Ano ang “Katapusan nga mga Adlaw”?

NAGAPALIBOG ka bala kon ano ang mahanabo sa imo kag sa imo mga hinigugma sa palaabuton? Ginabantayan sang madamo nga tawo ang balita agod tan-awon kon ano ang epekto sang mga hitabo sa bug-os nga kalibutan sa ila kabuhi. Sa pihak nga bahin, ang paghatag sing igtalupangod sa inspirado nga Pulong sang Dios nagahatag sa aton sing matuod nga paghangop. Ini bangod madugay na nga gintagna sang Biblia indi lamang ang mga hitabo sa karon kundi ang mahanabo man sa palaabuton.

Halimbawa, sang si Jesucristo yari sa duta, ginbantala niya ang Ginharian sang Dios sa madamo nga duog. (Lucas 4:43) Siempre pa, luyag mahibaluan sang mga tawo nga nagpamati sa iya kon san-o magaabot yadtong tumalagsahon nga Ginharian. Ang matuod, tatlo ka adlaw antes si Jesus di-makatarunganon nga ginpatay, ginpamangkot sia sang iya mga disipulo: “Ano ang mangin tanda sang imo presensia [nga nagagahom sa Ginharian] kag sang katapusan sang sistema sang mga butang?” (Mateo 24:3) Nagsabat si Jesus nga si Jehova nga Dios lamang ang nakahibalo kon san-o gid ang tion nga magagahom sing bug-os ang Ginharian sa duta. (Mateo 24:36; Marcos 13:32) Apang, gintagna ni Jesus kag sang iban pa ang pila ka hitabo sa duta subong pamatuod nga si Cristo nagagahom sa Ginharian.

Antes naton usisaon ang kitaon nga pamatuod nga nagakabuhi kita sa “katapusan nga mga adlaw” sang karon nga sistema sang mga butang, binagbinagon naton sing malip-ot ang isa ka importante nga hitabo nga natabo anay sa langit. (2 Timoteo 3:1) Si Jesucristo nangin Hari sa langit sang tuig 1914. a (Daniel 7:13, 14) Sa gilayon pagkatapos sia nangin Hari sa Ginharian, si Jesus nakig-away. Ang Biblia nagasugid sa aton: “Nagdabdab ang inaway sa langit: Si Miguel kag ang iya mga anghel nagpakig-away sa dragon, kag ang dragon kag ang mga anghel sini nagpakig-away.” (Bugna 12:7) Si “Miguel nga arkanghel” amo si Jesucristo sa iya langitnon nga posisyon. b (Judas 9; 1 Tesalonica 4:16) Ang dragon amo si Satanas nga Yawa. Ano ang natabo kay Satanas kag sa iya sumulunod nga malauton nga mga anghel, nga gintawag nga mga demonyo, sa inaway? Nalutos sila sa inaway kag “gintagbong,” ukon gintabog sila gikan sa langit, padulong sa duta. (Bugna 12:9) Bangod sini ang ‘mga langit kag ang mga nagapuyo sa sini,’ kon sayuron, ang matutom nga espiritu nga mga anak sang Dios, nagkalipay. Apang, ang mga tawo wala nalipay. “Kailo sa duta,” tagna sang Biblia, “bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.”—Bugna 12:12.

Bangod sang daku nga kaakig ni Satanas, ginpahanabo niya ang kailo—pag-antos kag kapipit-an—sa mga nagapuyo sa duta. Apang, ina nga kailo makadali lamang, ‘sa malip-ot lamang nga tion.’ Ginatawag sang Biblia ini nga tion subong “katapusan nga mga adlaw.” Malipay kita nga sa dili madugay ang impluwensia sang Yawa sa duta dulaon sing bug-os. Apang ano ang pamatuod nga nagakabuhi kita sa katapusan nga mga adlaw?

[Mga nota]