Talalupangdon nga mga Punto Gikan sa Tulun-an sang Juan
Ang Pulong ni Jehova Buhi
Talalupangdon nga mga Punto Gikan sa Tulun-an sang Juan
SI Juan nga “hinigugma nga disipulo ni Jesus” amo ang katapusan nga gintuytuyan sang Dios sa pagsulat tuhoy sa kabuhi kag ministeryo ni Jesus. (Juan 21:20) Ginsulat ang Ebanghelyo ni Juan sang mga tuig 98 C.E. kag halos ang tanan nga detalye sa sini indi makita sa tatlo pa ka Ebanghelyo.
May katuyuan gid si apostol Juan sang ginsulat niya ang iya Ebanghelyo. Nagsiling sia tuhoy sa iya ginsulat: “Ginsulat ini agod magpati kamo nga si Jesus amo ang Cristo nga Anak sang Dios, kag bangod sa pagpati, makatigayon kamo sang kabuhi paagi sa iya ngalan.” (Juan 20:31) Mapuslanon gid sa aton ang iya mensahe.—Heb. 4:12.
“TAN-AWA, ANG KORDERO SANG DIOS”
Sang makita ni Juan Bautista si Jesus, nagsiling sia: “Tan-awa, ang Kordero sang Dios nga nagakuha sang sala sang kalibutan!” (Juan 1:29) Naglakbay si Jesus sa Samaria, Galilea, Judea, kag sa kadutaan sa sidlangan sang Jordan nga nagabantala, nagapanudlo, kag nagahimo sang gamhanan nga mga buhat. Bangod sini, ‘madamo nga tawo ang nagkadto sa iya kag nagtuo sa iya.’—Juan 10:41, 42.
Ang isa sa labing talalupangdon nga mga milagro nga ginhimo ni Jesus amo ang pagbanhaw kay Lazaro. Madamo ang nagtuo kay Jesus sang nakita nila nga nabuhi ang isa ka tawo nga apat ka adlaw na nga patay. Apang, nagsinapol ang puno nga mga saserdote kag ang mga Fariseo agod patyon si Jesus. Gani, nagkadto si Jesus “sa duta nga malapit sa kahanayakan, sa siudad nga ginatawag Efraim.”—Juan 11:53, 54.
Sabat sa mga Pamangkot sa Kasulatan:
1:35, 40—Luwas kay Andres, sin-o ang disipulo nga nagatindog upod ni Juan Bautista? Pirme ginatawag sang manunulat si Juan Bautista nga “Juan” kag wala gid niya ginagamit ang iya ngalan kon ginapatuhuyan ang iya kaugalingon sa iya Ebanghelyo. Gani, si Juan nga manunulat sang Ebanghelyo amo ang wala mahingadli nga disipulo.
2:20—Ano nga templo ang “ginpatindog sa sulod sang kap-atan kag anom ka tuig”? Ang ginatumod sang mga Judiyo amo ang templo ni Zorobabel nga ginpatindog liwat ni Hari Herodes sang Judea. Suno kay Josephus nga istoryador, ginsugdan ang pagpatindog sa sini sang ika-18 nga tuig sang paghari ni Herodes, ukon sang mga tuig 18/17 C.E. Ginpatindog ang santuaryo kag ang iban pa nga bahin sang templo sa sulod sang walo ka tuig. Apang, nagpadayon ang pagpatindog sa iban pa nga mga tinukod sa palibot sang templo tubtob pagligad sang Paskua sang tuig 30 C.E. sang ginsiling sang mga Judiyo nga napatindog ini sa sulod sang 46 ka tuig.
5:14—Ang pagbalatian bala resulta sang pagpakasala? Indi gid man. Ang tawo nga gin-ayo ni Jesus nagbalatian sa sulod sang 38 ka tuig bangod sang napanubli nga pagkadihimpit. (Juan 5:1-9) Ang buot silingon ni Jesus amo nga bangod ginkaluuyan na ini nga tawo, dapat niya sundon ang dalanon padulong sa kaluwasan kag indi na hungod nga maghimo sang sala. Kon hungod sia nga maghimo sang sala, basi may matabo sa iya nga mas malain pa sa balatian. Basi makahimo sia sang sala nga indi na mapatawad kag takus sa kamatayon nga wala na sing paglaum nga mabanhaw pa.—Mat. 12:31, 32; Luc. 12:10; Heb. 10:26, 27.
5:24, 25—Sin-o ang mga “nagliton halin sa kamatayon pakadto sa kabuhi”? Ginapatuhuyan ni Jesus ang mga patay anay sa espirituwal apang nagtuo sa iya sang mabatian nila ang iya mga pulong kag nag-untat sa paghimo sing sala. ‘Nagliton sila halin sa kamatayon pakadto sa kabuhi’ kay wala na sila ginpamatbatan sing kamatayon, kag ginhatagan na sila sing paglaum nga mabuhi sing walay katapusan bangod sang ila pagtuo sa Dios.—1 Ped. 4:3-6.
5:26; 6:53—Ano ang kahulugan sang pagtigayon sing ‘kabuhi sa kaugalingon’? Para kay Jesucristo, nagakahulugan ini nga nabaton niya gikan sa Dios ang duha ka butang—ang ikasarang sa pagbulig sa mga tawo nga kahamut-an ni Jehova kag ang gahom sa paghatag sing kabuhi paagi sa pagbanhaw sa mga patay. Para sa mga sumulunod ni Jesus, ang pagtigayon sing kabuhi sa ila kaugalingon nagakahulugan nga matigayon nila ang kabuhi nga walay katapusan. Matigayon ini sang hinaplas nga mga Cristiano kon mabanhaw sila sa pagkabuhi sa langit. Matigayon sang matutom nga mga alagad sang Dios nga nagalaum nga mabuhi sa duta ang kabuhi nga walay katapusan kon malampuwasan nila ang katapusan nga pagtilaw sa tapos sang Isa ka Libo ka Tuig nga Paghari ni Cristo.—1 Cor. 15:52, 53; Bug. 20:5, 7-10.
6:64—Nahibaluan na bala ni Jesus sang ginpili niya si Judas Iscariote nga si Judas ang magaluib sa iya? Wala. Apang, sang isa ka tion sang tuig 32 C.E., nagsiling si Jesus sa iya mga apostoles: “Ang isa sa inyo mabinutangbutangon.” Mahimo nga sa amo nga tion namutikan na ni Jesus ang ‘pagsugod’ sang di-maayo nga panghulaghulag ni Judas Iscariote.—Juan 6:66-71.
Leksion Para sa Aton:
2:4. Ginpahangop ni Jesus kay Maria nga bilang bawtismado kag hinaplas nga Anak sang Dios, dapat niya tumanon ang ginasugo sang iya langitnon nga Amay. Bisan bag-o pa lang niya ginsugdan ang iya ministeryo, nahibaluan na niya ang tion sang gintangdo sa iya nga buluhaton, lakip na ang iya kamatayon bilang halad. Wala niya gintugutan nga mag-upang sa iya paghimo sing kabubut-on sang Dios bisan ang isa ka suod nga kapamilya subong ni Maria. Dapat determinado man kita sa pag-alagad kay Jehova nga Dios kaangay ni Jesus.
3:1-9. Duha ka leksion ang matun-an naton kay Nicodemo, nga isa ka manugdumala sang mga Judiyo. Una, si Nicodemo mapainubuson, may paghantop, kag nagkilala sa iya espirituwal nga kinahanglanon, kay ginbaton niya ang anak sang isa ka kubos nga panday subong isa ka manunudlo gikan sa Dios. Kinahanglan gid magpaubos ang matuod nga mga Cristiano karon. Ikaduha, wala nangin disipulo si Nicodemo sang yara pa sa duta si Jesus. Mahimo nga nahadlok sia sa iban nga tawo, ukon indi niya luyag nga madula ang iya posisyon sa Sanhedrin, ukon ginpasulabi niya ang iya manggad. Leksion ini sa aton: Indi naton pagtugutan nga punggan kita sini nga mga butang nga ‘pas-anon ang aton usok sang pag-antos kag padayon nga magsunod kay Jesus.’—Luc. 9:23.
4:23, 24. Agod batunon sang Dios ang aton pagsimba sa iya, dapat nahisanto ini sa kamatuoran sang Biblia kag ginatuytuyan ini sang balaan nga espiritu.
6:27. Kon nagapangabudlay kita para sa “kalan-on nga nagapadayon para sa kabuhi nga walay katapusan,” ginapanikasugan naton nga matipigan ang aton maayo nga kaangtanan sa Dios. Malipayon kita kon ginahimo naton ini.—Mat. 5:3.
6:44. Nagaulikid gid si Jehova sa aton. Ginabuyok niya ang kada isa sa aton sa iya Anak paagi sa pagbantala nga hilikuton kag paagi sa pagbulig sa aton nga mahangpan kag masunod ang mga kamatuoran sa Biblia paagi sa Iya balaan nga espiritu.
11:33-36. Indi isa ka kaluyahon kon ipabutyag naton ang aton balatyagon.
‘PADAYON NGA MAGSUNOD SA IYA’
Sang malapit na ang Paskua sang tuig 33 C.E., nagbalik si Jesus sa Betania. Sang Nisan 9, nagkadto sia sa Jerusalem, nga nagasakay sa tinday nga asno. Sang Nisan 10, nagbalik si Jesus sa templo. Bilang sabat sa iya pangamuyo nga himayaon ang ngalan sang iya Amay, nagsiling ang tingog gikan sa langit: “Ginhimaya ko na ini kag himayaon ko ini liwat.”—Juan 12:28.
Samtang ginakaon nila ang panihapon sa Paskua, ginhatagan ni Jesus ang iya mga sumulunod sing importante nga laygay bangod malapit na sia magbiya sa ila. Nian nagpangamuyo sia para sa ila. Gindakop si Jesus, ginbista, kag ginlansang sa usok, kag ginbanhaw sang ulihi.
Sabat sa mga Pamangkot sa Kasulatan:
14:2—Paano ‘magahanda sang duog’ si Jesus sa langit para sa iya matutom nga mga sumulunod? Ginhimo niya ini sang ginpalig-on niya ang bag-o nga katipan paagi sa pag-atubang sa Dios kag pagpresentar sa Iya sang balor sang iya dugo. Lakip man sa sini nga paghanda ang pagbaton ni Cristo sing gahom subong hari. Pagkatapos sini nagsugod ang pagbanhaw sa iya hinaplas nga mga sumulunod pakadto sa langit.—1 Tes. 4:14-17; Heb. 9:12, 24-28; 1 Ped. 1:19; Bug. 11:15.
14:16, 17; 16:7, 8, 13, 14—Kon ginapatuhuyan ang manugbulig, ukon ang espiritu sang kamatuoran, ngaa “ini” ang gingamit nga pronombre sa Juan 14:16, 17, apang “sia” ang gingamit sa Juan 16:7, 8, 13, 14? Bangod ini sa gramatika. Sa Griego nga lenguahe, nga gingamit ni Juan sa pagsulat sa iya Ebanghelyo, ang tinaga nga ginbadbad “manugbulig” panglalaki, apang ang tinaga nga ginbadbad “espiritu” wala sing ginapatuhuyan nga sekso. Gani, sang ginsulat ni Juan ang ginsiling ni Jesus, gingamit niya ang panglalaki nga pronombre nga “sia” sang ginsambit niya ang pagahimuon sang manugbulig. Gingamit naman niya ang wala sing sekso nga pronombre nga “ini” sang ginsambit niya ang pagahimuon sang espiritu sang kamatuoran.
19:11—Si Judas Iscariote bala ang gintumod ni Jesus sang naghambal sia kay Pilato tuhoy sa tawo nga nagtugyan sa Iya? Sa baylo nga sambiton si Judas ukon ang iban pa nga indibiduwal, mahimo nga ginpatuhuyan ni Jesus ang tanan nga may salabton sa pagpatay sa iya. Lakip sa ila si Judas, “ang puno nga mga saserdote kag ang bug-os nga Sanhedrin,” kag ang “kadam-an” nga nahaylo nga pangayuon ang kahilwayan ni Barabas.—Mat. 26:59-65; 27:1, 2, 20-22.
20:17—Ngaa ginsilingan ni Jesus si Maria nga indi na magkapyot sa iya? Mahimo nga nagkapyot si Maria kay Jesus bangod abi niya magakayab na si Jesus sa langit kag indi na niya sia makita liwat. Agod pasaligon si Maria nga indi pa sia magakayab, ginsilingan niya sia nga indi na magkapyot sa iya kundi maglakat kag ibalita sa iya mga disipulo nga ginbanhaw na sia.
Leksion Para sa Aton:
12:36. Agod mangin ‘mga anak sang kapawa,’ ukon mga nagadala sang kapawa, kinahanglan naton ang sibu nga ihibalo tuhoy sa Pulong sang Dios, ang Biblia. Kag dapat naton gamiton ini nga ihibalo agod buligan ang iban nga maggua sa espirituwal nga kadulom padulong sa kapawa sang Dios.
14.6. Matigayon naton ang kahamuot sang Dios paagi lamang kay Jesucristo. Makapalapit kita kay Jehova kon magtuo kita kay Jesus kag magsunod sa iya halimbawa.—1 Ped. 2:21.
14:15, 21, 23, 24; 15:10. Makapabilin kita sa gugma sang Dios kag sa gugma sang iya Anak kon tumanon naton ang kabubut-on sang Dios.—1 Juan 5:3.
14:26; 16:13. Ang balaan nga espiritu ni Jehova nagatudlo sa aton kag nagapahanumdom sang aton natun-an. Nagapahayag man ini sing mga kamatuoran. Kon amo, mabuligan kita sini nga mag-uswag sa aton ihibalo, kaalam, paghantop, pagdesisyon, kag ikasarang sa paghunahuna. Gani, dapat kita magpadayon sa pagpangamuyo kag pangayuon gid ini nga espiritu.—Luc. 11:5-13.
21:15, 19. Ginpamangkot ni Jesus si Pedro kon ginahigugma niya sia sing labi sa “sini,” buot silingon ang mga isda sa atubangan nila. Ginpatudok ni Jesus kay Pedro nga dapat niya sundon si Jesus sing bug-os tion sa baylo nga mangin prioridad niya ang pagpangisda. Sa aton pagbinagbinag sa mga kasaysayan sa Ebanghelyo, kabay nga napalig-on kita nga mangin determinado sa paghigugma kay Jesus labi pa sa bisan ano nga butang nga makaganyat sa aton. Padayon gid kita nga magsunod sa iya sing bug-os tagipusuon.
[Piktyur sa pahina 31]
Ano ang matun-an naton kay Nicodemo?