Nagapamangkot Ka Bala, “Diin si Jehova?”

“Nagpalayo sila sa akon . . . Kag wala sila magsiling, ‘Diin si Jehova?’”—⁠JEREMIAS 2:​5, 6.

1. Kon mamangkot ang mga tawo, “Diin ang Dios?,” ano ang ila ginahunahuna?

“DIIN ang Dios?” Ini ang pamangkot sang madamo nga tawo. Luyag lamang mahangpan sang iban sa ila ang sadsaran nga kamatuoran kon diin nahamtang ang Manunuga. Ginpamangkot man ini sang iban sa tapos matabo ang isa ka lapnag nga kalamidad ukon sang may mabug-at sila nga problema kag indi nila mahangpan kon ngaa wala magbulig ang Dios. Apang ang iban wala gid nagapamangkot bangod wala sila nagapati nga ang Dios nagaluntad.​—⁠Salmo 10:4.

2. Sin-o ang nagmadinalag-on sa ila pagpangita sa Dios?

² Siempre, madamo ang nagabaton sa bugana nga pamatuod nga may isa ka Dios. (Salmo 19:⁠1; 104:24) Ang iban sa ila kontento na nga may yara sila relihion. Apang, ang daku nga gugma sa kamatuoran nagpahulag sa madamo, sa tanan nga pungsod, nga pangitaon ang matuod nga Dios. Nagmadinalag-on ang ila panikasog bangod “indi sia malayo sa tagsatagsa sa aton.”​—⁠Binuhatan 17:26-28.

3. (a) Diin nagapuyo ang Dios? (b) Ano ang ginapahangop sang Makasulatanhon nga pamangkot, “Diin si Jehova?”

³ Kon makita sang isa ka tawo si Jehova, marealisar niya nga ang “Dios Espiritu,” nga di-makita sang tawhanon nga mga mata. (Juan 4:24) Ginpatuhuyan ni Jesus ang matuod nga Dios subong “akon Amay nga yara sa langit.” Ano ang buot silingon sini? Nga ang duog nga ginapuy-an sang aton langitnon nga Amay, sa espirituwal nga kahulugan, mataas, subong nga ang pisikal nga mga langit mataas sangsa duta. (Mateo 12:50; Isaias 63:15) Apang, bisan pa indi naton makita ang Dios paagi sa aton pisikal nga mga mata, ginapaposible niya nga makilala naton sia kag mahibaluan ang madamo tuhoy sa iya mga katuyuan. (Exodo 33:20; 34:​6, 7) Ginasabat niya ang mga pamangkot sang sinsero nga mga tawo nga luyag makahibalo sang kahulugan sang kabuhi. Tuhoy sa mga butang nga nagaapektar sa aton kabuhi, nagahatag sia sing masaligan nga basihan agod mahibaluan naton kon paano niya ginatamod ini nga mga butang kag kon bala ang aton mga handum nagahisanto sa iya mga katuyuan. Luyag niya nga mamangkot kita tuhoy sini nga mga butang kag manikasog gid nga makita ang mga sabat. Paagi kay manalagna Jeremias, ginsabdong ni Jehova ang katawhan sang dumaan nga Israel bangod wala nila ginhimo ini. Nahibaluan nila ang ngalan sang Dios, apang wala sila mamangkot, “Diin si Jehova?” (Jeremias 2:6) Indi gid sila interesado sa katuyuan ni Jehova. Wala sila nagapangita sang iya panuytoy. Kon dapat ka maghimo sing mga desisyon, daku man kag gamay, nagapamangkot ka bala, “Diin si Jehova?”

Ang mga Nagpangayo sang Panuytoy sang Dios

4. Paano kita makabenepisyo gikan sa halimbawa ni David sa pagpangayo sing panuytoy kay Jehova?

⁴ Sang lamharon pa si David, nga anak ni Jesse, nagpalambo sia sing mabakod nga pagtuo kay Jehova. Kilala niya si Jehova subong ang “buhi nga Dios.” Naeksperiensiahan mismo ni David ang pag-amlig ni Jehova. Bangod sang iya pagtuo kag gugma sa “ngalan ni Jehova,” ginpatay ni David ang armado nga Filistinhon nga higante nga si Goliat. (1 Samuel 17:​26, 34-51) Apang, si David wala magsalig sa iya kaugalingon bangod sang naagom niya nga kadalag-an. Wala sia mangatarungan nga bisan ano man ang himuon niya karon, pakamaayuhon sia ni Jehova. Sang tinuig nga nagsunod, sulitsulit nga nagpangayo si David sing panuytoy kay Jehova sang kinahanglan  sia maghimo sing mga desisyon. (1 Samuel 23:⁠2; 30:⁠8; 2 Samuel 2:⁠1; 5:19) Padayon sia nga nagpangamuyo: “Ipahibalo sa akon ang imo mga dalanon, O Jehova; tudlui ako sang imo mga banas. Palakta ako sa imo kamatuoran kag tudlui ako, kay ikaw amo ang akon Dios sang kaluwasan. Sa imo nagalaum ako sa bug-os nga adlaw.” (Salmo 25:​4, 5) Maayo gid nga halimbawa nga dapat naton sundon!

5, 6. Paano ginpangita ni Jehosapat si Jehova sa nagkalainlain nga mga tion sa iya kabuhi?

⁵ Sang panahon ni Hari Jehosapat, nga ikalima nga hari gikan sa kaliwat ni David, ang tingob nga hangaway sang tatlo ka pungsod nakig-away batok sa Juda. Sa atubangan sining pungsudnon nga emerhensia, si Jehosapat “nagpahamtang sang iya nawong sa pagpangita kay Jehova.” (2 Cronica 20:​1-3) Indi ini ang una nga tion nga ginpangita ni Jehosapat si Jehova. Ginlikawan sang hari ang pagsimba kay Baal nga ginahimo sang apostata nga naaminhan nga ginharian sang Israel kag namat-od sia nga maglakat sa dalanon ni Jehova. (2 Cronica 17:​3, 4) Gani karon nga may palaligban sia, paano ‘ginpangita ni Jehosapat si Jehova’?

⁶ Sa iya dayag nga pangamuyo sa Jerusalem sa sining ital-ital nga tion, ginpakita ni Jehosapat nga nadumduman niya ang labing gamhanan nga gahom ni Jehova. Ginpamalandungan niya ang katuyuan ni Jehova subong sang gintabog Niya ang iban nga mga pungsod kag ginhatag ang duta sa Israel subong palanublion. Ginbaton sang hari nga kinahanglan niya ang bulig ni Jehova. (2 Cronica 20:6-12) Nagtugot bala si Jehova nga makita sia sadto nga okasyon? Huo, sa pagkamatuod. Paagi kay Jahaziel, nga isa ka Levinhon, naghatag si Jehova sing espesipiko nga panuytoy, kag pagkadason nga adlaw ginpadaug Niya ang Iya katawhan. (2 Cronica 20:14-28) Paano ka makasiguro nga tugutan man ni Jehova nga makita mo sia kon mangayo ka sa iya sing panuytoy?

7. Kay sin-o mga pangamuyo ang ginapamatian sang Dios?

⁷ Si Jehova wala sing ginapasulabi. Ginaagda niya ang mga tawo sang tanan nga pungsod nga pangitaon sia sa pangamuyo. (Salmo 65:⁠2; Binuhatan 10:​34, 35) Nahibaluan niya kon ano ang sa tagipusuon sang mga nagapangabay sa iya. Ginapasalig niya kita nga ginapamatian niya ang mga pangamuyo sang mga matarong. (Hulubaton 15:29) Ginatugutan niya nga makita sia sang iban nga indi anay interesado sa iya apang karon mapainubuson nga nagapangayo sang iya panuytoy. (Isaias 65:⁠1) Ginapamatian pa gani niya ang mga pangamuyo sang mga wala anay magtuman sang iya kasuguan apang mapainubuson karon nga nagahinulsol. (Salmo 32:​5, 6; Binuhatan 3:19) Apang, kon ang tagipusuon sang isa ka tawo indi mapinasakupon sa Dios, ang iya mga pangamuyo wala sing pulos. (Marcos 7:​6, 7) Binagbinaga ang pila ka halimbawa.

Nangamuyo Sila Apang Wala Ginsabat

8. Ngaa wala mahamuot si Jehova sa mga pangamuyo ni Hari Saul?

⁸ Sang ginsugiran ni manalagna Samuel si Hari Saul nga ginsikway sia sang Dios bangod sang iya pagkadimatinumanon, si Saul nagyaub kay Jehova. (1 Samuel 15:​30, 31) Apang pakunokuno lamang ini. Indi handum ni Saul nga tumanon ang Dios kundi padunggan sia sa atubangan sang mga tawo. Sang ulihi, sang ang mga Filistinhon nakig-away batok sa Israel, si Saul pakulahaw nga nagpamangkot kay Jehova. Apang, sang wala sia makabaton sing sabat, nagkadto sia sa isa ka espiritista, bisan pa nahibaluan niya nga ginapakamalaut ini ni Jehova.  (Deuteronomio 18:10-​12; 1 Samuel 28:​6, 7) Sa pagsumaryo, ang 1 Cronica 10:14 nagasiling tuhoy kay Saul: “Wala sia magpamangkot kay Jehova.” Ngaa? Bangod ang mga pangamuyo ni Saul wala napasad sa pagtuo. Gani, daw subong nga wala gid sia mangamuyo.

9. Ano ang sayop sa pagpakitluoy ni Sedequias para sa panuytoy ni Jehova?

⁹ Sing kaanggid, sang nagahilapit ang katapusan sang ginharian sang Juda, nangamuyo ang katawhan kag namangkot sila sa mga manalagna ni Jehova. Apang ginsamo nila ang idolatriya kag ang ila ginapangangkon nga pagsimba kay Jehova. (Sofonias 1:​4-6) Bisan pa pakulahaw sila nga nagpamangkot sa Dios, indi sila sinsero nga magpasakop sa iya kabubut-on. Nakitluoy si Hari Sedequias kay Jeremias nga pamangkuton si Jehova para sa iya. Ginsugiran na ni Jehova ang hari kon ano ang dapat niya himuon. Apang bangod kulang sing pagtuo kag nahadlok sa mga tawo, wala gintuman sang hari ang tingog ni Jehova, kag si Jehova wala maghatag sing sabat nga luyag mabatian sang hari.​—⁠Jeremias 21:1-12; 38:14-19.

10. Ano ang sayop sa kon paano nangabay sing panuytoy si Johanan kay Jehova, kag ano ang matun-an naton gikan sa iya sayop?

¹⁰ Sang nalaglag ang Jerusalem kag naglakat ang hangaway sang Babilonia upod ang Judiyo nga mga tinapok, naghanda si Johanan agod dalhon sa Egipto ang diutay nga grupo sang mga Judiyo nga nabilin sa Juda. Human na ang ila mga plano, apang antes sila maglakat, nangabay sila kay Jeremias nga mangamuyo para sa ila kag mangayo sing panuytoy gikan kay Jehova. Apang, sang wala nila mabaton ang sabat nga luyag nila, naglakat sila kag ginhimo kon ano ang ginplano nila. (Jeremias 41:16⁠–​43:⁠7) May nakita ka bala nga mga leksion sa sining mga hitabo nga makabulig sa imo agod nga kon pangitaon mo ang nawong ni Jehova, tugutan niya nga makita mo sia?

“Padayon nga Pat-ura”

11. Ngaa dapat naton iaplikar ang Efeso 5:10?

¹¹ Ang matuod nga pagsimba indi lamang nagadalahig sang pagsimbulo sang aton dedikasyon paagi sa pagpatugmaw sa tubig, pagtambong sa mga miting sang kongregasyon, kag pagpakigbahin sa publiko nga ministeryo. Ang aton bug-os nga pagkabuhi nadalahig. Nagaeksperiensia kita adlaw-adlaw sing mga pag-ipit​—⁠ang iban malimbungon, ang iban hilmunon gid​—⁠nga mahimo magpahilayo sa aton gikan sa banas nga nagahisanto sa diosnon nga debosyon. Ano ang himuon naton sa sining mga pag-ipit? Si apostol Pablo naglaygay sa iya sulat sa matutom nga mga Cristiano sa Efeso: “Padayon ninyo nga pat-ura kon ano ang kalahamut-an sa Ginuo.” (Efeso 5:10) Ang bentaha sa paghimo sini gin-ilustrar sang madamo nga mga hitabo nga ginreport sa Kasulatan.

12. Ngaa wala mahamuot si Jehova sang ginsaylo ni David ang kaban sang katipan sa Jerusalem?

¹² Sang ang kaban sang katipan ginbalik sa Israel kag gintago sa sulod sang madamo nga tinuig sa Kiriat-jearim, luyag ni Hari David nga sayluhon ini sa Jerusalem. Ginpamangkot niya ang mga pangulo sang katawhan kag nagsiling nga ang Kaban sayluhon ‘kon daw maayo ini sa ila kag kalahamut-an ini kay Jehova.’ Apang wala sia magtinguha nga mangusisa sing nagakaigo agod pat-uron kon ano gid ang kabubut-on ni Jehova tuhoy sini. Kon ginhimo niya ini, ang Kaban wala gid kuntani ginpasakay sa isa ka karo. Ginpas-an na lang kuntani ini sa abaga sang Kohatnon nga mga Levinhon, subong sang maathag nga ginsugo sang Dios. Bisan pa masunson nga namangkot si David kay Jehova, wala niya ini ginhimo sa nagakaigo nga paagi sa sini nga  okasyon. Ang resulta malain gid. Si David nagbaton sang ulihi: “Si Jehova nga aton Dios nagbulwang sa aton, kay wala naton sia pagpangitaa suno sa kinabatasan.”​​—⁠1 Cronica 13:​1-3; 15:11-​13; Numeros 4:​4-6, 15; 7:​1-9.

13. Sa ambahanon nga gin-amba sang ang Kaban madinalag-on nga ginsaylo, ano nga pahanumdom ang ginlakip?

¹³ Sang ginsaylo sang ulihi sang mga Levinhon ang Kaban halin sa balay ni Obed-edom pakadto sa Jerusalem, ang ambahanon nga ginkomposo ni David gin-amba. Naglakip ini sang tinagipusuon nga pahanumdom: “Pangitaa ninyo si Jehova kag ang iya kusog, pangitaa pirme ang iya nawong. Dumduma ang iya makatilingala nga mga binuhatan nga ginhimo niya, ang iya mga milagro kag ang hudisyal nga mga desisyon sang iya baba.”​—⁠1 Cronica 16:​11, 12.

14. Paano kita makabenepisyo gikan sa maayo nga halimbawa ni Solomon kag gikan sa iya mga kasaypanan sang tigulang na sia?

¹⁴ Antes sia mapatay, ginlaygayan ni David ang iya anak nga si Solomon: “Kon pangitaon mo [si Jehova], tugutan niya nga makita mo sia.” (1 Cronica 28:⁠9) Sang naghari si Solomon, nagkadto sia sa Gibeon, diin nahamtang ang kayangkayang nga tilipunan, kag naghalad kay Jehova. Didto gin-agda ni Jehova si Solomon: “Pangayo ka! Ano ang ihatag ko sa imo?” Bilang sabat sa pangabay ni Solomon, ginhatagan sia ni Jehova sing kaalam kag ihibalo sa paghukom sa Israel, kag gindugangan niya ini sing manggad kag dungog. (2 Cronica 1:3-12) Sang gintukod ni Solomon ang matahom nga templo, gingamit niya ang plano kag desinyo nga ginhatag ni Jehova kay David. Apang sang mangasawa sia, wala ginpangita ni Solomon si Jehova. Nangasawa si Solomon sing mga babayi nga wala nagasimba kay Jehova. Sang magtigulang na sia, ginpahilayo nila ang iya tagipusuon kay Jehova. (1 Hari 11:1-10) Bisan daw ano man kita ka prominente, kaalam, ukon kadamo sing nahibaluan, importante nga ‘padayon naton nga pat-uron ang kalahamut-an sa Ginuo’!

15. Sang ang Etiopianhon nga si Zera nakig-away batok sa Juda, ngaa nakapangamuyo si Asa nga may pagsalig nga luwason ni Jehova ang Juda?

¹⁵ Ini nga kinahanglanon labi pa nga ginpadaku sang rekord tuhoy sa paghari ni Asa, ang apo sa tuhod ni Solomon. Paglipas sang 11 ka tuig nga naghari si Asa, ginpangunahan sang Etiopianhon nga si Zera ang may isa ka milyon ka tawo nga hangaway sa pagpakig-away batok sa Juda. Luwason bala ni Jehova ang Juda? Kapin sa 500 ka tuig antes, maathag nga ginsugid ni Jehova kon ano ang mapaabot sang iya katawhan kon mamati sila sa iya kag sundon ang iya mga sugo kag kon ano ang ila mapaabot kon indi sila mamati kag indi magsunod. (Deuteronomio 28:​1, 7, 15, 25) Sa panugod sang iya paghari, ginkuha ni Asa sa iya ginharian ang mga altar kag mga haligi nga gingamit sa butig nga pagsimba. Ginlaygayan niya ang katawhan nga ‘pangitaon si Jehova.’ Ginhimo ini ni Asa antes matabo ang kalamidad. Amo kon ngaa may pagtuo kay Jehova nga nangamuyo si Asa sa iya nga buligan sila. Ang resulta? Ang talalupangdon nga kadalag-an ginhatag sa Juda.​—⁠2 Cronica 14:2-12.

16, 17. (a) Bisan pa nagdaug si Asa, ano nga pahanumdom ang ginhatag ni Jehova sa iya? (b) Sang nagpanghikot si Asa sing di-maalamon, ano nga bulig ang ginhatag sa iya, apang ano ang reaksion niya? (c) Paano kita makabenepisyo gikan sa pagbinagbinag sa ginhimo ni Asa?

¹⁶ Walay sapayan sini, sang nagpauli si Asa nga madinalag-on, ginpadala ni Jehova si Azarias agod magsug-alaw sa hari kag magsiling: “Pamatii ninyo ako, O Asa kag bug-os nga Juda kag Benjamin! Si Jehova nagaupod sa inyo samtang kamo nagaupod sa iya; kag kon pangitaon ninyo sia, itugot niya nga makita ninyo sia, apang kon bayaan ninyo sia bayaan man niya kamo.” (2 Cronica 15:⁠2) Upod ang ginpapagsik nga kakugi, ginpasanyog ni Asa ang matuod nga pagsimba. Apang pagligad sang 24 ka tuig, wala ginpangita ni Asa si Jehova sang makig-away sila liwat. Wala sia mangusisa sa Pulong sang Dios, kag wala niya gindumdom ang ginhimo ni Jehova sang ginsalakay sang hangaway sang Etiopia ang Juda. Binuang nga nakig-alyansa sia sa Siria.​—⁠2 Cronica 16:1-6.

¹⁷ Bangod sini, ginsabdong ni Jehova si Asa paagi kay Hanani nga manugpanan-aw. Bisan sadto, sang ang pagtamod ni Jehova bahin sa natabo ginpaathag, si Asa nakabenepisyo pa kuntani. Apang, naakig sia kag ginsulod si Hanani sa balay nga bilangguan. (2 Cronica 16:7-10) Makapasubo gid! Kamusta naman kita? Ginapangita bala naton ang Dios apang wala naton ginabaton ang laygay? Kon ang isa ka nagakabalaka kag nagaulikid nga gulang maggamit sing Biblia sa paglaygay sa aton bangod naimpluwensiahan na  kita sang kalibutan, nagapasalamat bala kita sa mahigugmaon nga bulig nga ginahatag sa aton agod mahibaluan ang “kalahamut-an sa Ginuo”?

Indi Malipat nga Mamangkot

18. Paano kita makabenepisyo gikan sa ginsiling ni Elihu kay Job?

¹⁸ Kon ginahul-an, bisan ang isa nga may maayo nga rekord sa pag-alagad kay Jehova makahimo sing butang nga di-kalahamut-an kay Jehova. Sang si Job nagmasakit sing makangilil-ad, namatyan sing mga anak kag nadulaan sing mga pagkabutang, kag ginsumbong sing sayop sang iya mga abyan, ginhunahuna niya ang iya lamang kaugalingon. Ginpahanumdom sia ni Elihu: “Wala sing isa nga nagsiling, ‘Diin ang Dios nga akon Daku nga Magbubuhat?’” (Job 35:10) Dapat nga hunahunaon sing maayo ni Job si Jehova kag binagbinagon kon paano Niya ginatamod ang kahimtangan. Mapainubuson nga ginbaton ni Job yadto nga pahanumdom, kag ang iya halimbawa makabulig sa aton nga himuon man ini.

19. Ano sa masami ang wala ginhimo sang katawhan sang Israel?

¹⁹ Nahibaluan sang katawhan sang Israel ang rekord tuhoy sa pagpakig-angot sang Dios sa ila pungsod. Apang masami nga wala nila ini gindumdom sa paglubad sa espesipiko nga mga kahimtangan sa ila kabuhi. (Jeremias 2:​5, 6, 8) Sang kinahanglan nga magdesisyon sa kabuhi, ginhimo nila ang luyag nila sa baylo nga mamangkot, “Diin si Jehova?”​—⁠Isaias 5:​11, 12.

Padayon nga Mamangkot, “Diin si Jehova?”

20, 21. (a) Sin-o sa karon ang nagpakita sang espiritu ni Eliseo sa pagpangayo sing panuytoy ni Jehova? (b) Paano naton mailog kag paano kita makabenepisyo sa ila halimbawa nga pagtuo?

²⁰ Sang natapos ang publiko nga ministeryo ni Elias, ginkuha sang iya alagad nga si Eliseo ang opisyal nga panapton nga nahulog kay Elias, nagkadto sia sa Jordan, ginbunal ang tubig, kag nagpamangkot: “Diin si Jehova nga Dios ni Elias, Sia mismo?” (2 Hari 2:14) Nagsabat si Jehova paagi sa pagpakita nga ang iya espiritu yara karon kay Eliseo. Ano ang matun-an naton gikan sa sini?

²¹ Kaanggid man ang natabo sa modernong  tion. Ang iban nga modernong-adlaw nga hinaplas nga mga Cristiano nga nagpanguna sa hilikuton nga pagbantala napatay sa duta. Ang mga gintulinan nian nga magdumala nag-usisa sa Kasulatan kag nangayo sing panuytoy kay Jehova paagi sa pangamuyo. Pirme sila nagpamangkot, “Diin si Jehova?” Subong resulta, padayon nga gintuytuyan ni Jehova ang iya katawhan kag ginpasanyog ang ila hilikuton. Ginailog bala naton ang ila pagtuo? (Hebreo 13:⁠7) Gani, magpabilin kita nga malapit sa organisasyon ni Jehova, magsunod sang iya panuytoy, kag makigbahin sing bug-os sa hilikuton nga ginahimo sa idalom sang panuytoy ni Jesucristo.​—⁠Zacarias 8:23.

Paano Mo Sabton?

• Sa ano nga katuyuan nga dapat kita magpamangkot, “Diin si Jehova?”

• Paano naton karon makita ang sabat sa pamangkot, “Diin si Jehova?”

• Ngaa ang iban nga mga pangamuyo nga nagapangayo sing panuytoy sa Dios wala ginasabat?

• Anong mga halimbawa sa Biblia ang nagailustrar sang kinahanglanon nga ‘padayon nga pat-uron ang kalahamut-an sa Ginuo’?

[Mga Pamangkot sa Pagtinuon]

[Retrato sa pahina 9]

Paano ginpangita ni Hari Jehosapat si Jehova?

[Retrato sa pahina 10]

Ngaa nagkadto si Saul sa isa ka espiritista?

[Mga retrato sa pahina 12]

Magpangamuyo, magtuon, kag magpamalandong agod mapat-od ‘kon diin si Jehova’