Magbenepisyo sa Labing Maayo nga Edukasyon nga Matigayon!

GINAPAKILALA sang Biblia si Jehova nga Dios subong ang Manunuga sang tanan nga butang, lakip ang mga tawo. (Genesis 1:27; Bugna 4:11) Subong ang Dungganon nga Instruktor, gintudluan niya ang unang mag-asawa nga sanday Adan kag Eva, kag ginhanda sila agod magpuyo sa matahom nga hardin sang Eden. Kabubut-on niya nga padayon sila nga tudluan kag atipanon tubtob sa walay katubtuban. (Genesis 1:​28, 29; 2:15-17; Isaias 30:​20, 21) Hunahunaa lamang ina nga palaabuton!

Apang, makapasubo nga ginsikway sang unang mag-asawa ang ila palaabuton. Bangod sang ila pagkadimatinumanon nagsugod ang kalautan kag kamatayon sang tawhanon nga rasa. (Genesis 3:17-19; Roma 5:12) Nagapatuhoy sa pila ka kaliwatan wala magdugay sa tapos gintuga ang tawo, ang Biblia nagasiling: “Nakita ni Jehova nga ang kalainan sang tawo bugana sa duta kag ang tagsa ka huyog sang mga hunahuna sang iya tagipusuon malain gid sa tanan nga tion.”​—⁠Genesis 6:5.

Mga 4,500 ka tuig ang nagligad sang nagsiling si Jehova nga ang huyog sang tawo padulong pirme sa kalautan, kag ang kahimtangan sang katawhan karon amo gid ang pinakamalaut. Madamo ang nagabinutig, nagapangawat, ukon nagasakit sa iban. Nagadugang ang mga problema adlaw-adlaw, samtang ang kabalaka sa isigkatawo nagatahaw. Indi bala problemado gid ang kalabanan nga personal nga mga relasyon, lakip ang sa sulod sang pamilya? Apang, indi balasulon ang Dios sa mga nagakatabo, kay padayon sia nga nagaulikid sa mga problema karon. Interesado gid pirme si Jehova sa kaayuhan sang tawo, kag handa sia nga tudluan ang mga nagapangayo sa iya sing panuytoy agod makatigayon sing malipayon nga kabuhi. Mga 2,000 ka tuig na ang nagligad sang ginpadala niya ang iya Anak, nga si Jesucristo, sa duta kag ginpasundayag ang Iya interes nga tudluan ang katawhan nga luyag nga magmadinalag-on. Ginpakita ni Jesus ang himpit nga huwaran sang edukasyon kay gintudluan sia sang Dungganon nga Instruktor sa indi matakus nga kalawigon sang tion.

Matuod nga Cristianismo—Isa ka Edukasyon

Ginpatok ni Jesus ang matuod nga Cristianismo nga amo ang dalanon sang kabuhi nga napasad sa gugma. Sa sini, ang tanan nga panghunahuna kag mga buhat dapat nahisuno sa kabubut-on sang Dios agod magpadungog kag maghimaya sa iya ngalan. (Mateo 22:37-39; Hebreo 10:7) Ginasakdag sang iya Amay nga si Jehova ang mga panudlo ni Jesus sa sini nga dalanon sang kabuhi. Ang pagsakdag nga nabaton ni Jesus gikan sa Dios aton mabasa sa Juan 8:29: “Sia nga nagpadala sa akon kaupod nakon; wala niya ako pagbayai sa akon kaugalingon lamang, bangod pirme ko ginahimo ang mga butang nga kalahamut-an sa iya.” Huo, si Jesus may pagsakdag kag panuytoy gikan sa iya Amay sa bug-os niya nga ministeryo. Ang una nga mga sumulunod ni Jesus may panuytoy sa ila pag-atubang sa mga hangkat sa kabuhi. Gintudluan sila ni Jehova paagi sa iya Anak. Ang ila pagsunod sa mga panudlo kag huwaran ni Jesus naghimo sa ila nga mangin mas maayo nga mga tawo. Subong man sini ang mga disipulo ni Jesus karon.​—⁠Tan-awa ang kahon nga “Ang Impluwensia ni Jesus kag Sang Iya mga Panudlo,” sa pahina 6.

Nalakip sa mga butang nga nagapatuhay sa matuod nga Cristianismo amo ang edukasyon nga nagaapektar sa hunahuna kag tagipusuon agod mapabag-o ang mga tawo. (Efeso 4:​23, 24) Subong  isa ka halimbawa, binagbinaga ang gintudlo ni Jesus tuhoy sa pagkatutom sang isa sa iya tiayon: “Nabatian ninyo nga ginsiling, ‘Indi ka magpanglahi.’ Apang nagasiling ako sa inyo nga ang tagsatagsa nga padayon nga nagatan-aw sa isa ka babayi nga may daku nga pagkaibog sa iya nakahimo na sa iya sing panghilahi sa iya tagipusuon.” (Mateo 5:​27, 28) Sa sining mga pulong, gintudluan ni Jesus ang iya mga disipulo nga dapat huptan nga matinlo ang tagipusuon kag ang di-nagakaigo nga panghunahuna kag mga pagkaibog bisan wala pa mahimo, may makahalalit nga mga resulta. Indi bala matuod gid man nga ang malaut nga panghunahuna makadul-ong sa mga buhat nga makapaakig sa Dios kag makasakit sa iban?

Gani, ang Biblia nagalaygay: “Indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) ‘Posible bala nga mabag-o ang painuino paagi sa edukasyon?’ mahimo ipamangkot mo. Ang pagbag-o sang painuino nagalakip sing pagpaliso sini sa tuhay nga direksion paagi sa pagpuno sini sing mga prinsipio kag instruksion nga masapwan sa Pulong sang Dios. Mahimo ini paagi sa pagbaton sing edukasyon nga ginaaman sang Dios paagi sa iya Pulong.

Napahulag sa Pagbag-o

“Ang pulong sang Dios buhi kag gamhanan.” (Hebreo 4:12) May gamhanan gihapon ini nga impluwensia sa mga indibiduwal nga nagapamatuod nga indi ini kinaraan na. Makapahulag ini sa isa ka tawo nga bag-uhon ang iya dalanon, batunon ang matuod nga Cristianismo, kag mangin mas maayo nga tawo. Ang masunod nga mga halimbawa nagailustrar sang kapuslanan sang pagtudlo sang Biblia.

Si Emilia nga ginhinambitan sa nagligad nga artikulo, nagsiling: “Ang akon lang panikasog kulang gid agod mapaayo ang kahimtangan sa amon panimalay. Sang magsugod ako sa pagtuon sa Biblia upod sa mga Saksi ni Jehova, narealisar ko nga may paglaum gali kag ginbag-o ko ang akon panimuot. Natun-an ko nga mangin mas mapailubon kag indi magpadala sa daku nga kaakig. Sang ulihi, nagbuylog man ang akon bana sa akon pagtuon sing Biblia. Nabudlayan gid sia nga untatan ang pag-inom, apang nahimo niya ini. Nag-ayo ang amon pag-asawahay. Sa karon, malipayon kami nga mga Cristiano kag ginapatudok namon sa amon kabataan ang mga prinsipio sa Biblia.”​—⁠Deuteronomio 6:7.

Ang edukasyon nga ginaaman sang matuod nga Cristianismo makahilway sa isa ka tawo sa mga bisyo kag imoral nga pagkabuhi. Napamatud-an ini ni Manuel.⁠ * Sa edad nga 13, naglayas sia sa ila balay kag nagyupyop sing marijuana kag sang ulihi heroina na. Nagpakighirop sia sa mga lalaki kag mga babayi para may tulugan kag makakuarta. May mga tion man nga nagpanghold-ap sia agod masuportahan ang iya kaugalingon. Pirme lang  sia bangag. Pirme sia nagakapriso bangod sang iya kasingki. Isa ka bes, apat ka tuig sia nga napriso, kag didto nadalahig sia sa pagpalapaw sing mga armas. Bisan nakapangasawa na sia, magamo gihapon ang kabuhi ni Manuel. Nagsiling sia: “Nag-apok kami sa pagpuyo sa duog nga kurong anay sang mga manok. Madumduman ko pa nga ang akon asawa nagaluto sa sig-ang nga tisa. Ang amon kahimtangan wala gid sing kasiguruhan amo nga ginsilingan sang akon pamilya ang akon asawa nga bayaan na ako.”

Ano ang nagpabag-o sang iya kabuhi? Si Manuel nagsabat: “Ang kakilala ko nagkadto sa balay kag nag-istorya parte sa Biblia. Ginaatubang ko sia kon magduaw sia agod lamang pamatud-an sa iya nga ang Dios nga nagakabalaka sa katawhan wala nagaluntad. Ginkabig ko ang akon kaugalingon nga isa ka buhi nga ebidensia sina. Nakibot ako sa pagkamapailubon kag pagkamatinahuron sang Saksi, gani nagpasugot ako nga magtambong sa mga miting sa Kingdom Hall. Bisan pa nga nahibaluan sang iban didto kon ano ang akon nagligad, mainabyanon nga gin-abiabi nila ako. Wala sila nagapang-iban-iban. Daku gid ini nga paumpaw sa akon. Amo kon ngaa nagdesisyon ako nga untatan ang akon pagdroga agod mangita sing maayo nga obra. Pagkatapos sang apat ka bulan nga pagtuon ko sa Biblia, gintugutan na ako nga mag-upod sa pagbantala nga hilikuton, kag apat ka bulan sang ulihi, nabawtismuhan ako subong isa sa mga Saksi ni Jehova.”

Ano ang nahimo sang matuod nga Cristianismo kay Manuel kag sa iya pamilya? “Kon wala sing edukasyon sa Biblia, ayhan madugay na ako nga napatay. Ang dalanon sang kabuhi nga gintudlo ni Jesus nagpasag-uli sa akon sang akon pamilya. Indi na maagihan sang akon duha ka anak ang naagihan ko sang pamatan-on ako. Daku gid ang akon pagpasalamat kay Jehova kag ginapabugal ko gid ang maayo namon nga pag-updanay sang akon asawa. Ang pila sang mga kaupdanan ko anay nagdayaw kag nagsiling sa akon nga ang dalanon sang pagkabuhi ko karon amo ang labing maayo.”

Sa dalanon sang kabuhi sang mga Cristiano, ang katinlo sa moral ginalakipan sang pisikal nga katinlo. Narealisar ini ni John, nga nagaistar  sa imol katama nga bahin sang Nabagatnan nga Aprika. Sia nagpaathag: “Kon kaisa, ang amon bata nga babayi isa ka semana nga indi makapaligo, kag daw wala lang ini sa bungog namon.” Ginabaton sang iya asawa nga tuman gid man kahigko sang ila puluy-an. Apang, nagbag-o ini bangod sa Cristianong edukasyon. Nag-untat si John sa pagpakig-upod sa isa ka gang nga nagapangawat sing salakyan kag gin-atipan sing maayo ang iya pamilya. “Natun-an namon nga subong mga Cristiano, dapat namon tinluan ang amon lawas kag panapton. Naluyagan ko gid ang ginasiling sa 1 Pedro 1:​16, nga nagapalig-on sa aton nga magpakabalaan kay si Jehova nga Dios balaan. Ginapanikasugan man namon karon nga tinluan kag panamion ang hitsura sang amon simple nga puluy-an.”

Matigayon Mo ang Labing Maayo nga Edukasyon

Ang mga eksperiensia nga ginhinambitan sa ibabaw indi talagsahon. Linibo ka tawo ang nagpauswag sang ila kabuhi, subong resulta sang edukasyon nga napasad sa Biblia. Gin-apresyar sila sang ila mga amo bangod sang ila pagkabunayag kag kapisan. Nangin maayo sila nga mga kasilingan kag mga abyan, nga nagakabalaka sa kahimtangan sang ila isigkatawo. Determinado sila nga likawan ang mga bisyo kag undanon nga mga huyog, gani mas labi nga ginaatipan nila ang kapagros sang ila lawas, hunahuna, kag emosyon. Sa baylo nga usikan ang ila kinitaan sa mga bisyo, ginagamit nila ini sa kaayuhan nila kag sa kaayuhan sang ila pamilya. (1 Corinto 6:9-11; Colosas 3:18-23) Indi maduhaduhaan nga ang mga resulta sang pagtuman sang mga sugo ni Jehova sa Biblia nagapakita nga ang pagkabuhi nahisuno sa matuod nga Cristianismo amo ang labing maayo nga dalanon sang kabuhi kag amo ang labing maayo nga edukasyon nga matigayon. Nagapatuhoy sa isa ka tawo nga nagapahisuno sang iya kabuhi sa mga kasuguan sang Dios, ang Biblia nagasiling: “Ang tanan nga ginahimo niya magamadinalag-on.”​—⁠Salmo 1:3.

Makapalig-on mahibaluan nga luyag gid sang Labing Gamhanan nga Dios, nga si Jehova, nga tudluan kita. Nagsiling sia tuhoy sa iya kaugalingon: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan.” (Isaias 48:17) Huo, ginpakita ni Jehova ang dalanon, paagi sa halimbawa kag mga panudlo sang iya Anak, nga si Jesucristo. Ang iya mga panudlo nagpabag-o sa kabuhi sang madamo nga nakakilala sa iya sang yari sia sa duta, kag amo man sini ang nagakatabo sa madamo pa nga nagakabuhi suno sa iya mga panudlo karon. Ngaa indi mo hibaluon sing dugang pa ining mga panudlo? Nalipay magbulig sa imo ang mga Saksi ni Jehova sa inyo lugar agod matigayon mo ining tuman ka hamili nga edukasyon.

[Nota]

[Kahon/Retrato sa pahina 6]

Ang Impluwensia ni Jesus kag sang Iya mga Panudlo

Subong isa ka pangulo nga manugsukot sing buhis, si Zaqueo nagmanggaranon paagi sa pagpanunto kag pagpangilkil sa mga imol. Apang ginbag-o niya ang dalanon sang iya kabuhi paagi sa pag-aplikar sang mga panudlo ni Jesus.​—⁠Lucas 19:1-10.

Si Saulo sang Tarsus nag-untat sa paghingabot sa mga Cristiano kag nangin Cristiano man, kag sang ulihi gintawag nga si apostol Pablo.​—⁠Binuhatan 22:6-21; Filipos 3:4-9.

Ang pila anay sang mga Cristiano sa Corinto mga ‘makihilawason, sumilimba sa mga idolo, makihilahion, mga lalaki nga nagahulid sa mga lalaki, makawat, mga tawo nga sakon, palahubog, mapasipalahon, kag nagapangilkil.’ Apang, sang matun-an nila ang matuod nga Cristianismo, ‘ginhugasan sila sing matinlo, ginpakabalaan, kag ginpahayag nga matarong sa ngalan sang aton Ginuong Jesucristo.’​—⁠1 Corinto 6:9-11.

[Retrato sa pahina 7]

Mapakita sa imo sang Biblia kon paano magmadinalag-on