Maguba Gid Man Bala ang Duta?

“NANAMIAN pirme maglantaw ang mga tawo sang pelikula parte sa pagkaguba sang kalibutan,” siling sang isa ka kolumnista nga si John Scalzi. Ngaa? “Kay amo ini ang aton ginakahadlukan,” siling niya. May rason bala kita nga mahadlok nga maguba ang duta kag mapatay ang tanan nga kabuhi sa sini?

Halos adlaw-adlaw may mabatian kita nga mga kalamidad nga grabe gid ang halit sa bilog nga kalibutan. Sulitsulit ini nga ginapagua sa TV kag sa Internet amo nga nagadugang ang aton kahadlok. Kon pirme naton ini makita, daw mapati na gid kita nga maguba ang kalibutan.

Nadugangan pa gid ang aton kahadlok kay may mga teoriya ang mga scientist kon paano maguba ang duta. Ang iban gani nagsiling nga may expiration date ang duta. Sang Marso 2008, ang Monthly Notices of the Royal Astronomical Society nagreport nga ginbulubanta sang duha ka astronomo nga pagkatapos sang 7.59 bilyon ka tuig, tunawon sang adlaw ang aton planeta.

Maguba gid man bala ang aton duta?

May “Expiration Date” Bala ang Aton Planeta?

Ang Biblia nagapasalig sa aton: “Ang isa ka kaliwatan nagataliwan, kag ang isa pa ka kaliwatan nagaabut, apang ang duta nagapabilin sa gihapon.” (Manugwali 1:4) Si Jehova ang “nagpasad sang mga sadsaran sang duta” kag gindesinyo niya ini nga “indi mationg sa gihapon.” (Salmo 104:5) Mapatihan bala ini? Ngaa dapat ka magpati nga indi maguba ang aton duta bisan pa amo sini ang ginasiling sang mga scientist?

Halimbawa, natalupangdan mo bala nga ang pila ka produkto sa balaligyaan may expiration date? Sin-o ang nagbutang sini? Ginbulubanta lang bala ini sang manedyer sina nga balaligyaan? Siempre, indi! Ang naghimo sini nga produkto amo mismo ang nagbutang sang expiration date. Makasalig kita nga husto ang petsa nga ginbutang niya kay sia ang mas nakahibalo sang iya produkto. Kon masaligan naton sia, mas masaligan pa gid naton ang Manughimo sang aton planeta! Ang iya Pulong maathag nga nagsiling nga ‘ginpahamtang niya sing malig-on ang kalibutan!’ Ang aton duta wala gid sing expiration date.—Salmo 119:90, APD.

Pero, posible bala nga gub-on sang iresponsable nga mga tawo ang duta kag indi na gid ini makay-o pa? Indi gid! Si Jehova indi pareho sang mga manughimo sing produkto kay “mahimo [niya] ang bisan ano nga butang.” (Job 42:2, APD) Amo nga ginapasalig gid niya kita: “Manginsubong sini ang akon polong nga nagagowa sa akon baba . . . magauswag [ukon matuman] ini.” (Isaias 55:11) Makasiguro gid kita nga indi pagtugutan sang “aton Magbubuhat” nga maupangan sang bisan ano ang iya katuyuan para sa duta. (Salmo 95:6) Ano ang iya katuyuan kag paano niya ini himuon?

Tumanon sang Ginharian sang Dios ang Iya Katuyuan

Magluwas nga nagpasalig ang Dios nga ang duta indi maguba, ang iya Pulong nagsiling nga ‘ginhimo niya ini agod puy-an.’ (Isaias 45:18) Bisan pa linibo na ka tuig nga ginaistaran ang aton duta, wala pa gihapon matuman ang katuyuan sang Dios.

Si Jehova “malipayon nga Dios” kag “nagahigugma sang katarungan.” (1 Timoteo 1:11; Salmo 37:28) Katuyuan gid niya nga ang tanan  nga tawo mabuhi sing malipayon nga wala sing inhustisya. Para matuman ini, nagpromisa ang Dios nga magahimo sia sing isa ka Ginharian sa langit nga amo ang magagahom sa bug-os nga duta. (Daniel 2:44) Sang ari si Jesus sa duta, pirme niya ginasugid sa iban ini nga Ginharian. Ginpalig-on niya ang iya mga disipulo nga ipangamuyo ini kay nahibaluan niya nga paagi sa sini nga Ginharian, pakamaayuhon sang Dios ang bilog nga duta. (Mateo 6:9, 10; 24:14) Ano ang pila sang mga pagpakamaayo sini?

▪ May kalinong na kag seguridad kay nagpromisa ang Dios nga dulaon niya ang tanan nga inaway.—Salmo 46:9.

▪ May madamo na nga pagkaon para sa tanan.—Salmo 72:16.

▪ Wala na sing balatian kay “ang pumuluyo indi magsiling, ‘Nagamasakit ako.’”—Isaias 33:24.

▪ Wala na sing may magakasubo kay “wala na sing kamatayon.”—Bugna 21:4.

▪ Nagpromisa ang Dios nga ang iya katawhan magapatindog sang ila balay, magakabuhi nga may seguridad, kag ‘magakinasadya sa wala sing katapusan.’—Isaias 65:17-24, APD.

Sigurado gid nga ginahandum mo ining ginasiling sa ibabaw. Gusto gid ni Jehova nga tumanon ang iya mga ginpromisa. (Isaias 9:6, 7) Pero mahimo mamangkot ka: ‘Linibo na ka tuig sugod sang ginsulat ining mga promisa sa Biblia, ngaa wala pa gihapon ini natabo?’

Ang Pagpasensia sang Dios Nagaresulta sa Kaluwasan

“Si Jehova indi mahinay may kaangtanan sa iya saad.” Ginapaathag sang Biblia nga ginapalaba sang Dios ang iya pasensia kay palangga niya kita. Gani ginapalig-on kita nga ‘kabigon naton ang pagpailob [pagpasensia] sang aton Ginuo subong kaluwasan.’ (2 Pedro 3:9, 15) Pero, ngaa dapat magpasensia ang Dios para maluwas kita?

Una, nahibaluan sang Dios nga dapat niya anay ‘laglagon ang mga nagalaglag sang duta,’ para mangin malinong kag malipayon ang matarong nga mga tawo. (Bugna 11:18) Pero, indi gusto ni Jehova nga “malaglag ang bisan sin-o.” Amo nga ginpalaba niya ang iya pasensia para ‘paandaman ang malauton gikan sa iya malaut nga dalanon.’ Ginapaandaman niya sila paagi sa mensahe sang Ginharian nga ginabantala sa bilog nga kalibutan. * (Ezequiel 3:17, 18) Luwason niya kag hatagan sing kabuhi nga walay katapusan sa paraiso sa duta ang tanan nga nagapamati sa iya paandam kag nagasunod sa iya matarong nga mga sugo.

Magpalapit sa Dios Para Maluwas Ka

Ang Biblia may “maayong balita” para sa aton. (Mateo 24:14) Ginapasalig kita sini nga ang aton duta indi gid maguba kag ‘sa diotay pa nga tion, ang malauton wala na.’ Sa ulihi, ang mga matarong “magapanubli sang duta, kag magakalipay sila sa kabuganaan sang paghidait.” (Salmo 37:9-11, 29; Mateo 5:5; Bugna 21:3, 4) Antes pa ini mag-abot, ang Dios padayon kag mapinasensiahon nga nagapanawagan: “Magdangop kamo sa akon, tanan kamo sa bug-os nga kalibutan, agod maluwas kamo.” (Isaias 45:22, APD) Batunon mo bala ini nga panawagan?

Ngaa indi ka magpalapit sa Dios? Ang Biblia nagapalig-on sa aton: “Magsalig ka sa GINOO kag sunda ang iya pamaagi, kag padunggan niya ikaw kay padayon niya ikaw nga paestaron sa duta.” (Salmo 37:34, APD) Malipay ang mga Saksi ni Jehova nga buligan ka nga mahibaluan ang katuyuan sang Dios para sa duta kag masaksihan ang katumanan sini.

[Nota]

[Picture Credit Line sa pahina 22]

NASA photo