Bulig sa mga Pamatan-on sa Pagdumdom sa Ila Manunuga

“DUMDUMA man ang imo Manunuga sa mga adlaw sang imo pagkapamatan-on,” sulat sang maalam nga tawo nga si Solomon mga 3,000 ka tuig na ang nagligad. (Man. 12:1) Agod mahimo ina, isa ka bag-o nga bulig ang nabaton sang Cristianong mga pamatan-on. Ang libro nga Questions Young People Ask—Answers That Work, Volume 2, ginpagua sa Distrito nga Kombension sang mga Saksi ni Jehova nga may tema “Pagtuytoy sang Espiritu sang Dios,” nga ginhiwat sugod sang Mayo 2008 tubtob Enero 2009.

Sa sulod sang panghapin sini, makita ang sulat sang Nagadumala nga Hubon para sa mga pamatan-on. Ang bahin sini nagasiling: “Ginapangamuyo gid namon sing hanuot nga ang mga impormasyon sa sini nga publikasyon makabulig sa imo nga malandas ang mga pag-ipit kag mga pagsulay nga ginaatubang sang mga pamatan-on karon kag mabuligan ka nga makadesisyon nahisuno sa kabubut-on sang Dios.”

Nagakaigo lamang nga padakuon sang mga ginikanan ang ila kabataan “sa disiplina kag nagatuytoy nga panghunahuna ni Jehova.” (Efe. 6:4) Apang, sa tion nga magtin-edyer na sila, madamo nga kabataan ang nagakadulaan sing pagsalig sa ila kaugalingon kag nagapangita sing panuytoy. Kon ikaw ginikanan sang isa ka tin-edyer, paano mo mabuligan ang imo bata nga makapanginpulos sa sini nga publikasyon? Yari ang pila ka panugda.

▪ Magkuha sang imo kaugalingon nga kopya sini nga libro kag mangin pamilyar sa sini. Indi lamang ini pagbasaha. Tun-i kon paano sini ginapabutyag ang mga ideya. Sa baylo nga isugid lang sa mga pamatan-on kon ano ang husto kag sala, ginatinguhaan sini nga libro nga hanason ang ila “ikasarang sa paghantop.” (Heb. 5:14) Nagahatag man ini sa ila sang praktikal nga mga panugda kon paano sila makapanindugan sa kon ano ang husto. Halimbawa, ang Kapitulo 15 (“How Can I Resist Peer Pressure?”) wala lamang nagatudlo sa mga pamatan-on nga magsiling sing indi. Ginapakita sini ang pasad sa Biblia kag realistiko nga mga pamaagi nga makabulig sa ila kon paano “magsabat sa kada isa.”—Col. 4:6.

▪ Panginpusli ang mga bahin sang libro nga kinahanglan sabtan. Bisan pa ini nga mga bahin gindesinyo  para sa mga pamatan-on, puede mo man masabtan ang imo kopya kon nagakaigo. * Halimbawa, kon ginabinagbinag mo ang duha ka pamangkot tuhoy sa pag-date sa pahina 16, dumduma ang imo anay ginbatyag sang pareho ang imo edad sa imo bata. Sa mga espasyo nga gin-aman, isulat ang mahimo nga isabat mo kon pamatan-on ka pa. Nian pamangkuta ang imo kaugalingon: ‘Nagbag-o na bala ang akon ginabatyag sa sini nga topiko pagligad sang mga tinuig? Ano nga mga butang ang akon natun-an sa kabuhi, kag paano ko ini mapaambit sa akon bata?’

▪ Hatagi sing kahilwayan ang imo bata nga magkinaugalingon. Ang mga bahin sang libro nga kinahanglan sabtan gindesinyo agod mapahulag ang imo bata nga isulat ukon hunahunaon ang iya mga sabat. Ang imo tulumuron amo nga mahibaluan kon ano ang yara sa iya tagipusuon, kag indi kon ano ang iya ginsulat sa iya libro. Sa pahina 3 sang seksion nga natig-uluhan “A Note to Parents,” ang libro nagapanugda: “Agod mapalig-on ninyo ang inyo tin-edyer nga magsulat sing tampad sa ila libro, hatagi sila sing kahilwayan nga magtago sing sekreto. Sa ulihi, mahimo nga sila na mismo ang magsugid sa inyo sang mga problema nga ila ginsulat.”

Isa ka Bulig sa Pangpamilya nga Pagtuon sa Biblia

Ang Young People Ask, Volume 2, isa gid ka maayo nga bulig nga magamit sa inyo Pangpamilya nga Pagsimba. Bangod ini nga libro wala sing pamangkot sa kada parapo, paano ninyo ini gamiton? Mahimo ninyo ipasibu ang inyo pagtuon sa paagi nga labing epektibo sa inyo kabataan.

Halimbawa, ang pila ka pamilya mahimo mag-ensayo paagi sa pagbinagbinag sang “Peer-Pressure Planner” nga makita sa pahina 132 kag 133. Ang una nga pamangkot diri mahimo makabulig sa imo anak nga mahibaluan kon ano nga pag-ipit ang mabudlay gid para sa iya. Ang ikaduha nga pamangkot makabulig sa iya nga mahibaluan kon sa diin mahimo mag-utwas ina nga pag-ipit. Sa tapos mabinagbinag kon ano ang mangin resulta kon magpadala sia ukon magbato sa pag-ipit, ginapangabay sini ang imo bata nga magplano sang iya himuon: batunon (absorb), likawan (deflect), ukon ibalik (return) ang pag-ipit. Hatagi sing kahigayunan ang imo bata nga makapamensar sang mga pamaagi kon paano niya atubangon ang mga pag-ipit kag kon paano niya ini gamiton nga may pagsalig kag kompiansa.—Sal. 119:46.

Isa ka Bulig sa Komunikasyon

Ang Young People Ask, Volume 2, nagapalig-on sa mga pamatan-on nga makighambal sa ila mga ginikanan. Halimbawa, ang kahon nga “How Can I Talk to Dad or Mom About Sex?” (pahina 63-64) kag “Talk to Your Parents!” (pahina 189) mahimo magamit para maistoryahan ninyo ang sensitibo  nga mga topiko. Ang isa ka 13-anyos nga bata nga babayi nagsulat, “Ini nga libro naghatag sa akon sing kaisog nga makigsugilanon sa akon mga ginikanan tuhoy sa mga butang nga yara sa akon hunahuna—lakip ang mga butang nga nahimo ko na.”

May iban pa nga paagi nga mabuligan ka sini nga libro nga mapauswag ang inyo komunikasyon sang imo bata. Sa katapusan sang kada kapitulo, makita ang kahon nga “What Do You Think?” Indi lamang ini isa ka repaso, kundi puede ini gamiton subong balayan para sa paghinun-anon sang pamilya. Sa hingapusan sang kada kapitulo, makita man ang kahon nga “Action Plan!” Ini nga kahon nagahatag sa mga pamatan-on sing kahigayunan nga isulat kon paano nila espesipiko nga maaplikar ang ila natun-an sa sina nga kapitulo. Ang katapusan nga bahin sa kahon nga “Action Plan!” nagasiling: “What I would like to ask my parent(s) about this subject is . . . ” Makabulig ini sa mga pamatan-on nga mangayo sing laygay sa ila mga ginikanan.

Lab-uta ang Tagipusuon!

Subong isa ka ginikanan, ang imo tulumuron amo ang paglab-ot sa tagipusuon sang imo bata. Ang Young People Ask, Volume 2, makabulig sa imo nga mahimo ini. Binagbinaga kon paano ini nga libro nakabulig sa isa ka amay sa pagpakighambal sing tinagipusuon sa iya bata nga babayi.

“Kami ni Rebekah may paborito nga mga lugar nga ginakadtuan sa diin nagalakatlakat kami, nagabisikleta, ukon nagamaneho sang salakyan. Nakita ko nga sa sini nga mga lugar, nangin mahapos para sa iya nga isugid sa akon ang iya balatyagon.

“Ang amon una nga ginbinagbinag sa sini nga libro amo ang sulat sang Nagadumala nga Hubon kag ang ‘A Note to Parents.’ Ginsilingan ko ang akon bata nga mahimo niya isulat ang iya mga sekreto sa iya libro, suno sa ginpanugda sa pahina 3 kag indi ko pagbasahon kon ano ang iya ginsulat.

“Ginpapili ko si Rebekah sang mga kapitulo nga luyag niya nga binagbinagon namon kag kon paano namon ini pasunuron. Ang isa sa una niya nga ginpili amo ang ‘Should I Play Electronic Games?’ Wala gid ako naglaum nga amo sina ang iya pilion! Apang, may rason sia. Ang pila sa iya mga abyan nagahampang sing makahaladlok katama nga hampang sa kompyuter. Wala gid ako sing ideya nga tuman gali kasingki kag bastos ang lenguahe sa sina nga hampang! Nahibaluan ko lang ini tanan sang ginbinagbinag namon ang “Action Plan!” sa pahina 251. Ina nga kahon nagbulig kay Rebekah nga makahanda kon ano ang iya himuon kon piliton sia nga maghampang sina nga mga hampang.

“Sa sini nga punto, wala na nagpangalag-ag si Rebekah sa pagsugid sa akon sang iya ginsulat sa iya libro. Ang amon pagtuon nangin masadya nga pagsugilanunay. Nagabulosbulos kami sa pagbasa, kag luyag na niya nga istoryahan namon ang halos tanan, pati ang mga laragway kag mga kahon. Naghatag man ini sa akon sing kahigayunan nga masugid sa iya kon ano anay ang akon ginbatyag sang pareho sa iya ang akon edad, kag nian ginasugid niya sa akon kon ano na karon ang ginabatyag sang mga kabataan. Luyag niya isugid sa akon ang tanan!”

Kon isa ikaw ka ginikanan, pat-od gid nga nalipay ka sang ginpagua ini nga libro. May kahigayunan ka na karon nga gamiton ini sing maayo. Ginalauman sang Nagadumala nga Hubon nga ang Questions Young People Ask—Answers That Work, Volume 2, mangin isa gid ka pagpakamaayo sa inyo pamilya. Kabay nga makabulig ini sa tanan—ilabi na sa aton pinalangga nga mga pamatan-on—nga ‘magpadayon sa paglakat suno sa balaan nga espiritu.’—Gal. 5:16.

[Nota]

[Kahon sa pahina 30]

Kon Ano ang Ginasiling sang Pila ka Pamatan-on

“Amo ini ang libro nga kinahanglan mo hatagan sing tion sa pagsulat kag sa pagpamalandong. Bangod gindesinyo ini kaangay sang ‘personal diary,’ puede mo ini masulatan sang imo mga ginahunahuna pati na sang imo mga tulumuron kon paano mo matigayon ang pinakamaayo nga dalanon sang pagkabuhi.”—Nicola.

“Madamo ang nagapamilit sa akon nga mag-‘date’ kag ang pila sa ila maayo man ang motibo. Ang una nga bahin sini nga libro nagkumbinsi sa akon nga bisan ano man ang isiling sang iban, indi pa ako handa nga mag-‘date.’”—Katrina.

“Ang kahon nga ‘Are You Thinking of Getting Baptized?’ nagbulig sa akon nga hunahunaon sing mas serioso ang akon bawtismo. Napahulag ako sini nga usisaon ang akon batasan sa pagtuon kag pagpangamuyo.”—Ashley.

“Bisan pa gintudluan ako sang akon Cristianong mga ginikanan sugod sang gamay pa ako, ini nga libro nagpahunahuna sa akon sang mga tikang nga dapat ko himuon sa akon kabuhi. Nakabulig man ini sa akon nga mangin bunayag sa akon mga ginikanan.”—Zamira.

[Retrato sa pahina 31]

Mga ginikanan, dapat kamo mangin pamilyar sa sini nga libro

[Retrato sa pahina 32]

Tinguhai nga lab-uta ang tagipusuon sang imo anak