Makilala gid Bala Naton ang Dios?

“Ini nagakahulugan sing kabuhi nga wala sing katapusan, ang pagkuha nila sing ihibalo tuhoy sa . . . lamang matuod nga Dios.”—Juan 17:3.

“O  PAGKADALOM sang kamanggaran kag kaalam kag ihibalo sang Dios!” tuaw ni apostol Pablo. Nagdugang sia: “Indi gid mahangpan sing bug-os ang iya mga paghukom kag indi mausoy sing bug-os ang iya mga dalanon!” (Roma 11:33) Magahinakop bala kita pasad sa sini nga mga pulong nga indi gid matungkad sang tawo ang kaalam kag ihibalo sang Dios, amo nga imposible nga makilala sia kag ang iya mga katuyuan?

Ang pila ka relihiosong mangin-alamon nagapati nga imposible gid nga makilala ang Dios. Ang The Encyclopedia of Religion nagsiling tuhoy sa sining panghunahuna: “Ang Dios labaw pa sa tanan nga mahibaluan tuhoy sa iya. . . . Ang Dios indi mahingalanan ukon mapaathag. Ang bisan anong ngalan ukon pagpaathag may mga limitasyon, kag ang Dios nagalabaw . . . sa sini. . . . Indi sia dapat hibaluon, kay labaw pa sia sa ihibalo.” *

Suno sa Newsweek nga magasin, madamo nga tawo sa sekular nga mga katilingban ang nahuyog sa “isa ka bag-o nga pagpati” nga, amo ang pagpati nga “may isa lamang ka kamatuoran, kag ini nga kamatuoran amo nga wala sing kamatuoran.”

Sa gihapon, madamo sang may mga pamangkot tuhoy sa katuyuan sang kabuhi ang wala makasapo sing sabat. Nakita nila ang makasulubo nga problema sang kapigaduhon, balatian, kag kasingki. Ayhan sa ila, ang pagkawalay kapat-uran sa kabuhi daku gid nga kapaslawan. Mahimo luyag nila mahibaluan ang mga sabat, apang kon indi nila ini masapwan, mahimo nga magahinakop na lang sila nga wala ini sing sabat. Subong resulta, madamo sa sini nga mga tawo ang nagbulag sa organisado nga relihion kag nagamatumato sa pagpalapit sa Dios—ini kon nagapati pa sila gihapon nga nagaluntad ang Dios.

Ang Pagtamod Sang Biblia

Yadtong nagapati sa ginatudlo sang Biblia kag nagabaton nga si Jesucristo amo ang Humalambal sang Dios dapat mangin interesado gid nga mahibaluan ang pagtamod sang Biblia. Mahimo madumduman mo nga sang una si Jesus nagpamulong tuhoy sa duha ka dalan, ang isa “masangkad kag malapad . . . nga nagapadulong sa kalaglagan” kag ang isa “masipot . . . nga nagapadulong sa kabuhi.” Ginpaathag niya kon paano makilala ang  mga nagalakat sa sining tagsa ka dalan, nga nagasiling: “Paagi sa ila mga bunga makilala ninyo sila.” Paagi sa ano nga mga bunga? Indi sa kon ano ang ila ginasiling, kundi kon ano ang ila ginabuhat, subong sang gin-athag ni Jesus: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang isa nga nagahimo sang kabubut-on sang akon Amay nga yara sa langit.” Indi bastante ang pagpangangkon nga nagapati kita sa Dios. Dapat naton himuon ang kabubut-on sang Dios. Sing makatarunganon, dapat anay naton tigayunon ang sibu nga ihibalo tuhoy sa kabubut-on sang Dios.—Mateo 7:13-23.

Ginpakita ni Jesus nga posible gid para sa mga tawo nga matigayon ang ihibalo tuhoy sa Dios. Nagsiling sia: “Ini nagakahulugan sing kabuhi nga wala sing katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Sing maathag, matigayon lamang naton ang kaalam kag ang ihibalo nga ginapadayag sang Dios—kon manikasog gid kita sa pagpangita sini. Apang, ang regalo sang Dios sa mga nagahimo sini amo ang kabuhi nga wala sing katapusan, busa ini nga pagpangita takus gid.

[Nota]

[Retrato sa pahina 4]

Si Jesus nagsiling nga ang masipot nga dalan nagapadulong sa kabuhi