WALA sing nakahibalo sang iya ngalan asta subong. Nakilala lamang sia bangod sa iya amay nga si Jefte. Basahon naton sa Biblia ang istorya parte sa ila. Ginasugid sini nga palangga gid sang Dios kag sang iya mga abyan ang bata nga babayi ni Jefte.

Mabasa naton ini sa Biblia sa Hukom kapitulo 11. Tungod matutom sa Dios si Jefte, sigurado gid nga pirme niya ginatudluan ang iya bata parte sa Kasulatan.

Ara na si Jefte antes pa nangayo ang mga Israelinhon, nga katawhan sang Dios, sing tawo nga magahari sa ila. Makusog si Jefte kag maayo makig-away. Gani, ginpangabay sia sang mga Israelinhon nga manguna sa pagpakig-away sa mga Amonhon, ang pungsod nga malapit lang sa ila.

Gusto ni Jefte nga buligan sila sang Dios para mapierde ang mga Amonhon, gani may ginpromisa sia. Nagpromisa sia nga kon padaugon sia ni Jehova, ihatag niya kay Jehova ang una nga maggua sa ila balay kon magpauli sia. Magaalagad ini sa bilog niya nga kabuhi sa tabernakulo sang Dios—ang lugar diin nagasimba sa Dios ang mga tawo sadto. Sa banta mo sin-o ang una nga naggua?— *

 Ang bata nga babayi ni Jefte! Nasubuan gid si Jefte kay bugtong lang niya ini nga bata. Pero dapat niya tumanon ang iya promisa kay Jehova. Nagsiling dayon ang iya bata: “Amay ko, nabungat mo ang imo baba sa GINOO, himoa sa akon ang sono sa naggowa sa imo baba.” Nangabay sia nga magkadto sa kabukiran sing duha ka bulan para magpangasubo. Ngaa nasubuan gid sia? Bangod kon tumanon niya ang promisa sang iya amay, indi na sia makapamana kag makabata. Pero wala niya ini gin-una. Gusto niya nga tumanon ang iya amay kag magmatutom kay Jehova. Nalipay bala si Jehova kag ang iya amay sa iya ginhimo?—

Ginsugtan ni Jefte ang iya bata nga maglakat upod sa iya mga amiga sing duha ka bulan. Pagpauli niya, gintuman sang iya amay ang iya promisa kag ginpaalagad sia sa tabernakulo sang Dios sa Shilo sa bilog niya nga kabuhi. Kada tuig, ang mga dalaga sa Israel nagakadto sa Shilo para pabakuron ang bata ni Jefte.

May kilala ka bala nga mga bata nga nagatuman sa ila ginikanan kag nagahigugma kay Jehova?— Maayo kon kilalahon mo pa gid sila kag mangin abyan nila. Kon mangin matinumanon ka kag matutom pareho sang bata ni Jefte, makakita ka sing maayo nga mga abyan. Malipay gid ang imo mga ginikanan, kag palanggaon ka man ni Jehova.