Sugilanon sa Kabuhi

Nabaton Ko ‘ang mga Pangabay sang Akon Tagipusuon’

PANUGIRON NI DOMINIQUE MORGOU

Nakakadto gid man ako sa Aprika sang Disiembre 1998! Natuman na ang akon handum sugod pa sa pagkabata. Ang pagpamensar sa mga kawayangan kag sa makawiwili nga ilahas nga mga kasapatan sa Aprika pirme gid nga nagapahalipay sa akon. Karon didto na ako! Natuman man ang akon isa pa ka handum. Isa ako ka bug-os tion nga ebanghelisador nga nagaalagad sa isa ka dumuluong nga pungsod. Para sa madamo, daw imposible ini. Haluson ako makakita, apang ginataristaris ko ang balasbalason nga mga kalye sang mga minuro sa Aprika sa bulig sang isa ka nagatuytoy nga ido nga anad sa mga kalye sang mga siudad sa Europa. Sugiran ko kamo kon paano nangin posible para sa akon nga mag-alagad sa Aprika kag kon paano ginhatag ni Jehova sa akon ‘ang mga pangabay sang akon tagipusuon.’​—⁠Salmo 37:4.

NATAWO ako sang Hunyo 9, 1966, sa nabagatnan nga Pransia. Ako ang kinagot sa pito ka kabataan​—⁠duha ka lalaki kag lima ka babayi​—⁠kag kami tanan gin-atipan sang mahigugmaon nga mga ginikanan. Apang, may isa ka makapasubo nga hitabo sang bata pa ako. Kaangay sang akon lola, sang akon iloy, kag sang akon magulang nga babayi, nasubli ko ang balatian nga nagadul-ong sa ulihi sa bug-os nga pagkabulag.

Sang tin-edyer ako, nagrebelde ako batok sa katilingban bangod sang naagihan ko nga pag-ihig-ihig sa rasa, pagkamaynadampigan, kag pagkasalimpapaw. Sini man nga mabudlay nga tion nga nagsaylo kami sa rehiyon sang Hérault. Didto natabo ang isa ka makalilipay nga butang.

Isa ka Domingo sang aga, nagduaw sa amon balay ang duha ka babayi nga mga Saksi ni Jehova.  Bangod kilala sila sang akon iloy, ginpadayon niya sila. Ginpamangkot sang isa sa ila si Nanay kon nadumduman pa niya nga nagsaad sia anay nga magatuon sia sa Biblia sa pila ka adlaw. Nadumduman pa ini ni Nanay, gani namangkot sia, “Ti, san-o ta masugod?” Nagsugtanay sila nga magtuon kada Domingo sang aga, kag sa sini nga paagi nga natun-an ni Nanay ang “kamatuoran sang maayong balita.”​—⁠Galacia 2:14.

Pagtigayon sing Paghangop

Maukod nga ginpanikasugan ni Nanay nga intiendihon kag tandaan ang iya ginatun-an. Bangod bulag sia, dapat niya sauluhon ang tanan. Ang mga Saksi mapailubon gid sa iya. Kada magduaw ang mga Saksi, nagapanago ako sa akon hulot kag nagagua lamang ako kon makahalin na sila. Apang, isa ka hapon, nakita ako ni Eugénie, nga isa sa mga Saksi, kag ginsugilanon niya ako. Nagsiling sia nga dulaon sang Ginharian sang Dios ang tanan nga pagkasalimpapaw, dumot, kag pag-ihig-ihig sa kalibutan. “Ang Dios lamang ang makalubad sini,” siling niya. Ginpamangkot niya ako kon luyag ko nga mahibaluan ang dugang pa. Pagkadason nga adlaw, nagsugod ako sa pagtuon sa Biblia.

Bag-o para sa akon ang tanan nga natun-an ko. Nahangpan ko karon ang makatarunganon nga mga rason kon ngaa umalagi nga ginapahanugutan sang Dios ang kalautan sa duta. (Genesis 3:15; Juan 3:16; Roma 9:17) Natun-an ko man nga wala kita ginpabay-an ni Jehova nga wala sing paglaum. Nagsaad sia sa aton sing kabuhi nga walay katapusan sa isa ka paraiso nga duta. (Salmo 37:29; 96:​11, 12; Isaias 35:​1, 2; 45:18) Sa sina nga Paraiso, ang akon panulok ipasag-uli, kay amat-amat na ako nga nagakabulag.​—⁠Isaias 35:5.

Pagsulod sa Bug-os Tion nga Pag-alagad

Sang Disiembre 12, 1985, ginsimbuluhan ko ang akon dedikasyon kay Jehova paagi sa pagpatugmaw sa tubig, sa amo ginbuylugan ko ang akon magulang nga babayi nga si Marie-Claire, nga nauna na nga nagpatugmaw. Ang akon magulang nga lalaki nga si Jean-Pierre kag ang akon pinalangga nga iloy nagpatugmaw man sang ulihi.

Ang kongregasyon nga ginapakig-updan ko may yara pila ka regular payunir, ukon bug-os tion nga mga ebanghelisador. Napalig-on ako sa ila kalipay kag kakugi sa ministeryo. Walay sapayan nga si Marie-Claire may balatian sa mata kag may brace sa isa ka tiil, nagsulod sia sa bug-os tion nga pag-alagad. Tubtob karon, padayon gihapon niya ako nga ginapalig-on sa espirituwal. Bangod sang akon pirme nga pagpakig-upod sa mga payunir sa kongregasyon kag sa pamilya, nagtubo sa akon ang hanuot nga handum nga magsulod man sa bug-os tion nga pag-alagad. Gani sang Nobiembre 1990, nagpayunir ako sa Béziers.​—⁠Salmo 94:17-19.

Pag-atubang sa Pagluya sing Buot

Ginbuligan kag gin-atipan ako sang iban pa nga mga payunir sa ministeryo. Apang, ginaluyahan gihapon ako sing buot kon kaisa bangod sang akon mga limitasyon kag sang akon handum nga makahimo sing kapin pa. Apang, ginsakdag ako ni Jehova sa mga tion nga ginaluyahan ako. Nagpanalawsaw ako sa Watch Tower Publications Index, kag ginpangita ko ang mga sugilanon tuhoy sa mga payunir nga indi man makakita sing maayo kaangay ko. Nakibot ako nga kadamo gid gali! Ining praktikal kag makapalig-on nga mga sugilanon nagtudlo sa akon nga pabaloran ang masarangan ko nga himuon kag batunon ang akon mga limitasyon.

Agod suportahan ang akon kaugalingon, nagtrabaho ako subong manugpaninlo sa mga shopping mall upod sa iban nga mga Saksi. Isa ka adlaw, natalupangdan ko nga ginasulit sang akon mga katrabaho ang mga lugar nga bag-o ko lang natinluan. Maathag gid nga may nagakabilin gihapon nga higko. Ginsugilanon ko si Valérie, ang payunir nga amo ang lider sang amon grupo sa pagpaninlo, kag ginsilingan ko sia nga prangkahon niya ako kag sugiran kon bala ginapabudlayan ko ang iban. Mainayuhon nga ginpabay-an niya ako nga magdesisyon kon sa pagbanta ko, indi ko na masarangan ang trabaho. Sang Marso 1994, naghalin ako.

Sa liwat, nagbatyag ako nga daw wala sing pulos. Nangamuyo ako sing hugot kay Jehova, kag nahibaluan ko nga ginpamatian niya ang akon mga pakitluoy. Sa liwat, ang pagtuon sa Biblia kag Cristianong mga publikasyon nakabulig gid sing daku. Walay sapayan nga labi nga nagadulom ang akon  mata, ang akon handum nga mag-alagad kay Jehova labi pa nga nagbaskog. Ano ang himuon ko?

Maabtik nga Pagdesisyon Samtang Ginapahulat Anay

Nag-aplay ako para mag-training sa Rehabilitation Center for the Blind and Visually Impaired sa Nîmes kag sang ulihi, gin-admit ako sa sulod sang tatlo ka bulan. Takus gid ang tion nga gintener ko didto. Nahangpan ko ang limitasyon sang akon sablag kag natun-an ko nga makigbagay sa sini. Bangod kaupod ko ang mga tawo nga may lainlain nga mga sablag, narealisar ko kon daw ano ka hamili ang akon Cristianong paglaum. Sa bisan paano, may tulumuron ako kag makahimo ako sing mapuslanon nga butang. Isa pa, nagtuon ako sing Pranses nga Braille.

Sa akon pagpauli, natalupangdan sang akon pamilya ang daku gid nga nabulig sang training sa akon. Apang, ang isa ka butang nga wala ko gid maluyagan amo ang puti nga baston nga kinahanglan ko gamiton. Indi ko mabaton nga kinahanglan ko nga maggamit sing baston. Kuntani iban na lang​—⁠ayhan isa ka nagatuytoy nga ido.

Nagpangabay ako sing ido apang ginpahulat anay ako kay madamo pa kuno ang nauna sa akon. Isa pa, ang ahensia kinahanglan pa nga magpangusisa anay. Ang isa ka nagatuytoy nga ido wala ginahatag bisan kay sin-o lang. Isa ka adlaw, ginsilingan ako sang babayi nga nagabulig sa pagpalakat sang isa ka asosasyon para sa mga bulag nga ang isa ka lokal nga tennis club magadonar sing isa ka nagatuytoy nga ido sa isa ka bulag ukon sa isa nga haluson-makakita sa amon lugar. Kag nagsiling sia nga nadumduman niya ako. Batunon ko bala ini? Nahantop ko ang bulig ni Jehova sa sini nga butang kag ginbaton ko ang mainayuhon nga tanyag. Walay sapayan sini, kinahanglan nga maghulat anay ako sa pag-abot sang ido.

Indi Gihapon Malipatan ang Aprika

Samtang nagahulat, ginpatuhoy ko ang akon igtalupangod sa iban nga butang. Subong sang nasambit  na kaina, interesado gid ako sa Aprika sugod pa sa akon pagkabata. Walay sapayan nga labi nga nagadulom ang akon mata, ang akon interes labi pa gid nga nagbaskog, ilabi na sang nabalitaan ko nga madamo katama nga tawo sa Aprika ang interesado sa Biblia kag sa pag-alagad kay Jehova. Antes sini, nasambit ko kay Valérie nga luyag ko mamasyar sa Aprika. Updan bala niya ako? Nagpasugot sia, kag nagsulat kami sa pila ka nagahambal-sing-Pranses nga mga sanga sang mga Saksi ni Jehova sa Aprika.

Nagbalos ang Togo. Nalipay gid ako kag ginpangabay ko si Valérie nga basahon ini sa akon. Makapalig-on ang sulat, gani nagsiling si Valérie: “Kon amo, malakat ta.” Pagkatapos makigkomunikar sa mga kauturan sa sanga paagi sa sulat, gin-instruksionan ako nga kontakon si Sandra, nga isa ka payunir sa Lomé, ang kapital nga siudad. Gin-iskedyul namon ang petsa sang amon lakat sang Disiembre 1, 1998.

Daku gid ang kinatuhayan, apang daw ano ini ka makalilipay! Pagpanaug namon sa eroplano sang naghugpa kami sa Lomé, nabatyagan namon dayon ang tuman nga kainit sa Aprika. Ginsugat kami ni Sandra. Amo pa lang ini ang amon una nga pagkitaay, apang daw madugay na kami nga mag-abyanay. Antes kami nag-abot, si Sandra kag ang iya kaupod, nga si Christine, gintangdo subong mga espesyal payunir sa Tabligbo, isa ka gamay nga banwa sa interyor. Pribilehiyo namon karon nga updan sila sa ila bag-o nga asaynment. Nagtener kami sing mga duha ka bulan, kag sang pagpauli namon, nahibaluan ko nga magabalik ako.

Nalipay Ako nga Makabalik

Sa Pransia, gilayon ko nga ginhandaan ang akon ikaduha nga pagbiyahe sa Togo. Sa bulig sang akon pamilya, nakahimo ako sing mga kahimusan nga makatener didto sing anom ka bulan. Gani sang Septiembre 1999, nagsakay liwat ako sa eroplano pakadto sa Togo. Apang, sini nga tion, isa lang ako. Handurawa lamang ang kahangawa sang akon pamilya sang nakita nila ako nga magabiyahe sing isahanon walay sapayan sang akon sablag! Apang wala sing rason agod magkabalaka sila. Ginpasalig ko ang akon mga ginikanan nga sugaton ako sang akon mga abyan, nga nangin daw pamilya na sa akon, sa Lomé.

Makalilipay gid nga makabalik sa isa ka lugar diin madamo katama nga tawo ang nagapakita sing interes sa Biblia! Kinaandan na lang ang makakita sing tawo nga nagabasa sing Biblia sa dalan. Sa Tabligbo ang mga tawo amo ang nagatawag sa imo agod makigsugilanon sa Biblia. Kag isa gid ka pribilehiyo nga makaupod sa dalayunan ang duha ka espesyal payunir nga babayi! Natun-an ko ang isa pa ka kultura, nga amo ang pagtan-aw sa mga butang sa tuhay nga paagi. Una sa tanan, nakita ko nga ginauna sang amon Cristianong mga kauturan sa Aprika ang mga intereses sang Ginharian sa ila kabuhi. Halimbawa, indi balagbag para sa ila ang paglakat sing kinilometro pakadto sa Kingdom Hall agod makatambong sa mga miting. Madamo man ako sing natun-an gikan sa ila pagkamainabyanon kag pagkamaabiabihon.

Isa ka adlaw, pagpauli ko halin sa pag-alagad sa latagon, ginsugiran ko si Sandra nga nahadlok ako nga magpauli sa Pransia. Haluson na ako makakita. Ginpamensar ko ang gutok kag magahod nga  mga dalan sa Béziers, ang hagdanan sa apartment nga mga bilding, kag ang madamo pa nga butang nga nagapabudlay sa isa nga haluson makakita. Sa pihak nga bahin, ang mga dalan sa Tabligbo, bisan pa indi baldosa, malinong​—⁠wala sing madamo nga tawo kag wala sing trapik. Paano ako mabuhi sa Pransia karon nga naanad na ako sa Tabligbo?

Pagkaligad sang duha ka adlaw, nagtawag si Nanay kag nagsiling sia nga nagahulat na sa akon ang eskwelahan para sa nagatuytoy nga mga ido. Isa ka bata pa nga Labrador nga ido, nga ang iya ngalan amo si Océane, ang handa na nga mangin akon “mga mata.” Sa liwat, ang akon mga kinahanglanon gin-atipan kag ang akon mga kabalaka nadula. Pagkatapos sang makalilipay nga pag-alagad sa Tabligbo sa sulod sang anom ka bulan, nagpauli ako sa Pransia agod makilala si Océane.

Pagkatapos sang pila ka bulan nga paghanas, si Océane gintulin sa akon. Sang primero, indi ini mahapos. Dapat namon tun-an nga mahangpan ang isa kag isa. Apang, amat-amat ko nga narealisar nga kinahanglan ko gid si Océane. Ang matuod, si Océane bahin na karon sang akon kabuhi. Ano ang reaksion sang mga taga-Béziers kon makita nila ako nga nagaduaw sa ila balay upod ang isa ka ido? Nakatigayon ako sing daku nga pagtahod kag pagkaayo. Si Océane nangin “baganihan” sa amon lugar. Sanglit madamo ang nasaw-ahan nga makig-atubang sa isa ka tawo nga may sablag, ang ido nakabulig sa akon agod mahambalan sing mahapos ang tuhoy sa akon sablag. Ang mga tawo wala na nasaw-ahan kag nagapamati sila sa akon. Sa pagkamatuod, si Océane nangin ang pinakamaayo nga panugod sa pagpakighambal.

Nagkadto sa Aprika Upod si Océane

Wala ko malipatan ang Aprika, kag nagahanda ako karon para sa akon ikatlo nga pagbiyahe. Sini nga tion, upod ko si Océane. Nag-upod man ang lamharon nga mag-asawa, nga sanday Anthony kag Aurore, kag ang akon abyan nga si Caroline​—⁠ang tanan mga payunir kaangay ko. Sang Septiembre 10, 2000, nag-abot kami sa Lomé.

Sang primero, madamo ang nahadlok kay Océane. Pila lang sa mga taga-Lomé ang nakakita sing amo sini ka daku nga ido, kay ang kalabanan nga mga ido sa Togo magagmay lamang. Kon makita nila ang higot ni Océane, nagdumdom ang iban nga mabangis sia amo kon ngaa kinahanglan sia nga higtan. Si Océane naman handa nga pangapinan ako batok sa bisan ano man nga ginadahom niya nga katalagman. Apang, naanad sang ulihi si Océane sa bag-o nga lugar. Kon may higot sia, nagatrabaho sia​—⁠disiplinado, responsable, wala nagahalin sa akon tupad. Kon wala naman sia sing higot, paladugsing sia, kon kaisa palasunlog. Masadya kami nga duha.

Didto kami tanan nagdayon kanday Sandra kag Christine sa Tabligbo. Agod mangin pamilyar ang mga utod kay Océane, gin-agda namon sila nga magduaw sa amon kag ginpaathag sa ila ang katungdanan sang isa ka nagatuytoy nga ido, kon ngaa kinahanglan ko ini, kag kon ano ang dapat nila himuon kon yara si Océane. Nagpasugot ang mga gulang nga mag-upod si Océane sa akon sa Kingdom Hall. Bangod bag-o ini nga kahimusan sa Togo, isa ka pahibalo tuhoy sini ang ginhatag sa kongregasyon. Bahin naman sa ministeryo, si Océane nagaupod lamang sa mga pagduaw liwat kag sa mga pagtuon sa Biblia​—⁠ang mga sitwasyon diin mas madali mahangpan kon ngaa upod ko sia.

Makalilipay gid ang pagbantala sa sining teritoryo. Natandog gid ako sa pagkamainulikdon kag sa pagkamainayuhon sang mga tawo, subong sang kaabtik nila sa paghatag dayon sa akon sing bangko. Sang Oktubre 2001, nag-upod si Nanay sa akon ikap-at nga pagbiyahe sa Togo. Paglipas sang tatlo ka semana nagpauli sia sa Pransia, kag nalipay sia bangod nakita niya nga maayo ang akon kahimtangan.

Nagapasalamat gid ako kay Jehova nga nakaalagad ako sa Togo. Nagasalig ako nga padayon nga ihatag ni Jehova ‘ang mga pangabay sang akon tagipusuon’ samtang padayon ko nga ginagamit ang tanan nga ginapanag-iyahan ko sa pag-alagad sa iya.⁠ *

[Nota]

[Mga retrato sa pahina 10]

Ang pagpamensar sa mga kawayangan kag sa makawiwili nga ilahas nga mga kasapatan sa Aprika pirme gid nga nagpahalipay sa akon

[Retrato sa pahina 10]

Nag-upod si Océane sa mga pagduaw liwat

[Retrato sa pahina 11]

Nagpasugot ang mga gulang nga paupdon ko si Océane sa mga miting