Si Jehova Bugana sa Mainunungon nga Gugma
Si Jehova Bugana sa Mainunungon nga Gugma
“Ang GINUO . . . daku sa malig-on nga paghigugma.”—SALMO 145:8.
1. Daw ano kasangkad ang gugma sang Dios?
“ANG Dios gugma.” (1 Juan 4:8) Ining makatalandog nga prase nagapamatuod nga ang paggahom ni Jehova napasad sa gugma. Ti, bisan ang mga tawo nga wala nagatuman sa iya nagabenepisyo gikan sa adlaw kag ulan nga ginaaman niya sing mahigugmaon! (Mateo 5:44, 45) Bangod sang gugma sang Dios sa kalibutan sang katawhan, bisan ang iya mga kaaway sarang maghinulsol, magdangop sa iya, kag makatigayon sing kabuhi nga dayon. (Juan 3:16) Apang, sa dili madugay, laglagon ni Jehova ang wala nagahinulsol nga mga malauton agod ang mga tawo nga nagahigugma sa iya makatigayon sing kabuhi nga dayon sa isa ka matarong nga bag-ong kalibutan.—Salmo 37:9-11, 29; 2 Pedro 3:13.
2. Anong pinasahi nga aspekto sang gugma ang ginpakita ni Jehova sa mga dedikado sa iya?
2 Si Jehova nagapakita sang gugma sa iya matuod nga mga sumilimba sa isa ka hamili kag mapinadayunon nga paagi. Ini nga gugma ginapakita sang isa ka Hebreong tinaga nga ginbadbad “malig-on nga paghigugma,” ukon “mainunungon nga gugma.” Si Hari David sang dumaan nga Israel nag-apresyar gid sang malig-on nga paghigugma sang Dios. Bangod sang iya personal nga eksperiensia kag sang iya pagpamalandong sa mga pagpakig-angot sang Dios sa iban, may pagsalig nga nakaamba si David: “Ang GINUO . . . daku sa malig-on nga paghigugma [ukon, “mainunungon nga gugma”, NW].”—Salmo 145:8.
Pagkilala sa mga Mainunungon sa Dios
3, 4. (a) Paano ang Salmo 145 nagabulig sa aton nga makilala ang mga mainunungon kay Jehova? (b) Paano ang mga mainunungon sang Dios “nagapakamaayo” sa iya?
3 Tuhoy kay Jehova nga Dios, ang iloy ni manalagna Samuel, nga si Ana nagsiling: “Sia magabantay sang mga tiil sang iya mga balaan” [“mga mainunungon”, NW]. (1 Samuel 2:9) Sin-o ining “mga mainunungon”? Si Hari David naghatag sing sabat. Pagkatapos madayaw ang makatilingala nga mga kinaiya ni Jehova, sia nagsiling: “Ang imo mga balaan [mga mainunungon, NW] magapakamaayo sa imo.” (Salmo 145:10) Mahimo matingala ka kon paano mapakamaayo sang mga tawo ang Dios. Mahimo nila ini paagi sa pagdayaw sa iya ukon paagi sa paghambal sing maayo tuhoy sa iya.
4 Ang mga mainunungon kay Jehova makilala gid bangod nagahambal sila sing maayo tuhoy sa iya. Sa mga pagtinipon kag sa Cristianong mga miting, ano ang kinaandan nga tema sang ila paghambalanay? Amo gid ang Ginharian ni Jehova! Ang mainunungon nga mga alagad sang Dios may amo man nga balatyagon subong ni David, nga nag-amba: “Magapamulong sila sang himaya sang imo ginharian, kag magahambal sang imo gahom.”—Salmo 145:11.
5. Paano naton mahibaluan nga nagapamati si Jehova kon ang iya mga mainunungon nagahambal sing maayo tuhoy sa iya?
5 Nagapamati bala si Jehova kon dayawon sia sang iya mga mainunungon? Huo, nagapamati sia sa ila ginasiling. Sa isa ka tagna may kaangtanan sa matuod nga pagsimba sa aton adlaw, si Malaquias nagsulat: “Ang mga nagakahadlok sa GINUO nagsinilingay; ang GINUO nagdungog kag nagpamati, kag ang tulun-an nga handumanan ginsulat sa atubangan niya tungod sa mga nagakahadlok sa GINUO kag nagpainoino sa iya ngalan. (Malaquias 3:16) Nagapahamuot gid kay Jehova kon maghambal sing maayo tuhoy sa iya ang iya mga mainunungon, kag ginadumdom niya sila.
6. Ano nga hilikuton ang nagabulig sa aton nga makilala ang mga mainunungon sa Dios?
6 Ang mainunungon nga mga alagad ni Jehova makilala man bangod sang ila kaisog kag inisyatibo sa pagpakighambal sa mga indi sumilimba sang matuod nga Dios. Sa pagkamatuod, ang mga mainunungon sa Dios ‘nagapakilala sa mga anak sang mga tawo sang iya gamhanan nga mga buhat, kag sang himaya sang pagkahari sang iya ginharian.’ (Salmo 145:12) Nagapangita ka bala kag nagahimulos gid sang mga kahigayunan nga makapakighambal sa mga di-tumuluo tuhoy sa pagkahari ni Jehova? Indi kaangay sang tawhanon nga mga panguluhan nga madula sa dili madugay, ang iya pagkahari mapinadayunon. (1 Timoteo 1:17) Hilingagawon nga matun-an sang mga tawo ang tuhoy sa wala sing katapusan nga pagkahari ni Jehova kag magtindog sila subong mga sumalakdag sini. “Ang imo ginharian dayon nga ginharian,” amba ni David, “kag ang imo ginsakpan nagapadayon sa tanan nga kaliwatan.”—Salmo 145:13.
7, 8. Ano ang natabo sang 1914, kag ano nga pamatuod nga nagagahom na karon ang Dios paagi sa Ginharian sang iya Anak?
7 Sugod sang 1914, may dugang pa nga rason nga maghambal tuhoy sa pagkahari ni Jehova. Sadto nga tuig, gintukod sang Dios ang langitnon nga Mesianikong Ginharian kag ang Hari amo si Jesucristo, ang Anak ni David. Sa amo, gintuman ni Jehova ang iya saad nga ang pagkahari ni David tukuron sing malig-on tubtob sa tion nga wala sing latid.—2 Samuel 7:12, 13; Lucas 1:32, 33.
8 Ang pamatuod nga nagagahom na si Jehova paagi sa Ginharian sang iya Anak, nga si Jesucristo, makita sa nagakatuman nga tanda sang presensia ni Jesus. Ang labing talalupangdon nga bahin sina nga tanda amo ang hilikuton nga gintagna ni Jesus nga tumanon sang tanan nga mga mainunungon sa Dios sang sia nagsiling: “Iwali ining maayong balita sang ginharian sa bug-os nga kalibutan, subong nga saksi sa tanan nga kapungsuran; kag ugaling magaabot ang katapusan.” (Mateo 24:3-14) Bangod ang mga mainunungon sa Dios makugi nga nagatuman sini nga tagna, kapin sa anom ka milyon nga kalalakin-an, kababayin-an, kag kabataan ang nagapakigbahin karon sa sining daku kag indi na gid masulit nga hilikuton. Sa dili madugay ang katapusan magaabot sa tanan nga nagapamatok sa Ginharian ni Jehova.—Bugna 11:15, 18.
Pagbenepisyo Gikan sa Pagkasoberano ni Jehova
9, 10. Ano ang kinatuhayan sa ulot ni Jehova kag sang tawhanon nga mga gumalahom?
9 Kon dedikado kita nga mga Cristiano, ang aton kaangtanan sa Soberanong Ginuong Jehova nagadala sa aton sing madamo nga benepisyo. (Salmo 71:5; 116:12) Halimbawa, bangod nahadlok kita sa Dios kag nagahimo sing pagkamatarong, nahamut-an niya kita kag suod kita sa iya sa espirituwal. (Binuhatan 10:34, 35; Santiago 4:8) Sa kabaliskaran, ang tawhanon nga mga gumalahom pirme makita nga kaupod sang prominente nga mga tawo, subong sang mga pangulo sang militar, manggaranon nga mga negosyante, ukon sang mga bantog sa isport kag kalingawan. Suno sa pamantalaan sa Aprika nga Sowetan, ang isa ka prominente nga opisyal sang gobierno nagsiling sang masunod tuhoy sa imol nga mga duog sa iya pungsod: “Nahangpan ko kon ngaa kalabanan sa aton indi luyag magkadto sa sinang imol nga mga duog. Ini bangod luyag lamang naton kalimtan nga nagaluntad ini nga mga kahimtangan. Ginakonsiensia kita kag nahuya tungod sang malahalon [nga mga salakyan] nga ginapanag-iyahan naton.”
10 Sa pagkamatuod, ang pila ka tawhanon nga mga gumalahom nabalaka gid tuhoy sa kaayuhan sang ila mga sakop. Apang bisan ang labing halangdon nga mga gumalahom wala makakilala sing suod sa ila mga sakop. Sa pagkamatuod, mahimo kita mamangkot: May gumalahom bala nga nagaulikid gid sa tanan niya nga mga sakop amo nga nagabulig sia gilayon sa kada isa sa ila sa tion sang kabudlayan? Huo, may yara. Si David nagsulat: “Si Jehova nagaalay-ay sang tanan nga nagakapukan, kag nagapabangon sang tanan nga nagadungok.”—Salmo 145:14, NW.
11. Ano nga mga pagtilaw ang naeksperiensiahan sang mga mainunungon sa Dios, kag ano ang bulig sa ila?
11 Madamo nga mga pagtilaw kag mga kalamidad ang nagakatabo sa mga mainunungon ni Jehova nga Dios bangod sang ila pagkadihimpit kag bangod nagakabuhi sila sa isa ka kalibutan nga ginagamhan ni Satanas, ang “isa nga malaut.” (1 Juan 5:19; Salmo 34:19) Naeksperiensiahan sang mga Cristiano ang paghingabot. Ang pila nag-antos sing nagalukmatlukmat nga balatian ukon bangod nga namatyan. Kon kaisa, ang mga sayop sang mga mainunungon kay Jehova nangin tunaan nga ‘magdungok’ sila bangod sang pagluya sing buot. Apang, ano man nga pagtilaw ang matabo sa ila, pirme handa si Jehova nga magpaumpaw kag magpabakod sa espirituwal sa kada isa sa ila. Ang Hari nga si Jesucristo may kaanggid man nga mahigugmaon nga interes sa iya mainunungon nga mga sakop.—Salmo 72:12-14.
Makaalayaw nga Pagkaon sa Nagakaigo nga Tion
12, 13. Daw ano kaayo ang pag-aman ni Jehova sang mga kinahanglanon sang “tagsa ka butang nga buhi”?
12 Bangod sang iya dakung malig-on nga paghigugma, nagaaman si Jehova sang tanan nga kinahanglanon sang iya mga alagad. Nalakip sa sini amo ang pagbusog sa ila sang makapapagros nga pagkaon. Si Hari David nagsulat: “Ang mga mata sang tanan nagahulat sa imo [Jehova], kag ginahatagan mo sila sang ila kalan-on sa nagakaigo nga panag-on. Ginahumlad mo ang imo kamot, ginabusog ang handum sang tagsa ka butang nga buhi.” (Salmo 145:15, 16) Bisan sa tion sang kalamidad, sarang maniobrahon ni Jehova ang mga butang agod ang iya mga mainunungon makatigayon sing “kalan-on sa inadlaw.”—Lucas 11:3; 12:29, 30.
13 Ginsambit ni David nga ang “tagsa ka butang nga buhi” mabusog. Nagalakip ini sa mga sapat. Kon indi bangod sa bugana nga mga gamhon sang duta kag mga tanom sa dagat, ang mga tinuga sa tubig, mga pispis, kag mga sapat sa duta wala sing mahaklo nga oksiheno ukon makaon nga pagkaon. (Salmo 104:14) Apang, ginapat-od ni Jehova nga ang tanan nila nga kinahanglanon mapaayawan.
14, 15. Paano ginaaman ang espirituwal nga pagkaon karon?
14 Indi kaangay sa mga sapat, ang mga tawo may espirituwal nga kinahanglanon. (Mateo 5:3) Daw ano ka makatilingala nga ginapaayawan ni Jehova ang espirituwal nga mga kinahanglanon sang iya mga mainunungon! Antes sang iya kamatayon, si Jesus nagsaad nga “ang ulipon nga matutom kag mainandamon” magaaman sing espirituwal nga “pagkaon sa nagakaigo nga tion” sa iya mga sumulunod. (Mateo 24:45) Ang nagkalabilin sang 144,000 ka hinaplas ang nagahuman sining ulipon nga klase karon. Paagi sa ila, si Jehova nag-aman matuod sang bugana nga espirituwal nga pagkaon.
15 Halimbawa, ang kalabanan sang katawhan ni Jehova nakabenepisyo karon gikan sa bag-o kag sibu nga badbad sang Biblia sa ila kaugalingon nga lenguahe. Daw ano ka dalayawon nga aman ang New World Translation of the Holy Scriptures! Dugang pa, minilyon ka bulig sa pagtuon sa Biblia ang padayon nga ginabalhag sa kapin sa 300 ka lenguahe. Ining tanan nga pagkaon sa espirituwal nangin isa ka pagpakamaayo sa matuod nga mga sumilimba sa bug-os nga duta. Sin-o ang nagakabagay nga padunggan sini tanan? Si Jehova nga Dios. Bangod sang iya daku nga malig-on nga paghigugma, ginpaposible niya para sa ulipon nga klase nga mag-aman sing “kalan-on sa nagakaigo nga panag-on.” Paagi sa sining mga aman, “ang handum sang tagsa ka butang nga buhi” sa espirituwal nga paraiso mapaayawan karon. Kag daw ano ang kalipay sang mga alagad ni Jehova sa paglaum nga sa dili madugay ila makita ang duta nga mangin isa ka pisikal nga paraiso!—Lucas 23:42, 43.
16, 17. (a) Ano nga mga halimbawa sang pagkaon nga nabaton sa nagakaigo nga tion? (b) Paano ginpabutyag sang Salmo 145 ang balatyagon sang mga mainunungon sa Dios tuhoy sa panguna nga isyu nga ginbangon ni Satanas?
16 Binagbinaga ang talalupangdon nga halimbawa sang espirituwal nga pagkaon nga nabaton sa nagakaigo nga tion. Sang 1939, ang Bug-os Kalibutan nga Inaway II nagsugod sa Europa. Sa amo man nga tuig, ang Nobiembre 1 nga isyu sang The Watchtower nagaunod sang isa ka artikulo nga ginatig-uluhan “Neutrality.” Bangod sang maathag nga impormasyon, ang mga Saksi ni Jehova sa bug-os nga kalibutan nakahangop nga dapat mangin neutral gid sa mga hilikuton sang nagailinaway nga mga pungsod. Bangod sini, naakig sa ila ang mga panguluhan sa magtimbang nga bahin sining anom ka tuig nga inaway. Apang, walay sapayan sang pagdumili kag paghingabot, ang mga mainunungon sang Dios nagpadayon sa pagbantala sing maayong balita sang Ginharian. Sugod sang 1939 tubtob 1946, ginpakamaayo sila sang makatilingala nga pag-uswag nga 157 porsiento. Dugang pa, ang ila maayo nga rekord sang integridad sa tion sang inaway padayon nga nagbulig sa mga tawo nga makilala ang matuod nga relihion.—Isaias 2:2-4.
17 Ang espirituwal nga pagkaon nga gin-aman ni Jehova indi lamang suno sa tion kundi tuman man ka makaalayaw. Samtang ang mga pungsod malapuyot nga nagainaway sa Bug-os Kalibutan nga Inaway II, ginbuligan ang katawhan ni Jehova nga isentro ang igtalupangod sa pila ka butang nga mas importante pa sangsa ila kaluwasan. Ginbuligan sila ni Jehova nga mahangpan nga ang panguna nga hulusayon, nga nagadalahig sa bug-os nga uniberso, naangot sa kinamatarong sang pagkasoberano ni Jehova. Makapaumpaw gid mahibaluan nga bangod sang katutom sang tagsa ka Saksi ni Jehova may diutay sila nga bahin sa pagbindikar sang pagkasoberano ni Jehova kag sa pagpamatuod nga butigon ang Yawa! (Hulubaton 27:11) Indi kaangay ni Satanas, nga nagapasipala kay Jehova kag sa iya pamaagi sa paggahom, ang mga mainunungon ni Jehova padayon nga nagabantala sing dayag: “Ang GINUO matarong sa tanan niya nga dalanon.”—Salmo 145:17.
18. Ano nga halimbawa kasan-o lang sang espirituwal nga pagkaon nga suno sa tion kag makaalayaw gid?
18 Ang isa pa ka halimbawa sang suno sa tion, makaalayaw nga espirituwal nga pagkaon amo ang libro nga Mangin Suod kay Jehova, nga ginpaguwa sa ginatos ka “Makugi nga mga Manugbantala Sang Ginharian” nga mga Distrito nga Kombension nga ginhiwat sa bug-os nga kalibutan sang 2002/03. Ini nga libro, nga ginpatubas sang “ulipon nga matutom kag mainandamon” kag ginbalhag sang mga Saksi ni Jehova, nagatalupangod sang makatilingala nga mga kinaiya ni Jehova nga Dios, lakip ang ginsambit sa Salmo 145. Ining maayo nga libro may importante gid nga papel sa pagbulig sa mga mainunungon sa Dios nga magsuod pa gid sa iya.
Tion nga Magsuod Pa Gid kay Jehova
19. Anong importante nga tion ang nagahilapit, kag paano naton ini maatubang?
19 Ang isa ka importante nga kahimtangan sa paglubad sang hulusayon sa pagkasoberano ni Jehova nagahilapit. Subong sang gintagna sa Ezequiel kapitulo 38, sa dili madugay kompletuhon ni Satanas ang iya papel subong nga “Gog sang Magog.” Magalakip ini sang isa ka bug-os kalibutan nga pagsalakay sa katawhan ni Jehova. Mangin bug-os nga pagtinguha ini sa bahin ni Satanas nga gub-on ang integridad sang mga mainunungon sa Dios. Subong nga wala pa gid matabo sang una, ang mga sumilimba ni Jehova kinahanglan magtawag sa iya sing hanuot, nga nagapangayo sing bulig. Ang ila bala hanuot nga kahadlok sa Dios kag gugma sa iya mangin wala sing pulos? Indi sa pagkamatuod, kay ang Salmo 145 nagasiling: “Ang GINUO malapit sa tanan nga nagapanawag sa iya, sa tanan nga nagapanawag sa iya sa kamatuoran. Tumanon niya ang handum sang mga nagakahadlok sa iya, pamatian man niya ang ila pagtuaw, kag luwason sila. Ang GINUO nagatipig sang tanan nga nagahigugma sa iya; apang ang tanan nga malauton laglagon niya.”—Salmo 145:18-20.
20. Paano mangin matuod ang mga pinamulong sang Salmo 145:18-20 sa malapit nga palaabuton?
20 Daw ano ka makalilipay nga maeksperiensiahan ang pagkasuod ni Jehova kag ang iya nagaluwas nga gahom kon laglagon niya ang tanan nga malauton! Sa sining importante nga tion nga tuman na gid karon kalapit, magapamati lamang si Jehova sa “nagapanawag sa iya sa kamatuoran.” Indi gid sia mamati sa mga salimpapaw. Maathag nga ginapakita sang Pulong sang Dios nga ang bisan ano nga pagpanawag sing dalidali sang mga malauton sa iya ngalan mangin wala sing pulos.—Hulubaton 1:28, 29; Miqueas 3:4; Lucas 13:24, 25.
21. Paano ginapakita sang mga mainunungon ni Jehova nga nalipay sila sa paggamit sang balaan nga ngalan?
21 Mas hilingagawon na karon para sa mga nagakahadlok kay Jehova nga ‘magpanawag sa iya sa kamatuoran.’ Nalipay ang iya mga mainunungon nga gamiton ang iya ngalan sa ila mga pangamuyo kag sa mga komento nga ila mahimo sa mga miting. Ginagamit nila ang balaan nga ngalan sa ila pribado nga pagpakigsugilanon. Kag maisugon nga ginabantala nila ang ngalan ni Jehova sa ila publiko nga ministeryo.—Roma 10:10, 13-15.
22. Ngaa importante nga padayon nga pakigbatuan ang kalibutanon nga mga panimuot kag mga handum?
22 Agod makapadayon sa pagbenepisyo gikan sa suod nga kaangtanan kay Jehova nga Dios, importante man nga padayon naton nga pakigbatuan ang makahalalit sa espirituwal nga mga butang subong sang materyalismo, dimatinlo nga kalingawan, pagkadimapinatawaron, ukon di-pagsapak sa mga imol. (1 Juan 2:15-17; 3:15-17) Kon indi matadlong, ining mga tulumuron kag mga kinaiya magaresulta sa serioso nga sala kag sa ulihi sang pagkadula sa kahamuot ni Jehova. (1 Juan 2:1, 2; 3:6) Maalamon nga aton dumdumon nga si Jehova padayon nga magapakita sang malig-on nga paghigugma, ukon mainunungon nga gugma, sa aton kon magpabilin kita nga matutom sa iya.—2 Samuel 22:26.
23. Anong dalayawon nga palaabuton ang nagahulat sa tanan nga mga mainunungon sang Dios?
23 Busa padayon naton nga isentro ang aton mga panghunahuna sa dalayawon nga palaabuton nga nagahulat sa tanan nga mga mainunungon ni Jehova. Sa paghimo sini, may makalilipay kita nga paglaum nga malakip sa sadtong magadayaw, magapakamaayo kay Jehova sa “tagsa ka adlaw” kag “sa gihapon.” (Salmo 145:1, 2) Busa kabay nga ‘tipigan naton ang aton kaugalingon sa gugma sang Dios nga sa kabuhi nga wala sing katapusan.’ (Judas 20, 21) Samtang padayon nga nagabenepisyo kita gikan sa makatilingala nga mga kinaiya sang aton langitnon nga Amay, lakip ang daku nga mahigugmaon nga kaayo nga ginapakita niya sa sadtong mga nagahigugma sa iya, kabay nga mangin kaangay ang aton pagtamod sadtong ginpabutyag ni David sa katapusan nga mga pinamulong sa Salmo 145: “Ang akon baba magapamulong sang pagdayaw sa GINUO; kag magpakamaayo ang tanan nga unod sang iya balaan nga ngalan sa gihapon kag sa gihapon.”
Paano Mo Sabton?
• Paano nagabulig ang Salmo 145 nga makilala ang mga mainunungon sang Dios?
• Paano ni Jehova ‘ginapaayawan ang handum sang tagsa ka buhi nga butang’?
• Ngaa dapat kita magsuod pa gid kay Jehova?
[Mga Pamangkot sa Pagtinuon]
[Retrato sa pahina 16]
Ang mga mainunungon sang Dios nalipay sa paghinun-anon sang iya gamhanan nga mga binuhatan
[Retrato sa pahina 17]
Ang mga alagad ni Jehova maisugon nga nagabulig sa mga dumuluong nga matun-an ang himaya sang iya pagkahari
[Retrato sa pahina 18]
Si Jehova nagaaman sing pagkaon sa “tagsa ka buhi nga butang”
[Credit Line]
Animals: Parque de la Naturaleza de Cabárceno
[Retrato sa pahina 19]
Si Jehova nagahatag sing kusog kag panuytoy sa iya mga mainunungon, nga nagapangayo sang iya bulig sa pangamuyo
