Ang Espirituwalidad kag ang Imo Ikaayong Lawas

MAHIMO nga madamo nga tion ang ginahinguyang mo sa pag-atipan sang imo pisikal nga kapagros. Kada adlaw, mahimo nagahinguyang ka sing tubtob walo ka oras sa pagtulog, madamo nga oras sa pagluto kag pagkaon, kag walo ka oras ukon kapin pa sa pagtrabaho agod may ibayad ka sa lugar nga imo ginatulugan kag ibakal sing pagkaon. Kon magmasakit ka, ayhan nagahinguyang ka sing tion kag nagagasto sing kuarta agod magpadoktor ukon maghanda sing kinaandan nga bulong. Nagapaninlo ka, nagapaligo, kag mahimo nagaehersisyo pa gani pirme, agod lamang mangin maayo ang imo panglawas.

Apang, indi lamang pag-atipan sang imo pisikal nga mga kinahanglanon ang nadalahig agod magpabilin nga mapagros. May isa pa ka butang nga may daku nga papel sa imo ikaayong lawas. Ang pagpanalawsaw sa medisina nagapakita nga ang pisikal nga kapagros suod nga naangot sa espirituwal nga kapagros, buot silingon, ang imo pisikal nga kapagros apektado sang imo espirituwalidad.

Naangot sing Direkta

“Natukiban sang kalabanan nga mga pagpanalawsaw sa sini nga topiko ang direkta nga kaangtanan sang nagauswag nga espirituwalidad sa mas maayo nga kapagros,” siling ni Propesor Hedley G. Peach sang University of Melbourne, Australia. Nagakomento tuhoy sa sini, ang The Medical Journal of Australia (MJA) nagsiling: “Ang pagkarelihioso naangot man sa . . . mas manubo nga presyon sang dugo, mas manubo nga kolesterol . . . kag  mas manubo pa gani nga tsansa nga makanser sa tinai.”

Natukiban man sang isa ka pagtuon sa 6,545 ka tawo sang 2002 sa Estados Unidos nga ginhimo sang University of California (UC), Berkeley, nga “ang mga tawo nga nagatambong sa relihioso nga mga serbisyo sing makaisa kada semana mas malawig ang kabuhi sangsa mga tawo nga malaka lang ukon wala gid nagatambong.” Si Doug Oman, panguna nga awtor sang pagtuon kag isa ka manunudlo sa UC Berkeley’s School of Public Health, nagsiling: “Nakita namon ining kinatuhayan bisan pagkatapos mabinagbinag ang iban pa nga mga butang nga mahimo makaapektar subong sang sosyal nga mga kaangtanan kag mga batasan sa pag-atipan sang lawas, lakip ang pagpanigarilyo kag pag-ehersisyo.”

Ginapatalupangod ang iban pa nga mga benepisyo sang mga may espirituwal nga pagtamod sa kabuhi, ang MJA nagsiling: “Nasapwan sang mga pagtuon sa Australia nga ang relihioso nga mga tawo may mas mapag-on nga pag-asawahay, diutay lang ang nagapahubog kag nagadroga, manubo ang tsansa kag mas negatibo ang pagtamod sa paghikog, diutay ang kabalaka kag kapung-aw, kag indi makagod.” Dugang pa ang BMJ (kilala anay subong The British Medical Journal) nagreport: “Ang mga tawo nga nagapangangkon nga may mabakod nga espirituwal nga pagtuluuhan daw mas madasig maumpawan sa ila kasubo kag madula nila ini sing bug-os kon mamatyan sing isa ka hinigugma sangsa mga tawo nga wala sing pagtuluuhan.”

Nanuhaytuhay ang opinyon tuhoy sa kon ano gid ang matuod nga espirituwalidad. Apang, ang imo espirituwal nga kahimtangan may daku nga epekto sa imo pisikal kag mental nga kapagros. Ini nga pamatuod nagahisanto sa ginsiling ni Jesucristo halos 2,000 ka tuig na ang nagligad. Sia nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:​3, NW) Sanglit ang imo espirituwalidad nagaapektar sa imo kapagros kag kalipay, makatarunganon nga mamangkot: ‘Diin ayhan ako makasapo sing masaligan nga panuytoy sa espirituwal? Kag ano ang nadalahig agod mangin isa ka espirituwal nga tawo?’