Ginapabaloran ni Jehova ang Pagkamapainubuson
Mangin Suod sa Dios
Ginapabaloran ni Jehova ang Pagkamapainubuson
ANG bugal, kahisa, kag ambisyon kinaandan na nga mga batasan sang mga tawo nga luyag magmadinalag-on sa sini nga kalibutan. Pero, ini bala nga mga batasan nagapasuod sa aton sa Dios? Wala. Sa pihak nga bahin, ginapabaloran ni Jehova ang iya mapainubuson nga mga sumilimba. Makita naton ini sa kasaysayan sa Numeros kapitulo 12. Natabo ini sa kahanayakan sang Sinai, pagkatapos mahilway ang mga Israelinhon sa Egipto.
Ang mga magulang ni Moises nga sanday Miriam kag Aaron “nagpamolong batok” sa iya. (Bersikulo 1) Imbes nga istoryahon nila si Moises, nagpamulong sila batok sa iya, mahimo nga ginpakalain pa nila sia sa iban. Bangod si Miriam ang una nga ginsambit, mahimo nga sia ang una nga nagreklamo. Ang una nga rason sang ila pagkumod amo ang pagpangasawa ni Moises sa isa ka Cushanon. Nahisa bala si Miriam nga basi malabawan sia sang isa ka babayi nga indi Israelinhon?
Nagdamo pa gid ang ila rason sa pagreklamo. Pirme nagareklamo sanday Miriam kag Aaron nga nagasiling: “Kay Moises lamang bala nagpamolong ang GINOO sa pagkamatuud? Wala bala sia magpamolong sa aton man?” (Bersikulo 2) Ang ila bala pagkumod nagapakita nga gusto nila ang mas daku nga awtoridad kag kilalahon pa gid?
Suno sa rekord, wala nagsabat si Moises sa ila mga reklamo. Naghipos lang sia kag nagbatas sa ila pagpakalain. Ang iya reaksion nagpamatuod sa paglaragway sang Biblia sa iya subong “tama gid kamapainubuson” nga tawo sa duta. * (Bersikulo 3) Indi na kinahanglan pa nga magpaathag si Moises. Nagapamati si Jehova, kag ginbuligan niya si Moises.
Gintamod ni Jehova ang ila pagkumod kay Moises subong pagkumod sa iya. Kay man, siya ang nagtangdo kay Moises. Sa pagsabdong sa ila, ginpahanumdom sila sang Dios nga may pinasahi sia nga kaangtanan kay Moises: “Sa baba kag baba nagapakighambal ako sa iya.” Ginpamangkot dayon ni Jehova si Miriam kag si Aaron: ‘Niyan ngaa bala wala kamo mahadluk sa paghambal batok kay Moises?’ (Bersikulo 8) Ang ila pagpamatok kay Moises, nagapakita nga nagahambal sila batok sa Dios. Bangod wala sila sing pagtahod, ginsilutan sila sang Dios.
Si Miriam, nga mahimo amo ang nanguna sa pagreklamo, gin-aro. Nangabay gilayon si Aaron kay Moises nga ayuhon sia. Hunahunaa lamang bala, nagadepende karon sa isa nga ginhimuan nila sing malain ang pag-ayo ni Miriam! Mapainubuson nga ginhimo ni Moises ang ginpangabay sa iya. Amo ini ang una nga pagsambit sa kasaysayan nga hanuot nga nangabay si Moises kay Jehova para sa iya utod nga babayi. Nag-ayo si Miriam pero kinahanglan niya batason ang kahuy-anan sa sulod sang pito ka adlaw nga pagkuarentinas.
Ini nga kasaysayan nagabulig sa aton nga mahibaluan ang mga kinaiya nga ginapabaloran kag ginadumtan ni Jehova. Kon luyag naton mangin suod sa Dios, dapat naton dulaon ang mga batasan kaangay sang bugal, kahisa, kag pagkaambisyuso. Palangga ni Jehova ang mga mapainubuson. Nagsaad sia: “Ang mapainubuson magapanubli sang duta, kag magakalipay sila sa kabuganaan sang paghidait.”—Salmo 37:11; Santiago 4:6.
[Nota]
^ par. 4 Ang pagkamapainubuson isa ka mabakod nga kinaiya nga nagabulig sa tawo agod mabatas ang inhustisya nga wala nagabalos.
