Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

Paano nangin nagapaandam nga halimbawa si Solomon para sa aton?

Ginpakamaayo kag gingamit sang Dios si Hari Solomon. Apang sang maggahom na sia, ginbiyaan niya ang Dios. Ginpangasawa niya ang pagano nga anak sang Paraon, nagkuha sing madamo nga asawa, kag sang ulihi amat-amat nila sia nga gin-impluwensiahan sa butig nga pagsimba. Dapat gid naton likawan ang amat-amat nga paglambo sing sayop nga mga panimuot ukon mga huyog. (Deut. 7:1-4; 17:17; 1 Hari 11:4-8)—12/15, pahina 10-12.

Ngaa masiling naton nga si Sara isa ka diosnon nga babayi kag maayo nga asawa?

Sang ginsugo sang Dios si Abraham nga maghalin sa Ur, nagakahulugan ini sang pagbiya sa mga abyan kag pamilya pakadto sa indi sigurado nga pangabuhi kag destinasyon. Pero, nagkooperar si Sara, kag nagsalig nga pakamaayuhon sia sang Dios. Ginrespeto niya si Abraham, kag nagpakita sing maayo nga mga kinaiya.—1/1, pahina 8.

Ngaa ginsugo ni Jehova si Abraham nga ihalad ang iya pinalangga nga anak?

Dapat naton dumdumon nga wala gintugutan ni Jehova nga dayunon ni Abraham ang paghalad kay Isaac. Ginapakita sini nga hitabo kon daw ano kadaku ang ginsakripisyo sang Dios sa paghalad sang iya Anak nga si Jesus.—1/1, pahina 23.

Ano ang nagapakita nga sugod sang unang siglo, may yara pirme matuod nga hinaplas nga Cristiano sa duta?

Sa parabola ni Jesus parte sa “mga trigo” kag “mga gamhon,” “ang maayo nga binhi” amo ang “mga anak sang ginharian.” (Mat. 13:24-30, 38) Ang mga gamhon magatubo sa tunga sang mga trigo asta sa pag-ani. Gani, bisan pa indi kita sigurado kon sin-o gid ang yara sa trigo nga klase, pero nakahibalo kita nga may yara pirme nagarepresentar sa ila asta subong.—1/15, pahina 7.

Ano nga mga hitabo ang magadul-ong sa Armagedon?

Ang mga pungsod magapagua sang importante nga deklarasyon sang “Paghidait kag kalig-unan!” (1 Tes. 5:3) Salakayon sang mga gobierno ang butig nga relihion. (Bug. 17:15-18) Salakayon ang matuod nga mga sumilimba. Dayon magaabot ang katapusan.—2/1, pahina 9.

Paano naton makontrol ang kahisa?

Makabulig ang masunod nga mga tikang: Palambua ang gugma kag utudnon nga pagpalangga, makig-upod sa diosnon nga mga tawo, tinguhai nga maghimo sing maayo, kag ‘magkasadya upod sa mga nagakasadya.’ (Roma 12:15)—2/15, pahina 16-17.

Sin-o ang nagahambal sang Nahuatl nga lenguahe, kag ano ang ginhimo para sa ila?

Amo ini ang lenguahe sang mga Aztec sadto kag ginagamit gihapon sang mga 1.5 ka milyon ka tumandok sa Mexico. Ang mga Saksi nagawali sa tanan nga nagahambal sang Nahuatl kag pila man sa aton mga literatura ang mabasa sa sini nga lenguahe.—3/1, pahina 13-14.

Kon nagalaygay, ano nga mga prinsipio ang dapat mo dumdumon?

Hantupa ang matuod nga sitwasyon. Likawi ang padasudaso nga sabat. Mangin mapainubuson kag iaplikar ang Pulong sang Dios. Kon posible, gamita ang mga publikasyon. Likawi ang pagdesisyon para sa iban.—3/15, pahina 7-9.

Ginsugo ni Jesus ang iya mga tagpalamati nga mag-upod sing duha ka kilometro. (Mat. 5:41) Ano ang iya ginapahangop?

Sa Israel sadto, mahimo piliton sang nagagahom nga mga Romano nga paobrahon ang isa ka tawo. Sang ginsilingan ni Jesus ang iya mga tagpalamati nga mag-upod sing duha ka kilometro, ginapahangop niya nga tumanon sing halog sa tagipusuon ang ginapatuman sang mga awtoridad.—4/1, pahina 9.