Daw Ano ka Importante ang Mahigugmaon nga Kaayo?

“ANG halandumon nga butang sa dutan-on nga tawo amo ang iya mahigugmaon nga kaayo,” siling sang Biblia. (Hulubaton 19:22) Sa pagkamatuod, halandumon gid ang mga buhat sang kaayo nga ginpahulag sang gugma. Apang, ang tinaga sa Biblia nga “mahigugmaon nga kaayo,” nagapatuhoy sa isa ka kaayo nga mahimo napasad sa nagaluntad na nga kaangtanan, subong sang isa nga napasad sa nahimo na nga kaayo sang isa pa. Busa, nagalakip ini sing ideya sang pagkamainunungon.

Napaslawan si Hari Jehoas sang Juda nga palambuon ining halandumon nga kinaiya. Daku ang iya utang nga kabalaslan sa iya tiya kag sa iya tiyo nga si Jehoiada. Sang wala pa mag-isa ka tuig si Jehoas, ginhimo sang iya malaut nga lola ang iya kaugalingon nga reyna kag ginpapatay ang tanan nga utod nga lalaki ni Jehoas, nga mga manunubli sang trono. Apang, wala niya mapatay si Jehoas, bangod gintago sia sing maayo sang iya tiya kag tiyo. Gintudluan man nila sia sang Kasuguan sang Dios. Sang pito ka tuig na ang edad ni Jehoas, gingamit sang iya tiyo ang iya awtoridad subong mataas nga saserdote agod patyon ang malaut nga reyna kag mapalingkod sa trono si Jehoas.​​—⁠2 Cronica 22:⁠10⁠–​​23:15.

Ang lamharon nga si Jehoas naggahom subong isa ka maayo nga hari tubtob mapatay ang iya tiyo, apang sang ulihi nagsimba sia sa mga idolo. Ginpadala sang Dios si Zacarias, nga anak ni Jehoiada, agod paandaman si Jehoas sa iya apostasya. Ginpabato ni Jehoas si Zacarias. Isa gid ka daku nga buhat sang pagkadimainunungon sa isa ka pamilya nga daku gid ang iya utang nga kabalaslan!​​—⁠2 Cronica 24:17-​21.

Ang Biblia nagasiling: “Si Jehoas nga hari wala makadumdom sang mahigugmaon nga kaayo nga ginpakita sang amay [ni Zacarias] sa iya, amo nga ginpapatay niya ang iya anak.” Samtang nagatagumatayon, nagsiling si Zacarias: “Tan-awon kuntani ini ni Jehova kag magasukot sini.” Suno gid sa ginsiling ni Zacarias, nagmasakit gid si Jehoas kag ginpatay sang iya kaugalingon nga mga alagad.​​—⁠2 Cronica 24:17-​25.

Sa baylo nga mangin kaangay kay Hari Jehoas, ang tanan nga nagatuman sini nga laygay makaangkon sing isa ka makalilipay nga palaabuton: “Kabay ang mahigugmaon nga kaayo kag pagkamaminatud-on mismo indi magbiya sa imo. . . . Kag magtigayon sing kahamuot . . . sa mga mata sang Dios kag sang dutan-on nga tawo.”​​—⁠Hulubaton 3:​3, 4.