“INDI GID MALIPATAN!” Amo ini ang ginsiling sang madamo parte sa “Creation Drama.” Suno gid ini sa tion kag indi malipatan sang mga nakatan-aw sini. Huo, ang “Creation Drama” naghatag sing daku nga panaksi sa kadayawan ni Jehova wala madugay antes ginhingabot sang rehimen ni Hitler ang Iya katawhan sa Europa. Pero ano ang “Creation Drama”?

Sang 1914, ang ulong talatapan sang katawhan ni Jehova sa Brooklyn, New York, U.S.A., nagpagua sang “Photo-Drama of Creation.” Walo ini ka oras nga produksion sang mga slide, kag sine nga colored kag may tunog. Ang “Photo-Drama” natan-aw sang minilyon sa bug-os nga kalibutan. Ang ginpalip-ot nga bersion—nga “Eureka Drama”—ginpagua man sang 1914. Pero sang katuigan 1920, ang mga slide, film, kag ang mga kagamitan nagdaan na kag nagkalaguba. Pero madamo gihapon ang gusto magtan-aw sang “Photo-Drama.” Halimbawa, ang mga pumuluyo sang Ludwigsburg, Germany, namangkot, “San-o naman ipagua ang ‘Photo-Drama’?” Ano ang himuon para makatan-aw sila?

Para mapasalida liwat ang Drama, sang katuigan 1920 ang mga representante sang pamilya Bethel sa Magdeburg, Germany, nagbakal sing mga film sa ahensia sang media sa Paris, Pransia, kag sang mga slide sa mga kompanya sang graphics sa Leipzig kag Dresden. Gintingob ini sa pila ka daan nga mga slide sang “Photo-Drama” nga puede pa magamit.

Si Brother Erich Frost, nga isa ka maayo nga musikero, nagkomposo sang musika para gamiton upod sa mga film kag slide. Ang pila ka ginasaysay sa drama ginkuha sa libro nga Creation. Gani ang ginrebisar nga bersion sang “Photo-Drama” gintawag nga “Creation Drama.”

Ang bag-o nga Drama walo man ka oras pareho sa “Photo-Drama,” kag ginbahinbahin ang pagpagua sini sa sulod sang pila ka gab-i. Ginpresentar sini ang mga detalye parte sa mga adlaw sang pagpanuga, ginrepaso ang Biblikanhon kag sekular nga kasaysayan, kag ginpatalupangod nga ang butig nga relihion nagpaslaw sa katawhan. Ang “Creation Drama” ginpagua sa Austria, Germany, Luxemburg, Switzerland, kag sa mga nagahambal sing German sa iban nga lugar.

Si Erich Frost nagpaathag: “Sa tion sang mga pagpasalida sang Drama, ginpalig-on ko ang akon kaupdanan, ilabi na ang mga ara sa orkestra, nga gamiton namon ang intermisyon para magkadto sa kada raya kag managtag sang aton matahom nga mga libro kag  bukleta sa mga tumalan-aw. Mas madamo kami sing napanagtag nga literatura sa sini nga paagi sangsa pagpamalaybalay.” Nadumduman ni Johannes Rauthe, nga amo ang nag-organisar sang mga pasalida sa Poland kag Czech Republic, nga madamo sa mga tumalan-aw ang naghatag sang ila mga adres para duawon. Ini nga mga adres nakabulig gid para sa madinalag-on nga mga pagduaw liwat.

Sang katuigan 1930, puno ang mga tilipunan kada ipagua ang “Creation Drama,” kag mga Saksi ni Jehova pirme ang ginaistoryahan. Sang 1933, halos isa ka milyon ang nakatan-aw sa mga pasalida nga gin-organisar sang aton sanga talatapan sa Germany. “Para lang makatan-aw sang Drama,” siling ni Käthe Krauss, “sa kada lima ka adlaw, nagalakat kami sing 10 kilometros, nga nagaagi sa kakahuyan kag mga bakulod.” “Ang ‘Creation Drama’ amo ang pundasyon sang akon gugma sa kamatuoran,” siling ni Else Billharz.

Si Alfred Almendinger nagsiling nga sang nakatan-aw ang iya iloy sang Drama, “nalipay gid sia amo nga nagbakal sia sang Biblia kag ginpangita ang tinaga nga ‘purgatoryo.’” Bangod wala niya ini makita sa Biblia, gin-untatan niya ang pagtambong sa ila simbahan kag nagpabawtismo. “Madamo ang nagsulod sa kamatuoran bangod sa ‘Creation Drama,’” siling ni Erich Frost.—3 Juan 1-3.

Samtang nagadamo ang nagatan-aw sang “Creation Drama,” nagadamo man ang nagasakdag sa Nazi sa Europa kag nagatuga sing kagamo. Sugod sang 1933, gindumilian ang mga hilikuton sang mga Saksi sa Germany. Halin sadto kag tubtob sa hingapusan sang ikaduha nga inaway sa bug-os kalibutan sang 1945, grabe ang paghingabot sa mga alagad ni Jehova sa Europa. Ginpriso si Erich Frost sing mga walo ka tuig. Pero nakalampuwas sia kag sang ulihi nag-alagad sa Bethel sa Wiesbaden, Germany. Maayo gid kay ang indi malipatan nga “Creation Drama” nag-abot suno sa tion para pabakuron ang madamo nga Cristiano sa pag-atubang sa mga pagtilaw sang ila pagtuo sa tion sang Bug-os Kalibutan nga Inaway II!—Halin sa amon archive sa Germany.