Ang Pagbantala sa mga Balay—Ngaa Importante Subong?

“Adlaw-adlaw sa templo kag sa mga balay padayon sila nga wala nagauntat sa pagpanudlo kag sa pagbantala sing maayong balita tuhoy sa Cristo, si Jesus.”​—BINU. 5:42.

1, 2. (a) Sa ano nga pamaagi sang pagbantala nakilal-an ang mga Saksi ni Jehova? (b) Ano ang aton binagbinagon sa sini nga artikulo?

KINAANDAN na lang nga makita sa halos tanan nga pungsod ang duha ka tawo nga nagasuksok sing disente nga bayo nga nagakadto sa mga balay. Ginatinguhaan nila nga mapaambit sa tagbalay ang malip-ot nga mensahe gikan sa Biblia tuhoy sa Ginharian sang Dios. Kon interesado ang tagbalay sa mensahe, ginatanyagan nila sia sing pasad sa Biblia nga mga literatura kag wala sing bayad nga pagtuon sa Biblia sa puluy-an. Nian makadto sila sa masunod nga balay. Kon nagapakigbahin kamo sa sini nga hilikuton, mahimo masapwan ninyo nga bisan wala pa kamo makasugilanon sa mga tawo makilal-an na nila kamo nga mga Saksi ni Jehova. Sa pagkamatuod, nangin kilala kita bangod sang pagbantala sa mga balay.

² Nagagamit kita sing nanuhaytuhay nga pamaagi sa pagtuman sang sugo ni Jesus nga magbantala kag maghimo sing disipulo. (Mat. 28:19, 20) Nagapanaksi kita sa mga merkado, kalye, kag publiko nga mga duog. (Binu. 17:17) Ginapanaksihan naton ang iban paagi sa telepono kag sulat. Sa aton adlaw-adlaw nga mga hilikuton, ginapaambit naton ang kamatuoran sa Biblia sa tanan naton nga masugilanon. May Web site pa gani kita, nga nagaaman sing mga pasad sa Biblia nga mga impormasyon sa kapin sa 300 ka lenguahe. * Ining tanan nga pamaagi may maayo nga mga resulta. Apang, sa kalabanan nga duog, ang aton panguna nga pamaagi sa pagpalapnag sing maayong balita amo ang pagbantala sa mga balay. Sa diin napasad ini nga pamaagi? Paano ini nangin panguna nga pamaagi sa pagbantala sang katawhan sang Dios subong? Kag ngaa importante ini subong?

Pamaagi sang mga Apostoles

3. Ano ang ginhambal ni Jesus sa iya mga apostoles tuhoy sa pagbantala, kag ano ang ginapahangop sini?

³ Ang pagbantala sa mga balay napasad sa Kasulatan. Sang ginpadala ni Jesus ang iya mga apostoles sa pagbantala, ginhambalan niya sila: “Bisan diin nga siudad ukon minuro kamo magsulod, pangitaa ninyo kon sin-o didto ang takus.” Paano nila pangitaon ang mga takus? Ginsilingan sila ni Jesus nga makadto sa balay sang mga tawo nga nagasiling: “Kon nagasulod kamo sa balay, tamyawa ninyo ang panimalay; kag kon ang panimalay takus, ang inyo paghidait mangin sa sini.” Hulaton pa bala nila nga agdahon sila? Talupangda ang ginsiling pa gid ni Jesus: “Bisan diin nga wala sing isa nga magbaton sa inyo ukon magpamati sa inyo mga pulong, sa paggua ninyo sa amo nga balay ukon sa amo nga siudad itaktak ang yab-ok sa inyo mga tiil.” (Mat. 10:11-14) Maathag sa sini nga instruksion nga kon magkadto ang mga apostoles “sa mga minuro, nga nagabantala sang maayong balita,” kinahanglan magmatumato sila sa pagduaw sa mga tawo sa ila mga balay.​—Luc. 9:6.

4. Ano nga mga teksto ang direkta nga nagasambit tuhoy sa pagbantala sa mga balay?

⁴ Espesipiko nga nagasiling ang Biblia nga nagbantala sa mga balay ang mga apostoles. Halimbawa, nagsiling ang Binuhatan 5:42 tuhoy sa ila: “Adlaw-adlaw sa templo kag sa mga balay padayon sila nga wala nagauntat sa pagpanudlo kag sa pagbantala sing maayong balita tuhoy sa Cristo, si Jesus.” Pagligad sing mga 20 ka  tuig, ginpahanumdom ni apostol Pablo ang mga gulang sa kongregasyon sa Efeso: “Wala ako magpugong sa pagsugid sa inyo sing bisan ano sa mga butang nga mapuslanon ukon sa pagtudlo sa inyo sing dayag kag sa mga balay.” Ginduaw bala ni Pablo ini nga mga gulang antes sila nangin mga tumuluo? Maathag nga ginduaw sila ni Pablo, kay lakip sa iya gintudlo sa ila amo ang “tuhoy sa paghinulsol sa Dios kag pagtuo sa aton Ginuong Jesus.” (Binu. 20:20, 21) Tuhoy sa Binuhatan 20:20, ang Robertson’s Word Pictures in the New Testament nagkomento: “Talalupangdon gid nga ining labing bantog nga manugbantala nagbantala sa mga balay.”

Ang Tulad-Apan nga Hubon sa Aton Adlaw

5. Paano ginlaragway sa tagna ni Joel ang pagbantala nga hilikuton?

⁵ Ang pagbantala sang una nga siglo panugod lamang sang mas daku pa nga hilikuton sa pagbantala sa aton adlaw. Ginlaragway ni manalagna Joel ang pagbantala sang hinaplas nga mga Cristiano sa malaglagon nga pagsalakay sang mga insekto, lakip na sang mga apan. (Joel 1:4) Nagasalakay ang mga apan kaangay sang hubon sang mga soldado, nagalandas sang dalagku nga mga balagbag, nagasulod sa mga balay, kag nagahalunhon sang tanan nga butang nga ila maagyan. (Basaha ang Joel 2:2, 7-9.) Isa gid ini ka maathag nga paglaragway tuhoy sa pagbatas kag kaid-id sang katawhan sang Dios sa ila pagbantala subong! Ang panguna nga pamaagi sang hinaplas nga mga Cristiano kag sang ila kaupod nga “iban nga mga karnero” sa pagtuman sini nga tagna amo ang pagbantala sa mga balay. (Juan 10:16) Subong mga Saksi ni Jehova, paano naton nasunod ining pamaagi sang una sang mga apostoles sa pagbantala?

6. Sang 1922, ano ang ginpalig-on tuhoy sa pagbantala sa mga balay, apang ano ang reaksion sang iban?

⁶ Sugod sang 1919, ginpadaku ang responsibilidad sang tagsa ka Cristiano nga magbantala. Halimbawa, sa artikulo nga “Importante ang Pag-alagad” [“Service Essential”] sa Watch Tower nga Agosto 15, 1922, ginpahanumdom sa hinaplas nga mga Cristiano nga importante ang “pagpanagtag sing mga balasahon sa mga tawo kag pagpakigsugilanon sa ila sa ila mga balay, kag sa pagpanaksi nga malapit na ang ginharian sang langit.” Gin-aman ang detalyado nga mga presentasyon sa pagbantala sa Bulletin (karon Ang Aton Ministeryo sa Ginharian). Apang sang primero,  diutay lamang ang nagabantala sa mga balay. Ang iban nangindi sa pagbantala. Madamo sila sing balibad, apang ang panguna nga problema amo nga nagabatyag ang iban nga kubos sila kon magbantala sila sa mga balay. Sang ginpadaku pa gid nga kinahanglan nga magbantala, madamo sining reklamador ang amat-amat nga nagbiya sa organisasyon ni Jehova.

7. Sang katuigan 1950, ano ang nakita nga kinahanglanon?

⁷ Sa masunod nga mga dekada, nagdamo ang nagbuylog sa pagbantala. Apang, nakita nga kinahanglan pa ang dugang nga paghanas sa pagbantala sa mga balay. Halimbawa, sang maaga nga bahin sang katuigan 1950, 28 porsiento sang mga Saksi sa Estados Unidos ang nagapanagtag lamang sing mga handbill ukon nagatindog sa mga kalye nga nagauyat sing mga magasin sa tion sang ila pagbantala. Kapin sa 40 porsiento ang indi regular sa pagbantala, nga nagapaligad sang binulan nga indi makabantala. Ano ang himuon agod mabuligan ang tanan nga dedikado nga Cristiano sa pagbantala sa mga balay?

8, 9. Ano nga paghanas ang ginsugdan sang 1953, kag ano ang resulta sini?

⁸ Sa internasyonal nga kombension nga ginhiwat sa New York City sang 1953, ginpadaku ang pagbantala sa mga balay. Nagsiling si Utod Nathan H. Knorr nga ang panguna nga hilikuton sang tanan nga Cristianong manugtatap amo ang pagbulig sa kada Saksi nga mangin regular sa pagbantala sa mga balay. “Ang tanan,” siling niya, “dapat makahibalo magbantala sing maayong balita sa mga balay.” Ginsugdan ang bug-os kalibutan nga paghanas agod magmadinalag-on ini nga tulumuron. Yadtong wala pa nakabantala sa mga balay ginhanas sa pagsugilanon sa mga tawo sa ila mga balay, sa pagsugid sa ila sing mensahe sa Biblia, kag sa pagsabat sang mga pamangkot sang tagbalay.

⁹ Dalayawon gid ang resulta sini nga paghanas. Sa sulod sang isa ka dekada, nag-uswag sing 100 porsiento ang mga manugbantala, 126 porsiento ang mga pagduaw-liwat, kag 150 porsiento ang pagtuon sa Biblia sa bug-os nga kalibutan. Karon, halos pito ka milyon na ang mga manugbantala sang Ginharian nga nagabantala sing maayong balita sa bug-os nga kalibutan. Ini nga pag-uswag pamatuod gid sang pagpakamaayo ni Jehova sa mga panikasog sang iya katawhan sa pagbantala sa mga balay.​—Isa. 60:22.

Pagtanda sa mga Tawo Para sa Kaluwasan

10, 11. (a) Ano ang palanan-awon ni Ezequiel nga narekord sa Ezequiel kapitulo 9? (b) Paano natuman ini nga palanan-awon sa aton adlaw?

¹⁰ Ang importansia sang pagbantala sa mga balay makita sa palanan-awon ni manalagna Ezequiel. Sa sina nga palanan-awon, nakakita si Ezequiel sing anom ka lalaki nga may hinganiban. Nakita man niya ang ikapito nga lalaki nga napanaptan sing lino nga may tintirohan sang sekretaryo sa iya kilid. Ginsilingan ang ikapito nga lalaki nga ‘maglatas sa tunga sang banwa’ kag ‘butangan sing tanda ang mga agtang sang mga tawo nga nagapanghayhay kag nagabakho sa tanan nga kalangil-aran nga ginhimo sa tunga niya.’ Pagkatapos sang pagtanda, ang anom ka lalaki nga may hinganiban ginsugo nga patyon ang tanan nga wala sing tanda.​—Basaha ang Ezequiel 9:1-6.

¹¹ Nahangpan naton ang katumanan sini nga tagna. Ang lalaki nga “napanaptan sing lino” nagalaragway sa nagkalabilin nga hinaplas sa espiritu nga mga Cristiano. Paagi sa pagbantala kag paghimo sing disipulo, malaragwayon nga ginabutangan nila sing tanda ang mangin katapo sang “iban nga mga karnero” ni Cristo. (Juan 10:16) Ano ining tanda? Ining malaragwayon nga tanda, nga daw nabutang sa ila walay tabon nga agtang, nagapamatuod nga sila dedikado, bawtismado nga mga disipulo ni Jesucristo kag nagasul-ob sang tulad-Cristo nga bag-ong personalidad. (Efe. 4:20-24) Gintipon  ining mga tulad-karnero sa isa ka toril upod sa hinaplas nga mga Cristiano kag nagbulig sa importante nga hilikuton sang mga hinaplas sa pagtanda sa iban.​—Bug. 22:17.

12. Paano ang palanan-awon ni Ezequiel tuhoy sa pagtanda sa mga agtang nagapadaku nga importante gid ang pagpangita sa mga tulad-karnero?

¹² Ginapatalupangod sang palanan-awon ni Ezequiel ang isa pa ka rason kon ngaa hilingagawon ang pagpangita sa mga tawo nga “nagapanghayhay kag nagabakho.” Kabuhi ang nadalahig sa sini. Sa indi madugay, ang langitnon nga puersa ni Jehova, nga ginalaragway sang anom ka lalaki nga may hinganiban, magalaglag sa mga wala sing simbuliko nga tanda. Tuhoy sa sina nga paghukom, nagsulat si apostol Pablo nga si Ginuong Jesus, upod sa “iya gamhanan nga mga anghel,” ‘magatimalos sa mga wala nagakilala sa Dios kag sa mga wala nagatuman sa maayong balita tuhoy sa aton Ginuong Jesus.’ (2 Tes. 1:7, 8) Talupangda nga pagahukman ang mga tawo pasad sa ila reaksion sa maayong balita. Amo nga ang pagbantala sang mensahe sang Dios dapat magpadayon tubtob sa katapusan. (Bug. 14:6, 7) Serioso gid ini nga salabton sang tanan nga dedikado nga mga alagad ni Jehova.​—Basaha ang Ezequiel 3:17-19.

13. (a) Ano nga salabton ang ginbatyag ni apostol Pablo, kag ngaa? (b) Ano nga salabton ang imo ginabatyag sa mga tawo sa inyo teritoryo?

¹³ Nagbatyag si apostol Pablo sing personal nga salabton sa pagpaambit sing maayong balita sa iban. Nagsulat sia: “May utang ako sa mga Griego kag sa mga Barbaro, sa mga maalam kag sa mga buangbuang: gani nalangkag gid ako nga ibantala man ang maayong balita sa inyo dira sa Roma.” (Roma 1:14, 15) Bangod sang pagpasalamat sa kaluoy nga ginpakita sa iya, nagbatyag si Pablo nga kinahanglan nga buligan gid niya ang iban agod makabenepisyo sa wala tupong nga kaayo sang Dios bangod nakabenepisyo man sia sa sini. (1 Tim. 1:12-16) Daw subong bala nga may utang sia sa tagsa ka tawo nga iya masugilanon, kag mabayaran lang niya ini paagi sa pagpaambit sing maayong balita sa sina nga tawo. Nagabatyag ka bala nga may utang man sa mga tawo sa inyo teritoryo?​—Basaha ang Binuhatan 20:26, 27.

14. Ano ang aton panguna nga rason sa pagbantala sa publiko kag sa mga balay?

¹⁴ Bisan pa importante katama ang pagluwas sang kabuhi, may mas importante pa nga rason kon ngaa nagabantala kita sa mga balay. Sa Malaquias 1:11 si Jehova nagsiling: “Kutub sa pagsubang sang adlaw tubtub gid sa pagtunud sang amo ang akon ngalan daku sa mga Gentil, kag . . . ang incienso ginadolot sa akon ngalan, kag isa ka dolot nga putli; kay ang akon ngalan daku sa mga Gentil.” Bilang katumanan sini nga tagna, ang dedikado nga mga alagad ni Jehova dayag nga nagadayaw sang iya ngalan sa bug-os nga duta samtang mapainubuson nga ginatuman ang ila ministeryo. (Sal. 109:30; Mat. 24:14) Ang pagdulot sing “halad sang pagdayaw” kay Jehova amo ang aton panguna nga rason sa pagbantala sa publiko kag sa mga balay.​—Heb. 13:15.

Importante Pa Gid nga mga Hitabo sa Palaabuton

15. (a) Ano ang ginhimo sang mga Israelinhon sa ila ikapito nga adlaw sang pagmartsa palibot sa Jerico? (b) Ano ang ginapakita sini tuhoy sa pagbantala nga hilikuton?

¹⁵ Ano pa ayhan ang matabo sa pagbantala nga hilikuton sa palaabuton? Ang rekord sa tulun-an sang Josue tuhoy sa paglikop sa Jerico, nagailustrar sini. Dumduma nga antes ginlaglag sang Dios ang Jerico, ginsugo niya ang mga Israelinhon nga magmartsa palibot sa siudad sing makaisa kada adlaw sa sulod sang anom ka adlaw. Apang sa ikapito nga adlaw, dugangan nila ang  ila hilikuton. Ginsilingan ni Jehova si Josue: “Libuton ninyo sing makapito ang banwa, kag ang mga sacerdote magapatonog sang mga budyong. Kag kon patunggon nila sing malawig ang sungay sang carnero, . . . niyan ang bug-os nga katawohan magsinggit sa mabaskug nga tingug; kag ang kuta sang banwa mapukan sing haplak.” (Jos. 6:2-5) Posible man nga madugangan ang aton hilikuton nga magbantala. Wala sing duhaduha nga sa tion sang kalaglagan sining presente nga sistema sang mga butang, makita naton ang labing lapnag nga pagpanaksi sa ngalan sang Dios kag sa iya Ginharian sa bug-os nga maragtas.

16, 17. (a) Ano ang matabo antes matapos ang “dakung kapipit-an”? (b) Ano ang binagbinagon sa masunod nag artikulo?

¹⁶ Mahimo man mag-abot ang tion nga ang mensahe nga aton ginabantala mangin kaangay sa “mabaskug nga tingug.” Sa tulun-an sang Bugna, ginlaragway ang matigdas nga mensahe sang paghukom subong “dalagku nga mga yelo halin sa langit nga ang binilog sini subong kabug-at sa isa ka talanton.” * Kag ang Bugna 16:21 nagsiling: “Ini nga kalalat-an makahalalit gid.” Wala pa naton mahibaluan kon ano ang papel sang pagbantala sa mga balay sa sining importante nga pagpahibalo sang mensahe sang paghukom. Apang makapat-od kita nga antes matapos ang “dakung kapipit-an,” mapahibalo gid sing lapnag ang ngalan ni Jehova.​—Bug. 7:14; Ezeq. 38:23.

¹⁷ Samtang ginahulat naton ining importante nga mga hitabo, kabay nga padayon kita nga magmakugi sa pagbantala sing maayong balita sang Ginharian. Sa pagtuman sa sini nga hilikuton, ano nga mga kabudlayan ang aton maatubang sa pagbantala sa mga balay, kag paano naton ini malandas? Ini nga mga pamangkot binagbinagon sa masunod nga artikulo.

[Mga footnote]

Ano ang Imo Sabat?

• Ano ang Makasulatanhon nga basihan sa pagbantala sa mga balay?

• Paano ginpadaku ang pagbantala sa mga balay subong?

• Ngaa may salabton ang dedikado nga mga alagad ni Jehova sa pagbantala?

• Anong importante pa gid nga mga hitabo ang yara sa palaabuton?

[Mga Pamangkot sa Pagtinuon]

[Mga piktyur sa pahina 4]

Kaangay ni apostol Pablo, nagabatyag ka bala sing salabton sa pagbantala sa iban?

[Piktyur sa pahina 5]

Si Utod Knorr, 1953