Takus Gid Mangin Bunayag

ANG pagkadibunayag nagsugod sadto pa sa katamnan sang Eden. Apang, ginapabaloran sang kalabanan nga kultura kag sosiedad ang pagkabunayag kag ginatamod ang pagbinutig kag paglimbong subong di-maayo kag malain. Ang tamdon nga masaligan isa ka butang nga dapat ipabugal. Apang, ang pagkadibunayag labi kag labi pa nga ginatamod nga kinahanglanon agod makalampuwas sa moderno nga sosiedad. Ano ang imo masiling tuhoy sini? Takus bala nga palambuon ang pagkabunayag? Ano ang imo talaksan sa pagpamat-od kon ano ang bunayag nga paggawi kag kon ano ang indi?

Agod mapahamut-an ang Dios, dapat kita mangin bunayag sa aton panghambal kag sa aton dalanon sang kabuhi. Si apostol Pablo naglaygay sa mga masigka-Cristiano: “Maghambal sing kamatuoran ang kada isa sa inyo sa iya isigkatawo.” (Efeso 4:25) Si Pablo nagsulat man: “Luyag namon maggawi sing bunayag sa tanan nga butang.” (Hebreo 13:18) Ang aton motibo sa pagkabunayag indi agod dayawon sang aton mga isigkatawo. Bunayag kita bangod ginatahod naton ang aton Manunuga kag luyag naton nga pahamut-an sia.

Indi Magpakunokuno

Sa madamo nga pungsod, ang mga tawo nagapakunokuno agod makapamentaha sa kabuhi. Nagakuha sila sing palsipikado nga mga dokumento, diploma, kag papeles sa pagpakilala sa kaugalingon agod makasulod sa isa ka pungsod sing ilegal ukon makakuha sing trabaho ukon posisyon nga indi sila kalipikado. Ginapalsipikar sang pila ka ginikanan ang birth certificate sang ila mga anak agod mapalawig ang ila pag-eskwela.

Apang, agod mangin kalahamut-an sa Dios, indi kita magpanglimbong. Ang Biblia nagasiling nga si Jehova “Dios sang kamatuoran” kag ginapaabot niya ang pagkamaminatud-on gikan sa mga nagapakigsuod sa iya. (Salmo 31:5) Kon luyag naton huptan ang suod nga kaangtanan kay Jehova, indi naton mahimo ilugon ang “mga tawo nga butigon,” ang mga tawo nga “nagapakunokuno.”—Salmo 26:4.

Kinaandan na para sa mga tawo nga ihimutig ang kamatuoran kon nagaatubang sing posibilidad nga madisiplina bangod sang nahimo nga sala. Bisan sa Cristiano nga kongregasyon, ang isa ka tawo mahimo masulay nga himuon ini. Sa isa ka kongregasyon, halimbawa, ginbaton sang isa ka pamatan-on nga lalaki sa mga gulang nga nakahimo sia sing pila ka sala. Apang, wala niya ginbaton nga nangawat sia, bisan pa may ebidensia nga ginhimo niya ini. Napamatud-an sang ulihi nga nagbinutig sia amo nga ginsikway sia gikan sa kongregasyon. Indi bala kuntani maalamon nga nangin bunayag gid sia kag nagpabulig agod mapasag-uli ang iya hamili nga kaangtanan kay Jehova? Sa  pagkamatuod, ang Biblia nagasiling: “Dili pagpakadiutaya ang disiplina ni Jehova, ukon mapunaw kon tadlungon ka niya; kay ang ginahigugma ni Jehova ginadisiplina niya.”—Hebreo 12:5, 6.

Kon kaisa, mahimo ihinago sang isa ka utod nga lalaki nga nagatinguha nga matigayon ang responsibilidad sa kongregasyon ang iya personal nga mga problema ukon nagligad nga sala. Halimbawa, kon nagasulat sing aplikasyon para sa pinasahi nga pribilehiyo sang pag-alagad, mahimo nga indi niya pagsabton sing kompleto ang mga pamangkot tuhoy sa panglawas kag moralidad, nagahunahuna nga basi madiskalipikar sia kon isugid niya ang matuod tuhoy sini nga mga butang. Mahimo sia mangatarungan, ‘Wala gid man ako nagabinutig,’ apang tampad kag bunayag gid bala sia sa iban? Binagbinaga ang punto sang Hulubaton 3:32: “Ang malimbungon nga tawo kangil-aran kay Jehova, apang ang Iya pagpakigsuod yara sa mga matadlong.”

Agod mangin bunayag, una sa tanan, dapat kita mangin bunayag sa aton kaugalingon. Masami kita nagapati sa kon ano lang ang luyag naton patihan sa baylo sang kon ano ang husto ukon matuod. Daw ano kahapos para sa aton nga basulon ang iban sa baylo nga ang aton kaugalingon! Halimbawa, gintilawan ni Hari Saul nga pakamatarungon ang indi niya pagtuman paagi sa pagbasol sa iban. Gani, ginsikway sia ni Jehova subong hari. (1 Samuel 15:20-23) Tuhay gid si Hari David, kay nangamuyo sia kay Jehova: “Gintu-ad ko ang akon sala sa imo, kag wala ko gintakpan ang akon kasaypanan. Nagsiling ako: ‘Itu-ad ko ang akon mga kalapasan kay Jehova.’  Kag ikaw mismo nagpatawad sang kasaypanan sang akon mga sala.”—Salmo 32:5.

Ang Pagkabunayag Nagaresulta sa mga Pagpakamaayo

Ang imo pagkabunayag, ukon ang indi pagpakita sini, may epekto sa kon paano ka ginatamod sang iban. Kon mahibaluan sang mga tawo nga ginlimbungan mo sila bisan sing makaisa lang, ang ila pagsalig sa imo madula, kag mabudlay na ini bawion. Sa pihak nga bahin, kon ikaw matinuuron kag bunayag, makilal-an ka subong isa ka tawo nga may integridad, nga takus gid saligan. Ang mga Saksi ni Jehova may amo sini nga reputasyon. Binagbinaga ang pila ka halimbawa.

Natukiban sang direktor sang isa ka kompanya nga madamo sang iya mga empleyado ang nagapangawat sa kompanya, gani nagpangayo sia sing bulig sa mga pulis. Sang mabalitaan niya nga ang isa sa mga gindakop amo ang isa niya ka empleyado nga Saksi ni Jehova, nagkadto sia sa pulis agod mabuy-an gilayon ang Saksi. Ngaa? Bangod nakahibalo ang direktor nga isa sia ka bunayag nga empleyado kag wala sia sing sala. Ang Saksi wala mapahalin sa trabaho, samtang ang iban ginpahalin. Ang iya kaupod nga mga Saksi nalipay gid, kay ang iya paggawi nagpadungog sa ngalan ni Jehova.

Ang maayo nga paggawi matalupangdan gid. Sa isa ka komunidad sa Aprika, isa ka taytay ang kinahanglan nga kay-uhon bangod ginkawat ang pila ka tablon. Nagdesisyon ang lokal nga mga residente nga magkolekta sing kuarta agod maislan ang ginkawat nga mga tablon, apang sin-o ang ila saligan sa pag-uyat sing kuarta? Nag-ugyon ang tanan nga dapat nga isa sa mga Saksi ni Jehova ang magauyat.

Sang nag-utwas ang kagamo sa politika kag sa tumandok nga mga grupo sa isa ka pungsod sa Aprika, ang isa ka Saksi nga nagatrabaho subong tenedor-de-libro para sa isa ka internasyonal nga kompanya ginsaylo sang iya kompanya, kay ang iya kabuhi yara sa katalagman. Naghimo ang kompanya sing kahimusan nga magtrabaho sia sa sulod sang madamo nga bulan sa iban nga pungsod tubtob nga magtawhay ang kahimtangan sa gasto sang kompanya. Ngaa? Bangod wala sia anay maghimbon upod sa mga nagpadugi nga kawatan ang kompanya. Indi lipod sa kompanya ang iya reputasyon subong bunayag gid. Handa ayhan nila nga buligan ini nga empleyado kon nakilal-an sia nga di-bunayag?

“Ang matarong nga tawo nagalakat sa iya integridad,” sulat sang Hulubaton 20:7. Ang tawo nga bunayag isa ka tawo nga may integridad. Wala sia nagadaya ukon nagalimbong sa iya isigkatawo. Indi bala amo sini ang luyag mo nga himuon sang iban sa imo? Ang pagkabunayag kinahanglanon nga bahin sang matuod nga pagsimba. Isa ini ka pagpakita sang aton gugma sa Dios kag sa isigkatawo. Paagi sa pagkabunayag, ginapakita naton ang aton handum nga tumanon ang prinsipio sa paggawi nga ginsiling ni Jesus: “Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.”—Mateo 7:12; 22:36-39.

Kon kaisa, ang mangin bunayag sa tanan nga tion mahimo nga may yara di-maayo nga mga resulta, apang ang matinlo nga konsiensia nga mabatyagan bangod sang paghimo sini takus gid sa bisan ano pa nga bili sini. Sa ulihi, ang mangin bunayag kag matadlong may pinakadaku nga mga benepisyo. Ang matuod amo nga ang maayo nga kaangtanan kay Jehova bilidhon gid. Ngaa abi gub-on mo ini paagi sa paghimo sing di-bunayag nga mga butang agod indi ka mahuy-an ukon agod matigayon mo ang pila ka bentaha sa ilegal nga paagi? Bisan ano pa nga kabudlayan ang mahimo nga atubangon naton, makasalig kita sa ginsiling sang salmista: “Malipayon ang mabukod nga tawo nga nagabutang sang iya pagsalig kay Jehova kag wala magliso sang iya nawong sa mga tawo nga mabinatukon, ukon sa mga nahulog sa kabutigan.”—Salmo 40:4.

[Mga retrato sa pahina 18]

Ang matuod nga mga Cristiano wala nagabakal ukon nagagamit sing palsipikado nga mga dokumento