Batuna ang Espiritu sang Dios, Indi ang Espiritu sang Kalibutan
Batuna ang Espiritu sang Dios, Indi ang Espiritu sang Kalibutan
“Nabaton naton, indi ang espiritu sang kalibutan, kundi ang espiritu nga gikan sa Dios, agod mahibaluan naton ang mga butang nga mainayuhon nga ginhatag sang Dios sa aton.”—1 COR. 2:12.
1, 2. (a) Ang mga Cristiano nagaatubang sa ano nga sahi sang pagpakig-away? (b) Ano nga mga pamangkot ang aton binagbinagon?
ANG matuod nga mga Cristiano nagapakig-away! Ang aton kaaway gamhanan, madaya, kag beterano sa inaway. May armas sia nga tuman ka makamamatay kag madamo na sia sing nahalitan. Apang indi kita dapat mahadlok. (Isa. 41:10) Ang aton depensa tuman kabakod kag indi masulod.
2 Ang aton pagpakig-away indi pisikal kundi espirituwal. Ang kaaway naton amo si Satanas nga Yawa, kag ang iya panguna nga armas amo “ang espiritu sang kalibutan.” (1 Cor. 2:12) Ang aton depensa batok sa iya mga pagsalakay amo ang espiritu sang Dios. Agod maluwas kita sa sining inaway kag makapabilin nga suod sa Dios, kinahanglan kita mangabay sang espiritu sang Dios kag ipakita ang mga bunga sini sa aton kabuhi. (Gal. 5:22, 23) Apang, ano ang espiritu sang kalibutan, kag ngaa mabaskog ang impluwensia sini? Paano naton mahibaluan kon bala naimpluwensiahan na kita sang espiritu sang kalibutan? Kag ano ang matun-an naton kay Jesus tuhoy sa pagbaton sang espiritu sang Dios kag sa pagpamatok sa espiritu sang kalibutan?
Ngaa Lapnag Gid ang Espiritu sang Kalibutan?
3. Ano ang espiritu sang kalibutan?
3 Ang espiritu sang kalibutan naghalin kay Satanas, “ang manuggahom sang kalibutan,” kag nagapanghikot ini batok sa balaan nga espiritu sang Dios. (Juan 12:31; 14:30; 1 Juan 5:19) Amo ini ang nagapangibabaw nga huyog sang kalibutan nga nagaimpluwensia sa mga tawo. Ini nga puersa ang nagatulod sa mga tawo nga magpanghikot batok sa kabubut-on kag katuyuan sang Dios.
4, 5. Ngaa tuman ka lapnag sang espiritu nga ginapasanyog ni Satanas?
4 Ngaa tuman ka lapnag sang espiritu nga ginapasanyog ni Satanas? Una, ginlimbungan niya si Eva sa hardin sang Eden. Ginkumbinsi niya sia nga magauswag ang iya kabuhi kon indi sia magpasakop sa Dios. (Gen. 3:13) Butigon gid si Satanas! (Juan 8:44) Paagi sa babayi, ginpadihutan niya nga malapas ni Adan si Jehova. Bangod sa ginhimo ni Adan, ang bug-os nga katawhan napaidalom sa sala kag madali maimpluwensiahan sang espiritu sang pagkadimatinumanon nga ginapasanyog ni Satanas.—Basaha ang Efeso 2:1-3.
5 Si Satanas madamo man sang naimpluwensiahan nga mga anghel, nga nangin mga demonyo. (Bug. 12:3, 4) Natabo ini antes ang Anaw sang panahon ni Noe. Nagpati yadtong mga anghel nga mas maayo kon biyaan nila ang ila posisyon sa langit kag paayawan ang ila di-nagakaigo nga mga handum sa duta. (Jud. 6) Sang nagbalik ining mga demonyo sa duog sang mga espiritu, nagbuylog sila kay Satanas sa ‘pagpatalang sa bug-os napuy-an nga duta.’ (Bug. 12:9) Makapasubo gid nga ang kalabanan nga katawhan wala sing hinalung-ong sa impluwensia sang mga demonyo.—2 Cor. 4:4.
Ginaimpluwensiahan Ka Bala sang Espiritu sang Kalibutan?
6. Paano makaimpluwensia sa aton ang espiritu sang kalibutan?
6 Madamo ang wala sing hinalung-ong sa impluwensia ni Satanas, apang ang matuod nga mga Cristiano indi ignorante sa sini. (2 Cor. 2:11) Ang matuod, ang espiritu sang kalibutan indi makaimpluwensia sa aton luwas lang kon tugutan naton ini. Binagbinagon naton ang apat ka pamangkot nga makabulig sa aton nga mahibaluan kon bala ginaimpluwensiahan kita sang espiritu sang Dios ukon sang espiritu sang kalibutan.
7. Ano ang isa ka paagi ni Satanas sa pagpahilayo sa aton kay Jehova?
7 Ano ang ginasugid tuhoy sa akon sang mga kalingawan nga akon ginapili? (Basaha ang Santiago 3:14-18.) Ginatinguhaan ni Satanas nga ipahilayo kita sa Dios paagi sa paghaylo sa aton nga higugmaon ang kasingki. Nahibaluan sang Yawa nga ginadumtan ni Jehova ang bisan sin-o nga nagahigugma sa kasingki. (Sal. 11:5) Gani, agod pukawon ang aton undanon nga kailigbon, ginagamit ni Satanas ang mga literatura, pelikula, musika, kag mga video game—nga ang pila sini nagahaylo sa mga nagahampang nga maghimo sang makangilil-ad nga imoralidad kag tuman nga kapintas. Wala sing labot si Satanas kon nagahigugma kita sa matarong. Basta ang importante sa iya may bahin sa aton tagipusuon nga nagahigugma sa malain nga mga buhat nga ginapasanyog niya.—Sal. 97:10.
8, 9. Ano nga mga pamangkot tuhoy sa kalingawan ang dapat naton ipamangkot sa aton kaugalingon?
8 Sa pihak nga bahin, ang mga nagabaton sang espiritu sang Dios ginapahulag sini nga mangin putli, mahidaiton, kag puno sang kaluoy. Gani, maayo nga pamangkuton naton ang aton kaugalingon, ‘Ang mga kalingawan bala nga ginapili ko nagapalig-on sa akon nga magpakita sing positibo nga mga kinaiya?’ Ang kaalam nga nagagikan sa hitaas “indi salimpapaw.” Ang mga ginaimpluwensiahan sang espiritu sang Dios wala nagabantala sing kaputli kag paghidait sa ila mga kaingod kag dayon kon sa ila na puluy-an, nasadyahan sa pagtan-aw sing masingki kag imoral nga mga kalingawan.
9 Si Jehova nagapatuman sang eksklusibo nga debosyon. Apang si Satanas, sugot na bisan sa isa lang ka buhat sang pagsimba, kaangay sang luyag niya ipahimo kay Jesus. (Luc. 4:7, 8) Gani, pamangkuton naton ang aton kaugalingon: ‘Ang kalingawan bala nga akon ginapili makaupang sa akon sa paghatag sing eksklusibo nga debosyon sa Dios? Nagapabudlay bala ini ukon nagapahapos sa akon nga mapamatukan ang espiritu sang kalibutan? May dapat bala ako bag-uhon sa pagpili sing mga kalingawan?’
10, 11. (a) Ano nga panimuot ang ginapasanyog sang espiritu sang kalibutan tuhoy sa materyal nga mga pagkabutang? (b) Ano nga panimuot ang ginapalig-on sang Pulong sang Dios?
10 Ano ang akon panimuot sa materyal nga mga butang? (Basaha ang Lucas 18:24-30.) Ginapasanyog sang espiritu sang kalibutan “ang kailigbon sang mga mata” paagi sa kakagod kag materyalismo. (1 Juan 2:16) Ginapalambo sini ang determinasyon sang mga tawo nga mangin manggaranon. (1 Tim. 6:9, 10) Ginapapati kita sini nga espiritu nga ang pagtigayon sang madamo nga pagkabutang amo ang makahatag sing kasiguruhan. (Hulu. 18:11) Apang kon tugutan naton nga madaug sang gugma sa kuarta ang aton gugma sa Dios, mangin madinalag-on si Satanas. Dapat naton pamangkuton ang aton kaugalingon, ‘Ginauna ko bala sa akon kabuhi ang pagpangita sing materyal nga kasulhayan kag pagpangalipay?’
11 Sa pihak nga bahin, ginapalig-on kita sang gin-inspirar sang espiritu nga Pulong sang Dios nga tamdon sing balanse ang kuarta kag magpangabudlay sing lakas agod maamanan sing materyal nga mga kinahanglanon ang aton kaugalingon kag ang aton pamilya. (1 Tim. 5:8) Ang mga nakabaton sang espiritu sang Dios ginabuligan sini nga mapadayag ang kaalwan ni Jehova. Nakilal-an sila nga nagahatag kag wala lamang nagabaton. Mas ginapabaloran nila ang mga tawo sangsa mga pagkabutang kag nalipay sila sa pagpaambit sang ila masarangan. (Hulu. 3:27, 28) Ginauna nila ang pag-alagad sa Dios sangsa pagpangita sang kuarta.
12, 13. Kabaliskaran sa espiritu sang kalibutan, paano ang espiritu sang Dios makaimpluwensia sa aton sa kaayuhan?
12 Ano nga espiritu ang akon ginapadayag? (Basaha ang Colosas 3:8-10, 13.) Ginapasanyog sang espiritu sang kalibutan ang mga buhat sang unod. (Gal. 5:19-21) Madayag kon ano nga espiritu ang nagaimpluwensia sa aton, indi sa tion nga maayo ang kahimtangan kundi sa tion nga may problema, kaangay abi kon may Cristianong utod nga wala nagasapak sa aton, nakasaklaw sa aton, ukon nakasala pa gani sa aton. Madayag man kon ano nga espiritu ang nagapangibabaw sa aton kon yara kita sa aton puluy-an kag wala sing iban nga tawo. Maayo nga pamangkuton naton ang aton kaugalingon, ‘Sa nagligad nga anom ka bulan, labi bala nga nangin tulad-Cristo ang akon kinaiya ukon nagabalik liwat ang malain ko nga batasan?’
13 Ang espiritu sang Dios makabulig sa aton nga ‘ubahon ang daan nga personalidad upod ang mga buhat sini kag magpanapot sang bag-o nga personalidad.’ Buligan kita sini nga mangin mahigugmaon kag mainayuhon. Mangin mahapos lang para sa aton nga magpatawad, bisan pa may rason kita nga magreklamo. Ginalikawan na naton ang “madinumtanon nga paghinakit kag kaakig kag kasingkal kag sininggitanay kag nagapakalain nga hambal” kon daw ginahimuan kita sing inhustisya. Sa baylo, magapanikasog kita nga mangin “mapinalanggaon nga may kaawa.”—Efe. 4:31, 32.
14. Paano ginatamod sang kalabanan sa kalibutan ang Pulong sang Dios?
14 Ginatahod ko bala kag ginahigugma ang moral nga mga talaksan sang Biblia? (Basaha ang Hulubaton 3:5, 6.) Ginapadayag sang espiritu sang kalibutan ang pagrebelde batok sa Pulong sang Dios. Ang mga naimpluwensiahan sining espiritu nagasikway sa mga bahin sang Biblia nga wala nila nanamian. Mas gusto pa nila sundon ang mga tradisyon kag mga pilosopiya sang tawo. (2 Tim. 4:3, 4) Ginsikway naman sang iban ang bug-os nga Biblia. Ginapangduhaduhaan nila kon bala ang Biblia praktikal pa nga sundon ukon masaligan, sa amo nangin maalam sila sa ila kaugalingon nga mga mata. Ginapakadiutay nila ang mga talaksan sang Dios tuhoy sa pagpanghilahi, homoseksuwalidad, kag diborsio. Ginatudlo nila nga ‘ang malaut maayo kag ang maayo malaut.’ (Isa. 5:20) Naapektuhan bala kita sini nga espiritu? Nagasalig bala kita sa kaalam sang tawo, ukon sa aton lang kaugalingon nga mga ideya kon nagaatubang kita sing mga problema? Ukon nagapanikasog kita nga iaplikar ang laygay sang Biblia?
15. Sa baylo nga magsandig sa aton kaugalingon nga kaalam, ano ang dapat naton himuon?
15 Ginapahulag kita sang espiritu sang Dios nga tahuron ang Biblia. Kaangay sang salmista, ginatamod naton ang pulong sang Dios subong suga sa aton mga tiil kag kapawa sa aton banas. (Sal. 119:105) Sa baylo nga magsandig sa aton kaugalingon nga kaalam, nagapatuytoy kita sa Pulong sang Dios agod mahibaluan naton kon ano ang husto kag kon ano ang sala. Wala lamang naton natun-an nga tahuron ang Biblia kundi natun-an man naton nga higugmaon ang kasuguan sang Dios.—Sal. 119:97.
Magtuon sa Halimbawa ni Jesus
16. Paano naton matigayon ang “hunahuna ni Cristo”?
16 Agod mabaton naton ang espiritu sang Dios, dapat naton palambuon ang “hunahuna ni Cristo.” (1 Cor. 2:16) Kon luyag naton matigayon ang “panimuot sang hunahuna pareho sang iya ni Cristo Jesus” dapat naton hibaluon kon paano sia anay naghunahuna kag nagpanghikot kag nian ilugon naton sia. (Roma 15:5; 1 Ped. 2:21) Binagbinagon naton kon paano naton ini mahimo.
17, 18. (a) Ano ang matun-an naton kay Jesus tuhoy sa pangamuyo? (b) Ngaa dapat kita ‘magpadayon sa pagpangayo’?
17 Mangabay sang espiritu sang Dios. Antes si Jesus nag-atubang sa mga pagtilaw, nangamuyo sia nga buligan sia sang espiritu sang Dios. (Luc. 22:40, 41) Dapat man kita mangabay sang balaan nga espiritu sang Dios. Maalwan ini nga ginahatag ni Jehova sa tanan nga nagapangabay sini nga may pagtuo. (Luc. 11:13) Si Jesus nagsiling: “Padayon sa pagpangayo, kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo. Kay ang tagsatagsa nga nagapangayo magabaton, kag ang tagsatagsa nga nagapangita makakita, kag ang tagsatagsa nga nagapanuktok pagabuksan.”—Mat. 7:7, 8.
18 Kon kinahanglan naton ang espiritu kag bulig ni Jehova, indi kita dapat mag-untat sa pagpangabay sini. Ayhan kinahanglan naton ini himuon sing mas masunson kag wala nagadali. Kon kaisa, ginatugutan anay ni Jehova nga ipakita naton kon daw ano kita ka sinsero sa aton ginapangayo ukon kon matuod gid bala ang aton pagtuo antes niya sabton ang aton mga pangamuyo. *
19. Ano ang pirme ginahimo ni Jesus, kag ngaa dapat naton sia ilugon?
19 Tumana sing bug-os si Jehova. Ginahimo pirme ni Jesus ang mga butang nga nagapahamuot sa iya Amay. May tion nga ang luyag himuon ni Jesus tuhay sangsa luyag sang iya Amay. Apang, nagsiling sia sa iya Amay nga may pagsalig: “Indi ang akon kabubut-on, kundi ang imo kabubut-on ang matuman.” (Luc. 22:42) Pamangkuta ang imo kaugalingon, ‘Ginatuman ko bala ang Dios bisan pa sa tion nga indi mahapos ang paghimo sini?’ Kabuhi naton ang nadalahig sa pagtuman sa Dios. Takus gid sia nga tumanon sing bug-os bangod sia ang aton Manunuga, ang Ginhalinan kag Tagsakdag sang aton kabuhi. (Sal. 95:6, 7) Wala sang puede ital-us sa pagkamatinumanon. Kon wala ini, indi naton mapahamut-an ang Dios.
20. Sa ano nasentro ang kabuhi ni Jesus, kag paano naton sia mailog?
20 Mangin pamilyar sa Biblia. Gingamit ni Jesus ang Kasulatan agod pamatukan ang direkta nga pagsalakay ni Satanas. (Luc. 4:1-13) Sang ginkomprontar sia sang mga manugpamatok, gingamit ni Jesus ang Pulong sang Dios subong awtoridad. (Mat. 15:3-6) Ang bug-os nga kabuhi ni Jesus nasentro sa paghibalo kag pagtuman sang kasuguan sang Dios. (Mat. 5:17) Kaangay niya, luyag man naton pun-on ang aton hunahuna sang Pulong sang Dios. (Fil. 4:8, 9) Huo, mahimo mabudlayan ang pila sa aton nga mangita sing tion para sa personal kag pangpamilya nga pagtuon. Apang, indi kita dapat mangita lang sing tion, kundi dapat gid naton ini hatagan sing tion.—Efe. 5:15-17.
21. Ano nga kahimusan ang makabulig sa aton nga mangin pamilyar sa Pulong sang Dios kag maaplikar ini?
21 “Ang matutom kag mainandamon nga ulipon” nagbulig sa aton nga mahatagan sing tion ang personal kag pangpamilya nga pagtuon paagi sa kahimusan sang gab-i sang Pangpamilya nga Pagsimba kada semana. (Mat. 24:45) Ginapanginpuslan mo bala ini nga kahimusan? Agod matigayon mo ang hunahuna ni Cristo, puede mo ilakip sa imo pagtuon ang sistematiko nga pagbinagbinag sang mga gintudlo ni Jesus sa bisan ano nga topiko nga gusto mo. Mahimo mo gamiton ang Watch Tower Publications Index sa pagpangita sing reperensia sa mga topiko nga luyag mo tun-an. Halimbawa, halin sang 2008 tubtob 2010, ang publiko nga edisyon sini nga magasin nagbalhag sang serye sang 12 ka artikulo nga may tema “Ang Matun-an Naton kay Jesus.” Mahimo mo gamiton ining mga artikulo sa imo pagtuon. Sugod sang 2006, ang Magmata! may artikulo na nga “Ano ang Imo Sabat?” Ini nga mga pamangkot gindesinyo para mapasangkad kag mapadalom ang imo ihibalo sa Pulong sang Dios. Ngaa indi mo ini pag-ilakip sa inyo Pangpamilya nga Pagsimba sa pulupanag-on?
Madaug Naton ang Kalibutan
22, 23. Ano ang dapat naton himuon agod madaug ang kalibutan?
22 Agod matuytuyan kita sang espiritu sang Dios, dapat naton pamatukan ang espiritu sang kalibutan. Indi mahapos ang pagpamatok sa sini. Mahimo nagakinahanglan ini sing pagpanikasog, isa ka lakas nga pagpakig-away. (Jud. 3) Apang madaug naton ini! Si Jesus nagsiling sa iya mga disipulo: “Sa kalibutan may kapipit-an kamo, apang magpakabakod kamo! Nadaug ko ang kalibutan.”—Juan 16:33.
23 Madaug man naton ang kalibutan kon pamatukan naton ang espiritu sini kag himuon ang aton bug-os nga masarangan nga mabaton ang espiritu sang Dios. Ang matuod, “kon ang Dios dampig sa aton, sin-o ang mangin batok sa aton?” (Roma 8:31) Kon batunon naton ang espiritu sang Dios kag sundon ang panuytoy sini nga mabasa sa Biblia, matigayon naton ang pagkakontento, paghidait, kalipay, kag paglaum nga kabuhi nga walay katapusan sa bag-ong kalibutan nga malapit na.
[Nota]
^ par. 18 Para sa dugang nga impormasyon, tan-awa ang pahina 170-173 sang libro nga Ano Gid ang Ginatudlo Sang Biblia?
Madumduman Mo Bala?
• Ngaa tuman ka lapnag sang espiritu sang kalibutan?
• Ano ang apat ka pamangkot nga dapat naton ipamangkot sa aton kaugalingon?
• Ano ang tatlo ka butang nga matun-an naton kay Jesus tuhoy sa pagbaton sang espiritu sang Dios?
[Mga Pamangkot sa Pagtinuon]
[Retrato sa pahina 8]
Paano nangin demonyo ang pila ka anghel?
[Retrato sa pahina 10]
Ginagamit ni Satanas ang espiritu sang kalibutan sa pagkontrol sa mga tawo, apang makapanginpadlos kita sa impluwensia sini
