‘Ang Gugma Ninyo sa Isa kag Isa Nagalambo’

MADAMO nga kinaugali nga kalamidad ang natabo sa Japan sang 2004. Ang pila sini amo ang bagyo, baha, kag linog. Madamo ang naapektuhan gid lakip na ang mga Saksi ni Jehova. (Manugwali 9:​11) Apang naghatag ini sing kahigayunan sa mga Saksi nga ipakita ang ila utudnon nga gugma sa isa kag isa.—1 Pedro 1:​22.

Halimbawa, bangod sang mabunok nga ulan sang Hulyo, nag-awas ang isa ka suba sa sentral nga Japan. Ginguba sang baha ang kapin sa 20 ka pamalay sang mga Saksi ni Jehova. Nagtaas ang tubig sa isa ka Kingdom Hall sing mga 1 ka metro halin sa salog. Gilayon nga nagkadto ang mga Saksi halin sa kaiping nga mga kongregasyon sa pagbulig. Gintinluan sang ginatos ka boluntaryo ang lutakon nga mga balay. Sa sulod lamang sang duha ka semana, ang Kingdom Hall natinluan sing maayo kag nakay-o.

Sang Oktubre 23, naglinog sa amo gihapon nga lugar nga may kabaskugon nga 6.8 sa Richter scale. Mga 40 ka tawo ang napatay, kag kapin sa 100,000 ka tawo ang gin-ibakwit. Wala sing tubig, gas, kag koryente. Walay sapayan nga ang sentro sang linog 50 kilometros lamang ang kalayuon sa ginkay-o nga Kingdom Hall, wala ini maano. Ginhimo ini dayon nga temporaryo nga relief center. Ginkadtuan gilayon sang Cristianong mga gulang ang ila mga kauturan kag nalipay sa paghibalo nga wala sing isa nga nasamaran ukon napatay. Kaagahon pa pagkasunod nga adlaw, anom ka Saksi nga nabahaan sang Hulyo ang malangkagon nga nagboluntaryo sa pagdul-ong sing pagkaon kag tubig sa mga nalinugan. Pila ka oras pagkatapos sang linog, nag-abot dayon ang mga ayuda.

“Ginakabig sang mga nabahaan nga ang pagbulig sa mga nalinugan isa ka kahigayunan nga mapabutyag nila ang ila pagpasalamat sa bulig nga nabaton mismo nila,” panaysayon sang isa ka gulang. “Nagtrabaho sila todo halin kaagahon tubtob tungang gab-i. Kag makita sa ila mga nawong ang kalipay!”

Wala sing baha ukon linog ang makabugto sa higot sang gugma nga nagahiusa sa Cristianong paghiliutod sang mga Saksi ni Jehova. Sa baylo sini, kon mag-abot ining mga kalamidad, maeksperiensiahan sang mga Cristiano ang ginsiling ni apostol Pablo sa mga masigkatumuluo sa Tesalonica: ‘Ang gugma sang tagsa sa inyo sa isa kag isa nagalambo.’—2 Tesalonica 1:3.