Pamatud-i nga Handa Ka!
Pamatud-i nga Handa Ka!
“Pamatud-i man ninyo nga handa kamo, bangod sa oras nga wala ninyo ginahunahuna, magaabot ang Anak sang tawo.”—MAT. 24:44.
1, 2. (a) Anong hitabo nga gintagna sa Biblia ang mapaanggid sa pag-atake sang isa ka tigre? (b) Ano ang epekto sa imo sang nagapakari nga pag-atake?
TINUIG na nga ginalingaw sining bantog nga trainer ang iya mga tumalan-aw paagi sa pagpasundayag upod sa iya anta nga mga tigre. Nagsiling sia: “Daw nabaton mo ang pinakamatahom nga regalo sa bilog nga kalibutan kon makuha mo ang pagsalig sang isa ka sapat.” Apang sang Oktubre 3, 2003, naguba ina nga pagsalig. Sa wala nahibaluan nga rason, ginsalakay sia sang isa niya ka anta nga sapat, ang iya puti nga tigre nga 172 kilos ang kabug-aton. Ina nga pag-atake wala gid ginapaabot, kag wala nakapangaman ang trainer.
2 Talalupangdon man nga ang Biblia nagtagna tuhoy sa pag-atake sang “mabangis nga sapat,” kag dapat kita mangin handa sa sini. (Basaha ang Bugna 17:15-18.) Sin-o ang atakehon sining mabangis nga sapat? Sa hinali nga pagbag-o sang eksena, ang kalibutan sang Yawa magabahinbahin batok sa iya kaugalingon. Ang duag-eskarlata nga mabangis nga sapat nagarepresentar sa Nasyones Unidas, kag ang “napulo ka sungay” nagarepresentar sa tanan nga pulitikal nga kagamhanan. Magabalikid ini sa makihilawason nga Babilonia nga Daku, ang bug-os kalibutan nga emperyo sang butig nga relihion kag salakayon ini sing masingki. San-o ini mahanabo? Wala kita nakahibalo sang adlaw kag oras. (Mat. 24:36) Ang nahibaluan lang naton nga matabo ini sa oras nga wala naton ginapaabot kag malip-ot na lang ang nabilin nga tion antes sini nga pagsalakay. (Mat. 24:44; 1 Cor. 7:29) Gani, importante gid nga mangin handa kita sa espirituwal agod nga kon mag-abot na ining pag-atake, kag si Cristo magapanghikot na subong Manuglaglag, pamatud-an man niya nga sia ang aton Manluluwas! (Luc. 21:28) Agod mahimo ini, tun-an naton ang halimbawa sang matutom nga mga alagad sang Dios sang una nga nangin handa kag sa amo nakasaksi sang katumanan sang mga saad sang Dios. Ining matuod nga mga eksperiensia makabulig sa aton kon tamdon naton ini sing serioso.
Pamatud-i nga Handa Ka Kaangay ni Noe
3. Ngaa mabudlay gid para kay Noe nga alagdon ang Dios sing matutom?
3 Bisan pa nagalala ang kahimtangan sa duta sang panahon ni Noe, ginpamatud-an niya nga handa sia nga makita ang katumanan sang saad sang Dios. Handurawa ang kabudlayan nga gin-atubang ni Noe sang ang rebelde nga mga anghel nagmateryalisar kag naghulid sa matahom nga mga babayi! Ining di-nagakaigo nga pagpakigsekso nagpatubas sang “gamhanan” nga mga kaliwat nga nagpangdaug-daug sa iban. (Gen. 6:4) Hunahunaa kon ano ayhan nga kagamo ang gintuga sining mga higante sa kada lugar nga ila ginkadtuan. Subong resulta, naglapnag ang kalautan kag naglain ang panghunahuna kag pamatasan sang mga tawo. Gani, ang Soberanong Ginuong Jehova nagpagua sing mando nga laglagon niya inang di-diosnon nga kalibutan.—Basaha ang Genesis 6:3, 5, 11, 12. *
4, 5. Paano magkaanggid ang aton panahon kag ang panahon ni Noe?
4 Gintagna ni Jesus nga ang kahimtangan sang aton panahon mangin kaangay sang panahon ni Noe. (Mat. 24:37) Halimbawa, nasaksihan naton ang impluwensia sang malaut nga mga espiritu. (Bug. 12:7-9, 12) Amo ining mga demonyo nga nagmateryalisar sang panahon ni Noe. Bisan pa sa karon indi na sila makamateryalisar, ginatinguhaan nila gihapon nga impluwensiahan ang mga tawo, bata man ukon tigulang. Wala sing hinalung-ong ang mga tawo nga nagakalipay ang mga demonyo kon maghimo sila sing malaut kag maulag nga mga buhat.—Efe. 6:11, 12.
5 Ginalaragway sang Pulong sang Dios ang Yawa subong “manugpatay” kag “may ikasarang sa pagpahanabo sing kamatayon.” (Juan 8:44; Heb. 2:14) Indi buot silingon sini nga may gahom sia sa pagpatay sa tanan nga luyag niya patyon. Pero, ginapalambo sining mapintas nga espiritu ang pagpangdaya kag pagpanghaylo. Ginapatubo niya sa hunahuna kag tagipusuon sang mga tawo ang handum nga magpatay. Halimbawa, 1 sa kada 142 ka bata nga ginabun-ag sa Estados Unidos ang mangin biktima sang pagpatay. Sa banta mo, pabay-an lang bala ni Jehova ining lapnag nga kasingki? Indi bala sia magpanghikot?
6, 7. Paano ginpakita ni Noe kag sang iya pamilya ang ila pagtuo kag diosnon nga kahadlok?
6 Sang ulihi, ginpahibalo sang Dios kay Noe ang iya desisyon nga laglagon ang tanan nga unod paagi sa anaw. (Gen. 6:13, 17) Ginsugo ni Jehova si Noe nga maghimo sang arka nga korte-kahon. Nian, ginsugdan ni Noe kag sang iya pamilya ang pagtukod sang arka. Ano ang nakabulig sa ila nga tumanon ang Dios kag mangin handa sa pag-abot sang paghukom?
7 Ang ila malig-on nga pagtuo kag diosnon nga kahadlok amo ang nagpahulag kay Noe kag sa iya pamilya nga tumanon ang sugo sang Dios. (Gen. 6:22; Heb. 11:7) Subong ulo sang pamilya, nagpabilin si Noe nga aktibo sa espirituwal kag ginlikawan niya ang malain nga mga buhat sang mga tawo sang iya panahon. (Gen. 6:9) Nahibaluan niya nga kinahanglan sila magbantay batok sa impluwensia sang masingki kag rebelde nga panimuot sang mga tawo sa ila palibot. Indi sila dapat mawili sa ila adlaw-adlaw nga mga hilikuton. Kay ang Dios may hilikuton nga ginapahimo sa ila kag importante gid nga amo ini ang mangin prioridad sang iya bug-os nga pamilya.—Basaha ang Genesis 6:14, 18.
Ginpamatud-an ni Noe kag sang Iya Pamilya nga Handa Sila
8. Ano ang nagapakita nga may diosnon nga debosyon ang pamilya ni Noe?
8 Bisan pa ang kasaysayan sang Biblia nakasentro sa ulo sang pamilya nga si Noe, ang iya asawa, mga anak nga lalaki kag ang ila mga asawa mga sumilimba man ni Jehova. Ini nga impormasyon makita man sa rekord ni manalagna Ezequiel. Nagsiling sia nga kon si Noe nabuhi sa iya panahon, ang kabataan ni Noe indi maluwas base lamang sa pagkamatarong sang ila amay. Yara na sila sa husto nga edad para magdesisyon kon bala tumanon nila ang Dios ukon indi. Gani subong indibiduwal, ginpamatud-an nila ang ila gugma sa Dios kag sa iya mga dalanon. (Ezeq. 14:19, 20) Ginsunod sang pamilya ni Noe ang iya instruksion, gin-ilog ang iya pagtuo, kag wala nila gintugutan ang impluwensia sang iban nga mag-upang sa ila sa pagtuman sa hilikuton nga ginhatag sang Dios.
9. Sin-o ang may pagtuo kaangay ni Noe sa karon?
9 Daw ano ka makalilipay makita nga madamo nga kauturan sa bug-os nga kalibutan nga ulo sang pamilya ang nagahimo sang ila bug-os nga masarangan nga mailog si Noe! Nahangpan nila nga indi lamang pagkaon, panapton, pasilungan, kag edukasyon ang dapat nila iaman. Dapat man nila amanan sang espirituwal nga mga kinahanglanon ang ila pamilya. Sa paghimo sini, ginapamatud-an nila nga handa sila sa pagahimuon ni Jehova sa indi madugay.
10, 11. (a) Ano ayhan ang ginbatyag ni Noe kag sang iya pamilya samtang yara sila sa sulod sang arka? (b) Ano ang mahimo naton ipamangkot sa aton kaugalingon?
10 Mga 50 ka tuig ang ginhinguyang ni Noe kag sang iya pamilya sa pagtukod sang arka. Mahimo nga ginatos ka beses sila nga nagagua-sulod sa arka samtang ginatukod ini. Ginkulapan nila ini nga indi masudlan sang tubig, ginpuno sing pagkaon, kag ginpasudlan sang mga sapat. Handurawa ang masunod nga hitabo. Nag-abot na ang adlaw nga ila ginapaabot. Sang ika-17 nga adlaw sang ikaduha nga bulan sang tuig 2370 B.C.E., nagsulod sila sa arka. Ginsira ni Jehova ang puertahan kag nagsugod ang ulan. Indi ini kinaandan nga pag-ulan. Ang mga tuburan sang tubig kag mga talambuan sang langit nabuksan. Nagbundak ang madamol katama nga ulan kag nagtinagasak sa arka. (Gen. 7:11, 16) Ang mga tawo sa gua nagakalamatay, apang hilway sa katalagman ang mga tawo sa sulod sang arka. Ano ayhan ang ginbatyag sang pamilya ni Noe? Sigurado nga tuman gid ang ila pagpasalamat sa Dios. Mahimo nga nakahunahuna sila, ‘Maayo lang kay naglakat kita upod sa matuod nga Dios kag nangin handa!’ (Gen. 6:9) Mahanduraw mo man bala kon daw ano nga kalipay ang batyagon mo kon maluwas ka sa Armagedon?
11 Wala sing makapugong sa Labing Gamhanan sa paglaglag sining satanikong sistema sang mga butang. Pamangkuta ang imo kaugalingon, ‘Nagapati gid bala ako nga wala sang saad ang Dios nga indi matuman bisan ang pinakagamay nga detalye kag nga matuman ini tanan sa iya gintalana nga tion?’ Kon amo, pamatud-i nga handa ka paagi sa pagdumdom pirme sang nagapakari nga “adlaw ni Jehova.”—2 Ped. 3:12.
Si Moises Nagpabilin nga Nagabantay
12. Ano ang posible nga nagpaburon kuntani sa espirituwal nga panan-aw ni Moises?
12 Binagbinagon naton ang isa pa ka halimbawa. Para sa iban, tuman katahom sang kahimtangan ni Moises sa Egipto. Bangod gin-adoptar sia sang anak nga babayi ni Paraon, mahimo nga ginatahod gid sia sang mga tawo. Nagakaon sia sang manamit nga pagkaon, may matahom nga panapton, kag may tuman kagarbo nga palibot. May mataas man sia nga tinun-an. (Basaha ang Binuhatan 7:20-22.) Kag madamo sia kuntani sang mapanubli.
13. Ano ang nakabulig kay Moises nga magkonsentrar sa mga saad sang Dios?
13 Mahimo nga ang paghanas kay Moises sang iya mga ginikanan sang bata pa sia amo ang nakabulig sa iya nga mahangpan nga sayop ang pagsimba sang Egiptohanon sa mga idolo. (Ex. 32:8) Ang iya natigayon nga edukasyon sa Egipto kag ang materyal nga kamanggaran sa palasyo wala nakaimpluwensia sa iya nga biyaan ang matuod nga pagsimba. Mahimo nga ginpamalandungan niya sing maayo ang mga saad sang Dios sa iya katigulangan kag ginpakita niya nga handa sia nga tumanon ang kabubut-on sang Dios. Sang ulihi, ginsilingan ni Moises ang mga Israelinhon: “Ang GINOO . . . ang Dios ni Abraham, ang Dios ni Isaac, kag ang Dios ni Jacob, nagpadala sa akon sa inyo.”—Basaha ang Exodo 3:15-17.
14. Paano ang pagtuo kag kaisog ni Moises natilawan?
14 Indi kaangay sang wala sing kabuhi nga mga idolo sa Egipto, si Jehova matuod gid kay Moises. Nagkabuhi si Moises nga daw subong bala nga nakita niya ang “Isa nga di-makita.” Nagatuo sia nga magaabot ang tion nga ang katawhan sang Dios pagahilwayon, apang wala sia nakahibalo kon san-o ini matabo. (Heb. 11:24, 25, 27) Ang pag-apin niya sa isa ka Israelinhon nga ginmaltratar, nagapakita nga mabaskog gid ang iya handum nga masaksihan ang kahilwayan sang mga Hebreo. (Ex. 2:11, 12) Apang, indi pa ini ang tion nga gintalana ni Jehova amo nga napilitan si Moises nga magpalagyo sa malayo nga lugar. Bangod naanad sia sa masulhay nga pangabuhi sa palasyo, pat-od gid nga mabudlay para sa iya ang pag-istar sa kahanayakan. Apang sa gihapon, ginpamatud-an ni Moises nga handa sia sa pagtuman sa tanan nga instruksion nga ginhatag ni Jehova. Pagkatapos sang 40 ka tuig nga pagpuyo niya sa Midian, mahimo na sia gamiton sang Dios agod hilwayon ang iya mga utod. Bilang pagtuman sa sugo sang Dios, nagbalik si Moises sa Egipto. Tion na para tumanon ni Moises ang hilikuton nga ginhatag sang Dios sa iya, sa paagi nga luyag sang Dios. (Ex. 3:2, 7, 8, 10) Sang nagbalik na sa Egipto si Moises, “ang pinakamahagop nga tawo,” kinahanglan gid niya ang pagtuo kag kaisog agod maatubang si Paraon. (Num. 12:3, NW) Indi lang isa ka bes nga ginhimo niya ini, kundi sulitsulit sia nga nag-atubang kay Paraon sa kada kalalat-an kag wala nakahibalo kon pila ka beses pa sia nga magabalik kay Paraon.
15. Ngaa ginpadunggan ni Moises ang iya langitnon nga Amay bisan pa nag-atubang sia sing mga kapaslawan?
15 Sa sulod sang 40 ka tuig, halin sang 1513 B.C.E. tubtob sang 1473 B.C.E., madamo nga kalugaw-an ang naatubang ni Moises. Apang walay sapayan sini, ginpadunggan niya si Jehova kag ginpalig-on ang iya mga masigka-Israelinhon nga amo man sini ang himuon. (Deut. 31:1-8) Ngaa? Bangod ginhigugma niya ang ngalan kag soberanya ni Jehova labaw sangsa iya kaugalingon nga ngalan. (Ex. 32:10-13; Num. 14:11-16) Gani, kon makaeksperiensia kita sang kalugaw-an ukon kapaslawan, padayon naton nga sakdagon ang paggahom sang Dios upod ang bug-os nga pagsalig nga ang iya dalanon amo ang mas maalamon, mas matarong kag mas maayo sangsa iban. (Isa. 55:8-11; Jer. 10:23) Amo mo man bala sina ang imo ginabatyag?
Magpadayon nga Nagamata!
16, 17. Ano ang kahulugan sang Marcos 13:35-37 para sa imo?
16 “Magpadayon kamo nga nagabantay, magpadayon kamo nga nagamata, kay wala kamo makahibalo kon san-o ang gintalana nga tion.” (Mar. 13:33) Amo ina ang paandam nga ginhatag ni Jesus sang ginsugid niya ang tanda sang katapusan sining malaut nga sistema sang mga butang. Binagbinaga ang katapusan nga ginsiling ni Jesus suno sa rekord ni Marcos: “Magpadayon kamo sa pagbantay, kay wala kamo makahibalo kon san-o maabot ang agalon sang balay, kon sa kagab-ihon ukon sa tungang-gab-i ukon sa tigpamalo sang manok ukon sa kaagahon; agod nga kon mag-abot sia sing hinali, indi niya kamo masapwan nga nagakatulog. Apang ang ginasiling ko sa inyo ginasiling ko sa tanan, Magpadayon kamo sa pagbantay.”—Mar. 13:35-37.
17 Makapahunahuna gid ang laygay ni Jesus. Ginpatuhuyan niya ang apat ka hugna sang pagbantay. Ang katapusan nga hugna amo ang pinakamabudlay nga tion nga magpabilin nga nagamata, kay halin ini sa mga alas tres sang kaagahon tubtob sa pagbutlak sang adlaw. Napamatud-an sang mga eksperto sa inaway nga amo ini ang pinakamaayo nga tion nga salakayon ang kaaway kay “nagakatulog” sila. Sing kaanggid, ang kalabanan nga tawo sa kalibutan karon nagakatulog sing hamuok sa espirituwal, gani isa gid ka hangkat nga magpabilin nga nagamata. Nagaduhaduha pa bala kita sa sugo sa aton nga ‘magpadayon nga nagamata kag magpadayon nga nagabantay’ samtang ginahulat naton ang katapusan kag ang aton kaluwasan?
18. Subong mga Saksi ni Jehova, ano ang aton daku nga pribilehiyo?
18 Ang trainer nga ginsambit sa umpisa, naluwas sa pag-atake sang tigre. Apang, ginapakita sang tagna sa Biblia nga ang butig nga relihion kag ining malaut nga sistema indi gid makaluwas sa nagapakari nga kalaglagan. (Bug. 18:4-8) Kabay nga ang tanan nga alagad sang Dios, bata man ukon tigulang, mangin serioso sa paghimo sang ila bug-os nga masarangan agod pamatud-an nga handa sila sa adlaw ni Jehova kaangay ni Noe kag sang iya pamilya. Ang mga manunudlo sang butig nga relihion, mga agnostiko, kag mga ateista, nagayaguta sa aton Manunuga paagi sa ila mga ginahambal. Apang, indi kita dapat magpaimpluwensia sa ila. Tamdon naton sing serioso ang mga halimbawa nga aton natun-an kag pangapinan naton pirme kag padunggan si Jehova subong “ang Dios sang mga dios,” huo, “ang Dios nga daku, ang gamhanan, kag ang makakulugmat.”—Deut. 10:17.
[Nota]
^ par. 3 Tuhoy sa “isa ka gatus kag duha ka pulo ka tuig” nga ginsambit sa Genesis 6:3, tan-awa ang Lalantawan, Disiembre 15, 2010, pahina 30.
Madumduman Mo Bala?
• Ngaa dapat gid unahon ni Noe ang espirituwal nga mga kinahanglanon sang iya pamilya?
• Paano magkaanggid ang aton panahon sa panahon ni Noe?
• Ngaa nagkonsentrar si Moises sa mga saad ni Jehova bisan pa nakaeksperiensia sia sing mga kalugaw-an?
• Ano nga mga tagna sa Biblia ang nagpahulag sa imo nga magpabilin nga nagamata sa espirituwal?
[Mga Pamangkot sa Pagtinuon]
[Retrato sa pahina 25]
Si Noe kag ang iya pamilya nagkonsentrar sa paghimo sang kabubut-on ni Jehova
[Retrato sa pahina 26]
Ang masaligan nga mga saad sang Dios nakabulig kay Moises nga magpabilin nga nagabantay
