Kon Paano ang Iban Nakabaton sing mga Sabat

MINILYON ka tawo ang nagapangamuyo. Ang iban kumbinsido nga ginasabat ang ila mga pangamuyo. Ang iban naman nagapalibog kon bala ginapamatian ang ila mga pangamuyo. Ang iban pa gid nagapangita sing mga sabat apang wala nila ini ginapangamuyo sa Dios.

Ginapakilala sang Biblia ang matuod nga Dios subong ang “Nagapamati sa pangamuyo.” (Salmo 65:⁠2) Kon nagapangamuyo ka, sigurado ka bala nga ang imo mga pangamuyo ginapatuhoy sa matuod nga Dios? Ang imo bala mga pangamuyo amo ang sahi nga sabton niya?

Para sa madamo nga mga tawo sa tanan nga bahin sang duta, huo ang sabat! Paano nila nabaton ang mga sabat? Ano ang ila natun-an?

Ang Dios​​—⁠Sin-o Sia?

Ang isa ka maestra sa Portugal nga gintudluan sang mga madre kag mga pari sinsero nga nag-aplikar sang iya pagtuluuhan. Naglibog ang iya ulo sang gin-islan kag ginsikway sang simbahan ang mga buhat nga gintudlo sa iya nga dapat tamdon subong importante. Sa iya paglakbay, nasonaran niya ang pagsimba sang mga tawo sa Sidlangan, kag bangod sini, nagpalibog sia kon bala may isa ka matuod nga Dios. Ano ang nagakaigo nga pagsimba? Sang ginpamangkot niya ang pari nila tuhoy sa Biblia, wala sia ginsapak, gani nagbatyag sia sing kalugaw-an.

Nagpanagtag ang iglesia Katolika sing isa ka pampleta sa siudad nga ginapuy-an sini nga maestra nga nagapaandam sa mga parokyano nga indi makighambal sa mga Saksi ni Jehova. Apang indi sia maributay sa iya mga pamangkot. Isa ka adlaw sang magduaw ang mga Saksi sa iya balay, namati sia kag nagpakita sing interes sa iya nabatian. Amo ini ang una nga tion nga nakighambal sia sa ila.

Agod masabat ang iya madamo nga mga pamangkot, gintun-an sini nga babayi ang Biblia upod sa mga Saksi. Kada semana, nagahanda sia sing malaba nga listahan sang mga pamangkot. Luyag niya mahibaluan ang ngalan sang Dios, kon bala may isa lamang ka matuod nga Dios, kon bala ginakahamut-an niya ang paggamit sing mga imahen sa pagsimba, kag madamo pa. Natalupangdan niya nga ang tanan nga sabat nga nabaton niya naghalin sa Biblia, indi personal nga mga opinyon, gani nakibot sia kag nalipay sa iya ginatun-an. Amat-amat nga nasabat ang iya madamo nga mga pamangkot. Sa karon, ginasimba niya  si Jehova sa espiritu kag kamatuoran, subong amo ang ginsiling ni Jesucristo nga dapat himuon sang “matuod nga mga sumilimba.”​​—⁠Juan 4:⁠23.

Sa Sri Lanka, regular nga ginabasa sang isa ka pamilya ang Biblia, apang wala gihapon masabat ang madamo nga mga pamangkot nga importante sa ila. Bisan pa nagakinahanglan sila sing bulig, indi ini mahatag sang ila pari. Apang, nagduaw ang mga Saksi ni Jehova kag nagbilin sila sa pamilya sing makabulig nga literatura sa Biblia. Sang ulihi, sang masabat sang mga Saksi ni Jehova ang ila mga pamangkot sa Biblia, nagsugot sila nga tun-an ang Biblia. Napukaw gid ang ila interes sa ila ginatun-an.

Apang, bangod sang namat-an nga panudlo sang simbahan, indi mahangpan sang asawa nga ang Amay ni Jesucristo amo “ang lamang matuod nga Dios,” subong sang ginsiling mismo ni Jesus. (Juan 17:​1, 3) Gintudluan sia nga si Jesus tupong sa Amay kag indi dapat duhaduhaan ini nga “misteryo.” Sing sinsero kag sa handum nga mahibaluan kon ano gid ang matuod, nangamuyo sia kay Jehova, nga ginagamit ang iya ngalan, kag nangabay sa Dios nga ipakita sa iya kon sin-⁠o si Jesus. Nian mahalungon nga gin-usisa niya liwat ang may kaangtanan nga mga kasulatan. (Juan 14:28; 17:21; 1 Corinto 8:​5, 6) Nasanagan ang iya nadulman nga panghunahuna, gani nahangpan na niya karon nga si Jehova​​—⁠ang Manunuga sang langit kag duta kag Amay ni Jesucristo⁠​—⁠amo ang matuod nga Dios.​​—⁠Isaias 42:⁠8; Jeremias 10:10-​12.

Pag-antos​​—⁠Ngaa?

Ang tawo nga si Job nag-antos sing tuman. Ang tanan niya nga mga anak napatay sang bagyo, kag nag-imol sia. Nag-antos man sia sing masakit nga balatian kag gin-ipit sang iya di-matuod nga mga abyan. Bangod sini tanan, padasudaso nga nakahambal si Job sing pila ka butang. (Job 6:⁠3) Apang ginbinagbinag sang Dios ang iya kahimtangan. (Job 35:15) Nahibaluan niya kon ano ang yara sa tagipusuon ni Job kag ginhatagan niya si Job sing kinahanglanon nga laygay. Ginahimo man niya ini sa mga tawo karon.

Sa Mozambique, dies anyos lamang si Castro sang mapatay ang iya iloy. Daw maano gid sia. “Ngaa napatay sia kag ngaa ginbiyaan niya kami?” pamangkot niya. Bisan pa ginpadaku sia sang mahinadlukon sa Dios nga mga ginikanan, indi gid niya mahangpan ang natabo. Ano ang makalipay sa iya hunahuna kag tagipusuon? Nakasapo sia sing lugpay sang ginbasa niya ang isa ka gamay nga Biblia sa Chichewa nga hambal kag ginhambalan niya ini upod sa iya magulang nga mga lalaki.

Amat-amat nga nahangpan ni Castro nga ang iya iloy napatay, indi bangod sang inhustisya sang Dios, kundi bangod sang napanubli nga pagkadihimpit. (Roma 5:​12; 6:23) Ang ginasaad sang Biblia nga pagkabanhaw naghatag sa iya sing labing daku nga lugpay bangod nakita niya sa sini ang sadsaran sang pagsalig nga makita niya liwat ang iya iloy. (Juan 5:​28, 29; Binuhatan 24:15) Makapasubo nga pagligad lamang sang apat ka tuig, napatay ang iya amay. Apang sini nga tion nasarangan na ni Castro ang pagkapatay sang iya amay. Sa karon, ginahigugma niya si Jehova kag matutom nga ginagamit niya ang iya kabuhi sa pag-alagad sa Dios. Makita sang tanan nga nakakilala sa iya ang kalipay nga nasapwan niya.

Madamo nga mga tawo nga namatyan sing mga hinigugma ang nakasapo sing lugpay sa amo man nga mga kamatuoran sang Biblia nga nagdala sing lugpay kay Castro. Ang iban nga nakaeksperiensia sing daku nga kabudlayan bangod sang ginhimo sang malaut nga mga tawo nagapamangkot, kaangay ni Job: “Ngaa ang mga malauton padayon nga nagakabuhi?” (Job 21:⁠7) Kon pamatian lamang sang mga tawo ang ginasabat sang Dios paagi sa iya Pulong, matun-an nila nga ang ginahimo sang Dios para gid sa ila kaayuhan.​​—⁠2 Pedro 3:⁠9.

Si Barbara, nga ginpadaku sa Estados Unidos, wala makaeksperiensia sang kakugmat sang inaway. Apang nagdaku sia sa isa ka kalibutan diin nagailinaway ang madamo nga mga pungsod. Ang mga kapintas sang inaway amo pirme ang ginabalita kada adlaw. Sang nagaeskwela sia, naglibog ang iya ulo sa daw indi mapaktan nga nagkalatabo sa maragtas. Ano ang kabangdanan sini? May pag-ulikid bala ang Dios sa mga natabo? Nagtuo sia nga nagaluntad ang Dios, apang indi maghilisanto ang iya ginabatyag tuhoy sa iya.

Walay sapayan, amat-amat nga nagbag-o ang pagtamod ni Barbara sa kabuhi bangod sang iya  pagpakig-upod sa mga Saksi ni Jehova. Nagpamati sia sa ila kag nagtuon sa Biblia upod sa ila. Nagtambong sia sa mga miting sa Kingdom Hall. Nagtambong pa gani sia sa isa sang ila daku nga mga kombension. Dugang pa, natalupangdan niya nga sang ginpamangkot niya ang mga Saksi, indi nanuhaytuhay nga mga opinyon ang iya nabatian. Sa baylo, ang mga Saksi naghambal nga nagahisantuanay bangod ang ila panghunahuna napasad sa Biblia.

Ginpakita sang mga Saksi ang ebidensia sa Biblia nga ang kalibutan impluwensiado ni Satanas nga Yawa, ang manuggahom sini, kag ginapakita sini ang iya espiritu. (Juan 14:30; 2 Corinto 4:⁠4; Efeso 2:​1-3; 1 Juan 5:19) Ginpaathag nila nga ang mga hitabo nga nagpalibog kay Barbara gintagna sa Biblia. (Daniel, kapitulo 2, 7, kag 8) Gintagna ini sang Dios bangod may ikasarang sia nga makita ang palaabuton kon luyag niya hibaluon ini. Ang iban sini nga mga hitabo ginpahanabo sang Dios. Ang iban naman gintugutan lamang niya nga mahanabo. Ginpakita sang mga Saksi kay Barbara nga ginatagna man sang Biblia ang maayo kag malain nga mga hitabo sa aton adlaw kag ginapaathag ang kahulugan sini. (Mateo 24:​3-​14) Ginpakita nila sa iya ang ginasaad sang Biblia nga isa ka bag-ong kalibutan diin magaluntad ang pagkamatarong kag wala na sing pag-antos.​​—⁠2 Pedro 3:​13; Bugna 21:​3, 4.

Sing amat-amat, nahangpan na ni Barbara nga bisan pa indi si Jehova nga Dios ang may salabton sa pag-antos sang mga tawo, wala niya ginapunggan ini paagi sa pagpilit sa mga tawo nga tumanon ang iya mga sugo kon luyag nila nga lalison ini. (Deuteronomio 30:​19, 20) Naghimo ang Dios sing mga kahimusan agod mahimo kita magkabuhi sing dayon sa kalipay, apang ginahatagan niya kita karon sing kahigayunan nga ipasundayag naton kon bala luyag naton magkabuhi nahisanto sa iya matarong nga mga dalanon. (Bugna 14:​6, 7) Namat-od si Barbara nga hibaluon ang mga ginapatuman sang Dios kag sundon ini. Nasapwan man niya sa tunga sang mga Saksi ni Jehova ang sahi sang gugma nga ginsiling ni Jesus amo ang magapakilala sa iya matuod nga mga sumulunod.​​—⁠Juan 13:​34, 35.

Makabenepisyo man ikaw gikan sa mga kahimusan nga nakabulig sa iya.

Kabuhi nga May Kahulugan

Bisan ang mga tawo nga daw madinalag-on sa ila kabuhi mahimo nga nagapangita sing mga sabat sa mga pamangkot nga nagapalibog sa ila. Halimbawa, madugay na nalangkag si Matthew, isa ka pamatan-on sa Britanya, nga makilala ang matuod nga Dios kag mahibaluan ang katuyuan sang kabuhi. Napatay ang amay ni Matthew sang 17 anyos sia. Pagkatapos sadto, nagkuha si Matthew sing degree sa musika sa unibersidad. Nian amat-amat nga naeksperiensiahan niya ang pagkawalay pulos sang iya materyalistiko nga pagkabuhi. Nagkadto sia sa London, kag didto nadalahig sia sa droga, sa mga naytklab, astrolohiya, espiritismo, Zen nga Budhismo kag iban pa nga pilosopiya​​—⁠agod lamang makita ang makaalayaw nga kabuhi. Sang desperado na sia, nagtuaw sia sa Dios nga buligan sia sa pagpangita sa kamatuoran.

Pagligad sang duha ka adlaw nasumalang ni Matthew ang iya dugay na nga abyan kag ginpaathag niya ang iya problema. Ini nga tawo nakatuon upod sa mga Saksi ni Jehova. Sang ginpakita kay Matthew ang 2 Timoteo 3:1-5, nakibot sia sa sibu gid nga paglaragway sang Biblia sa mga nagakatabo sa kalibutan karon. Natandog ang iya tagipusuon sang ginbasa niya ang Sermon sa Bukid. (Mateo, kapitulo 5-7) Sang primero, nagpangalag-ag sia bangod nakabasa sia sing pila ka balasahon nga nagamulay sa mga Saksi ni Jehova, apang namat-od sia sang ulihi nga magtambong sa mga miting sa isa ka malapit nga Kingdom Hall.

Naluyagan ni Matthew ang iya nabatian kag ginsugdan niya nga tun-an ang Biblia upod sa isa sa mga gulang sang kongregasyon. Wala madugay, narealisar niya nga ang iya ginatun-an amo ang iya ginapangita, ang sabat sa ginpangamuyo niya anay sa Dios. Nakabenepisyo sia sang ginsikway niya ang mga buhat nga wala nagapahamuot kay Jehova. Sa tapos mapalambo ang mapuslanon nga kahadlok sa Dios, napahulag sia nga ipahisanto ang iya kabuhi sa mga sugo sang Dios. Natun-an ni Matthew nga ini nga sahi sang kabuhi may matuod nga kahulugan.​​—⁠Manugwali 12:13.

Wala ginbuot sang Dios nga si Matthew ukon ang iban pa nga ginsambit sa sining artikulo makasapo sing isa ka makaalayaw nga kabuhi. Walay sapayan, natun-an nila nga si Jehova nga Dios may mahigugmaon nga katuyuan nga nagalakip  sa tanan nga malipayon nga nagapili nga tumanon ang iya mga sugo. (Binuhatan 10:​34, 35) Ini nga katuyuan nagalakip sang dayon nga kabuhi sa isa ka kalibutan nga wala sing inaway, balatian kag gutom​​—⁠wala bisan sing kamatayon. (Isaias 2:⁠4; 25:​6-8; 33:24; Juan 3:16) Amo bala sini ang luyag mo? Kon amo, makatuon ka sing dugang pa tuhoy sa pagsapo sang sekreto padulong sa isa ka makaalayaw nga kabuhi paagi sa pagtambong sa napasad sa Biblia nga mga miting sa Kingdom Hall of Jehovah’s Witnesses. Ginaagda gid ikaw nga himuon ini.

[Retrato sa pahina 7]

Mangamuyo sing hanuot sa Dios, nga ginagamit ang iya personal nga ngalan

[Retrato sa pahina 7]

Tun-i ang Biblia upod sa ila nga nagatudlo gid sang ginaunod sini

[Mga retrato sa pahina 7]

Magtambong sa mga miting sa Kingdom Hall

[Credit Line sang retrato sa pahina 4]

Hiker: Chad Ehlers/Index Stock Photography