Padayon nga Pangitaa Anay ang “Iya Pagkamatarong”
Padayon nga Pangitaa Anay ang “Iya Pagkamatarong”
“Padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.”—MAT. 6:33.
1, 2. Ano ang pagkamatarong sang Dios, kag sa ano ini napasad?
“PADAYON nga pangitaa anay ang ginharian.” (Mat. 6:33) Ini nga laygay nga ginhatag ni Jesucristo sa iya Sermon sa Bukid nahibaluan gid sang mga Saksi ni Jehova sa karon. Ginatinguhaan gid naton nga ipakita sa tanan nga aspekto sang aton kabuhi nga ginahigugma naton inang Ginharian kag luyag naton nga mangin mainunungon sa sini. Apang dapat man naton dumdumon ang ikaduha nga bahin sini nga teksto, “kag ang iya pagkamatarong.” Ano ang pagkamatarong sang Dios, kag ano ang buot silingon sang pagpangita anay sini?
2 Ang orihinal nga tinaga nga ginbadbad “pagkamatarong” mahimo man badbaron nga “katarungan” ukon “pagkatadlong.” Gani, ang pagkamatarong sang Dios amo ang pagkatadlong suno sa iya mga talaksan kag mga prinsipio. Subong Manunuga, may kinamatarong si Jehova nga magpahamtang sang talaksan kon ano ang maayo kag kon ano ang malain, kon ano ang husto kag kon ano ang sala. (Bug. 4:11) Apang, ang pagkamatarong sang Dios wala napasad sa estrikto nga mga kasuguan ukon sa wala sing katapusan nga listahan sang mga pagsulundan. Sa baylo, napasad ini sa personalidad ni Jehova kag sa iya kinaiya nga katarungan kag sa iban pa niya nga panguna nga mga kinaiya subong sang gugma, kaalam, kag gahom. Gani, ang pagkamatarong sang Dios naangot sa iya kabubut-on kag katuyuan. Nalakip sa sini ang iya ginapaabot sa mga luyag mag-alagad sa iya.
3. (a) Ano ang buot silingon sang pagpangita anay sang pagkamatarong sang Dios? (b) Ngaa ginatuman naton ang matarong nga mga talaksan ni Jehova?
3 Ano ang buot silingon sang pagpangita anay sang pagkamatarong sang Dios? Sa simple nga hambal, nagakahulugan ini sa paghimo sang iya kabubut-on agod mapahamut-an sia. Nalakip sa sini ang pagkabuhi nahisuno sa iya mga prinsipio kag himpit nga mga talaksan kag indi nahisuno sa aton kaugalingon nga talaksan. (Basaha ang Roma 12:2.) Nadalahig sa sini ang aton mismo kaangtanan kay Jehova. Nagatuman kita sa iya mga kasuguan indi bangod nahadlok kita nga silutan niya. Sa baylo, ang aton gugma sa Dios amo ang nagapahulag sa aton nga pahamut-an sia paagi sa pagtuman sa iya, kag sa indi paghimo sang aton kaugalingon nga talaksan. Nahibaluan naton nga amo ini ang husto nga himuon kay gindesinyo kita para magsunod sa sini. Kaangay ni Jesucristo, ang Hari sang Ginharian sang Dios, dapat naton higugmaon ang pagkamatarong.—Heb. 1:8, 9.
4. Ngaa importante gid nga pangitaon naton ang pagkamatarong sang Dios?
4 Daw ano ka importante ang pagpangita sang pagkamatarong ni Jehova? Binagbinaga ini: Ginapakita sang pagtilaw sa hardin sang Eden nga si Adan kag si Eva ginhatagan sing kahigayunan nga kilalahon ang kinamatarong ni Jehova sa pagpahamtang sing mga talaksan. (Gen. 2:17; 3:5) Bangod wala nila ini ginkilala, nagresulta ini sa aton pag-antos kag kamatayon. (Roma 5:12) Sa pihak nga bahin, ang Pulong sang Dios nagasiling: “Ang nagasonod sa pagkamatarung kag kalolo makakita sing kabuhi, pagkamatarung, kag dungug.” (Hulu. 21:21) Huo, kon pangitaon anay naton ang pagkamatarong sang Dios, magaresulta ini sa aton maayo nga kaangtanan kay Jehova kag sa aton kaluwasan.—Roma 3:23, 24.
Ang Katalagman sang Pagpakamatarong sa Kaugalingon
5. Ano nga katalagman ang dapat naton likawan?
5 Sa iya sulat sa mga Cristiano sa Roma, ginpadaku ni apostol Pablo ang isa ka katalagman nga dapat naton tanan likawan agod mapangita anay naton ang pagkamatarong sang Dios. Si Pablo nagsiling tuhoy sa iya mga masigka-Judiyo: “Nagapanaksi ako tuhoy sa ila nga may kakugi sila sa Dios; apang indi suno sa sibu nga ihibalo; kay wala sila magpasakop sa pagkamatarong sang Dios bangod wala nila mahibaluan ang pagkamatarong sang Dios kundi nagatinguha sa pagtukod sang ila kaugalingon nga pagkamatarong.” (Roma 10:2, 3) Suno kay Pablo, ina nga mga sumilimba wala makahangop sang pagkamatarong sang Dios bangod masako sila sa pagtukod sang ila kaugalingon nga pagkamatarong. *
6. Ano nga kinaiya ang dapat naton likawan, kag ngaa?
6 Mahimo kita masiod sa sini kon ginapaanggid naton ang aton kaugalingon sa iban kag ginakabig nga ang aton pag-alagad sa Dios isa ka kompetisyon. Ini nga panimuot madali lang magresulta sa sobra nga pagsalig sa kaugalingon. Apang, kon amo sina ang aton himuon, malimtan naton ang pagkamatarong ni Jehova. (Gal. 6:3, 4) Dapat ang aton motibo sa paghimo sang matarong amo ang aton gugma kay Jehova. Indi naton mapakita nga ginahigugma naton sia kon ginatinguhaan naton nga padakuon ang aton kaugalingon nga pagkamatarong.—Basaha ang Lucas 16:15.
7. Paano ginhatagan ni Jesus sing igtalupangod ang problema tuhoy sa pagpakamatarong sa kaugalingon?
7 Nabalaka si Jesus sa mga “nagasalig sa ila kaugalingon nga sila matarong kag nagakabig sa iban subong wala pulos.” Ginhatagan niya sing igtalupangod ang problema tuhoy sa pagpakamatarong sa kaugalingon paagi sa sini nga ilustrasyon: “Duha ka tawo ang nagkadto sa templo sa pagpangamuyo, ang isa Fariseo kag ang isa manugsukot sing buhis. Ang Fariseo nagtindog kag nagpangamuyo sing hipos, ‘O Dios, nagapasalamat ako sa imo nga indi ako subong sang iban nga mga tawo, nga nagapangilkil, di-matarong, makihilahion, ukon subong sining manugsukot sing buhis. Nagapuasa ako sing makaduha sa isa ka semana, kag nagahatag ako sang ikanapulo sang tanan ko nga natigayon.’ Apang ang manugsukot sing buhis nga nagatindog sa malayo indi gani luyag magtangla sa langit, kundi nagpukpok sang iya dughan, nga nagasiling, ‘O Dios, maluoy ka sa akon nga makasasala.’” Nian, naghinakop si Jesus: “Nagasiling ako sa inyo, Ini nga tawo nagpauli sa iya balay nga mas matarong sangsa isa; bangod ang tagsatagsa nga nagapakataas sang iya kaugalingon paubson, apang ang nagapaubos sang iya kaugalingon pakataason.”—Luc. 18:9-14.
Isa Pa ka Katalagman—Ang Mangin ‘Lakas Katarung’
8, 9. Ano ang buot silingon sang “maglakas katarung,” kag mahimo ini magdul-ong sa ano?
8 Ang isa pa ka katalagman nga dapat naton likawan amo ang ginlaragway sa Manugwali 7:16: “Dili ka maglakas katarung, kag dili ka maglakas kaalam; ngaa bala laglagon mo ang imo kaugalingon?” Agod mabuligan kita nga malikawan ina nga panimuot, ang gin-inspirar nga manunulat sang Biblia nagpadayon sa pagsiling sa bersikulo 20: “Sa pagkamatuud walay tawo nga matarung sa duta nga nagahimo sing maayo kag wala nagapakasala.” Ang tawo nga ‘lakas katarung’ may kaugalingon nga talaksan kag amo ini ang iya ginabasihan sa paghukom sa iban. Apang, wala niya narealisar nga sa paghimo sini, ginapakataas niya ang iya kaugalingon nga mga talaksan sangsa mga talaksan sang Dios, kag sa amo, ginapamatud-an niya nga indi sia matarong sa atubangan sang Dios.
9 Ang ‘pagkalakas katarung’ ukon suno sa iban nga badbad, “sobra katarong,” mahimo pa gani bangdan nga duhaduhaan naton ang paagi ni Jehova sa pag-atubang sa mga problema. Apang dapat naton dumdumon nga kon ginaduhaduhaan naton ang pagkahusto ukon pagkatarong sang mga desisyon ni Jehova, ginapakataas naton ang aton talaksan sang pagkamatarong sangsa iya. Daw kaangay lang nga ginahukman naton si Jehova base sa aton kaugalingon nga mga talaksan sa kon ano ang husto kag sala. Apang tandaan naton nga si Jehova amo ang may kinamatarong sa pagpahamtang sang talaksan sang pagkamatarong, indi kita!—Roma 14:10.
10. Subong sang natabo kay Job, paano naton mahimo mahukman ang Dios?
10 Bangod sang aton pagkadihimpit, mahimo naton mahukman ang Dios sing di-hungod. Mahimo ini matabo kon makakita kita sang inhustisya ukon kon kita mismo mag-antos sang kabudlayan. Amo ini ang natabo sa matutom nga tawo nga si Job. Ginlaragway sia nga “himpit [wala sing kasawayan, NW] kag matarung, isa nga mahadlukon sa Dios, kag nagalikaw sa malaut.” (Job 1:1) Apang sang nakaeksperiensia si Job sang tuman nga pag-antos, nagbatyag sia nga indi ini makatarunganon, tubtob sang ulihi nga “ginpakamatarung niya ang iya kaugalingon sang sa Dios.” (Job 32:1, 2) Bangod sini kinahanglan nga tadlungon ang pagtamod ni Job. Gani, indi kita makibot nga kon kaisa nagabatyag man kita sini. Kon matabo ini sa aton, ano ang makabulig sa aton nga matadlong ang aton panghunahuna?
Wala Naton Pirme Nahibaluan ang Tanan nga Detalye
11, 12. (a) Kon makabatyag kita sang inhustisya, ano ang dapat naton tandaan? (b) Ngaa mahimo magbatyag ang isa nga ang mga mamumugon sa ilustrasyon ni Jesus ginpakig-angutan sing di-makatarunganon?
11 Ang una nga butang nga tandaan naton amo nga wala naton pirme nahibaluan ang tanan nga detalye. Amo sina ang kahimtangan ni Job. Wala sia makahibalo nga gin-akusahan sia ni Satanas sa miting sang mga anghel sa langit. (Job 1:7-12; 2:1-6) Wala man si Job nakahibalo nga si Satanas amo ang kabangdanan sang iya mga problema. Ang matuod, indi gani naton mapat-od kon bala kilala ni Job kon sin-o gid si Satanas! Bangod sini, ginpasibangdan niya ang Dios sang iya mga problema. Huo, madali lang kita makahinakop sing sayop kon wala naton nahibaluan ang tanan nga detalye.
12 Halimbawa, binagbinaga ang ilustrasyon ni Jesus tuhoy sa mga mamumugon sa ulubasan. (Basaha ang Mateo 20:8-16.) Ginlaragway diri ni Jesus ang agalon sang panimalay nga nagbayad sing pareho nga kantidad sa tanan nga mamumugon, nagtrabaho man sila sing bug-os nga adlaw ukon sing isa lang ka oras. Ano sa banta mo, makatarunganon bala ang iya ginhimo? Ayhan naluoy ka sa mga mamumugon nga nagtrabaho sing bug-os nga adlaw sa nagatagiti nga init. Dapat lang nga mas daku kuntani ang ibayad sa ila! Kon amo sina ang imo ginabatyag, mahimo maghinakop ka nga ang agalon sang panimalay indi mahigugmaon kag indi makatarunganon. Base sa iya sabat sa nagreklamo nga mga mamumugon, daw makasiling kita nga gin-abusuhan niya ang iya awtoridad. Apang nahibaluan bala naton ang tanan nga detalye?
13. Sa ano pa nga anggulo mahimo binagbinagon ang ilustrasyon ni Jesus tuhoy sa mamumugon sa ulubasan?
13 Usisaon naton ini nga ilustrasyon sa iban pa nga anggulo. Wala sing duhaduha nga ang agalon sa ilustrasyon nakahibalo nga ining mga lalaki may pamilya nga dapat sakdagon. Sang panahon ni Jesus, ang mga trabahador ginabayaran sing inadlaw. Ang ila sueldo sa kada adlaw amo lang ang ginasaligan sang ila pamilya. Hunahunaa ang kahimtangan sang mga lalaki nga nagapangita sing obra sa bug-os nga adlaw apang ulihi na nakita sang agalon kag nagtrabaho na lang sing isa ka oras. Mahimo nga indi nila mapakaon ang ila pamilya sa isa lang ka oras nga sueldo; pero handa gihapon sila magtrabaho kag naghulat sa bug-os nga adlaw. (Mat. 20:1-7) Indi nila sala nga wala sila ginpatrabaho sing bug-os nga adlaw. Wala sing indikasyon nga nagalikaw sila sa trabaho. Ano ang batyagon mo kon bug-os nga adlaw ka nga nagapangita sang trabaho kag may nagahulat sang imo kinitaan sa sina nga adlaw? Pat-od nga daku gid ang pasalamat mo sang nakakita ka sang trabaho kag nakabaton sing sueldo nga bastante para mapakaon ang imo pamilya!
14. Anong hamili nga leksion ang matun-an naton sa ilustrasyon tuhoy sa ulubasan?
14 Usisaon naton liwat ang ginhimo sang agalon. Ginbayaran niya ang mga mamumugon suno sa ila ginkasugtan. Ang iya ginbayad sa ila sarang makasakdag sang ila pamilya. Bisan pa tuman kadamo sang tawo nga nagapangita sang trabaho, wala niya ginhingalitan ang kahigayunan nga tanyagan sila sing manubo nga sueldo. Tanan niya nga mamumugon nagpauli nga may bastante nga kinitaan nga makapakaon sang ila pamilya. Ang pagbinagbinag sining dugang pa nga detalye mahimo magpabag-o sang aton pagtamod sa ginhimo sang agalon. Ang iya desisyon mahigugmaon kag indi pag-abuso sa awtoridad. Ano nga leksion ang aton matun-an? Ginapakita sini nga mahimo kita maghinakop sing sayop kon pila lamang ka detalye ang aton nahibaluan. Huo, ginapadaku sini nga parabola nga labaw gid ang pagkamatarong sang Dios kay wala lamang ini nabase sa mga pagsulundan kag pagtamod sang tawo.
Ang Aton Pagtamod Mahimo Tiko Ukon Limitado
15. Ngaa mahimo mangin tiko ukon limitado ang aton pagtamod tuhoy sa katarungan?
15 Ang ikaduha nga butang nga tandaan naton kon nagaatubang kita sang kahimtangan nga daw indi makatarunganon amo nga ang aton pagtamod mahimo tiko ukon limitado. Ang pagkadihimpit, pagpasulabi, ukon kultura nga ginhalinan mahimo magpatiko sang aton pagtamod. Ang aton pagtamod limitado man bangod indi kita makabasa sang tagipusuon kag indi naton mahantop ang motibo sang mga tawo. Apang, si Jehova kag si Jesus wala sing amo sini nga mga limitasyon.—Hulu. 24:12; Mat. 9:4; Luc. 5:22.
16, 17. Ano ang posible nga rason kon ngaa wala ginpadapat ni Jehova ang iya kasuguan tuhoy sa pagpanghilahi sang nakasala si David upod kay Bat-seba?
16 Binagbinagon naton ang ginhimo ni David sang nagpanghilahi sia upod kay Bat-seba. (2 Sam. 11:2-5) Suno sa Mosaikong Kasuguan, dapat sila patyon. (Lev. 20:10; Deut. 22:22) Bisan pa ginsilutan sila ni Jehova, wala niya ginpadapat ang iya kaugalingon nga kasuguan. Indi bala makatarunganon si Jehova sa iya ginhimo? Nagpakita bala sia sing paboritismo kay David kag ginlapas ang Iya kaugalingon nga talaksan sang pagkamatarong? Amo sini ang ginabatyag sang pila nga nagabasa sang Biblia.
17 Apang, ini nga kasuguan tuhoy sa pagpanghilahi ginhatag ni Jehova sa di-himpit nga mga hukom nga indi makabasa sang tagipusuon. Walay sapayan sining mga limitasyon, ini nga kasuguan nagbulig sa ila nga maghukom sing makatarunganon. Sa pihak nga bahin, si Jehova makabasa sang tagipusuon. (Gen. 18:25; 1 Cron. 29:17) Bangod sini, indi naton paghunahunaon nga si Jehova magasunod man sing estrikto sa kasuguan nga gindesinyo niya para sa di-himpit nga mga hukom. Kay kon amo sina, indi bala nga daw kaangay lang ina nga ginapilit mo ang isa ka tawo nga wala sing diperensia ang mata nga magsuksok sang antipara nga may grado? Sarang mabasa ni Jehova ang tagipusuon nanday David kag Bat-seba kag makita niya kon bala matuod sila nga naghinulsol. Bangod sini, ginpakitaan niya sila sing gugma kag kaluoy.
Padayon nga Pangitaa ang Pagkamatarong ni Jehova
18, 19. Ano ang makabulig sa aton nga indi paghukman si Jehova base sa aton kaugalingon nga mga talaksan?
18 Gani, halimbawa kon may mabasa kita sa Biblia ukon may maeksperiensiahan sa kabuhi nga sa pamatyag naton nangin di-makatarunganon si Jehova, indi naton dapat paghukman ang Dios base sa aton kaugalingon nga mga talaksan. Tandaan naton nga wala naton pirme nahibaluan ang tanan nga detalye kag ang aton pagtamod mahimo tiko ukon limitado. Indi naton pagkalimtan nga “ang kaakig sang tawo wala nagapatubas sang pagkamatarong sang Dios.” (Sant. 1:19, 20) Sa amo, malikawan naton nga ang ‘aton tagiposoon maakig’ kay Jehova.—Hulu. 19:3.
19 Kaangay ni Jesus, dapat naton dumdumon pirme nga si Jehova lamang ang may kinamatarong sa pagpahamtang sang talaksan kon ano ang matarong kag maayo. (Mar. 10:17, 18) Panikasugi nga magkuha sang “sibu nga ihibalo” tuhoy sa iya mga talaksan. (Roma 10:2; 2 Tim. 3:7) Paagi sa pagbaton sini kag pagkabuhi nahisuno sa kabubut-on ni Jehova, mapakita naton nga ginapangita anay naton “ang iya pagkamatarong.”—Mat. 6:33.
[Nota]
^ par. 5 Suno sa isa ka iskolar, ang orihinal nga tinaga nga ginbadbad “pagtukod” nagakahulugan man sang ‘pagpatindog sing monumento.’ Daw amo sina ang ginhimo sang mga Judiyo. Nagpatindog sila sang isa ka malaragwayon nga monumento para sa ila kadayawan kag indi sa Dios.
Madumduman Mo Bala?
• Ngaa importante ang pagpangita sang pagkamatarong ni Jehova?
• Anong duha ka katalagman ang dapat naton likawan?
• Paano naton mapakita nga ginapangita anay naton ang pagkamatarong sang Dios?
[Mga Pamangkot sa Pagtinuon]
[Retrato sa pahina 9]
Ano nga leksion ang matun-an naton sa ilustrasyon ni Jesus tuhoy sa duha ka tawo nga nangamuyo sa templo?
[Retrato sa pahina 10]
Makatarunganon bala nga ang mamumugon nga nagtrabaho sing isa lang ka oras bayaran sang pareho nga sueldo sa mamumugon nga nagtrabaho sing bug-os nga adlaw?
