Pamangkot sang Amon Bumalasa

Bug-os Kalibutan Gid Bala ang Anaw sang Adlaw ni Noe?

Ang Anaw sang adlaw ni Noe natabo kapin sa 4,000 ka tuig na ang nagligad. Gani, wala na sing tawo nga nakasaksi sadto nga hitabo ang makasugid sa aton tuhoy sini. Apang, may nasulat nga rekord tuhoy sini nga hitabo. Suno sa sini, ginlapawan sang tubig ang pinakamataas nga bukid sa sina nga tion.

Ang Biblia nagsiling: “Ang anaw kap-atan ka adlaw sa ibabaw sang duta . . . Kag naglambas ang mga tubig sing lakas gid sa ibabaw sang duta sa bagay nga linapawan ang tanan nga mga bukid nga mataas nga yara sa idalum sang bug-os nga langit; napulo kag lima ka maniko [mga 6.5 metros] pa ibabaw ang paglambas sang mga tubig kag linapawan ang mga bukid.”​—Genesis 7:17-20.

Ayhan magaduhaduha ang iban nga ini nga hitabo indi matuod, ukon sugidsugid lang. Apang natabo gid ini! Ang matuod, ginatabunan gihapon sang tubig ang daku nga bahin sang duta. Kay man, dagat ang mga 71 porsiento sang duta. Gani, ang tubig sadto nga baha yara gihapon. Subong man, kon matunaw ang dalagku nga mga yelo sa North Pole kag South Pole, magataas ang nibel sang dagat, kag malapawan ang mga siudad kaangay sang New York kag Tokyo.

Gintun-an sang mga geologo ang porma sang duta sa naaminhan-nakatundan nga Estados Unidos. Nagapati sila nga sang una, natabo sa sini nga lugar ang mga 100 ka grabe nga pagbaha. Ang isa sini nga mga baha nagdalasa sa amo nga lugar sa kabaskugon nga 105 kilometros por ora. Ang kadalumon sini mga 600 metros. Pareho man sa sini ang natukiban sang iban nga mga sientista, amo nga nagapati sila nga posible nga natabo sadto ang bug-os kalibutan nga Anaw.

Para sa mga nagapati nga ang Biblia amo ang Pulong sang Dios, ang bug-os kalibutan nga Anaw indi lang posible, kundi matuod gid nga natabo. Nagsiling si Ginuong Jesus tuhoy sa Dios: “Ang imo pulong kamatuoran.” (Juan 17:17) Si apostol Pablo nagsulat nga kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Timoteo 2:3, 4) Paano matudluan ni apostol Pablo sing kamatuoran ang mga sumulunod ni Jesus kon ang iban nga hitabo nga ginsambit sa Pulong sang Dios indi matuod?

Si Ginuong Jesus nakahibalo nga natabo ang Anaw, kag nakahibalo man sia nga natabo ini sa bug-os nga kalibutan. Sa iya talalupangdon nga tagna, ang mga kahimtangan tuhoy sa iya presensia kag sa katapusan sang sistema sang mga butang ginpaangay niya sa mga kahimtangan sang tion ni Noe. (Mateo 24:37-39) Subong man, si apostol Pedro nagsulat tuhoy sa Anaw sang adlaw ni Noe: “Paagi sini ang kalibutan sadto nalaglag sang gin-anaw ini sang tubig.”​—2 Pedro 3:6.

Kon si Noe kag ang bug-os kalibutan nga Anaw indi matuod, ang mga paandam ni apostol Pedro kag ni Ginuong Jesus sa mga nagakabuhi sa katapusan nga mga adlaw indi mapatihan. Sa baylo nga mangin paandam, mahimo mangduhaduha ang isa ka tawo kon bala matuod ang mga paandam sang Biblia, kag mahimo madula ang iya kahigayunan nga maluwas sa kapipit-an nga labaw pa sa Anaw sang adlaw ni Noe.​—2 Pedro 3:1-7.

Tuhoy sa nagapadayon nga kaluoy sang Dios sa iya katawhan, sia nagsiling: “Subong nga nagsumpa ako nga ang mga tubig ni Noe indi na maglambas sa ibabaw sang duta, sa amo nagsumpa ako nga indi na ako magkasingkal sa imo ukon magsabdong sa imo.” Subong nga natabo gid ang Anaw sang adlaw ni Noe, mapat-od man naton nga ang mahigugmaon nga kaayo sang Dios mabaton sang mga nagasalig sa iya.​—Isaias 54:9.