Ang Biblia Nagapabag-o sang Kabuhi

Ngaa ang isa ka babayi, nga isa anay ka smuggler sang mga diamante kag nagapangawat sa iya amo, nagbag-o kag nangin masaligan nga trabahador? Ano ang nagbulig sa isa ka babayi nga duha ka beses nga nagtinguha nga manginmatay, nga magbag-o kag makita ang balor sang kabuhi? Paano ang isa ka tawo nga palahubog kag adik nakakuha sing kusog nga untatan ang iya makahalalit nga bisyo? Binagbinaga ang ila mga panaysayon.

MALIP-OT NGA BIOGRAPIYA

NGALAN: MARGARET DEBRUYN

EDAD: 45

PUNGSOD: BOTSWANA

KABUHI SADTO: SMUGGLER KAG KAWATAN

ANG AKON NAGLIGAD: Si Tatay taga-Germany pero nagaistar na sia karon sa South-West Africa (Namibia karon). Si Nanay naman taga-Botswana, sa tribo sang Mangologa. Natawo ako sa Gobabis, Namibia.

Sang dekada 1970, kontrolado katama sang gobierno sang South Africa ang Namibia kag estrikto nila nga ginpatuman ang apartheid nga mga layi sa tanan nga mga banwa kag mga minuro. Bangod indi pareho ang rasa sang akon mga ginikanan, ginpilit sila nga magbulagay. Gani nag-upod kami sang akon mga utod kay Nanay sa Ghansi, Botswana.

Sang 1979, nagsaylo ako sa Lobatse, Botswana, kag nag-istar sa mag-asawa nga nag-atipan sa akon samtang ginatapos ko ang akon pag-eskwela. Sang ulihi, nangin klerk ako sa isa ka talyer. Nagdaku ako nga nagapati nga ang Dios wala nagaulikid sa mga tawo, nga wala sia labot bisan ano ang himuon ko—eksakto man ukon sala—basta mabuhi ko lang ang akon kaugalingon kag ang akon pamilya.

Bangod may mataas ako nga posisyon sa trabaho, ginhingalitan ko ini para mangawat sing mga spare parts sa akon amo. Kada maglabay ang tren sa amon banwa kon gab-i, nagasakay kami sang akon mga kaupdanan kag ginakawat ang bisan ano nga amon makit-an. Nangin smuggler man ako sing diamante, bulawan, kag saway. Nagdroga ako, nangin mapintas, kag nagpadamo sing nobyo.

Dayon sang 1993, nadakpan ako sa pagpangawat amo nga nadulaan ako sing trabaho. Ginbiyaan ako sang akon “mga abyan,” kay nahadlok man sila nga madakpan. Nasakitan gid ako sa ila ginhimo, amo nga nadulaan na ako sing salig sa tanan nga tawo.

KON PAANO GINBAG-O SANG BIBLIA ANG AKON KABUHI: Sang 1994, nakilala ko sanday Tim kag Virginia, duha ka misyonero nga Saksi ni  Jehova. Naistorya nila ako sa akon bag-o nga ginatrabahuan, kag ginbuligan nga makatuon sing Biblia kon tigpalanyaga. Sang ulihi, nabatyagan ko nga masaligan sila, amo nga gintugutan ko sila nga magkadto sa balay agod didto kami magtuon.

Narealisar ko sang ulihi nga kinahanglan ko nga bag-uhon ang akon kabuhi para malipay sa akon ang Dios. Halimbawa, natun-an ko sa 1 Corinto 6:9, 10 nga “wala sing mga makihilawason, . . . ukon mga kawatan, ukon makagod nga mga tawo, ukon mga palahubog, ukon mga nagatamay sa iban, ukon mga manugkilkil nga makapanubli sang ginharian sang Dios.” Amat-amat ko nga gindula ang akon malain nga mga batasan. Wala na ako nagpangawat. Wala na ako nag-upod sa mga miembro sang gang nga mga kaupod ko na halin sang bata pa ako. Dayon, paagi sa kusog nga ginahatag ni Jehova, ginbiyaan ko ang akon mga nobyo.

MGA BENEPISYO: Natun-an ko kon paano makontrol ang akon kaakig kag indi pagsinggitan ang akon mga kabataan kon makasala sila. (Efeso 4:31) Ginatinguhaan ko nga masolbar ang problema sa malinong nga paagi. May maayo ini nga mga resulta kag nag-ayo ang amon pagtinamdanay subong pamilya.

Masaligan na ako sang akon mga abyan, kag bisan sang akon mga kaingod. Nangin isa na ako ka masaligan nga empleyado nga ginatugyanan sing mga suplay kag kuarta. Amo nga masuportahan ko sa pinansial ang akon kaugalingon samtang may daku ako nga tion sa pagbulig sa iban nga tawo nga makatuon sa Biblia. Nagapati gid ako sa ginasiling sang Hulubaton 10:22: “Ang pagpakamaayo sang GINOO nagapamanggad, kag wala sia nagadugang sing kasubo sa sini.”

MALIP-OT NGA BIOGRAPIYA

NGALAN: GLORIA ELIZARRARAS DE CHOPERENA

EDAD: 37

PUNGSOD: MEXICO

KABUHI SADTO: NAGTINGUHA NGA MANGINMATAY

ANG AKON NAGLIGAD: Nagdaku ako sa manggaranon nga lugar sang Naucalpan, Mexico State. Sang bata pa ako, rebelyuso ako katama kag nanamian ako magkadto sa mga party. Nagpanigarilyo na ako sa edad nga 12, nag-inom sing makahulubog nga ilimnon sa edad nga 14, kag nagdroga sa edad nga 16. Pagligad sang pila ka tuig, naglayas ako sa balay. Kalabanan sang akon mga abyan naghalin sa magamo nga pamilya, kag ginmaltratar. Daw wala na sing pulos ang akon kabuhi amo nga duha ka beses ko nga gintinguhaan nga manginmatay.

Sang 19 anyos ako, nagtrabaho ako subong model. Bangod sini, nakaupod ko ang mga pulitiko kag mga artista. Sang ulihi, nagpamana ako kag may mga kabataan kami, apang ako ang nagadesisyon sa amon pamilya. Ginpadayon ko man ang pagpanigarilyo kag pag-inom, kag nanamian ako gihapon sa masako nga sosyal nga pagkabuhi. Pirme ako nagapamuyayaw, kag nanamian ako mag-istorya sing binastos nga mga lahog. Madali ako maakig.

Ang kalabanan nga tawo nga akon ginaupdan pareho man sa akon. Para sa ila, yara na sa akon ang tanan. Apang ang akon kabuhi daw wala gihapon sing pulos, wala sing katuyuan.

KON PAANO GINBAG-O SANG BIBLIA ANG AKON KABUHI: Sang 1998, nagtuon ako sing  Biblia upod sa mga Saksi ni Jehova. Natun-an ko sa Biblia nga may katuyuan gali ang kabuhi. Natun-an ko nga himuon liwat ni Jehova nga Dios ang duta nga mangin Paraiso, nga pagabanhawon niya ang mga patay, kag mahimo ko man ini maeksperiensiahan sa indi madugay.

Natun-an ko man nga ang isa ka paagi nga mapakita ko ang gugma sa Dios amo ang pagtuman sa iya. (1 Juan 5:3) Mabudlay ini himuon sa umpisa bangod wala pa gid ako anay magtuman sa kay bisan sin-o. Apang, narealisar ko sang ulihi nga indi ko gid man magiyahan ang akon kabuhi nga ako lang. (Jeremias 10:23) Nagpangamuyo ako kay Jehova nga giyahan ako. Ginpangabay ko sia nga buligan ako sa pagsunod sa iya mga prinsipio kag sa pagtudlo sa akon mga kabataan nga indi pag-ilugon ang akon kabuhi sadto.

Mabudlay katama para sa akon ini nga mga pagbag-o, apang ginsunod ko ang laygay nga makita sa Efeso 4:22-24: “Ubahon ninyo ang daan nga personalidad nga nahisuno sa inyo paggawi anay . . . kag magsuklob sang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” Para sa akon, agod mabag-o ko ang akon personalidad, kinahanglan nga untatan ko ang makahalalit nga mga bisyo subong sang pagpanigarilyo, kag kinahanglan ko man nga untatan ang paghambal sing binastos nga mga hambal. Nagtinguha ako sing tatlo ka tuig para mahimo ko ini nga mga pagbag-o agod mabawtismuhan subong isa sa mga Saksi ni Jehova.

Magluwas sini, gintungdan ko na sing serioso ang akon responsibilidad subong asawa kag iloy. Ginsunod ko ang laygay sang 1 Pedro 3:1, 2: “Kamo nga mga asawa, magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa, bangod nasaksihan mismo nila ang inyo putli nga paggawi upod ang tudok nga pagtahod.”

MGA BENEPISYO: Nagapasalamat gid ako kay Jehova bangod nahibaluan ko na karon ang balor sang akon kabuhi. Nabatyagan ko ang akon pagbag-o kag mapadaku ko na sing maayo ang akon mga kabataan. Kon kaisa, daw ginakonsiensia ako bangod sang mga ginhimo ko sadto, apang nahibaluan ni Jehova ang akon tagipusuon. (1 Juan 3:19, 20) Kon indi tungod sa mga prinsipio sang Biblia mahimo nga patay na ako karon. Apang ang pagkabuhi sa sini nagahatag karon sa akon sing kalinong.

MALIP-OT NGA BIOGRAPIYA

NGALAN: JAILSON CORREA DE OLIVEIRA

EDAD: 33

PUNGSOD: BRAZIL

KABUHI SADTO: PALAHUBOG KAG ADIK

ANG AKON NAGLIGAD: Natawo ako sa Bagé, isa ka siudad sa Brazil nga may 100,000 ka pumuluyo, kag malapit sa dulunan sang Brazil kag Uruguay. Pagpanguma kag pagsagod sing baka ang panguna nga palangitan-an sa sini nga lugar. Nagdaku ako sa imol nga distrito diin lapnag ang pagpamintas sang mga gang, kag ang mga lamharon diri kinaandan na nga nagaabuso sa ilimnon kag droga.

Sang nag-untat ako sa pag-eskwela, nagsugod ako sa pag-inom, pagsuyop sing marijuana, kag sa pagpamati sing heavy-metal nga mga musika. Wala ako nagapati nga may Dios. Para sa akon, ang tanan nga pag-antos ebidensia nga wala sing Dios.

Gitarista ako kag manugkomposo sang kanta kag ginahimo ko pirme nga inspirasyon ang libro  sa Biblia nga Bugna. Abi ko magabantog ang amon banda pero wala ini magklik. Bangod sini nga kapaslawan, mas naglala ang akon paggamit sang droga. Wala ako mahadlok nga mapatay sa overdose. Tutal madamo sa mga singer nga akon gin-idolo ang napatay sa droga.

Para may ibakal ako pirme sang droga, nagahulam ako sang kuarta kay Lola, nga amo ang nagpadaku sa akon. Nagabinutig ako kada pamangkot niya kon diin ko ginagamit ang kuarta. Naglala pa gid ang akon kahimtangan sang nag-intra ako sa kulto. Nangin interesado ako sa espiritismo, kay ginhunahuna ko nga basi makabulig ini para magnami pa gid ang akon pagkomposo sang mga kanta.

KON PAANO GINBAG-O SANG BIBLIA ANG AKON KABUHI: Sang nagtuon ako sing Biblia kag nagtambong sa mga pagtilipon sang mga Saksi ni Jehova, nagbag-o ang akon disposisyon. Amat-amat ko nga ginhandum ang pagkabuhi nga malipayon. Bangod sining bag-o ko nga handum, gin-utod ko ang akon malaba nga buhok. Ginpalaba ko ini sadto subong tanda sang akon pagrebelde. Dayon, narealisar ko nga agod batunon ako sang Dios kinahanglan ko untatan ang pag-abuso sa alkohol, droga, kag pagpanigarilyo. Kinahanglan ko man islan ang akon ginapamatian nga mga musika.

Sa una ko nga pagtambong sa pagtilipon sang mga Saksi ni Jehova, natalupangdan ko ang bersikulo sa Biblia nga ginadispley sa isa sa mga dingding. Halin ini sa Hulubaton 3:5, 6, (NW) nga nagasiling: “Magsalig ka kay Jehova sa bug-os mo nga tagipusuon kag indi ka magsandig sa imo kaugalingon nga paghangop. Binagbinaga sia sa tanan mo nga dalanon, kag sia mismo ang magatadlong sang imo mga banas.” Ang paghunahuna sini nga bersikulo naghatag sa akon sing pasalig nga buligan ako ni Jehova kon tugutan ko sia nga bag-uhon ang akon kabuhi.

Sa gihapon, ang pagbag-o sang naandan ko na nga kabuhi kag ang pag-untat sa akon mga bisyo mabudlay gid himuon, kay daw pareho ini sa pag-utod sang akon kamot. (Mateo 18:8, 9) Indi ko ini maamat-amat sa pag-untat. Nabatyagan ko nga ini nga pamaagi wala sing epekto sa akon. Gani nagdesisyon ako nga gulpihon ko ang pag-untat sini. Ginalikawan ko man ang mga lugar kag mga tawo nga makatentar sa akon nga magbalik sa daan ko nga pagkabuhi.

Natun-an ko nga mangin malipayon sa akon mga nahimuan kada adlaw, kag wala ko ginasapak ang mga kapaslawan. Nagbatyag ako nga isa gid ka kadungganan nga mangin matinlo sa pisikal, moral, kag espirituwal sa mga mata ni Jehova nga Dios. Nangamuyo ako kay Jehova kag ginbuligan niya ako nga magpadayon kag indi na pagdumdumon ang akon kabuhi sadto. Apang, may mga tion nga nagabalik gihapon ako sa akon bisyo. Kon kaisa ginahambalan ko ang nagatuon sa akon sing Biblia nga padayunon ko lang ang pagtuon bisan pa may hangover ako.

Ang pagtuon sa Biblia sing kamatuoran parte sa Dios—nga nagaulikid sia sa aton sing personal, nga dulaon niya ang butig nga relihion, kag sia karon ang yara sa likod sang bug-os kalibutan nga pagbantala—nagpainteres sa akon. (Mateo 7:21-23; 24:14; 1 Pedro 5:6, 7) Ini nga mga kamatuoran nagkumbinse gid sa akon amo nga nagdesisyon ako sang ulihi nga idedikar sa iya ang akon kabuhi. Gusto ko gid nga pasalamatan sia sa tanan niya nga ginhimo para sa akon.

MGA BENEPISYO: Nabatyagan ko karon nga may direksion na kag balor ang akon kabuhi. (Manugwali 12:13) Sadto pabug-at ako sa akon pamilya, apang karon nagabulig na ako sa ila. Ginsugid ko kay Lola ang maayo nga mga butang nga akon natun-an sa Biblia, kag gindedikar man niya ang iya kabuhi kay Jehova. Amo man sini ang ginhimo sang pila ka miembro sang akon pamilya kag sang isa ko anay ka kaupod sa banda.

Karon may asawa na ako, kag kami nga mag-asawa may daku nga tion sa pagbulig sa iban nga makatuon parte sa Biblia. Madamo gid ako sing pagpakamaayo bangod natun-an ko nga ‘magsalig kay Jehova sing bug-os tagipusuon.’

[Blurb sa pahina 29]

“Amat-amat ko nga ginhandum ang pagkabuhi nga malipayon”