Paglakat sa Dalanon sang Nagasanag nga Kapawa

“Ang banas sang mga matarong kaangay sang masanag nga kapawa nga nagasanag kag nagasanag tubtob sa himpit nga adlaw.”​—⁠HULUBATON 4:18.

1, 2. Ano ang naeksperiensiahan sang katawhan sang Dios bangod sa nagasanag nga espirituwal nga kapawa gikan kay Jehova?

SIN-O ang mas sangkol nga makalaragway sa epekto sang nagabutlak nga adlaw sa madulom nga kagab-ihon sangsa Ginahalinan mismo sang kapawa, si Jehova nga Dios? (Salmo 36:9) ‘Kon ang kasanag sang kaagahon makalambot tubtob sa mga ukbong sang duta,’ siling sang Dios, ‘nagabalhin ang duta subong sang daga sa idalom sang inugpat-in, kag ang mga butang nagapahamtang sa ila duog subong sang sa panapton.’ (Job 38:12-14) Bangod sang nagadugang nga kasanag gikan sa adlaw, ang dagway sang duta nagaathag, subong sang mahumok nga daga nga nagabalhin kon mamarkahan ini sang isa ka inugpat-in.

² Si Jehova amo man ang Tuburan sang espirituwal nga kapawa. (Salmo 43:3) Samtang nagapabilin ang kalibutan sa pitipit nga kadudulman, ang matuod nga Dios padayon nga nagapaiwag sing kapawa sa iya katawhan. Ano ang resulta? Ang Biblia nagasabat: “Ang banas sang mga matarong kaangay sang masanag nga kapawa nga nagasanag kag nagasanag tubtob sa himpit nga adlaw.” (Hulubaton 4:18) Ang nagasanag nga kapawa gikan kay Jehova padayon nga nagaiwag sa banas sang iya katawhan. Ini nagabulig sa ila nga mapauswag pa ang mga kahimusan sa sulod sang organisasyon, ang mga doktrina, kag ang moralidad.

Ang Kasanagan Nagdul-ong sa Pag-uswag sang mga Kahimusan sa Sulod sang Organisasyon

3. Ano ang ginsaad sa Isaias 60:17?

³ Paagi kay manalagna Isaias, si Jehova nagtagna: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon.” (Isaias 60:17) Subong nga ang pagbaylo sa kubos nga materyal sing superyor nga materyal nagakahulugan sing pag-uswag, naeksperiensiahan sang mga Saksi ni Jehova ang mga pag-uswag sa mga kahimusan sa sulod sang organisasyon sa tion sang “katapusan sang sistema sang mga butang,” ukon “katapusan nga mga adlaw.”​—⁠Mateo 24:⁠3; 2 Timoteo 3:1.

4. Ano nga kahimusan ang ginsugdan sang 1919, kag ngaa mapuslanon ini?

⁴ Sang maaga nga bahin sang katapusan nga mga adlaw, ang mga kongregasyon sang mga Estudyante sa Biblia, subong amo anay ang pagtawag sa mga Saksi ni Jehova, nagapili sa mga gulang kag mga deakono paagi sa pagboto. Apang, ang iban nga mga gulang, wala sing matuod nga espiritu sang pag-ebanghelyo. Indi lamang nga ang iban indi gusto makigbahin sa pagbantala nga hilikuton kundi ginabalabagan man nila ang iban nga magpakigbahin sa sini. Gani, sang 1919 isa ka bag-o nga posisyon sang katungdanan ang  ginsugdan sa tagsa ka kongregasyon​—⁠amo ang service director ukon direktor sang pag-alagad. Ang service director wala ginabotohan sang kongregasyon, kundi sa teokratiko nga paagi ginatangdo sia sang sanga talatapan sang katawhan sang Dios. Ang responsibilidad sang gintangdo nga direktor amo ang pag-organisar sang pagbantala nga hilikuton, pag-asayn sing mga teritoryo, kag pagpalig-on sa mga kauturan nga makigbahin sa pagministeryo sa latagon. Sa tinuig nga nagsunod, ang pagbantala sing Ginharian ginsakdag gid.

5. Ano nga pagpauswag ang natigayon sang katuigan 1920?

⁵ Ang tanan sa kongregasyon dugang pa nga ginpapagsik sang panawagan nga “Ibantala, ibantala, ibantala, ang Hari kag ang iya ginharian,” nga ginhatag sang 1922 sa kombension sang mga Estudyante sa Biblia sa Cedar Point, Ohio, E.⁠U.⁠A. Sang 1927 gin-organisar ang pagbantala sa latagon tubtob sa punto nga ang Domingo ginkabig nga amo ang labing maayo nga adlaw para sa pagpakigbahin sa pamalaybalay nga pagbantala nga hilikuton. Ngaa Domingo nga adlaw? Bangod kon Domingo ang kalabanan nga mga tawo wala sing obra. Ginapakita sang mga Saksi ni Jehova karon ang amo man nga espiritu paagi sa pagduaw sa mga tawo sa mga tinion nga ang kalabanan yara sa ila balay, subong sang talipuspusan sang semana kag kon gab-i.

6. Sang 1931, ano nga resolusyon ang ginbaton, kag paano ina nakaapektar sa pagbantala sing Ginharian nga hilikuton?

⁶ Ang isa ka daku nga pangpapagsik sa pagbantala sing Ginharian natabo sang Domingo sang hapon, Hulyo 26, 1931, sang ang resolusyon ginbaton una sa kombension sa Columbus, Ohio, E.⁠U.⁠A., kag pagkatapos sa bug-os nga kalibutan. Sa bahin, ang resolusyon nagasiling: “Mga alagad kita ni Jehova nga Dios nga gintugyanan sing isa ka hilikuton sa iya ngalan, kag, bilang pagtuman sa iya sugo, sa pagpahayag sang testimonya ni Jesucristo, kag sa pagpahibalo sa katawhan nga si Jehova amo ang matuod kag Labing Gamhanan nga Dios; busa malipayon nga ginabaton naton kag ginadala ang ngalan nga ginhingalan mismo sang Ginuong Dios, kag handum naton nga makilala kag tawgon sa ngalan nga mga, saksi ni Jehova.” (Isaias 43:10) Daw ano kaathag nga ginpakita sinang bag-o nga ngalan kon ano ang panguna nga hilikuton sang tanan nga nagadala sina nga ngalan! Huo, si Jehova may hilikuton nga dapat pakigbahinan sang tanan niya nga mga alagad. Ang kalabanan mapagsik gid nga naghulag.

7. Ano nga pagbag-o ang ginsugdan sang 1932, kag ngaa?

⁷ Madamong mapainubuson nga mga gulang ang naghugod sang ila kaugalingon sa pagbantala nga hilikuton. Apang, sa pila ka duog, ang ginbotar nga mga gulang nagpamatok sa ideya nga  tanan sa kongregasyon dapat makigbahin sa publiko nga pagministeryo. Apang, dugang pa nga pag-uswag ang matabo. Sang 1932, nakabaton sing instruksion ang mga kongregasyon paagi sa Ang Lalantawan nga untatan na ang pagboto sa mga gulang kag mga deakono. Sa baylo, dapat sila magbotar sing isa ka komite sa pag-alagad nga ginatapuan sang espirituwal nga mga lalaki nga nagapakigbahin sa publiko nga pagbantala nga hilikuton. Sa amo ang pagtatap gintugyan sa mga aktibo nga nakigbahin sa ministeryo, kag ang hilikuton nag-uswag.

Ang Nagasanag nga Kapawa Nagakahulugan sing Dugang Pa nga Pag-uswag

8. Anong pag-uswag ang natabo sang 1938?

⁸ Ang kapawa “nagasanag kag nagasanag.” Sang 1938 ang pagboto gindula na sing bug-os. Ang tanan nga mga alagad sa kongregasyon dapat itangdo sa teokratiko nga paagi sa idalom sang pagdumala sang “matutom kag mainandamon nga ulipon.” (Mateo 24:45-47) Ang pagbag-o mahapos nga ginbaton sang halos tanan nga kongregasyon sang mga Saksi ni Jehova, kag ang hilikuton nga pagbantala padayon nga nagpamunga.

9. Sang 1972, anong kahimusan ang ginsugdan, kag ngaa isa ini ka pag-uswag?

⁹ Sugod sang Oktubre 1, 1972, isa pa ka pagbag-o sa pagdumala sa kongregasyon ang ginpatuman. Ang kahimusan sa pagdumala paagi sa isa ka hubon sang mga gulang ginsugdan sa mga kongregasyon sang mga Saksi ni Jehova sa bug-os nga kalibutan, sa baylo sang pagdumala sang isa lamang ka alagad sang kongregasyon, ukon manugtatap. Ining bag-o nga kahimusan nagpalig-on gid sa hamtong nga mga lalaki sa pagtinguha nga mangin kalipikado sa pagpanguna sa kongregasyon. (1 Timoteo 3:1-7) Subong resulta, madamong kauturan nga mga lalaki ang nakatigayon sing eksperiensia sa pagtatap sa mga responsibilidad sa sulod sang kongregasyon. Daku gid sila nga bulig sa pag-atipan sa madamong mga bag-uhan nga nagabaton sang kamatuoran sang Biblia!

10. Anong kahimusan ang ginpatuman sang 1976?

¹⁰ Ang mga katapo sang Nagadumala nga Hubon gin-organisar sa anom ka komite, kag sugod sang Enero 1, 1976, ang tanan nga hilikuton sang organisasyon kag sang mga kongregasyon sa bug-os nga duta ginpaidalom sa pagdumala sining mga komite. Isa gid ka pagpakamaayo nga ang tanan nga aspekto sang hilikuton para sa Ginharian ginadumalahan sining “kadam-an nga mga manuglaygay”!​—⁠Hulubaton 15:22; 24:6.

11. Ano nga pag-uswag ang ginsugdan sang 1992, kag ngaa?

¹¹ Sang 1992 isa pa ka pag-uswag ang ginhimo, nga mapaanggid sa natabo sang ang mga Israelinhon kag ang iban pa nakabalik gikan sa pagkabihag sa Babilonia. Sadto, kulang ang mga Levinhon nga magaalagad sa templo. Gani, ang di-Israelinhon nga Netinim ginhatagan sing hilimuon agod buligan ang mga Levinhon. Sing kaanggid, agod mabuligan ang matutom kag mainandamon nga ulipon nga klase sa pag-atipan sa nagadugang nga mga intereses sini sa duta, sang 1992 ang pila sang “iban nga mga karnero” nakabaton sing dugang nga mga responsibilidad sa pag-alagad. Gintangdo sila subong kabulig sa mga komite sang Nagadumala nga Hubon.​—⁠Juan 10:16.

12. Paano si Jehova nagtangdo sing paghidait subong aton manugdumala?

¹² Ano ang nangin resulta sining tanan? “Itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton,” siling ni Jehova. (Isaias 60:17) May “paghidait” sa tunga sang mga alagad ni Jehova karon, kag ang gugma sa “pagkamatarong” nangin ila “manughatag sing buluhaton”​—⁠ang puersa nga nagapahulag sa ila sa pag-alagad sa Dios. Organisado gid sila sa pagtuman sang hilikuton sa pagbantala sing Ginharian kag paghimo sing mga disipulo.​—⁠Mateo 24:14; 28:​19, 20.

Ginaiwagan ni Jehova ang Banas May Kaangtanan sa mga Doktrina

13. Paano gin-iwagan ni Jehova ang banas sang iya katawhan may kaangtanan sa mga doktrina sang katuigan 1920?

¹³ Progresibo man nga ginaiwagan ni Jehova ang banas sang iya katawhan may kaangtanan sa mga doktrina. Ang Bugna 12:1-9 isa ka halimbawa. Ang kasaysayan nagapatuhoy sa tatlo ka simbuliko nga mga karakter​—⁠“ang babayi” nga nagabusong kag nagpanganak, ang “dragon” kag ang “isa ka anak, isa ka lalaki.” Nahibaluan mo bala kon sin-o ang ginarepresentar sang kada isa? Ginpakilala sila sa isa ka artikulo nga natig-uluhan “Pagkabun-ag  Sang Pungsod,” nga naggua sa Marso 1, 1925, nga gua sang Ang Lalantawan. Ina nga artikulo nagahatag sing mas maathag nga paghangop sa katawhan sang Dios sa mga tagna tuhoy sa pagkabun-ag sang Ginharian, paghangop nga nagapakita nga may yara duha ka organisasyon​—⁠ang kay Jehova kag kay Satanas. Nian sang 1927/28, narealisar sang katawhan sang Dios nga ang Krismas kag kaadlawan (birthday) nga mga selebrasyon indi Makasulatanhon, gani gin-untatan nila ang pagsaulog sini.

14. Anong mga kamatuoran tuhoy sa doktrina ang gin-athag sang katuigan 1930?

¹⁴ Sang katuigan 1930 dugang pa nga kasanagan ang natigayon tuhoy sa tatlo ka doktrina sang kamatuoran. Sa sulod sang mga tinuig, nahibaluan sang mga Estudyante sa Biblia nga ang daku nga panong, ukon ang “dakung kadam-an,” nga ginasambit sa Bugna 7:9-17 tuhay sa 144,000, nga magagahom kaupod ni Cristo subong mga hari kag mga saserdote. (Bugna 5:​9, 10; 14:1-5) Apang, nagpabilin nga indi maathag kon sin-o ang daku nga panong. Subong nga ang nagadugang nga kasanag sa kaagahon nagapaklaro pa gid sa korte kag kolor sang isa ka butang, sang 1935 ang daku nga panong ginkilala nga amo ang makalampuwas sa “dakung kapipit-an,” nga may paglaum nga mabuhi sing dayon sa duta. Sang ulihi nga bahin sadto gihapon nga tuig, ginhatag ang paathag nga nag-apektar sa nagaeskwela nga mga kabataan sang mga Saksi ni Jehova sa pila ka pungsod. Samtang nagabaskog ang patriotismo sa bug-os nga kalibutan, nahibaluan sang mga Saksi nga ang pagsaludo sa bandera indi lamang isa ka pagtahod. Sang nagdason nga tuig, isa pa ka kamatuoran sa doktrina, nga si Cristo napatay sa usok, indi sa krus ang ginpaathag.​—⁠Binuhatan 10:39.

15. San-o kag paano ginpatalupangod ang pagkabalaan sang dugo?

¹⁵ Pagkatapos sang Bug-os Kalibutan nga Inaway II, nga sa sini nga tion nangin kinaandan na nga bulngon ang mga napilasan nga mga soldado paagi sa pagpatughong sing dugo, dugang pa nga kapawa ang ginhatag tuhoy sa pagkabalaan sang dugo. Ang Hulyo 1, 1945, nga gua sang Ang Lalantawan nagpalig-on sa “tanan nga mga sumilimba ni Jehova nga nagahandum sing dayon nga kabuhi sa iya bag-o nga kalibutan sang pagkamatarong nga tahuron ang pagkabalaan sang dugo kag ipahisuno ang ila kaugalingon sa matarong nga sugo sang Dios tuhoy sa sining importante nga butang.”

16. San-o ginpagua ang New World Translation of the Holy Scriptures, kag ano ang duha ka talalupangdon nga mga bahin sini?

¹⁶ Sang 1946 narealisar nga kinahanglan ang isa ka bag-o nga badbad sang Biblia nga ginhimo paagi sa bulig sang binag-o nga kinaalam sang mga iskolar sa sini nga patag kag wala nadagtaan sang mga doktrina nga napasad sa mga tradisyon sang Cristiandad. Ginsugdan ini nga pagbadbad sang Disiembre 1947. Sang 1950 ginpagua sa Ingles ang New World Translation of the Christian Greek Scriptures. Sugod sang 1953, amat-amat nga ginpagua ang Hebreong Kasulatan sa Ingles sa lima ka tomo. Ang katapusan nga tomo ginpagua sang 1960, sulusobra sa 12 ka tuig sugod sang gin-umpisahan ang proyekto sa pagbadbad. Ang kompleto nga New World Translation of the Holy Scriptures sa isa lang ka tomo ginpagua sang 1961. Karon matigayon na ini sa madamo nga lenguahe kag ini nga badbad may pila ka talalupangdon nga mga bahin. Ginpasag-uli sini ang balaan nga ngalan, nga Jehova. Dugang pa, ang literal nga pagbadbad sang orihinal nga mga sinulatan naghatag sing basehan para sa padayon nga pag-uswag sa paghangop sa kamatuoran sang Pulong sang Dios.

17. Anong dugang nga kapawa ang ginhatag sang 1962?

¹⁷ Ang paathag tuhoy sa “superyor nga mga awtoridad” sa Roma 13:1 kag ang kasangkaron sang pagpasakop sang isa ka Cristiano sa sini ginhatag sang 1962. Paagi sa maid-id nga pagtuon sa Roma kapitulo 13 kag sa mga teksto sang Kasulatan  subong sang Tito 3:​1, 2 kag 1 Pedro 2:​13, 17 nangin maathag nga ang ekspresyon nga “superyor nga mga awtoridad” nagapatuhoy indi kay Jehova nga Dios kag kay Jesucristo, kundi sa mga awtoridad sang tawhanon nga panguluhan.

18. Ano ang pila ka kamatuoran nga gin-athag sang katuigan 1980?

¹⁸ Sang mga tuig nga nagsunod, ang banas sang mga matarong padayon nga nagasanag kag nagasanag. Sang 1985 ginpaiwag ang kapawa kon ano ang kahulugan kon ang isa ginpahayag nga matarong “para sa kabuhi” kag matarong subong isa ka abyan sang Dios. (Roma 5:18; Santiago 2:23) Ang kahulugan sang Cristianong Jubileo ginpaathag sing maid-id sang 1987.

19. Paano si Jehova nag-aman sing dugang nga espirituwal nga kapawa para sa iya katawhan sining karon lang?

¹⁹ Sang 1995 ang pagpain sa “mga karnero” kag “mga kanding” labi pa nga nahangpan sing maathag. Sang 1998 detalyado nga ginpaathag ang palanan-awon ni Ezequiel tuhoy sa templo, nga nagakatuman na. Sang 1999 gin-athag kon san-o kag kon paano ang ‘makangilil-ad nga mga butang nagatindog sa isa ka balaan nga duog.’ (Mateo 24:​15, 16; 25:32) Kag sang 2002 ang dugang pa nga paghangop natigayon tuhoy sa kahulugan sang pagsimba sa Dios sa “espiritu kag kamatuoran.”​—⁠Juan 4:24.

20. Sa anong iban pa nga bahin naeksperiensiahan sang katawhan sang Dios ang pag-uswag?

²⁰ Dugang sa pagpauswag sang mga kahimusan sa sulod sang organisasyon kag sang mga doktrina, ginpauswag man ang Cristianong paggawi. Halimbawa, sang 1973 ang pagpanabako nahangpan nga “makadagta sa unod” kag dapat kabigon subong isa ka serioso nga sala. (2 Corinto 7:1) Isa ka dekada sang ulihi, ang Hulyo 15, 1983, nga gua sang Ang Lalantawan nag-athag sang aton pagtamod tuhoy sa pag-uyat sing mga armas. Pila lamang ini sang mga halimbawa sang nagadugang nga kapawa sa aton tion.

Padayon nga Maglakat sa Banas sang Nagasanag nga Kapawa

21. Ano nga panimuot ang makabulig sa aton agod padayon kita nga makalakat sa banas sang nagasanag nga kapawa?

²¹ “Ang pagbaton sa nagaabot nga mga pagbag-o kag ang pagpahisuno sa sini mabudlay himuon,” baton sang isa ka madugay na nga gulang. Ano ang nakabulig sa iya nga batunon ang mga pagbag-o nga nasaksihan niya sa sulod sang 48 ka tuig nga nangin manugbantala sia sang Ginharian? Sia nagsabat: “Ang sekreto amo ang husto nga panimuot. Kon indi mo pagbatunon ang mga pagbag-o maulihi ka samtang nagauswag ang organisasyon. Kon ginabudlayan ako sa pagbaton sa mga pagbag-o, ginabinagbinag ko ang mga pulong ni Pedro kay Jesus: ‘Ginuo, sa diin pa kami makadto? Ikaw may mga pulong sang kabuhi nga walay katapusan.’ Nian, ginapamangkot ko ang akon kaugalingon, ‘Sa diin pa bala ako makadto​—⁠didto sa madulom nga kalibutan sa gua?’ Nakabulig ini sa akon nga magpabilin sa organisasyon sang Dios.”​—⁠Juan 6:68.

22. Paano kita nagabenepisyo sa paglakat nga may kapawa?

²² Ang kalibutan sa palibot naton yara gid sa pitipit nga kadulom. Samtang padayon nga ginaiwagan ni Jehova ang iya katawhan, labi nga nagadaku ang kal-ang sa ulot nila kag sang kalibutan. Ano ang ginahimo sini nga kapawa sa aton? Bueno, subong nga indi madula ang batse sa dalan kon pasigahan mo ini sing spotlight, wala man ginadula sang kapawa gikan sa Pulong sang Dios ang mga tugalbong. Apang, ang kapawa gikan sa Pulong sang Dios nagabulig gid sa aton nga malikawan ang mga tugalbong agod padayon kita nga makalakat sa banas sang nagasanag nga kapawa. Gani, padayon nga talupangdon naton ang mga pulong ni Jehova, “subong sang sulo nga nagasiga sa isa ka madulom nga duog.”​—⁠1 Pedro 1:19.

Madumduman Mo Bala?

• Ano nga mga pag-uswag sa kahimusan sa sulod sang organisasyon ang ginhimo ni Jehova sa iya katawhan?

• Ano ang mga pagbag-o sa doktrina bangod sang nagasanag nga kapawa?

• Ano nga mga pagpasibu ang imo nasaksihan, kag ano ang nakabulig sa imo nga batunon ini?

• Ngaa luyag mo maglakat sing padayon sa banas sang nagasanag nga kapawa?

[Mga Pamangkot sa Pagtinuon]

[Mga retrato sa pahina 27]

Ang kombension sang 1922 sa Cedar Point, Ohio, nagpapagsik sa mga Estudyante sang Biblia nga himuon ang hilikuton sang Dios

[Retrato sa pahina 29]

Ang “New World Translation of the Christian Greek Scriptures” nga ginpagua ni N. H. Knorr sang 1950

[Credit Line sang retrato sa pahina 26]

© 2003 BiblePlaces.com