Espirituwal nga mga Talaksan—Sa Diin Ini Nagapadulong?

“Kinse ka paris ang nagtambong sa isa ka panggab-i [nga Katoliko] nga sesyon sa paglaygay sa mga kalaslon. Sa 30 ka nagtambong, 3 lang ang nagapangangkon nga may pagtuo.”

La Croix, periodiko sang Katoliko nga mga Pranses.

YARA sa krisis ang relihioso nga mga talaksan. Sa panghapin sang Hulyo 12, 1999, nga isyu sini, ang internasyonal nga edisyon sang Newsweek nagpamangkot: “Patay Bala ang Dios?” Para sa nakatundan nga Europa, ang sabat sang magasin daw huo gid. Nagareport tuhoy sa sinodo sang Simbahan Katoliko nga ginhiwat sa Roma sang Oktubre sang amo man nga tuig, ang Pranses nga pamantalaan nga Le Monde nagsulat: “Nabudlayan gid ang Simbahan sa pagpaalinton sing mensahe sini sa isa ka kultura nga nangin ‘alerdyik’ sa sini. . . . Sa Italya, indi tanan nga mga Katoliko nagahiliusa sa doktrina kag mga buluhaton. . . . Sa Alemanya, ang pagbinangig tuhoy sa mga sentro nga ginapakonsultahan sa aborsion nagapadaku sing di-paghangpanay sa ulot sang papa kag sang isa ka demokrasya nga indi na magpadikta. Ang makahas nga posisyon [sang Netherlands] sa moral nga talaksan kag euthanasia (pagpatay bangod sa kaluoy) ginapabangod na sang mga manugpanilag sa hinali nga pagkadi-Cristiano sini.”

Amo man ang sitwasyon sa iban nga lugar. Sang 1999 ang Arsobispo sang Canterbury, nga si George Carey, nagpaandam nga ang Church of England “isa na lang ka henerasyon gikan sa pagkapapas.” Sa isa ka artikulo nga gintig-uluhan “Ang Katapusan Sang Cristiano nga Europa,” ang Pranses nga pamantalaan nga Le Figaro nagsiling: “Amo man sini ang makita bisan diin. . . . Sistematiko nga ginapangduhaduhaan sang mga tawo ang moral kag doktrinal nga mga pagtamod.”

Nagadiutay nga Relihioso nga Partisipasyon

Sa Europa, nagadiutay gid ang mga nagasimba. Kubos pa sa 10 porsiento sang mga taga-Paris nga Katoliko ang nagatambong sa Misa kada Domingo, samtang halin sa 3 tubtob 4 porsiento lang sang taga-Paris nga mga Katoliko ang regular nga nagasimba. Naobserbahan ang amo man ukon  mas manubo pa nga mga tumalambong sa United Kingdom, sa Alemanya, kag sa mga pungsod sa Scandinavia.

Ginakabalak-an gid sang relihioso nga mga awtoridad ang kakulang sang mga nagapari. Sa wala pa isa ka siglo, nagnubo gid ang kadamuon sang mga pari sa Pransia, halin sa 14 ka pari kada 10,000 ka pumuluyo pakadto sa 1 kada 10,000 karon. Sa bug-os nga Europa, nagataas ang ginsuma nga edad sang mga pari, kag ang kakulangan mabatyagan bisan sa mga pungsod subong sang Ireland kag Belgium. Nagadiutay man ang kadamuon sang mga kabataan nga nalista sa mga klase sang katesismo, nga nagpautwas sing serioso nga mga pangduhaduha sa ikasarang sang Simbahan Katoliko nga pat-uron ang pagpasag-uli sini.

Kon tuhoy sa relihion, daw nadulaan na sing pagsalig ang mga tawo. Ipaanggid sa 15 porsiento sang 1981 kag 50 porsiento sang 1952, 6 porsiento na lang karon sang mga Pranses ang nagapati nga “masapwan ang kamatuoran sa isa lang ka relihion.” Nagalapnag ang pagkawalay-interes sa relihion. Nagtaas ang proporsion sang mga tawo nga nagasiling nga wala sila sing relihion halin sa 26 porsiento sang 1980 pakadto sa 42 porsiento sang 2000.​​—⁠Les valeurs des Français​​—⁠Évolutions de 1980 à 2000 (Pranses nga mga Talaksan​​—⁠Pag-uswag Halin Sang 1980 Tubtob 2000).

Daku nga Pagbag-o sa Moral nga mga Talaksan

Makita man ang krisis sa mga talaksan tuhoy sa moralidad. Subong sang ginsambit kaina, wala ginasunod sang madamo nga mga sumilimba ang moral nga mga dekrito sang ila simbahan. Wala sila nagaugyon sa ideya nga may kinamatarong ang relihioso nga mga lider sa pagpahamtang sing mga talaksan sa paggawi. Ang mga tawo nga nagadayaw sa panindugan sang papa tuhoy sa tawhanon nga kinamatarong amo man ang nagapamalibad sa pagsunod sa iya kon ang iya mga ginahambal nagaapektar sa ila pribado nga mga kabuhi. Halimbawa, lapnag nga wala ginasunod ang iya panindugan sa kontrasepsion, bisan sang madamo nga Katoliko nga mga mag-asawa.

Ining panimuot nagaapektar lunsay sa mga relihioso kag di-relihioso nga mga tawo, sa tanan nga kahimtangan sa sosiedad. Ang mga buhat nga maathag nga ginapakamalaut sa Balaan nga Kasulatan ginapahanugutan. Sang nagligad nga 20 ka tuig, 45 porsiento sang mga Pranses ang wala nagatugot sa homoseksuwalidad. Karon, 80 porsiento ang nagakabig sa sini nga sarang mabaton. Bisan pa ang kalabanan pabor sa katutom sa tiayon, 36 porsiento lamang ang nagakondenar sang pagpanghilahi nga sala gid.​​—⁠Roma 1:​26, 27; 1 Corinto 6:​9, 10; Hebreo 13:⁠4.

Isa ka Relihioso nga Pagsalakot

Sa Nakatundan nga mga katilingban, nagauswag ang himo-himo sa kaugalingon nga relihion diin ang tagsatagsa may kinamatarong sa pagpili sang iya mga ginapatihan. Ginabaton ang pila ka doktrina, samtang ginasikway naman ang iban. Ginatawag sang iban ang ila kaugalingon nga mga Cristiano samtang nagatuo sa reinkarnasyon, kag ang iban wala nagapangalag-ag sa pagsunod sa madamo nga relihioso nga pagtuluuhan. (Manugwali 9:​5, 10; Ezequiel 18:​4, 20; Mateo 7:​21; Efeso 4:​5, 6) Ang libro nga Les valeurs des Français maathag nga nagpakita nga madamo sang tumuluo karon ang indi na gid matabangan sa paglisa sa mga banas nga ginpasad sang simbahan.

Apang, may peligro ining huyog sa mas masangkad nga pagkinaugalingon sa relihion. Si Jean Delumeau, isa ka relihioso nga istoryador kag miembro sang Institut de France, malig-on nga nagapati nga imposible para sa isa ka tawo nga magtukod sang iya kaugalingon nga relihion nga independiente sa ano man establisado nga sistema. “Indi makapadayon ang pagtuo kon wala ini napasad sa kalig-on sang isa ka organisado nga relihion.” Ang maayo nga espirituwal nga mga talaksan kag relihioso nga mga buhat dapat bahin sang isa ka nagahisantuanay nga kabug-usan. Diin masapwan ining paghisantuanay sa isa ka sosiedad nga ginrumpag sang pagbag-o?

Sa mga pahina sini, ang Biblia nagapahanumdom sa aton nga ang Dios amo ang nagapahamtang sing maayo nga mga talaksan sa paggawi kag moralidad, apang ginahatagan niya ang mga tawo sing kahilwayan nga sundon ini ukon indi. Nahangpan sang minilyon sa bug-os nga kalibutan nga may praktikal nga balor karon ining madugay na ginatahod nga libro kag ini ‘suga sa ila tiil kag kapawa sa ila banas.’ (Salmo 119:105) Paano sila nakahinakop sini? Binagbinagon ini sa masunod nga artikulo.