Iluga ang Pagkamapailubon ni Jehova

“Si Jehova indi mahinay may kaangtanan sa iya saad, . . . kundi mapailubon sia.”—⁠2 PEDRO 3:9.

1. Anong walay tupong nga dulot ang gintanyag ni Jehova sa mga tawo?

 GINTANYAGAN kita ni Jehova sing isa ka butang nga wala na sing iban pa ang makatanyag. Isa ini ka butang nga makagalanyat gid kag bilidhon, apang indi ini mabakal ukon maganar man. Ang ginatanyag niya amo ang dulot nga kabuhi nga walay katapusan​—⁠para sa kalabanan sa aton, nagakahulugan ini sing kabuhi nga dayon sa isa ka paraiso nga duta. (Juan 3:16) Daw ano gid ini ka makalilipay! Madula na ang mga butang nga ginatunaan sang daku nga kasubo​—⁠pinuyas, kasingki, kaimulon, krimen, balatian, kag bisan ang kamatayon. Ang mga tawo magakabuhi nga may himpit nga paghidait kag paghiusa sa idalom sang mahigugmaon nga paggahom sang Ginharian sang Dios. Nalangkag gid kita sa sini nga Paraiso!​​—⁠Isaias 9:​6, 7; Bugna 21:​4, 5.

2. Ngaa wala pa ginlaglag ni Jehova ang sistema sang mga butang ni Satanas?

² Malangkagon man nga ginapaabot ni Jehova ang tion nga pagahimuon niya ang duta nga Paraiso. Matuod ina bangod mahigugmaon sia sa pagkamatarong kag katarungan. (Salmo 33:5) Wala sia nalipay sa pagtan-aw sa isa ka kalibutan nga wala nagasapak ukon nagatamay sa iya matarong nga mga prinsipio, isa ka kalibutan nga nagasikway sang iya awtoridad kag nagahingabot sa iya katawhan. Apang, may makatarunganon gid nga mga rason kon ngaa wala pa niya ginlaglag ang malaut nga sistema sang mga butang ni Satanas. Ining mga rason may kahilabtanan sa mga hulusayon tuhoy sa kon ano ang husto kag kon ano ang sayop may kaangtanan sa iya pagkasoberano. Sa paghusay sa sining mga hulusayon, ginapakita ni Jehova ang isa ka matahom gid nga kinaiya nga nagabuyok sa aton sa iya, isa ka kinaiya nga wala sa madamo karon​—⁠ang pagkamapailubon.

3. (a) Ano ang kahulugan sang Griego kag Hebreo nga tinaga nga ginbadbad nga “pagkamapailubon” sa Biblia? (b) Ano nga mga pamangkot ang aton karon binagbinagon?

³ May isa ka Griegong tinaga nga makatlo ka beses nga ginbadbad sa New World Translation subong “pagkamapailubon.” Literal ini nga nagakahulugan sing “malaba sing espiritu” kag busa masami ginbadbad nga “pagkamainantuson” kag isa ka bes nga “pagpailob.” Ginapakita lunsay sang Griego kag Hebreo nga tinaga nga ginbadbad nga “pagkamapailubon” ang ideya sang pagkamapinasensiahon kag mahinay sa pagpangakig. Paano kita makabenepisyo sa pagkamapailubon ni Jehova? Ano nga leksion ang matun-an naton sa pagpailob kag pagbatas ni Jehova kag sang iya matutom nga mga alagad? Paano naton mahibaluan nga ang pagkamapailubon ni Jehova may limitasyon? Tan-awon naton.

Binagbinaga ang Pagkamapailubon ni Jehova

4. Ano ang ginsulat ni apostol Pedro may kaangtanan sa pagkamapailubon ni Jehova?

⁴ Tuhoy sa pagkamapailubon ni Jehova, si apostol Pedro nagsulat: “Indi ninyo pagkalimtan ining katunayan, mga hinigugma, nga ang isa ka adlaw kay Jehova subong sang isa ka libo ka tuig kag ang isa ka libo ka tuig subong sang isa ka adlaw. Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:​8, 9) Palihug talupangda ang duha ka punto diri nga makabulig sa aton nga mahangpan ang pagkamapailubon ni Jehova.

5. Paano ang pagtamod ni Jehova sa tion nagaapektar sa iya mga ginahimo?

⁵ Ang nahauna nga punto amo nga wala ginatamod ni Jehova ang tion kaangay sang pagtamod  naton. Para sa Isa nga nagakabuhi sing walay katapusan, ang isa ka libo ka tuig kaangay sang isa ka adlaw. Wala sia ginalimitehan ukon ginaipit sang tion, apang indi sia mahinay sa paglubad sa problema. Bangod walay latid ang kaalam ni Jehova, nahibaluan gid niya ang pinakamaayo nga tion sa paghulag para sa kaayuhan sang tanan nga nadalahig, kag mapailubon niya nga ginahulat ang pag-abot sina nga tion. Apang, samtang wala pa ina mag-abot, indi kita dapat maghinakop nga si Jehova wala nabalaka sa mga pag-antos nga mahimo naeksperiensiahan sang iya mga alagad. Isa sia ka Dios sang “mapinalanggaon nga kaawa,” ang personipikasyon sang gugma. (Lucas 1:78; 1 Juan 4:8) Sarang niya dulaon, sing bug-os kag sing permanente, ang bisan ano nga halit nga tuga sang temporaryo niya nga pagpahanugot sa pag-antos.​​—⁠Salmo 37:10.

6. Ano ang indi naton dapat ihinakop tuhoy sa Dios, kag ngaa?

⁶ Siempre, ang paghulat sa isa ka butang nga ginakalangkagan indi mahapos. (Hulubaton 13:12) Amo nga kon ang mga tawo wala gilayon nagatuman sang ila mga pangako, ang iban mahimo maghinakop nga wala sila sing tuyo nga tumanon ini. Indi gid maalamon nga amo sini ang hunahunaon naton tuhoy sa Dios! Kon masal-an naton ang pagkamapailubon sang Dios subong kahinay, madali kita magduhaduha kag maluyahan sing buot sa pagligad sang tion, kag bangod sini, mahimo kita mangin di-aktibo sa espirituwal. Ang mas malain pa, mahimo kita malimbungan sang mga tawo nga ginhinambitan ni Pedro nga dapat naton andaman​—⁠mga mayubiton, mga tawo nga wala sing pagtuo. Inang mga tawo mayagutaon nga nagasiling: “Diin ining ginsaad nga presensia niya? Ti, kutob sang pagtulog sa kamatayon sang aton mga katigulangan, ang tanan nga butang nagapadayon sing subong gid kutob sa ginsuguran sang pagtuga.”​—⁠2 Pedro 3:4.

7. Paano naangot ang pagkamapailubon ni Jehova sa iya handum nga maghinulsol ang mga tawo?

⁷ Ang ikaduha nga punto nga makuha naton sa mga pulong ni Pedro amo nga si Jehova mapailubon bangod luyag niya nga ang tanan makadangat sa paghinulsol. Ang mga batinggilan nga indi magbiya sa ila malaut nga mga buhat pagalaglagon ni Jehova. Apang, wala nagakalipay ang Dios kon ang isa ka malauton mapatay. Sa baylo, nalipay sia nga makita ang mga tawo nga nagahinulsol, nagabiya sa ila malaut nga mga dalanon, kag padayon nga magkabuhi. (Ezequiel 33:11) Amo ini ang rason kon ngaa padayon sia nga nagapailob kag nagapadala sang iya mga alagad sa pagbantala sang maayong balita sa tanan nga bahin sang duta agod hatagan sing kahigayunan ang mga tawo sa pagkabuhi.

8. Paano nakita ang pagkamapailubon sang Dios sa iya pagpakig-angot sa pungsod sang Israel?

⁸ Ang pagkamapailubon sang Dios makita man sa iya pagpakig-angot sa dumaan nga pungsod sang Israel. Sa sulod sang mga siglo, nagpailob sia sa ila  pagkamalalison. Paagi sa iya mga manalagna, sulitsulit nga ginlaygayan niya sila: “Talikod kamo sa inyo malaut nga mga dalanon kag bantayi ang akon mga sugo kag ang akon mga palatukuran, suno sa tanan nga kasuguan nga ginsugo ko sa inyo mga ginikanan, kag nga ginpadala ko sa inyo paagi sa akon mga alagad nga mga manalagna.” Ano ang resulta? Sing makapasubo, ang mga tawo “wala namati.”​​—⁠2 Hari 17:​13, 14.

9. Paano ginpabanaag ni Jesus ang pagkamapailubon sang iya Amay?

⁹ Sa katapusan, ginpadala ni Jehova ang iya Anak, nga walay untat nga nagpangabay sa mga Judiyo nga magpanumbalik sa Dios. Himpit nga ginpabanaag ni Jesus ang pagkamapailubon sang iya Amay. Nakahibalo gid nga malapit na lang sia patyon, si Jesus nagpanalabiton: “Jerusalem, Jerusalem, ang nagapatay sa mga manalagna kag nagabato sa mga ginpadala sa iya,​—⁠makapila kuntani nga luyag ko tipunon ang imo mga anak, subong sang isa ka munga nga nagatipon sang iya mga piso sa idalom sang iya mga pakpak! Apang indi ninyo luyag ini.” (Mateo 23:37) Ining makatalandog nga mga pinamulong indi kaangay sang ginahambal sang isa ka matigdas nga hukom nga luyag magsilot sa isa ka tawo kundi kaangay sang isa ka mahigugmaon nga abyan nga mapailubon sa mga tawo. Kaangay sang iya Amay sa langit, luyag ni Jesus nga ang mga tawo maghinulsol kag makalampuwas sa malaglagon nga paghukom. Ang iban namati sa mga paandam ni Jesus kag nakalikaw sa makakulugmat nga paghukom sa Jerusalem sang 70 C.⁠E.​​—⁠Lucas 21:20-​22.

10. Sa anong paagi kita nakabenepisyo sa pagkamapailubon sang Dios?

¹⁰ Indi bala dalayawon gid ang pagkamapailubon sang Dios? Walay sapayan sang daku nga pagkamalalison sang katawhan, ginhatagan ni Jehova ang kada isa sa aton, lakip ang minilyon pa ka tawo, sing kahigayunan nga makilala sia kag magbaton sing paglaum nga kaluwasan. “Kabiga ninyo ang pagpailob sang aton Ginuo subong kaluwasan,” sulat ni Pedro sa mga masigka-Cristiano. (2 Pedro 3:15) Indi bala nga dapat naton pasalamatan nga ang pagkamapailubon ni Jehova nagbukas sing dalan agod maluwas kita? Wala bala kita nagapangamuyo nga kabay nga padayon si Jehova nga magpailob sa aton samtang nagaalagad kita sa iya adlaw-adlaw?​​—⁠Mateo 6:12.

11. Ang paghangop sa pagkamapailubon ni Jehova nagapahulag sa aton nga himuon ang ano?

¹¹ Kon mahangpan naton kon ngaa mapailubon si Jehova, mabuligan kita nga maghulat sing mapailubon sa iya pagluwas, nga wala gid nagahinakop nga mahinay sia sa pagtuman sang iya mga saad. (Panalabiton 3:26) Samtang padayon kita nga nagapangamuyo nga magkari ang Ginharian sang Dios, nagasalig kita nga nahibaluan sang Dios ang pinakamaayo nga tion sa pagsabat sinang pangamuyo. Dugang pa, ginapahulag kita nga ilugon si Jehova paagi sa pagpakita sing diosnon nga pagkamapailubon sa aton pagpakig-angot sa aton mga kauturan kag sa aton mga ginabantalaan. Indi man naton luyag nga malaglag ang bisan sin-o kundi luyag naton nga makita sila nga maghinulsol kag matigayon kaangay naton ang paglaum nga kabuhi nga walay katapusan.​​—⁠1 Timoteo 2:​3, 4.

Binagbinaga ang Pagkamapailubon sang mga Manalagna

12, 13. Nahisuno sa Santiago 5:​10, paano madinalag-on nga napakita ni propeta Isaias ang pagkamapailubon?

¹² Paagi sa pagbinagbinag sang pagkamapailubon ni Jehova, nabuligan kita nga apresyahon kag palambuon inang kinaiya. Indi mahapos para sa di-himpit nga mga tawo ang pagpalambo sing pagkamapailubon, apang sarang ina mahimo. Makatuon kita gikan sa mga alagad sang Dios sang una. Si disipulo Santiago nagsulat: “Mga utod, gamita subong huwaran sang pag-antos sa kalautan kag sang pagpailob ang mga manalagna, nga naghambal sa ngalan ni Jehova.” (Santiago 5:10) Makalulugpay kag makapalig-on mahibaluan nga nalandas sang iban ang mga problema nga kaanggid man sang aton.

¹³ Halimbawa, kinahanglan gid ni propeta Isaias ang pagpailob sa iya asaynment. Si Jehova nagsiling sa iya: “Lakat ka, kag ikaw magasiling sa sining katawhan, ‘Pamati kamo sa liwat kag liwat, apang indi kamo makahangop; kag tan-awa ninyo sa liwat kag liwat, apang indi ninyo mahibaluan.’ Patig-aha ang tagipusuon sining katawhan, kag pabungula ang ila mga dulunggan, kag papiyunga ang ila mga mata, agod indi sila makakita paagi sa ila mga mata kag paagi sa ila mga dulunggan indi sila makabati, kag agod ang ila tagipusuon indi makahangop kag agod indi sila manumbalik kag paayuhon ang ila kaugalingon.” (Isaias 6:​9, 10)  Walay sapayan sang di-pagsapak sang mga tawo, mapailubon nga ginpahayag ni Isaias ang nagapaandam nga mensahe ni Jehova sa di-magkubos 46 ka tuig! Sing kaanggid, ang pagkamapailubon makabulig man sa aton nga magbatas sa pagbantala sang maayong balita, bisan pa madamo ang wala nagabaton.

14, 15. Ano ang nakabulig kay Jeremias sa paglandas sang mga kapiutan kag kaluya sing buot?

¹⁴ Sa pagkamatuod, samtang ginatuman sang mga manalagna ang ila ministeryo, indi lamang di-pagsapak ang kinahanglan nila batason; ginhingabot pa sila. Si Jeremias ginbutang sa pandog, ginbilanggo sa “balay sang mga grilyos,” kag ginhulog sa bubon. (Jeremias 20:​2; 37:​15; 38:6) Ang mga tawo mismo nga luyag niya buligan amo pa ang naghingabot sa iya. Apang, si Jeremias wala nagdumot ukon nagbalos man. Mapailubon sia nga nagbatas sa sulod sang mga dekada.

¹⁵ Ang paghingabot kag pagyubit wala nagpahipos kay Jeremias, kag indi man ini makapahipos sa aton karon. Sa pagkamatuod, kon kaisa nagabatyag man kita sing kaluya sing buot. Si Jeremias naluyahan anay sing buot. “Ang pulong ni Jehova nangin kahuluy-an sa akon kag yuyubitan sa bug-os nga adlaw,” sulat niya. “Kag nagsiling ako: ‘Indi na gid ako maghinambit sa iya, kag indi ako magpamulong pa sa iya ngalan.’” Ano nian ang natabo? Nag-untat bala si Jeremias sa pagbantala? Padayon niya: “Sa akon tagipusuon ang [pulong sang Dios] subong sang kalayo nga nagadabdab nga natakpan sa akon mga tul-an; kag ginalapyo ako sa pagbatas, kag indi ko ini mabatas.” (Jeremias 20:​8, 9) Talupangda nga sang nagkonsentrar sia sa pagyubit sang mga tawo, nadula ang iya kalipay. Sang ginliso niya ang iya igtalupangod sa katahom kag importansia sang mensahe mismo, nagbalik ang iya kalipay. Dugang pa, si Jehova kaupod ni Jeremias “kaangay sang isa ka makakulugmat nga gamhanan,” ginpalig-on sia sa pagbantala sang pulong sang Dios upod ang kakugi kag kaisog.​—⁠Jeremias 20:11.

16. Paano naton mahuptan ang kalipay sa aton hilikuton nga pagbantala sang maayong balita?

¹⁶ Nakasapo bala sing kalipay si manalagna Jeremias sa iya hilikuton? Huo gid! Nagsiling sia kay Jehova: “Ang imo mga pulong nakit-an, kag ginkaon ko ini; kag ang imo pulong nangin kalipay sa akon kag kasadya sang akon tagipusuon; kay ang imo ngalan ginatawag sa akon, O Jehova.” (Jeremias 15:16) Nalipay si Jeremias sa iya pribilehiyo nga irepresentar ang matuod nga Dios kag ibantala ang iya pulong. Sarang man kita magkalipay. Dugang pa, nagakalipay kita, subong man ang mga anghel sa langit, bangod sa bug-os nga kalibutan madamo ang nagabaton sang mensahe sang Ginharian, nagahinulsol, kag nagalakat sa dalanon padulong sa kabuhi nga walay katapusan.​​—⁠Lucas 15:10.

“Ang Pagbatas ni Job”

17, 18. Paano nakabatas si Job, kag ano ang nangin resulta?

¹⁷ Pagkatapos magkomento tuhoy sa mga manalagna sang una, si disipulo Santiago nagsulat: “Nabatian ninyo ang pagbatas ni Job kag nakita ang resulta nga ginhatag ni Jehova, nga si Jehova mapinalanggaon gid kag maluluy-on.” (Santiago 5:11) Ang Griegong tinaga nga ginbadbad diri nga “pagbatas” may kahulugan nga kaanggid sa tinaga nga gingamit ni Santiago sa nauna nga bersikulo para sa “pagkamapailubon.” Ginapatalupangod ang kinatuhayan sang duha ka tinaga, ang isa ka iskolar nagsulat: “Ang nahauna amo ang pagpailob kon ginaabuso kita sang mga tawo, ang naulihi amo ang maisugon nga pagbatas sang mga butang nga nagapapiot sa aton.”

¹⁸ Daku gid nga kapiutan ang naeksperiensiahan  ni Job. Nadulaan sia sing pagkabutang, namatyan sang mga kabataan, kag nag-antos sing masakit nga balatian. Nangatarungan man sia batok sa butig nga mga panumbungon nga ginasilutan kuno sia ni Jehova. Si Job wala lamang nag-antos sing hipos; nanganduhoy sia sa iya kahimtangan kag nagpahangop pa gani nga mas matarong sia sangsa Dios. (Job 35:2) Apang, wala sia madulai sing pagtuo, ukon nagluya ang iya integridad. Wala niya ginsumpa ang Dios subong sang ginsiling ni Satanas nga pagahimuon niya. (Job 1:​11, 21) Ano ang resulta? “Ginpakamaayo [ni Jehova] ang katapusan ni Job sangsa iya panugod.” (Job 42:12) Ginpasag-uli ni Jehova ang kapagros ni Job, gindoble ang iya manggad, kag ginpadyaan sia sing makaalayaw kag makalilipay nga pagkabuhi upod sa iya mga hinigugma. Ang matutom nga pagbatas ni Job nagbulig man sa iya nga makilala sing labi si Jehova.

19. Ano ang matun-an naton sa mapailubon nga pagbatas ni Job?

¹⁹ Ano ang matun-an naton sa mapailubon nga pagbatas ni Job? Kaangay ni Job, mahimo man kita mag-antos sing balatian ukon sing iban pa nga mga kabudlayan. Mahimo indi naton mahangpan sing bug-os kon ngaa ginatugutan ni Jehova nga matilawan kita. Apang, isa lamang ang mapat-od naton: Kon magpabilin kita nga matutom, pakamaayuhon kita. Pat-od gid nga pagapadyaan ni Jehova ang mga hanuot nga nagapangita sa iya. (Hebreo 11:6) Si Jesus nagsiling: “Sia nga nakabatas tubtob sa katapusan amo sia ang maluwas.”​—⁠Mateo 10:22; 24:13.

“Ang Adlaw ni Jehova Magaabot”

20. Ngaa mapat-od naton nga magaabot ang adlaw ni Jehova?

²⁰ Bisan pa mapailubon si Jehova, matarong man sia kag indi niya pagpahanugutan tubtob san-o ang kalautan. May limitasyon ang iya pagpailob. Si Pedro nagsulat: “Wala sia [ang Dios] magpugong sa pagsilot sa dumaan nga kalibutan.” Walay sapayan nga si Noe kag ang iya pamilya naluwas, yadtong di-diosnon nga kalibutan gin-anaw. Ginlaglag man ni Jehova ang Sodoma kag Gomorra kag ginhimo ini nga abo. Ining mga paghukom “nagapahamtang sing sulundan para sa di-diosnon nga mga tawo tuhoy sa mga butang nga magaabot.” Bangod sini, makapat-od kita: “Ang adlaw ni Jehova magaabot.”​—⁠2 Pedro 2:​5, 6; 3:10.

21. Paano naton mapakita ang aton pagkamapailubon kag pagbatas, kag ano ang pagabinagbinagon naton sa masunod nga artikulo?

²¹ Busa, ilugon naton ang pagkamapailubon ni Jehova paagi sa pagbulig sa iban nga makadangat sa paghinulsol agod nga maluwas sila. Ilugon man naton ang mga manalagna paagi sa mapailubon nga pagbantala sang maayong balita walay sapayan sang di-pagsapak sang mga ginabantalaan naton. Dugang pa, mapat-od naton nga pakamaayuhon kita ni Jehova sing bugana kon, kaangay ni Job, ginabatas naton ang mga pagtilaw kag ginahuptan ang aton integridad. Madamo kita sing rason nga magkalipay sa aton ministeryo kon talupangdon naton kon daw ano ka bugana nga pagpakamaayo ang ginahatag ni Jehova sa mga panikasog sang iya katawhan nga ibantala ang maayong balita sa bug-os nga duta. Makita naton ini sa masunod nga artikulo.

Madumduman Mo Bala?

• Ngaa nagapailob si Jehova?

• Ano ang matun-an naton sa pagkamapailubon sang mga manalagna?

• Paano nagbatas si Job, kag ano ang nangin resulta?

• Paano naton nahibaluan nga ang pagkamapailubon ni Jehova may limitasyon?

[Mga Pamangkot sa Pagtinuon]

[Retrato sa pahina 18]

Himpit nga ginpabanaag ni Jesus ang pagkamapailubon sang iya Amay

[Mga retrato sa pahina 20]

Paano ginpadyaan ni Jehova ang pagkamapailubon ni Jeremias?

[Mga retrato sa pahina 21]

Paano ginpadyaan ni Jehova ang pagbatas ni Job?