Importante Bala kon Ano nga Relihion ang Pilion Mo?

LUYAG sang kalabanan sa aton nga madamo kita sing mapilian kon magpamalaklon kita. Kon ang isa ka tiendahan nagabaligya sing mas madamo nga baridad sang prutas kag utanon, makapili kita sing nanamitan gid naton kag sing maayo sa aton pamilya. Kon ang isa ka balaligyaan sang mga panapton nagabaligya sing barato kag madamo sing estilo kag kolor nga mga panapton, makapili kita sing bagay gid sa aton. Ang pila sang aton ginahimo nga pagpili sa kabuhi mga ekspresyon lamang sang indibiduwal nga luyag. Apang, ang iban nagaapektar sang aton kaayuhan, halimbawa na lang, ang aton ginapili nga masustansia nga pagkaon ukon maalamon nga mga abyan. Gani, kamusta naman ang aton ginapili nga relihion? Ang aton bala pagsimba isa lamang ka ekspresyon sang personal nga luyag? Ukon isa bala ini ka butang nga nagaapektar gid sang aton kaayuhan?

Madamo kita sing mapilian nga relihion. Madamo nga pungsod ang nagagarantiya karon sing kahilwayan sa relihion, kag ang mga tawo labi pa nga nagabatyag nga hilway sila sa pagbiya sa relihion sang ila mga ginikanan. Natukiban sang isa ka surbe sa Estados Unidos nga 80 porsiento sang mga Amerikano ang “nagapati nga indi lamang isa ka relihion ang nagapadulong sa kaluwasan.” Suno sa sini man nga surbe, “isa sa lima nga ginpamangkot ang nagsiling nga nagbag-o sia sing relihion sang hamtong na sia.” Ginpakita sang isa ka surbe sa Brazil nga halos 25 porsiento sang tanan nga taga-Brazil ang nagbag-o sang ila relihion.

Sang una, mainit nga ginabaisan sang mga tawo ang mga doktrina nga nagapakilala sa isa ka relihion nga tuhay sa iban. Ang popular nga pagtamod karon amo, ‘Indi importante kon ano nga relihion ang ginapili mo.’ Apang matuod bala ini? Ang imo bala ginapili nga relihion makaapektar sa imo?

Subong nga ang maalamon nga mga manugbakal nagapamangkot kon diin naghalin ang baligya, maalamon man nga mamangkot ka, ‘Paano nagsugod ining tanan nga nagkalainlain nga mga relihion, kag ngaa?’ Ang Biblia nagahatag sing sabat.

 Paano Nagsugod ang mga Relihion?

Sa dumaan nga Israel, nagtukod si Hari Jeroboam sing isa ka bag-o nga relihion halos isa ka libo ka tuig antes nagkari si Jesus sa duta. Si Jeroboam amo ang nahauna nga hari sang independiente nga naaminhan nga ginharian sang Israel. Problema niya ang pagpahiusa sa mga tawo agod matuman ang iya mga tulumuron. “Ang hari nagpakigsapol kag naghimo sing duha ka bulawan nga tinday nga baka kag nagsiling sa katawhan: ‘Mabudlay gid nga magtaklad pa kamo sa Jerusalem. Yari ang imo Dios, O Israel.’” (1 Hari 12:28) Maathag gid nga luyag gamiton sang hari ang relihion agod ipahilayo ang katutom sang katawhan gikan sa Jerusalem, diin sila nagasimba anay. Ang relihion nga gintukod ni Jeroboam naglawig sing siniglo kag nagresulta sa kamatayon ukon sa pagtapok sa minilyon sang ginhukman sang ulihi sang Dios yadtong apostata nga pungsod sang Israel. Ang relihion ni Jeroboam isa ka padugi para sa politika. Ang iban nga mga relihion sang Estado nga nagaluntad tubtob karon gintukod man subong mga panikasog agod pabakuron ang gahom sa politika.

Ginhatag ni apostol Pablo ang isa pa ka motibo kon ngaa nagtukod ang mga tawo sing bag-o nga relihion sang nagsiling sia: “Nahibaluan ko nga kon makahalin na ako magasulod ang mapiguson nga mga lobo sa tunga ninyo kag indi makig-angot sing mapinalanggaon sa panong, kag gikan sa inyo mismo may mga tawo nga magalutaw kag magapamulong sang tiko nga mga butang agod ipahilayo ang mga disipulo kag pasundon sa ila.” (Binuhatan 20:29, 30) Ang bugalon nga mga lider masami nga nagatukod sing relihioso nga mga hublag agod buyukon ang igtalupangod sa ila. Ang mga simbahan nga nagapangangkon sing binutig subong Cristiano nagsipak sa madamo nga grupo.

Sin-o ang Luyag nga Pahamut-an sang mga Relihion?

Ang iban nagtukod sing bag-o nga relihion bilang sabat sa ginapangayo sang madamo nga tawo. Halimbawa, ang The Economist nga magasin nagreport tuhoy sa dalagku kaayo nga mga simbahan sa Estados Unidos. Ang artikulo nagsiling nga ini nga mga simbahan nagadamo bangod “gintukod [sila] sa prinsipio nga kaangay sa iya sang tanan nga madinalag-on nga mga negosyo: ang pagpaayaw sa kon ano ang luyag sang mga bumalakal.” Ang iban may yara “masadya nga mga serbisyo nga may mga video, drama kag moderno nga musika.” Ang pila ka relihioso nga mga lider sa sining mga simbahan nagasiling nga ginatudluan nila ang ila mga miembro nga mangin “manggaranon, mapagros kag wala sing libog.” Bisan pa ini nga mga simbahan ginamulay bangod sang pagsulod sa industriya sang kalingawan ukon sa “negosyo nga nagabulig sa kaugalingon nga magtin-ad,” siling sini man nga reperensia, “ginapasundan lamang nila ang luyag sang ila mga miembro.” Ang report naghinakop: “Ang pag-upod sang negosyo kag relihion nangin madinalag-on gid.”

Bisan pa ang iban nga mga relihion indi tanto ka hilmunon nga daw negosyo, ang mga simbahan nga ‘ginapasundan lamang ang luyag sang ila miembro’ nagapahanumdom sa aton sang ginpaandam ni Pablo. Nagsulat sia: “Magaabot ang isa ka hut-ong sang tion nga indi sila magbatas sa makapapagros nga panudlo, kundi, suno sa ila kaugalingon nga mga kailigbon, magatipon sila sang mga manunudlo para sa ila kaugalingon agod pakalamon ang ila mga dulunggan; kag ipalayo nila ang ila mga dulunggan sa kamatuoran, samtang magaliso sila sa butig nga mga sugilanon.”—2 Timoteo 4:3, 4.

Sanglit madamo nga relihion ang gintukod bangod sang paghandum sing gahom sa politika, kadungganan, kag kahamuot sang mga tawo sa baylo sang paghandum nga pahamut-an ang Dios, indi makapakibot nga ang relihion nadalahig sa kalainan subong sang abuso sa bata, daya, inaway, ukon terorismo. Sa masami, ang relihion peke. Paano mo malikawan nga madaya?

[Blurb sa pahina 4]

Madamo nga relihion ang gintukod bangod sang paghandum sing gahom sa politika, kadungganan, kag kahamuot sang mga tawo sa baylo sang paghandum nga pahamut-an ang Dios