Kinabatasan Lamang Bala Ukon Paghamham?

SA PILA ka Polaco nga kolehiyo, kinabatasan na sang mga estudyante nga mangolekta sing kuarta agod ibakal sang regalo para sa ila mga manunudlo, sa paglaum nga makabaton sing mas mataas nga mga grado sa ila mga pasinawan. Gani, indi katingalahan nga ang isa ka lamharon nga Cristiano nga si Katarzyna nag-atubang sa mabudlay nga kahimtangan. “Mahatag bala ako sing kuarta ukon indi?” palibog niya. Ang iya mga katubotubo nagpangatarungan: “Kinabatasan na ini. Wala sing madula sa imo, kundi makaganar ka pa, gani ngaa nagapangalag-ag pa ikaw?”

“Ginaako ko nga sa una ko nga tuig sa pagbutho, nagpakigbahin ako sa pagpangolekta sing kuarta,” baton ni Katarzyna. “Sang ulihi ko na lang narealisar nga sa sining paagi ginsakdag ko ang paghamham, nga ginapakamalaut sa Biblia.” Nadumduman niya ang mga kasulatan nga nagapakita nga ginapakalain gid ni Jehova ang paghamham. (Deuteronomio 10:17; 16:19; 2 Cronica 19:⁠7) Si Katarzyna nagsiling: “Nahangpan ko kon daw ano kahapos magpadaug sa pag-ipit sang katubotubo. Ginhunahuna ko ini liwat kag kutob sadto wala na gid ako liwat magpakigbahin sa sini nga kinabatasan.” Sang nagligad nga tatlo ka tuig, walay sapayan sang mga pagyubit sang iban nga mga estudyante, napaathag niya sa pila sa ila nga wala sia nagapakigbahin sa sining mga pagpangolekta para sa “regalo” bangod sang iya pasad sa Biblia nga mga kombiksion.

Ginasumbong sang iban si Katarzyna subong dalok kag indi mainabyanon. “Ang iban sa ila indi gihapon mainabyanon sa akon,” siling niya. “Sa pihak nga bahin, nalipay ako nga ginatahod sang madamo ang akon pagtamod.” Si Katarzyna nakilala nga isa sang mga Saksi ni Jehova, nga nagatuman sang mga prinsipio sang Biblia sa matag-adlaw nga pagkabuhi.