Ang Biblia Nagapabag-o sang Kabuhi

Paano nauntat sang isa ka nagasolo nga iloy sa Rusya ang iya pagkaadik sa droga kag paano sia nangin maayo nga iloy sa iya kabataan? Paano nakatipon sing kaisog ang isa ka tawo nga nagaistar sa dalan sa Kyoto, Japan, nga untatan ang iya bisyo nga nagresulta sa iya kapigaduhon? Ano ang nakabulig sa isa ka cowboy nga taga-Australia nga untatan ang pagpahubog? Tan-awa kon ano ang ila masiling.

“Natun-an ko nga may obligasyon ako nga saguron ang akon kaugalingon.”—NELLY BAYMATOVA

EDAD: 45

PUNGSOD: RUSYA

KABUHI SANG UNA: ADIK SA DROGA

ANG AKON NAGLIGAD: Nagdaku ako sa Vladikavkaz, ang kapital sang Republika sang North Ossetia (Alania na karon). May kuarta ang amon pamilya. Pero bisan pa manggaranon kami, indi ako malipayon. Sa edad nga 34, kaduha na ako namana kag kaduha man nagbulag. Napulo ka tuig nga naadik ako sa droga kag duha ka beses nga ginparehab. Duha ang akon bata pero indi ko sila amo sina ka palangga sang una; indi man kami mayuhay sang akon mga abyan kag pamilya.

Nangin Saksi ni Jehova ang akon iloy, kag pirme ko sia mabatian nga nagahibi kag nagapangamuyo kay Jehova nga buligan ako. Sa pensar ko: ‘Wala gid bala ‘gapamensar ang iloy ko mo! Paano ako abi buligan ni Jehova?’ Gintinguhaan ko nga untatan ang droga. Pero daw indi gid ako ‘kasarang. Isa ka bes, wala ako makadroga sa sulod sang duha ka adlaw. Gulpi ko lang napensaran nga maggua sa balay. Gani naglumpat ako sa bintana. Ang malain lang kay ara ako sa second floor. Nabali ang akon butkon, tiil, pati ang akon likod. Sobra isa ka bulan nga wala ako nakabangon.

Samtang nagapaayo ako, si Nanay ang nagabantay sa akon pero wala gid niya ako ginbasol. Naintiendihan niya nga wala ako sa husto nga pamensaron kag indi ko makontrol ang akon hunahuna kag balatyagon. Ginabilinan niya ako sing pila ka magasin nga Magmata! * sa akon higdaan. Ginabasa ko ini tanan kag nanamian gid ako kay madamo ako sing natun-an. Sang ulihi, nagtuon ako sa Biblia upod sa mga Saksi.

KON PAANO GINBAG-O SANG BIBLIA ANG AKON KABUHI: Ang isa sa mga natun-an ko sa Biblia amo nga mangin responsable. Sa baylo nga magpasagod lang kay Nanay, natun-an ko nga may obligasyon ako nga saguron ang akon kaugalingon kag ang akon kabataan. Bangod naanad ako nga nagasalig lang sa akon iloy, sang primero nabudlayan ako mangita sing permanente nga obra.

 Nakabulig sa akon ang Deuteronomio 6:5-7. Nagalaygay ini sa mga ginikanan nga tudluan ang ila mga kabataan parte sa Dios. Narealisar ko nga salabton ko sa Dios kon paano ko padakuon ang akon duha ka bata. Bangod sini napalig-on ako nga palanggaon sila kag hatagan sing tion.

Daku gid ang pasalamat ko kay Jehova nga natun-an ko ang kamatuoran parte sa iya. Gani, gindedikar ko ang akon kabuhi sa iya kag nagpabawtismo subong isa ka Saksi ni Jehova.

MGA BENEPISYO: Sang una grabe ako mangakig. Pero sang matun-an ko ini nga kontrolon, nag-ayuhay kami ni Nanay. Nangin maayo man ang relasyon ko sa akon kabataan.

Bangod ginbayaan ko ang di-diosnon nga mga butang, madamo sa mga problema nga resulta sang akon bisyo ang nadula na. Malipayon ako karon nga nagabulig sa iban nga matun-an ang kamatuoran parte sa aton mahigugmaon nga Dios nga si Jehova.

“Pamatyag ko, nasalbar gid ang akon kabuhi.”—MINORU TAKEDA

EDAD: 54

PUNGSOD: JAPAN

KABUHI SANG UNA: NAGAISTAR SA DALAN

ANG AKON NAGLIGAD: Nagdaku ako sa siudad sang Yamaguchi upod sa akon tatay kag lola. Wala ko na makilala si Nanay. Sang 19 anyos ako, napatay si Lola kag kami na lang ni Tatay ang nangabuhi. Manugluto ako kag amo man si Tatay. Ang iskedyul sang amon obra indi pareho amo nga wala kami pirme nagakitaay. Naanad ako mag-obra sing malawig nga oras kag mag-inom upod sa akon mga amigo.

Sang ulihi, tinak-an ako sa akon obra. Nag-away kami sang akon amo kag sugod sadto nagpalahubog na ako. Sang manug-30 anyos ako, naghalin ako sa balay kag nagkadto sa iban nga lugar. Sang naubos na ang akon kuarta, nag-obra ako sa panchinko parlor (isa ka panahuran). May nakilala ako didto nga babayi kag nagpakasal kami. Pero pagkatapos sang duha ka tuig kag tunga, nagbulagay kami.

Grabe gid sadto ang akon kasubo. Nalubong man ako sa utang. Ginpalagyuhan ko ang akon ginpang-utangan kag nagpauli kay Tatay sa banwa nga gindak-an ko. Pero nagbinutig ako sa iya amo nga naglainay kami sing buot. Ginkuha ko ang iya kuarta kag nagpanahor. Sugod sadto, amo na ini ang akon palangabuhian. Sang ulihi, namigado ako kag nag-istar na lang sa estasyunan sang tren. Nagsaylo ako sa Hakata, dayon sa Himeji, kag sang ulihi sa siudad sang Kyoto. Mga pila man ka tuig nga nag-istar ako sa dalan.

KON PAANO GINBAG-O SANG BIBLIA ANG AKON KABUHI: Sang 1999, may duha ka babayi nga nagpalapit sa akon samtang ara ako sa parke malapit sa Kamogawa River sa Kyoto. Ang isa sa ila namangkot, “Gusto mo magtuon sa Biblia?” Nagpasugot ako. Gintun-an ako sang  hamtong nga mga Cristiano sa kongregasyon sang mga Saksi ni Jehova kag ginbuligan nila ako nga maintiendihan kon ngaa importante nga sundon ang mga prinsipio sini. Ginsilingan nila ako nga mangita sing trabaho kag ilistaran. Ginsunod ko sila. Nangita ako sing obra pero sang primero daw wala ko ini ginserioso. Sang ulihi, ginpangamuyo ko ini kag nagtinguha gid nga makakita sing obra, kag nakakita gid man ako.

Ang pangamuyo nakabulig gid sa akon sang ara ako sa mabudlay nga sitwasyon. Natultulan ako sang mga gin-utangan ko kag ginpilit nga magbayad. Gani namroblema gid ako. Sa akon iskedyul sa pagbasa sang Biblia, nabasahan ko ang Isaias 41:10. Sa sina nga teksto, ginpromisahan sang Dios ang iya matutom nga mga alagad: “Buligan ko ikaw.” Ina nga promisa nagpalig-on kag nagpabakod sa akon. Nangin mapisan ako kag sang ulihi, nabayaran ko gid man ang akon mga utang. Sang tuig 2000, gin-aprobahan ako nga magpabawtismo subong isa ka Saksi ni Jehova.

MGA BENEPISYO: Bangod sa akon mga natun-an sa Biblia nangayo ako sing pasaylo kay Tatay kag ginpatawad niya ako. Nalipay gid sia nga ginasunod ko ang mga prinsipio nga akon natun-an sa Biblia. Pamatyag ko, nasalbar gid ang akon kabuhi bangod sini.

Dugang pa, masuportahan ko na ang akon kaugalingon. (Efeso 4:28; 2 Tesalonica 3:12) Nakakita man ako sing matuod nga mga abyan sa sulod sang Cristianong kongregasyon. (Marcos 10:29, 30) Nagapasalamat gid ako kay Jehova sa tanan niya nga gintudlo sa akon.

“Indi mahapos para sa akon nga maghimo sing pila ka pagbag-o.”—DAVID HUDSON

EDAD: 72

PUNGSOD: AUSTRALIA

KABUHI SANG UNA: PALAHUBOG

ANG AKON NAGLIGAD: Ika-11 ako nga bata nanday Willie kag Lucy. Nagaistar kami sa komunidad sang mga tumandok nga ginatawag Aurukun. Ari ini sa malayo nga bahin sa naaminhan sang Queensland. Ang Aurukun ara nayon sa pangpang sang Archer River kag malapit sa dagat. Gintudluan kami sang amon mga ginikanan nga mangayam kag mangisda. Sadto nga tion, kami nga mga tumandok sang Australia, nga ginatawag Aborigine, ginpaistar sang gobierno sa isa lang ka lugar kag wala kami ginapauyat sang kuarta.

Ginpadaku kami sang amon mga ginikanan nga maayo kag mabuot nga kabataan. Gintudluan man kami nga mangin matinahuron sa mga tigulang kag maalwan. Bangod sini, ginakabig namon ang tanan nga tigulang nga amon mga nanay kag tatay ukon tiyo kag tiya.

Napatay si Tatay sang pito ako ka tuig kag  nagsaylo kami sa komunidad sang mga Aborigine sa Mapoon. Mga 150 kilometros ini sa aminhan sang Aurukun. Sang 12 anyos ako, nagbantay ako sing mga kabayo kag baka. Amo ini ang akon obra asta sang manug-50 na ako. Nakaobra ako sa madamo nga rantsuhan subong bakero ukon cowboy. Mabudlay ang kabuhi didto. Pirme ako nagapahubog. Bangod sini madamo ako sing problema.

Isa ka bes, grabe ako kahubog. Sang naggua ako sa hotel, nabungguan ako sang nagasibad nga salakyan. Duha ka tuig ako nga nagparehab kag nagpaterapy. Sugod sadto, indi na ako makabakero.

KON PAANO GINBAG-O SANG BIBLIA ANG AKON KABUHI: Sang ginarehab ako, gindal-an ako sang akon abyan nga babayi sing magasin nga Lalantawan kag Magmata! Pero bangod wala ako gawa nakaeskwela, mahinay ako magbasa. Isa ka bes, ginkadtuan ako sang 83 anyos nga lalaki bisan nagatagiti ang init. Ginpasulod ko sia sa balay kag ginpainom sang mabugnaw nga tubig. Ginhatagan niya ako sing mga balasahon halin sa Biblia kag ginpamangkot kon puede sia makabalik kag ipaathag ini sa akon. Sang ulihi, regular na kami nga nagatuon sa Biblia. Narealisar ko nga dapat ko bag-uhon ang akon personalidad kag pagkabuhi para mapahamut-an ang Dios.

Indi mahapos para sa akon nga maghimo sing pila ka pagbag-o. Bangod sa mga gintudlo sa akon ni Nanay, ginarespeto ko gid ang tigulang nga nagatuon sa akon sa Biblia kag ang mga ginatudlo niya sa akon. Pero, nagaduhaduha gihapon ako nga magdedikar sa Dios. Gusto ko nga mahibaluan anay ang tanan nga nasulat sa Biblia.

Sang ulihi, ginbuligan ako sang isa ko ka upod sa obra nga tadlungon ining sala nga panghunahuna. Isa sia sa mga Saksi ni Jehova. Ginbasa niya sa akon ang Colosas 1:9, 10. Nagasiling ini nga dapat padayon kita nga “nagalambo sa sibu nga ihibalo tuhoy sa Dios.” Ginpaathag niya sa akon nga may mga bag-o pirme nga butang ako nga matun-an. Gani, indi kinahanglan nga mabal-an ko gid ang tanan para makaalagad sa Dios.

Nanamian pa gid ako sang nagpakig-upod na ako sa mga Saksi ni Jehova. Nakita ko nga bisan lainlain ang ila estado sa kabuhi, tanan sila nahiusa sa pagsimba sa Dios. Nagkumbinsi gid ini sa akon nga amo ini ang matuod nga relihion. Gani sang 1985, nagpabawtismo ako subong isa sa mga Saksi ni Jehova.

MGA BENEPISYO: Mas madasig na ako subong magbasa. Kag kada semana, inoras ako nga nagabulig sa iban sa pagtuon kag pagbasa sa Biblia. Ang babayi nga nagdala anay sa akon sing Lalantawan kag Magmata! nagtuon man sa mga Saksi, nagpabawtismo, kag amo na subong ang akon pinalangga nga asawa. Subong, nalipay gid kami nga duha sa pagbulig sa mga Aborigine nga makilala si Jehova nga Dios.

[Nota]

[Blurb sa pahina 21]

Nalipay gid kami sang akon asawa sa pagbulig sa mga Aborigine nga makilala ang Dios