Mangin Suod sa Dios

Ginpadunggan Niya Kita sing Kahilwayan sa Pagpili

2 HARI 18:1-7

ANG mga ginikanan dapat mangin maayo nga halimbawa sa ila kabataan. Makabulig ini sa isa ka bata nga makatuon sing maayo nga mga batasan kag makahimo sing husto nga mga desisyon. Pero, madamo nga ginikanan ang indi maayo nga halimbawa sa ila kabataan. Wala na bala sing maayo nga buas-damlag ini nga mga kabataan? Ang sabat ara sa masaligan gid nga kamatuoran—ang kada isa sa aton ginpadunggan ni Jehova nga Dios paagi sa paghatag sa aton sing kahilwayan sa pagpili. Binagbinaga ang natabo kay Ezequias, nga mabasa sa 2 Hari 18:1-7.

Si Ezequias “anak ni Acaz (Ahaz), nga hari sang Juda.” (Bersikulo 1) Gintudluan ni Ahaz ang iya mga sakop sing butig nga pagsimba. Ginsimba sining malain nga hari si Baal, kag bahin sang ila pagsimba ang paghalad sang tawo. Ginhalad pa gani niya ang mga utod ni Ezequias. Ginpasira niya ang templo kag “naghimo sia nga sa iya sing mga halaran sa tagsa ka pamusod sang Jerusalem.” ‘Ginpaakig niya ang GINOO.’ (2 Cronica 28:3, 24, 25) Maathag nga malain gid ang amay ni Ezequias. Pero, mangin malain man bala si Ezequias?

Sang maghari na si Ezequias, ginpakita niya nga wala sia magpaimpluwensia sa malain nga halimbawa sang iya amay. Padayon nga “ginhimo niya ang matarung sa mga mata sang GINOO.” (Bersikulo 3) Nagsalig sia kay Jehova nga Dios, kag “walay kaangay sa iya sa tunga sang tanan nga hari sang Juda.” (Bersikulo 5) Sa una nga tuig sang iya paghari, gindula sining pamatan-on nga hari ang butig nga pagsimba kag ginpanguha ang mataas nga mga lugar diin ginasimba ang mga idolo. Ginbuksan liwat ang templo, kag ginbalik ang matuod nga pagsimba. (Bersikulo 4; 2 Cronica 29:1-3, 27-31) Si Ezequias ‘nagtapik sa GINOO . . . , kag ang GINOO kaupud niya.’—Bersikulo 6, 7.

Ano ang ginhimo ni Ezequias para indi sia magpareho sa iya malain nga amay? Diutay lang ang impormasyon parte sa iya iloy nga si Abia (Abias), pero posible ayhan nga daku ang iya impluwensia sa iya bata? Ang maayo ayhan nga halimbawa ni Isaias nga nangin propeta antes matawo si Ezequias nakaimpluwensia sa sining pamatan-on nga prinsipe? * Wala sing ginsiling ang Biblia. Pero isa ka butang ang sigurado: Ginpili ni Ezequias nga indi pag-ilugon ang iya amay.

Si Ezequias isa gid ka halimbawa sa mga kabataan nga nagdaku sa indi maayo nga mga ginikanan. Indi na mabag-o ang nagligad, kag indi na mapanas ang masakit nga mga inagihan. Pero indi buot silingon nga wala na kita sing mahimo. Makahimo kita sing mga desisyon nga makahatag sa aton sing malipayon nga palaabuton. Pareho ni Ezequias, makapili kita nga higugmaon kag simbahon ang matuod nga Dios nga si Jehova. Magaresulta ini sing malipayon nga kabuhi subong kag wala sing katapusan nga kabuhi sa bag-ong kalibutan sang Dios. (2 Pedro 3:13; Bugna 21:3, 4) Dapat gid kita magpasalamat sa aton mahigugmaon nga Dios bangod ginpadunggan niya kita sing isa ka malahalon nga regalo—ang kahilwayan sa pagpili.

[Nota]