Dapat Mo Bala Selebrahon ang Sabbath?

SANG ulihi nga bahin sang dekada 80, ginkontrol sang gamay nga grupo sang mga Metodista ang Suva, ang kapital nga siudad sang Fiji. Nagbutang ang mga lalaki, babayi, kag kabataan sing 70 ka barikada, kag tanan sila nakabayo sing pangsimba. Ginpauntat nila ang pagbiyahe sang depasahero nga mga salakyan, pati na ang tanan nga eroplano. Ngaa? Gusto nila nga selebrahon liwat sang bilog nga pungsod ang Adlaw nga Inugpahuway ukon Sabbath.

Sugod sang 2001, ang tanan nga bilding nga ipatindog sa Israel dapat may isa ka elebeytor nga awtomatik nga nagadulog sa kada floor. Ngaa? Para ang mga debotado nga mga Judiyo nga nagaselebrar sang Sabbath halin sa Biernes sang gab-i asta sa Sabado sang gab-i, indi na kinahanglan nga magtum-ok sa mga pilindutan sa elebeytor. Kay bisan ang pagtum-ok lang sini, ginakabig nila nga obra.

Sa Tonga, isa ka pungsod sa South Pacific, ginadumilian ang bisan ano nga sahi sang obra kon Domingo. Indi man puede maglanding ang mga eroplano ukon magdungka ang mga barko. Kag inbalido ang tanan nga kontrata nga ginpirmahan sina nga adlaw. Ginapatuman sang ila konstitusyon nga himuon nga “balaan nga adlaw” ang Domingo. Ang tanan dapat magtuman sini ano man ang ila relihion. Ngaa? Para masiguro nga ang bilog nga pungsod nagaselebrar sang Sabbath.

 Ginapakita sini nga mga halimbawa nga madamo ang nagapati nga gusto gid sang Dios nga selebrahon naton ang Sabbath kada semana. Ang iban gani nagasiling nga importante gid ini para maluwas kita. Ang iban naman nagahunahuna nga amo ini ang pinakaimportante nga sugo sang Dios. Ano ang Sabbath? Mabasa bala sa Biblia nga dapat ini selebrahon sang mga Cristiano kada semana?

Ano ang Sabbath?

Ang Ingles nga tinaga nga “Sabbath” naghalin sa Hebreo nga tinaga nga nagakahulugan “pagpahuway kag pag-untat.” Ang Genesis nagsiling nga nagpahuway si Jehova nga Dios sa pagpanuga sa ikapito nga adlaw. Pero, sang panahon lang ni Moises ginsugo sang Dios nga selebrahon ang 24-oras nga pagpahuway ukon Sabbath. (Genesis 2:2) Sang 1513 B.C.E., sang nakagua na ang mga Israelinhon sa Egipto, gin-amanan sila ni Jehova sing manna sa kamingawan. Ginhatagan man sila sing instruksion: “Sa anum ka adlaw magapamolot kamo sini; apang sa ikapitong adlaw, nga amo ang inugpahuway, wala sini.” (Exodo 16:26) Dayon ginasugiran kita nga “gintuman sang katawhan ang adlaw nga inugpahuway sa ikapito nga adlaw,” halin sa pagtunod sang adlaw sa Biernes pakadto sa pagtunod sang adlaw sa Sabado.—Exodo 16:30, NW.

Wala madugay pagkatapos mahatag ni Jehova ini nga instruksion, ginsugo niya ang mga Israelinhon nga selebrahon ang Sabbath. Ginlakip niya ini sa Napulo ka Sugo nga ginhatag niya kay Moises. (Exodo 19:1) Ang ikap-at sini nga sugo nagasiling: “Dumduma ang adlaw nga inugpahuway, sa pagpakabalaan sini. Sa anum ka adlaw magpangabudlay ka, kag maghimo sang tanan mong buluhaton; apang ang ikapitong adlaw isa ka inugpahuway sa GINOO nga imo Dios.” (Exodo 20:8-10) Gani ang Sabbath nangin importante gid nga bahin sa kabuhi sang mga Israelinhon.—Deuteronomio 5:12.

Ginselebrar Bala ni Jesus ang Sabbath?

Huo, ginselebrar ni Jesus ang Sabbath. Ang Biblia nagsiling: “Sang nag-abot na ang katapusan sang ginpat-od nga panag-on, ginpadala sang Dios ang iya Anak, nga natawo sa isa ka babayi kag nagkabuhi sa idalom sang kasuguan.” (Galacia 4:4) Bangod Israelinhon si Jesus, dapat niya tumanon ang Kasuguan, pati na ang Sabbath. Pero sang mapatay sia, ang Kasuguan nga katipan gindula na. (Colosas 2:13, 14) Kon mahibaluan naton kon san-o ini nagkalatabo, maintiendihan  naton ang pagtamod sang Dios sa sini.—Tan-awa ang tsart sa pahina 15.

Matuod, nagsiling si Jesus: “Indi kamo maghunahuna nga nagkari ako sa pagdula sa Kasuguan ukon sa pinamulong sang mga manalagna. Nagkari ako, indi sa pagdula, kundi sa pagtuman.” (Mateo 5:17) Pero ano ang kahulugan sang tinaga nga “pagtuman”? Sa pag-ilustrar: Indi matuman sang isa ka enhinyero ang iya kontrata nga magpatindog sing isa ka bilding kon gision niya ang kontrata. Dapat patindugon niya kag tapuson ang bilding. Pero kon napatindog na niya ang bilding kag kontento na ang tag-iya, natapos na ang kontrata kag wala na sia sing obligasyon. Sing kaanggid, wala ni Jesus gindula ukon gingisi ang Kasuguan, kundi gintuman niya ini kag gintapos. Sang matapos na ang “kontrata” sang Kasuguan, indi na ini kinahanglan sundon sang katawhan sang Dios.

Dapat Bala Ini Sundon sang mga Cristiano?

Bangod natuman na ni Cristo ang Kasuguan, obligado pa bala ang mga Cristiano nga selebrahon ang Sabbath? Sa bulig sang balaan nga espiritu, si Pablo nagsabat: “Gani wala sing tawo nga maghukom sa inyo sa pagkaon kag sa pag-inom ukon may kaangtanan sa kapiestahan ukon sa pagsaulog sa lati ukon sa adlaw nga inugpahuway; kay ini nga mga butang landong sang mga butang nga magaabot, apang ang katunayan yara kay Cristo.”—Colosas 2:16, 17.

Ginapakita sining mga pinamulong nga may pagbag-o sa mga ginapatuman sang Dios sa iya mga alagad. Ngaa? Kay dapat na sundon sang mga Cristiano ang bag-o nga kasuguan, “ang kasuguan ni Cristo.” (Galacia 6:2) Ang Kasuguan nga katipan sang una, nga ginhatag paagi kay Moises sa mga Israelinhon, natapos na sang mapatay si Jesus. (Roma 10:4; Efeso 2:15) Ang sugo bala nga selebrahon ang Sabbath natapos man? Huo. Sa tapos magsiling si Pablo nga “nahilway na kita sa Kasuguan,” ginpatuhuyan niya dayon ang isa sa Napulo ka Sugo. (Roma 7:6, 7) Gani ang Napulo ka Sugo, pati na ang Sabbath, nalakip sa mga Kasuguan nga natapos na. Amo nga  indi na kinahanglan nga selebrahon sang mga alagad sang Dios ang Sabbath.

Ini nga pagbag-o mahimo iilustrar sa sini nga paagi: Mahimo bag-uhon sang isa ka pungsod ang ila konstitusyon. Kon ipatuman na ining bag-o nga konstitusyon, indi na kinahanglan nga sundon pa sang mga tawo ang daan. Bisan may pila ka kasuguan sa daan nga konstitusyon nga pareho sa bag-o, ang iban sini mahimo nga lain na. Gani dapat nga tun-an sing maayo sang isa ang bag-o nga konstitusyon para mahibaluan niya kon ano nga mga kasuguan ang dapat niya sundon. Siempre, gusto mahibaluan sang isa ka maayo nga pumuluyo kon san-o ginpatuman ang bag-o nga konstitusyon.

Sing kaanggid, ginhatagan ni Jehova nga Dios ang pungsod sang Israel sing sobra sa 600 ka kasuguan, pati na ang 10 ka panguna nga sugo. Nalakip sa sini ang kasuguan parte sa moralidad, paghalad, panglawas, kag Sabbath. Pero, nagsiling si Jesus nga ang iya hinaplas nga mga sumulunod amo ang magahuman sa bag-o nga “pungsod.” (Mateo 21:43) Sugod sang 33 C.E., ini nga pungsod may bag-o na nga “konstitusyon” nga napasad sa duha ka panguna nga kasuguan, ang gugma sa Dios kag sa isigkatawo. (Mateo 22:36-40) Bisan pa ang “kasuguan ni Cristo” nagalakip sang mga sugo nga pareho sa Kasuguan nga ginhatag sa mga Israelinhon, indi kita matingala nga ang iban nga sugo lain gid kag may iban nga indi na dapat sundon. Ang isa sa mga kasuguan nga indi na dapat sundon amo ang sugo nga selebrahon ang Sabbath.

Ginbag-o Bala sang Dios ang Iya mga Talaksan?

Ang pagbag-o halin sa Kasuguan ni Moises pakadto sa kasuguan ni Cristo nagakahulugan bala nga nagbag-o man ang mga talaksan sang Dios? Indi. Subong nga gina-adjust sang mga ginikanan ang ila mga patakaran base sa edad kag kahimtangan sang ila kabataan, gina-adjust man ni Jehova ang mga kasuguan nga ginapatuman niya sa iya katawhan. Ginpaathag ini ni apostol Pablo: “Sang wala pa mag-abot ini nga pagtuo, ginhigtan kita sang Kasugoan subong mga binilanggo tubtob nga napahayag ining palaabuton nga pagtuo. Gani ang Kasugoan amo ang manunudlo naton tubtob sa pag-abot ni Cristo, agod mapakamatarong kita sa atubangan sang Dios paagi sa pagtuo. Karon kay yari na kita sa panahon sang pagtuo, wala na kita sa idalom sang Kasugoan.”—Galacia 3:23-25, MB.

Ano ang koneksion sining ginsiling ni Pablo sa Sabbath? Binagbinaga ini nga ilustrasyon: Kada semana, may adlaw gid nga ginatun-an sang estudyante ang isa ka subject pareho sang woodworking. Pero kon mag-obra na sia, puede niya gamiton ang iya mga natun-an indi lamang sa isa ka adlaw kundi sa bilog gid nga semana. Sing kaanggid, ginapatuman sang Kasuguan nga magtigana ang mga Israelinhon sing isa ka adlaw kada semana para sa pagpahuway kag pagsimba. Pero, ang mga Cristiano ginasugo nga simbahon ang Dios indi lamang sa isa ka adlaw kada semana, kundi adlaw-adlaw.

Malain bala nga itigana ang isa ka adlaw kada semana para sa pagpahuway kag pagsimba? Indi. Suno sa Pulong sang Dios, depende na ini sa kada isa sa aton. Ini nagsiling: “May mga tawo nga nagakabig nga may mga adlaw nga labi pa ka importante sang sa iban nga mga adlaw. Kag may nagakabig man nga ang tanan nga adlaw palareho lang. Ang kada isa maghimo sang iya kaugalingon nga desisyon parte sa sini nga butang.” (Roma 14:5, APD) Bisan pilion sang iban nga himuon ang isa ka adlaw nga balaan, maathag nga ginapakita sang Biblia nga wala ginasugo sang Dios ang mga Cristiano nga selebrahon ang Sabbath kada semana.

[Blurb sa pahina 12]

“Sa anum ka adlaw magapamolot kamo sini; apang sa ikapitong adlaw, nga amo ang inugpahuway, wala sini.”—EXODO 16:26

[Blurb sa pahina 14]

“Ang Kasugoan amo ang manunudlo naton tubtob sa pag-abot ni Cristo, agod mapakamatarong kita sa atubangan sang Dios paagi sa pagtuo. Karon kay yari na kita sa panahon sang pagtuo, wala na kita sa idalom sang Kasugoan.”—GALACIA 3:24-25, MB

[Kahon/Diagram sa pahina 13]

Ang International Date Line kag ang Sabbath

May mga nagapati nga dapat selebrahon ang Sabbath sing dulungan kada semana sa bilog nga kalibutan. Pero, problema gid nila ang international date line. Ang date line isa ka imaginary nga linya nga amo ang ginabasihan sa pagsugod sang bag-o nga adlaw. Nagaagi ini sa Pacific Ocean sa 180 meridian. Ang mga pungsod sa katundan sang date line abanse sing isa ka adlaw sa mga pungsod sa sidlangan.

Halimbawa, kon Domingo sa Fiji kag sa Tonga, Sabado naman sa Samoa kag sa Niue. Gani, kon ang isa ka taga-Fiji nagaselebrar sang Sabbath kon Sabado, nagaobra naman ang iban nga miembro sang ila relihion sa Samoa, nga mga 1,145 kilometros lang ang kalayuon. Ngaa? Kay Biernes didto.

Ginaselebrar sang mga Seventh-Day Adventist sa Tonga ang Sabbath kon Domingo kay gusto nila nga magdungan sa ila mga miembro sa Samoa nga mga 850 kilometros ang kalayuon. Pero sa amo man nga adlaw, ang mga Seventh-Day Adventist sa Fiji nga mga 800 kilometros lang ang kalayuon, wala nagaselebrar sini kay Domingo sa ila. Ginaselebrar nila ang Sabbath kon Sabado!

[Diagram]

(Para sa aktual nga pormat, tan-awa ang publikasyon)

\

\

\

\ SAMOA

\

— ― ― ― ― ― ― ―

FIJI \

Domingo\ Sabado

\

\

TONGA \

\

\

\

 [Tsart sa pahina 15]

(Para sa aktual nga pormat, tan-awa ang publikasyon)

Mga Butang nga Dapat Dumdumon Parte sa Sabbath:

Bisan pa may teksto sa Biblia nga nagasiling nga dapat selebrahon ang Sabbath kada semana, dapat naton hibaluon kon san-o ginhatag ini nga sugo.

4026 B.C.E. ANTES SANG PANAHON NI MOISES

GINTUGA SI ADAN Wala ginsugo nga selebrahon ang Sabbath

antes sang panahon ni Moises kag sang mga

Israelinhon.—Deuteronomio 5:1-3, 12-14.

1513 B.C.E. KASUGUAN SANG DIOS SA ISRAEL

GINHATAG ANG SUGO SA ISRAEL Ang sugo nga selebrahon ang Sabbath

wala ginhatag sa iban nga pungsod. (Salmo

147:19, 20) Ginhatag ini nga sugo subong

“tanda” sa tunga ni Jehova kag sang mga

Israelinhon.—Exodo 31:16, 17.

Ang pagselebrar sing Sabbath kada semana,

isa lang sa madamo nga sabbath nga ginsugo

sa mga Israelinhon nga selebrahon.—Levitico

16:29-31; 23:4-8; 25:4, 11; Numeros 28:26.

33 C.E. KASUGUAN NI CRISTO

NATAPOS NA ANG SUGO NGA Sang 49 C.E., gindesisyunan sang mga

GINHATAG SA ISRAEL apostoles kag sang tigulang nga mga lalaki

sa Jerusalem kon ano gid ang ginapatuman

sang Dios sa mga Cristiano. Wala nila

ginsambit nga dapat selebrahon ang Sabbath

kada semana.—Binuhatan 15:28, 29.

Nabalaka si apostol Pablo sa mga

Cristiano nga nagasaulog pa sang pinasahi

nga mga adlaw.—Galacia 4:9-11.

2010 C.E.

[Retrato sa pahina 11]

Makita sa mga newspaper ang mga barikada nga ginbutang sang grupo sang mga Metodista. Gusto nila nga selebrahon liwat sang mga taga-Fiji ang Sabbath

[Credit Line]

Courtesy of the Fiji Times