Dapat Mo Bala Ipilit ang Imo mga Luyag?

NAGAHAMPANG ang duha ka bata. Gin-agaw sang isa ka bata ang iya paborito nga hampanganan sa isa kag nagsinggit, “Akon ni ya!” Sugod pa sa pagkabata, ginapakita na sang di-himpit nga tawo ang kakagod. (Gen. 8:21; Roma 3:23) Dugang pa, ang kalabanan sa kalibutan nagapasanyog sang “ako anay” nga panimuot. Agod malikawan ini nga huyog, dapat naton ini pakigbatuan. Kay kon indi, mapasandad naton ang iban kag magahuyang ang aton kaangtanan kay Jehova.—Roma 7:21-23.

Agod palig-unon kita nga binagbinagon kon ano ang epekto sang aton mga binuhatan sa iban, nagsulat si apostol Pablo: “Ang tanan nga butang ginatugot sang kasuguan; apang indi tanan nga butang mapuslanon. Ang tanan nga butang ginatugot sang kasuguan; apang indi tanan nga butang makapalig-on.” Nagsiling pa gid si Pablo: “Likawi ninyo nga mangin kabangdanan sang pagkasandad.” (1 Cor. 10:23, 32) Tuhoy sa mga butang nga aton naluyagan, maalamon nga pamangkuton naton ang aton kaugalingon: ‘Handa bala ako nga ipaiway ang akon pila ka kinamatarong kon makatublag man lang ini sa kongregasyon? Handa bala ako sa pagsunod sa mga prinsipio sa Biblia bisan pa mabudlay ini himuon?’

Sa Pagpili sing Trabaho

Ginatamod sang kalabanan nga tawo nga wala sing labot ang iban sa pagpili nila sing trabaho kay nagapati sila nga personal ini nga desisyon. Apang  binagbinaga ang eksperiensia sang isa ka negosyante sa diutay nga banwa sa Bagatnan nga Amerika. Nakilal-an sia nga tahor kag palahubog. Apang, subong resulta sang pagtuon niya sa Biblia upod sa mga Saksi ni Jehova, gin-aplikar niya ang iya natun-an kag nagbag-o. (2 Cor. 7:1) Sang nagpabutyag sia nga luyag niya magbantala upod sa kongregasyon, mataktikanhon sia nga ginpalig-on sang isa ka gulang nga binagbinagon niya anay ang iya sekular nga trabaho. Madugay na nga sia ang panguna nga nagasuplay sa ila banwa sang puro nga alkohol halin sa tubo. Madamo ang ginagamitan sini nga produkto, apang sa ila lugar, masami ini nga ginasimbugan sing soft drink agod mangin makahulubog nga ilimnon.

Nahangpan niya nga kon magbantala sia sa publiko kag magbaligya gihapon sini, mahimo nga mamusingan ang reputasyon sang kongregasyon kag mahimo magguba ang iya maayo nga kaangtanan sa Dios. Bisan pa daku ang iya pamilya nga ginasakdag, gin-untatan niya ini nga negosyo. Ginasuportahan niya karon ang iya pamilya paagi sa pagbaligya sing mga produkto nga human sa papel. Sa karon, ini nga tawo, ang iya asawa, kag ang duha sa lima nila ka kabataan mga bawtismado na. Makugi sila nga nagabantala sing maayong balita nga may kahilwayan sa paghambal.

Sa Pagpili sing mga Kaupdanan

Pagusto lang bala kita sa kon sin-o ang aton pakig-updan, ukon kinahanglan nga talupangdon naton ang mga prinsipio sa Biblia? Luyag sang isa ka utod nga babayi nga magkadto sa isa ka party upod sa isa ka pamatan-on nga lalaki nga indi Saksi. Bisan pa nga ginpaandaman na sia sa mga katalagman, para sa iya pagusto lang sia kon ano ang iya himuon, amo nga nagkadto sia sa party. Wala magdugay pag-abot nila, ginhatagan sia sing ilimnon nga nasamuan sing pangpatulog. Pagligad sang pila ka oras, nakabugtaw sia kag narealisar niya nga ginlugos sia sang iya ginkabig nga abyan.—Ipaanggid ang Genesis 34:2.

Bisan pa wala man gid pirme nagaresulta sa trahedya nga kaangay sini ang pagpakig-upod sa mga indi tumuluo, nagpaandam ang Biblia: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” (Hulu. 13:20) Matuod gid ini—ang pagpakig-upod sa malain nga mga kaupdanan makatalagam! “Ang mahalongon nga tawo nakakita sang malaut kag nagapanago sia,” siling sang Hulubaton 22:3, “apang ang kulangkulang nagapadayon, kag nagaantus tungud sini.” Ang aton mga kaupdanan mahimo nga makaapektar sa aton kag sa aton kaangtanan sa Dios.—1 Cor. 15:33; Sant. 4:4.

Sa Pamayo kag Pamustura

Pirme nagabag-o ang uso nga pamayo kag pamustura. Apang, wala nagabag-o ang mga prinsipio sang Biblia tuhoy sa sini. Ginapalig-on ni Pablo ang Cristianong mga babayi nga “magpamuni paagi sa mahipid nga pagpamayo nga may kaugdang kag maligdong nga hunahuna,” isa ka prinsipio nga maaplikar man sa mga lalaki. (1 Tim. 2:9) Wala  ginrekomendar ni Pablo nga indi na kinahanglan ang manami nga bayo, ukon dapat nga mangin palareho ang estilo sang bayo sang tanan nga Cristiano. Apang kamusta ang pagkaugdang? Ginpaathag sang isa ka diksionaryo ang kaugdang subong “wala nagapahambog ukon nagapakitakita . . . nagakaigo nga pamayo, paghambal, ukon paggawi.”

Dapat naton pamangkuton ang aton kaugalingon: ‘Masiling ko gid bala nga maugdang ako kon ginapilit ko ang akon naluyagan nga pagpamayo nga nagakuha sing atension sang mga tawo? Ang akon bala pagpamayo nagahatag sing malain nga impresyon sa iban tuhoy sa akon kag sa akon ginasunod nga mga talaksan sa moral?’ Malikawan naton nga ‘makahatag sing kasandaran’ sa sini nga bahin paagi sa ‘pagtuon sang aton mata, indi lamang sa aton personal nga kaayuhan, kundi sa personal nga kaayuhan man sang iban.’—2 Cor. 6:3; Fil. 2:4.

Sa Negosyo

Sang nag-utwas ang serioso nga hulusayon tuhoy sa sayop ukon sa pagpangdaya sa kongregasyon sa Corinto, si Pablo nagsulat: “Ngaa indi na lang ninyo pagpabay-an nga himuan kamo sing sayop? Ngaa indi na lang ninyo pagpabay-an nga dayaan kamo?” Ginlaygayan ni Pablo ang mga Cristiano nga mangin handa sa pagpaiway sa baylo nga dalhon sa korte ang isa ka utod. (1 Cor. 6:1-7) Ginsunod sang isa ka utod sa Estados Unidos ini nga laygay. Sia kag ang iya Cristiano nga amo indi mag-ugyunay sa dapat nga isueldo kuntani sa iya. Bilang pagsunod sa mga panuytoy sang Kasulatan, madamong beses nga nagsugilanon ang duha ka utod apang wala nasolbar ang problema. Sang ulihi, nagpabulig sila “sa kongregasyon,” nga ginatiglawas sang Cristianong mga gulang.—Mat. 18:15-17.

Makapasubo nga wala gihapon nasolbar ang problema. Pagkatapos sang madamo nga pangamuyo, nagpaumod na lang sia kag wala na ginsukot ang ginabanta niya nga utang sang iya amo. Ngaa? Nagsiling sia sang ulihi, “Ini nga problema nagdula sang akon kalipay kag nag-ubos sang akon hamili nga tion nga nagamit ko kuntani sa pag-alagad sa Dios.” Pagkatapos sini nga desisyon, nagbatyag sia liwat sing kalipay, kag nabatyagan niya ang pagpakamaayo ni Jehova sa iya pag-alagad.

Bisan sa Diutay nga mga Butang

Ang indi pagpilit sang aton mga luyag bisan sa diutay nga mga butang ginapakamaayo man. Sa una nga adlaw sang distrito nga kombension, nakaabot sing temprano ang mag-asawa nga payunir kag nakapuesto sa pulungkuan nga nanamian gid nila. Sang nagsugod ang programa, isa ka pamilya nga may pila ka kabataan ang nagadalidali sa pagsulod sa puno na nga tilipunan. Natalupangdan sining mag-asawa nga payunir nga nagapangita sang maiguan nga pulungkuan ini nga pamilya, amo nga ginhatag na lang nila ang ila pulungkuan. Bangod sini, nakapungko sing ululupod ang bug-os nga pamilya. Pila ka adlaw pagligad sang kombension, ang mga payunir nakabaton sing sulat halin sa pamilya nga nagapasalamat sa ila. Ginpaathag sang sulat nga naluyahan gid sing buot ini nga pamilya kay naulihi sila sa kombension. Apang bangod sa kaayo sang mag-asawa nga payunir, ini nga balatyagon nabuslan sang kalipay kag pagpasalamat.

Kon may kahigayunan kita, kabay nga mangin handa kita sa pagpaiway sang aton mga luyag para sa iban. Paagi sa pagpakita sing gugma nga “wala nagapangita sang kaugalingon nga kaayuhan,” makabulig kita sa paghupot sing paghidait sa kongregasyon kag sa aton isigkatawo. (1 Cor. 13:5) Apang, labaw sa tanan, mahuptan naton ang aton pagpakig-abyan kay Jehova.

[Retrato sa pahina 20]

Handa mo bala ipaiway ang imo mga luyag sa pagpili sang estilo sa pagpamayo?

[Retrato sa pahina 20, 21]

Handa ka bala sa paghatag sang imo pulungkuan para sa imo mga kauturan?