, 6) Ginapatuhuyan diri ni Pedro ang Anaw sang panahon ni Noe. Indi ang duta ang nalaglag sadto kundi ang kalibutan sang indi diosnon nga mga tawo. Ang Anaw sa bilog nga kalibutan mangin “sulundan para sa di-diosnon nga mga tawo tuhoy sa mga butang nga magaabot.”—2 Pedro 2:6.

Dayon nagsiling si Pedro: “Ang langit kag ang duta karon ginatigana sa kalayo.” Kon asta lang diri ang aton basahon, mahimo magsala ang aton pag-intiende. Talupangda ang sugpon sini nga bersikulo: “Kag sang paglaglag sa di-diosnon nga mga tawo.” Gani, indi ang duta ang malaglag kundi ang mga indi diosnon. Ano dayon ang masunod? Si Pedro nagsulat: “May bag-ong langit [Ginharian sang Dios nga pagagamhan ni Jesus] kag bag-ong duta [katilingban sang mga matarong] nga ginahulat naton suno sa iya saad, kag sa sini magapuyo ang pagkamatarong.”—2 Pedro 3:7, 13.

Ginapakita sang tagna sang Biblia nga malapit na lang ang “katapusan.” Basaha ang Mateo 24:3-14 kag 2 Timoteo 3:1-5 para makita mo ang mga tanda nga nagapamatuod sini. *

Natingala ka man bala kon ngaa ginapaligban sang madamo ang Mateo 24:14, nga bisan ang bata makaintiende sini? May mga rason ini. Ginbulag ni Satanas ang mga tawo para indi nila makita ang kamatuoran sa Pulong sang Dios. (2 Corinto 4:4) Isa pa, gintago sang Dios ang iya katuyuan sa mga bugalon kag ginsugid ini sa mga mapainubuson. Parte sa sini, si Jesus nagsiling: “Nagadayaw ako sing dayag sa imo, Amay, Ginuo sang langit kag duta, bangod gintago mo ini nga mga butang gikan sa mga maalam kag mga intelihente kag ginpahayag ini sa mga bata.” (Mateo 11:25) Kadungganan gid nga malakip sa mga mapainubuson nga nakaintiende kon ano gid ang Ginharian sang Dios kag nagalaum sa mga pagpakamaayo nga mabaton sang mga nagasuporta sini!

[Nota]

[Retrato sa pahina 9]

Tapuson sang Ginharian ang tanan nga kalautan sa duta