Ang mabudlay nga mga kahimtangan mahimo makaapektar gid sa aton. Mahimo nga amo na lang ini ang aton ginahunahuna, nagaubos sang aton kusog, kag may epekto sa aton pagtamod sa kabuhi. Si Hari David sang dumaan nga Israel naapektuhan gid sang madamo nga kabudlayan. Paano niya ini gin-atubang? Sa makatalandog nga salmo, si David nagsiling: “Sa akon tingug nagatuaw ako sa GINOO, sa akon tingug nagaampo ako sa GINOO, ginaula ko ang akon yamo sa atubangan niya, ginapakita ko sa atubangan niya ang akon kalisdanan. Sang ginpunaw ang akon espiritu sa sulud nakon, nakilala mo ang akon banas.” Huo, mapainubuson si David nga nangamuyo sa Dios para buligan sia.—Sal. 142:1-3.

Sa isa pa ka salmo, si David nag-amba: “Isa ka butang ang ginpangayo ko sa GINOO, nga pangitaon ko; nga makapuyo ako sa balay sang GINOO sa tanan nga adlaw sang akon kabuhi, sa pagtan-aw sang katahuman [“kaayo,” APD] sang GINOO, kag sa pagpamalandong sa iya templo.” (Sal. 27:4) Indi Levinhon si David, pero handurawa nga nagatindog sia sa gua sang balaan nga luwang malapit sa sentro sang matuod nga pagsimba. Puno gid sang pagpasalamat ang tagipusuon ni David nga gusto niya magtener didto sa nabilin niya nga mga adlaw kag tan-awon ang kaayo ni Jehova.

Ang tinaga nga “katahuman” ukon kaayo naangot sa kinaiya ukon kahimtangan nga “kalahamut-an ukon makalilipay sa hunahuna, balatyagon, ukon igbalatyag.” Pirme gid ginaapresyar ni David ang kahimusan sang Dios sa pagsimba. Gani maayo nga pamangkuton naton ang aton kaugalingon, ‘Nabatyagan ko man bala ang ginbatyag ni David?’

Sa aton tion, ang kahimusan ni Jehova sa pagpalapit sa iya wala nasentro sa literal nga tinukod. Kundi, nagalakip ini sang dakung espirituwal nga templo sang Dios—ang sagrado nga kahimusan sang matuod nga pagsimba. * Kon ‘pamalandungan’ naton ini nga kahimusan, makita man naton ang kaayo ni Jehova.

Binagbinaga ang saway nga halaran para sa halad nga sinunog nga makita sa atubangan sang ganhaan sang tabernakulo. (Ex. 38:1, 2; 40:6) Ang halaran nagarepresentar sa kahanda ni Jehova sa pagbaton sang tawhanon nga kabuhi ni Jesus bilang halad. (Heb. 10:5-10) Hunahunaa kon ano ang kahulugan sini sa aton! Si apostol Pablo nagsulat: “Ginpasag-uli kita sa Dios paagi sa kamatayon sang iya Anak sang kaaway pa kita.” (Roma 5:10) Kon magtuo kita sa ginpaagay nga dugo ni Jesus, matigayon naton ang kahamuot kag pagsalig sang Dios subong iya mga abyan. Gani, maeksperiensiahan naton ang “pagpakig-abyan sang GINOO.”—Sal. 25:14.

Bangod mahimo na ‘mapanas ang aton mga sala,’ maeksperiensiahan naton ang “tion sang kaumpawan gikan kay Jehova.” (Binu. 3:19) Ang aton kahimtangan mapaanggid sa priso nga naghinulsol sa iya mga sala kag naghimo sing daku nga pagbag-o samtang nagahulat sang iya silot. Sang makita ini sang maayo nga hukom, napahulag sia nga panason ang sala sang tawo, kag indi na pagsilutan sang kamatayon. Mahimo nga naumpawan kag nalipay gid ang priso! Kaangay sina nga hukom, pakitaan man ni Jehova sing kaayo ang mga mahinulsulon kag dulaon niya ang silot nga kamatayon.

Ang pila ka aspekto sang matuod nga pagsimba nga nakita ni David sa balay ni Jehova amo ang daku nga pagtilipon sang pareho niya nga mga Israelinhon, pagbasa kag pagpaathag sang Kasuguan sa publiko, pagsunog sang incienso, kag ang sagrado  nga pag-alagad sang mga saserdote kag mga Levinhon. (Ex. 30:34-38; Num. 3:5-8; Deut. 31:9-12) Ini nga mga aspekto sang matuod nga pagsimba sa Israel sang una makita man karon.

Pareho sang una, makita man naton karon kon “daw ano kaayo kag daw ano katahum sang mag-ulutud nga magpuyo sing tingub sa paghiliusa.” (Sal. 133:1) Madamo ang nagadugang sa aton “paghiliutod” sa bilog nga kalibutan. (1 Ped. 2:17) Ang Pulong sang Dios ginabasa kag ginapaathag sa aton mga miting. Paagi sa iya organisasyon, nagaaman si Jehova sing madamo nga programa sa pagtudlo. Madamo man sang naimprinta nga espirituwal nga pagkaon nga magamit naton sing personal ukon sa pangpamilya nga pagsimba. Ang isa ka miembro sang Nagadumala nga Hubon nagsiling: “Paagi sa pagpamalandong sa Pulong ni Jehova, pagdumdom sa mga kahulugan sini, kag pagpangita sing paghantop kag paghangop, napuno ako sing espirituwal nga mga manggad kag kaayawan sa mga tion nga nagabugtaw ako.” Huo, ‘ang ihibalo manginkahamut-an sa aton kalag.’—Hulu. 2:10.

Sa karon, ang kalahamut-an nga pangamuyo sang mga alagad sang Dios nagalab-ot kay Jehova kada adlaw. Para sa iya, ini nga mga pangamuyo kaangay sang mahumot nga incienso. (Sal. 141:2) Nahamuot gid ang aton kalag kay nahibaluan naton nga nalipay si Jehova kon mapainubuson kita nga magpalapit sa iya paagi sa pangamuyo!

Si Moises nangamuyo: “Ang kahamuut sang GINOO nga amon Dios manginsa amon, kag lig-onon mo sa amon ang buhat sang amon mga kamut.” (Sal. 90:17) Kon makugi kita sa pagministeryo, pakamaayuhon gid ni Jehova ang aton hilikuton. (Hulu. 10:22) Mahimo nga may nabuligan kita nga makatuon sing kamatuoran. Ayhan tinuig na kita nga nagabatas sa ministeryo bisan pa wala kita ginasapak, may balatian, may kasakit sa emosyon, ukon ginahingabot. (1 Tes. 2:2) Pero, indi bala nga nakita naton ang kaayo ni Jehova kag narealisar nga ang aton langitnon nga Amay nahamuot gid sa aton mga panikasog?

“Ang GINOO amo ang bahin sang akon panublion kag ang akon tagayan,” amba ni David. “Ikaw nagapadayon sang akon [“palanublion,” NW]. Ang mga latid naholog sa akon sa mga duug nga mahamungayaon.” (Sal. 16:5, 6) Nagapasalamat gid si David sa iya “palanublion,” nga amo ang iya maayo nga kaangtanan kay Jehova kag ang pribilehiyo nga mag-alagad sa iya. Kaangay ni David, mahimo nga nagaantos man kita sang mga kabudlayan, pero madamo kita sang espirituwal nga pagpakamaayo! Gani, kabay nga padayon kita nga magkalipay sa matuod nga pagsimba kag pirme ‘pamalandungan’ ang espirituwal nga templo ni Jehova.