Kritikal nga mga Tion Karon

GINTAGNA sang Biblia nga ang mga katawhan makaeksperiensia sang “makahalanguyos nga mga tion nga mabudlay atubangon.” Ginalaragway ini nga tion subong “katapusan nga mga adlaw.” (2 Timoteo 3:1-5; 2 Pedro 3:3-7) Amo man ini ang dag-on nga ginpatuhuyan ni Jesucristo sang ginsabat niya ang pamangkot sang iya mga disipulo tuhoy sa “katapusan sang sistema sang mga butang.” (Mateo 24:3) Nagakabuhi na bala kita karon sa katapusan nga mga adlaw? Ikaw mismo ang makasabat sini nga pamangkot kon ipaanggid mo ang ginasiling sang mga balita karon sa kon ano ang gintagna sa Biblia.

Gintagna sang Biblia: bug-os kalibutan nga mga inaway​—Lucas 21:10; Bugna 6:4.

Ginasiling sang mga balita karon: “Ang mga nagkalamatay sa inaway sang ika-20 nga siglo nagalabaw sing sobra tatlo ka pilo kon ipaanggid sa tanan nga nagkalamatay sang nagligad nga mga siglo kutob pa sa pagkatawo ni Cristo.”​—Worldwatch Institute.

Gintagna sang Biblia: kakulang sa kalan-on kag balatian​—Lucas 21:11; Bugna 6:5–8.

Ginasiling sang mga balita karon: Sang 2004, ginabulubanta nga mga 863 milyones ka tawo ang kulang sing masustansia nga pagkaon, pito ka milyon ang ginlabaw sini sang 2003.​—United Nations Food and Agriculture Organization.

Mga isa ka bilyon ka tawo ang nagaistar sa mga iskwater; 2.6 ka bilyon ang wala sing kasilyas kag halabuyan sing higko; 1.1 ka bilyon ang wala sing matinlo nga tubig para imnon.​—Worldwatch Institute.

Lima ka gatos ka milyon ka tawo ang may malaria; 40 ka milyon ang may HIV-AIDS; sang 2005,1.6 ka milyon ang napatay sa anus.​—World Health Organization.

Gintagna sang Biblia: ang paglaglag sang duta​—Bugna 11:18.

Ginasiling sang mga balita karon: “Ang pag-abuso sang mga tawo sa duta mahimo magresulta sa pagkapapas sang nagkalainlain nga sahi sang mga sapat kag mga tanom.” “Mga dos-tersia sang ginaaman sang sistema sang ekolohiya sang duta ang nasapwan nga amat-amat nga  nagakaubos sa bug-os nga kalibutan.”​—Millennium Ecosystem Assessment.

“Bangod ginahalitan sang tawo ang Duta, halos guba na ang temperatura sini kag may makamamatay ini nga epekto.”​—NASA, Goddard Institute for Space Studies.

Gintagna sang Biblia: ang pagbantala sang maayong balita sang Ginharian sang Dios sa bug-os nga duta​—Mateo 24:14; Bugna 14:6, 7.

Ginasiling sang mga balita karon: Sang 2007, ang mga Saksi ni Jehova nga may kadamuon nga 6,957,854 naghinguyang sing 1.4 bilyones ka oras sa pagbantala sing maayong balita sang Ginharian sang Dios sa 236 ka kadutaan.​—2008 Tuigan nga Libro Sang mga Saksi ni Jehova.

Subong sang ginpakita, nagtagna ang Biblia nga may rason kita nga mangin positibo walay sapayan sing malain nga mga balita. Ginbantala ni Jesus ang tuhoy sa “maayong balita” sang Ginharian sang Dios. Ano ang Ginharian sang Dios? Ngaa nagahatag ini sa mga katawhan sing paglaum sa palaabuton? Kag paano ka nadalahig sa sini?

[Blurb sa pahina 5]

Gintagna na sa Biblia ang mga kahimtangan sa kalibutan karon