Indi Pagbiyaan ni Jehova ang mga Mainunungon sa Iya

“Indi [ni Jehova] pagbiyaan ang mga mainunungon sa iya. Bantayan niya sila tubtob sa walay katubtuban.”​—SAL. 37:28, NW.

1, 2. (a) Ano ang natabo sang ikanapulo nga siglo B.C.E. nga nagtilaw sa pagkamainunungon sang mga alagad sang Dios? (b) Sa anong tatlo ka kahimtangan gin-amligan ni Jehova yadtong mga mainunungon sa iya?

IKANAPULO nga siglo B.C.E., tion na agod magdesisyon. Ang inaway sa Israel nalikawan paagi sa paghatag sing kahilwayan sa naaminhan nga mga tribo. Ang ila bag-ong gintangdo nga hari nga si Jeroboam, nagpalig-on gilayon sang iya gahom paagi sa pagtukod sing bag-o nga relihion sang Estado. Luyag niya nga ang iya mga sakop mag-unong gid sa iya. Ano ang himuon sang matutom nga mga alagad ni Jehova? Mapabilin bala sila nga mainunungon sa Dios nga ila ginasimba? Amo sini ang ginhimo sang linibo sa ila, kag ginbantayan gid sila ni Jehova samtang ginahuptan nila ang ila integridad.​—1 Hari 12:1-33; 2 Cron. 11:13, 14.

² Ang pagkamainunungon sang mga alagad sang Dios ginatilawan man karon. “Hupti ang inyo kaligdong, mangin mabinantayon,” paandam sang Biblia. “Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.” Magmadinalag-on ayhan kita sa ‘pagtindog batok sa iya’ kag makapabilin nga malig-on sa pagtuo? (1 Ped. 5:8, 9) Usisaon naton ang pila ka hitabo may kaangtanan sa pagtangdo kay Hari Jeroboam sang 997 B.C.E. kag tan-awon naton kon ano nga mga leksion ang matun-an naton. Sadtong mabudlay nga mga tion, ginpigos ang matutom nga mga alagad ni Jehova. Samtang ginatuman nila ang ila mabudlay nga mga hilikuton, nakasumalang man sila sing apostasya. Sa sining mga kahimtangan, wala ginbiyaan ni Jehova ang mga mainunungon sa iya, kag makasalig kita nga amo man sini ang iya himuon sa aton panahon.​—Sal. 37:28.

Kon Ginapigos

3. Ngaa indi mapiguson ang paggahom ni Hari David?

³ Usisaon naton anay ang mga kahimtangan sang nangin hari si Jeroboam. Ang Hulubaton 29:2 nagasiling: “Kon maggahum ang malaut nga tawo, ang katawohan nagapanghayhay.” Sang si Hari David ang naggahom sa dumaan nga Israel, wala nagpanghayhay ang mga tawo. Si David indi himpit, apang mainunungon sia kag nagsalig sa Dios. Ang paggahom ni David indi mapiguson. Si Jehova naghimo sing katipan kay David, nga nagasiling: “Ang imo panimalay kag ang imo ginharian papag-onon sing dayon sa atubang mo; ang imo trono palig-onon sing dayon.”​—2 Sam. 7:16.

4. Sa ano nagadepende ang mga pagpakamaayo nga naagom sa tion sang paggahom ni Solomon?

⁴ Sa primero, mahidaiton kag mahamungayaon ang paggahom sang anak ni David nga si Solomon amo nga naglandong pa gani ini sa palaabuton nga Milenyo nga Paggahom ni Cristo Jesus. (Sal. 72:1, 17) Sadto nga tion, wala gid sing rason ang bisan isa sa 12 ka tribo sang Israel nga magrebelde. Apang, ang mga pagpakamaayo nga naagom ni Solomon kag sang iya mga sakop may kondisyon. Ginsilingan ni Jehova si Solomon: “Kon maglakat ka sa akon mga palatukuran kag magtuman sang akon mga pagsolondan kag magbantay sang tanan ko nga sogo sa paglakat sa ila, niyan lig-onon ko sa imo ang akon polong, nga ginpamolong ko kay David nga imo amay. Kag magapuyo ako sa tunga sang mga anak sang Israel, kag indi magbiya sang akon katawohan nga Israel.”​—1 Hari 6:11-13.

5, 6. Ano ang natabo sang nangin di-matutom si Solomon sa Dios?

 ⁵ Apang, sang nagtigulang na si Solomon, nangin di-matutom sia kay Jehova kag nagbuylog sa butig nga pagsimba. (1 Hari 11:4-6) Amat-amat nga nag-untat si Solomon sa pagtuman sa mga kasuguan ni Jehova kag nangin mapiguson. Nangin tuman sia ka mapiguson amo nga bisan gani napatay na sia, ginareklamo gihapon sia sang mga tawo. Kag nangayo sila sing kaumpawan sa iya anak nga nagbulos sa iya nga si Rehoboam. (1 Hari 12:4) Ano ang reaksion ni Jehova sang nangin di-matutom si Solomon?

⁶ Ang Biblia nagasugid sa aton: “Naakig ang GINOO kay Salomon, [“Solomon,” NW] bangud nga nagtalang ang iya tagiposoon gikan sa . . . Dios sang Israel, nga nakapahayag sa iya sing makaduha.” Ginsilingan ni Jehova si Solomon: “Sanglit nga . . . wala mo pagbantayi ang akon katipan kag ang akon mga palatukuran nga ginsogo ko sa imo, sa pagkamatuud kusniton ko ang ginharian gikan sa imo kag ihatag ini sa imo alagad.”​—1 Hari 11:9-11.

7. Bisan pa ginsikway si Solomon, paano gin-atipan ni Jehova ang mga mainunungon sa Iya?

⁷ Ginpadala ni Jehova si manalagna Ahias agod haplasan ang isa ka manluluwas. Inang manluluwas amo si Jeroboam, isa ka sangkol nga lalaki nga nagpangalagad anay sa panguluhan ni Solomon. Bisan pa nag-unong si Jehova sa iya katipan kay David para sa Ginharian, ginpahanugutan Niya nga matunga ang 12 ka tribo. Ang napulo ka tribo ihatag kay Jeroboam; ang duha naman gamhan sang mga kaliwat ni David, nga gintiglawas ni Hari Rehoboam. (1 Hari 11:29-37; 12:16, 17, 21) Ginsilingan ni Jehova si Jeroboam: “Kon magpamati ka sa tanan nga ginasogo ko sa imo, kag maglakat sa akon mga dalanon, kag maghimo sang matarung sa akon mga mata sa pagbantay sang akon mga palatukuran kag sang akon mga sogo, subong sang ginhimo ni David nga akon alagad, ako magaupud sa imo, kag magapatindug sa imo sing balay nga malig-on, subong sang ginpatindug ko kay David, kag magahatag ako sang Israel sa imo.” (1 Hari 11:38) Naghulag si Jehova agod mahatagan sing kaumpawan ang iya katawhan nga ginapigos.

8. Ano nga mga pagpigos ang naeksperiensiahan sang katawhan sang Dios sa karon?

⁸ Sa karon, lapnag gid ang pagpamigos kag inhustisya. “Ang pila ka mga tawo may gahom, kag ang iban nagaantos sa idalom nila,” siling sang Manugwali 8:9, Maayong Balita nga Biblia. Ang makagod nga komersio kag garok nga pagginobierno mahimo tunaan sang kapigaduhon sang mga tawo. Ang mga lider sa gobierno, negosyo, kag relihion masami nga indi maayo nga halimbawa sa moralidad. Busa, kaangay sang matarong nga si Lot, ang mga mainunungon sa Dios karon “natublag gid sa pagpatuyang sa lugak nga paggawi sang mga tawo nga di-matinumanon sa kasuguan.” (2 Ped. 2:7) Dugang pa, bisan nagapanikasog gid kita nga magkabuhi nahisuno sa talaksan sang Dios, masami kita nga ginahingabot sang matinaastaason nga mga manuggahom.​—2 Tim. 3:1-5, 12.

9. (a) Ano na ang nahimo ni Jehova agod luwason ang iya katawhan? (b) Ngaa makapat-od kita nga mangin mainunungon gid si Jesus sa Dios?

⁹ Apang makasalig gid kita sa kamatuoran nga: Indi pagbiyaan ni Jehova ang mga mainunungon sa iya! Hunahunaa lamang kon ano na ang ginhimo niya agod islan ang garok nga mga gumalahom. Natukod na ang Mesianikong Ginharian sang Dios nga ginagamhan ni Cristo Jesus. Halos isa na ka gatos ka tuig nga nagagahom si Jesucristo sa langit. Sa dili madugay, hatagan niya sing bug-os nga kaumpawan yadtong mga nagakahadlok sa ngalan sang Dios. (Basaha ang Bugna 11:15-18.) Napamatud-an na ni Jesus nga mainunungon sia sa Dios tubtob sa kamatayon. Indi sia mangin kaangay ni Solomon nga nagpaslaw sa iya mga sakop.​—Heb. 7:26; 1 Ped. 2:6.

10. (a) Paano naton mapakita nga ginapabaloran gid naton ang Ginharian sang Dios? (b) Kon nagaatubang sang mga pagtilaw, ano ang masaligan naton?

¹⁰ Ang Ginharian sang Dios isa ka matuod nga panguluhan nga magadula sang tanan nga sahi sang pagpamigos. Dapat mainunungon kita kay Jehova nga Dios kag sa iya Ginharian. Nagasalig kita sing bug-os sa Ginharian, amo nga ginasikway naton ang di-diosnon nga paggawi sang mga tawo sa palibot naton kag ginapanikasugan ang paghimo sing maayong mga buhat. (Tito 2:12-14) Ginapanikasugan man naton nga magpabilin nga wala sing higko sa sining kalibutan. (2 Ped. 3:14) Bisan ano pa nga pagtilaw ang maatubang naton karon, makasalig kita nga amligan kita ni Jehova gikan sa espirituwal nga mga kahalitan. (Basaha ang  Salmo 97:10. *) Dugang pa, ginapasalig kita sang Salmo 116:15 (NW): “Bilidhon sa mga mata ni Jehova ang kamatayon sang mga mainunungon sa iya.” Tuman gid ka bilidhon kay Jehova ang iya mga alagad amo nga indi gid niya pagtugutan nga mapatay sila tanan.

Kon Madayag sa Apostasya

11. Ano ang ginhimo ni Jeroboam nga nagpakita nga indi sia mainunungon?

¹¹ Ginalauman nga ang paggahom ni Hari Jeroboam makahatag kuntani sing kaumpawan sa katawhan sang Dios. Sa baylo, ang iya mga ginpanghimo nagtilaw pa gid sang ila pagkamainunungon sa Dios. Bangod wala pa nakontento sa kadungganan kag pribilehiyo nga ginhatag sa iya, nangita pa si Jeroboam sing paagi nga mapabakod ang iya posisyon. “Kon ining katawohan magtaklad sa pagdolot sing mga halad sa balay sang GINOO sa Jerusalem,” pangatarungan niya, “ang tagiposoon sining katawohan magaliso sa ila ginoo, bisan kay Roboam [“Rehoboam,” NW] nga hari sang Juda, kag patyon nila ako kag magabalik [sila] kay Roboam nga hari sang Juda.” Busa, nagtukod si Jeroboam sing bag-o nga relihion nga nasentro sa pagsimba sa duha ka tinday nga baka nga bulawan. “Kag ginbutang niya ang isa sa Bet-el, kag ang isa ginbutang niya sa Dan. Kag ining butang nanginsala, kay ang katawohan nagkadto sa pagsimba sa atubangan sang isa bisan sa Dan. Naghimo sia sing mga balay sa mataas nga mga duug, kag naghimo sing mga sacerdote gikan sa bug-os nga katawohan, nga indi gikan sa mga anak ni Levi.” Nag-imbento pa gani si Jeroboam sang iya kaugalingon nga “piesta sa katawohan sang Israel, kag nagsaka sa halaran sa pagsonog sing incienso.”​—1 Hari 12:26-33.

12. Ano ang ginhimo sang mga mainunungon sa Dios nga yara sa aminhan nga ginharian sang ginsugdan ni Jeroboam ang pagsimba sa tinday nga baka sa Israel?

¹² Ano karon ang himuon sang mga mainunungon sa Dios sa naaminhan nga Ginharian? Kaangay sang ila matutom nga mga katigulangan, naghulag gilayon ang mga Levinhon nga nagapuyo sa mga siudad nga ginhatag sa ila sa teritoryo sang naaminhan nga ginharian. (Ex. 32:26-28; Num. 35:6-8; Deut. 33:8, 9) Ginbiyaan nila ang ila mga palanublion kag ginsaylo ang ila pamilya sa bagatnan, sa Juda, diin makapadayon sila sa ila pagsimba kay Jehova nga wala sing tublag. (2 Cron. 11:13, 14) Ang iban nga mga Israelinhon nga temporaryo nga nagapuyo sa Juda nagdesisyon nga magtener na lang diri sing permanente sa baylo nga magpauli. (2 Cron. 10:17) Ginsiguro ni Jehova nga magapabilin ang matuod nga pagsimba agod nga kon mag-untat na sa pagsimba sa tinday nga baka ang pila sa naaminhan nga ginharian, puede sila gihapon makabalik sa Juda.​—2 Cron. 15:9-15.

13. Paano ang impluwensia sang mga apostata nagtilaw sa katawhan sang Dios sa karon?

 ¹³ Makatalagam man karon sa katawhan sang Dios ang mga apostata kag ang ila impluwensia. Ang iban nga manuggahom nagtinguha nga magtukod sing relihion sang Estado kag ginapilit ang ila mga sakop nga batunon ini. Ang klero sang Cristiandad kag ang iban pa nga ambisyuso nga mga tawo nagapangangkon nga sila ang gintagna nga harianon nga mga saserdote. Apang, ang matuod nga mga hinaplas, nga ginahuman sang “harianon nga mga saserdote” makita lamang naton sa tunga sang matuod nga mga Cristiano.​—1 Ped. 2:9; Bug. 14:1-5.

14. Ano dapat ang aton reaksion sa apostata nga panghunahuna?

¹⁴ Kaangay sang matutom nga mga Levinhon sang ikanapulo nga siglo B.C.E., ang mga mainunungon sa Dios karon indi man malimbungan sang apostata nga mga ideya. Ang mga hinaplas kag ang ila Cristianong mga kaupod maabtik sa paglikaw kag sa pagsikway sa apostata nga mga ideya. (Basaha ang Roma 16:17.) Bisan pa nagapasakop kita sa gobierno kon tuhoy sa sekular nga mga butang, nagapabilin kita nga neutral sa kalibutanon nga mga sinuay bangod mainunungon kita sa Ginharian sang Dios. (Juan 18:36; Roma 13:1-8) Ginasikway naton ang mga nagapangangkon nga nagaalagad sa Dios apang nagapanghiwala sa Iya paagi sa ila mga buhat.​—Tito 1:16.

15. Ngaa “ang matutom kag mainandamon nga ulipon” takus sang aton pagkamainunungon?

¹⁵ Dumduma man nga naghimo na si Jehova sing paagi nga ang mga bunayag sing tagipusuon makagua sa malaut nga kalibutan kag makasulod sa espirituwal nga paraiso nga iya gintuga. (2 Cor. 12:1-4) Upod ang tagipusuon nga puno sing apresasyon, nagapabilin kita nga suod sa “matutom kag mainandamon nga ulipon nga gintangdo sang iya agalon sa pagdumala sa iya panimalay, sa paghatag sa ila sang ila pagkaon sa nagakaigo nga tion.” Gintangdo ni Cristo ining ulipon nga “magdumala sa tanan niya nga pagkabutang.” (Mat. 24:45-47) Gani, bisan pa indi naton mahangpan sing bug-os ang panindugan sang ulipon nga klase, wala kita sing rason nga sikwayon ini ukon magbalik sa kalibutan ni Satanas. Sa baylo, ang pagkamainunungon magapahulag sa aton nga maghulat sing mapainubuson kay Jehova sa pagpaathag sang mga butang.

Kon Nagahimo sang mga Hilikuton Gikan sa Dios

16. Ano ang asaynment sang isa ka manalagna gikan sa Juda?

¹⁶ Ginpakamalaut ni Jehova si Jeroboam bangod sang iya pag-apostata. Nagtangdo si Jehova sing isa ka manalagna gikan sa Juda agod magkadto paaminhan sa Betel kag makigkita kay Jeroboam samtang nagahalad sia sa iya altar. Ihatag sang manalagna ang isa ka malaglagon nga pamatbat kay Jeroboam. Walay duhaduha nga isa gid ini ka mabudlay nga asaynment.​—1 Hari 13:1-3.

17. Paano gin-amligan ni Jehova ang iya mensahero?

¹⁷ Nagsingkal gid si Jeroboam sang nabatian niya ang pagpakamalaut ni Jehova. Gin-untay niya ang iya kamot sa tiglawas sang Dios kag ginsinggitan ang iya mga tinawo: “Dakpa sia.” Apang sa hinali, wala pa gani sila makahulag, “ang iya kamut, nga gin-untay batok sa iya, naitus, sa bagay nga indi na niya mapabalik sa iya. Ang halaran man nawasak, kag naula ang abo gikan sa halaran.” Napilitan si Jeroboam nga pangabayon ang manalagna nga mangamuyo kay Jehova para maulian ang iya naitos nga kamot. Ginhimo ini sang manalagna, kag naulian ang kamot ni Jeroboam. Busa gin-amligan ni Jehova ang iya mensahero gikan sa kahalitan.​—1 Hari 13:4-6.

18. Paano kita ginaamligan ni Jehova samtang nagahimo kita sing sagrado nga pag-alagad sa iya nga wala sing kahadlok?

¹⁸ Samtang mainunungon kita nga nagapakigbahin  sa pagbantala sang Ginharian kag paghimo disipulo nga hilikuton, makasumalang kita kon kaisa sing di-mainabyanon, ukon masingki pa gani nga mga tawo. (Mat. 24:14; 28:19, 20) Apang, indi naton dapat pagtugutan ang kahadlok nga magpatahaw sang aton kakugi sa ministeryo. Kaangay sang wala mahingadlan nga manalagna sang panahon ni Jeroboam, may “pribilehiyo [kita] sa paghimo sing sagrado nga pag-alagad [kay Jehova] nga wala sing kahadlok upod ang pagkamainunungon.” * (Luc. 1:74, 75) Bisan pa indi kita karon makapaabot sing mga milagro, ginaamligan gihapon ni Jehova ang iya mga Saksi paagi sa iya balaan nga espiritu kag mga anghel. (Basaha ang Juan 14:15-17; Bugna 14:6.) Indi gid pagbiyaan ni Jehova ang mga nagapadayon sa pagbantala sang iya pulong nga wala sing kahadlok.​—Fil. 1:14, 28.

Amligan ni Jehova ang mga Mainunungon sa Iya

19, 20. (a) Ngaa makasalig kita nga indi kita pagbiyaan ni Jehova? (b) Ano nga mga pamangkot ang pagabinagbinagon sa masunod nga artikulo?

¹⁹ Si Jehova isa ka mainunungon nga Dios. (Bug. 15:4; 16:5) “Mainunungon [sia] sa tanan niya nga binuhatan.” (Sal. 145:17, NW) Kag ang Biblia nagapasalig sa aton: “Ginabantayan niya ang mga matutom sa iya.” (Hulu. 2:8, Maayong Balita nga Biblia) Busa, kon ang mga mainunungon sa Dios makasumalang sing mga pagtilaw ukon apostata nga mga ideya samtang nagahimo sang isa ka mabudlay nga hilikuton, makasalig sila nga tuytuyan sila kag sakdagon ni Jehova.

²⁰ Bilang indibiduwal, amo sini ang kinahanglan naton pamalandungan karon: Ano ang makabulig sa akon agod mahuptan ko ang akon pagkamainunungon kay Jehova walay sapayan sang mga pagtilaw ukon mga pagsulay nga akon maatubang? Sa iban nga hambal, paano ko mapalig-on ang akon pagkamainunungon sa Dios?

[Mga footnote]

Ano ang Imo Sabat?

• Paano ginpakita ni Jehova nga wala niya ginabiyaan ang mga mainunungon sa iya kon piguson sila?

• Ano dapat ang mangin reaksion naton sa mga apostata kag sa ila mga ideya?

• Paano ginaamligan ni Jehova ang mga mainunungon sa iya samtang nagapakigbahin sila sa Cristianong ministeryo?

[Mga Pamangkot sa Pagtinuon]

[Mapa/Piktyur sa pahina 5]

(Para sa aktual nga pormat, tan-awa ang publikasyon)

NAAMINHAN NGA GINHARIAN (Jeroboam)

Dan

SIQUEM

Betel

NABAGATNAN NGA GINHARIAN (Rehoboam)

JERUSALEM

[Piktyur]

Sang ginsugdan ni Jeroboam ang pagsimba sa tinday nga baka, wala ginbiyaan ni Jehova ang mga mainunungon sa iya

[Piktyur sa pahina 3]

Ang mga pagpakamaayo nga naagom ni Solomon kag sang iya mga sakop may kondisyon