Dios Bala Ukon Tawo?

“AKO ang kapawa sang kalibutan. Sia nga nagasunod sa akon indi gid magalakat sa kadudulman, kundi makaangkon sing kapawa sang kabuhi.” (Juan 8:12) Ginpamulong ini ni Jesucristo. Ang isa ka edukado nga tawo sang nahaunang siglo nagsulat tuhoy sa iya: “Mahalungon nga natago sa iya ang tanan nga bahandi sang kaalam kag ihibalo.” (Colosas 2:3) Dugang pa, ang Biblia nagasiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Ang sibu nga ihibalo tuhoy kay Jesus importante gid agod mapaayawan ang aton espirituwal nga kinahanglanon.

Madamo nga tawo sa bug-os nga kalibutan ang nakabati na tuhoy kay Jesucristo. Ang iya impluwensia sa maragtas sang tawo indi maduhaduhaan. Sa katunayan, ang kalendaryo nga ginagamit sa kalabanan nga bahin sang kalibutan ginpasad sa tuig nga ginahunahuna nga natawo sia. “Ginatawag sang madamo nga tawo ang petsa antes sina nga tuig subong B.⁠C., ukon before Christ,” paathag sang The World Book Encyclopedia. “Ginagamit nila ang A.D., ukon anno Domini (sa tuig sang aton Ginuo), para sa petsa pagkatapos sina nga tuig.”

Apang, may nagasumpakilay nga mga ideya tuhoy sa kon sin-o si Jesus. Para sa pila, isa lamang sia ka kilala nga tawo nga may talalupangdon nga rekord sa maragtas. Apang, ginasimba sia sang iban subong Dios nga Labing Gamhanan. Ginapaanggid naman sang pila ka Hindu nga mga sumulunod si Jesucristo sa dios sang mga Hindu nga si Krishna, nga suno sa madamo, isa kuno ka dios nga nagpakatawo. Si Jesus bala isa lamang ka tawo, ukon sia bala isa nga dapat simbahon? Sin-o gid bala sia? Diin sia naghalin? Ano ang iya personalidad? Kag diin na sia karon? Subong sang makita naton sa masunod nga artikulo, ang tulun-an nga may madamo nga masiling tuhoy kay Jesus nagahatag sing masaligan nga mga sabat sa sining mga pamangkot.