Mga Pamatan-on—Nagauswag Bala Kamo sa Espirituwal?

“BISAN pa nagatambong ako sa Cristianong mga miting, wala ako sing mabaskog nga handum nga alagaron si Jehova,” siling ni Hideo samtang ginahinumdom niya ang panahon sang iya ikatlo nga tuig sa hayskul. “Pirme ko ginapanan-aw ang akon kaugalingon nga bantog sa akon mga kaklase kag bugalon nga nagalakat sa kalye upod sa akon nobya. Wala ako sing espesipiko nga tulumuron, kag wala ako sing handum nga mag-uswag sa espirituwal.” Kaangay ni Hideo, madamo nga pamatan-on ang daw nagadalangdalang, nga wala sing handum nga lab-uton ang bisan anong mapuslanon nga mga tulumuron ukon maghimo sing bisan ano nga pag-uswag.

Kon ikaw isa ka pamatan-on, ayhan nakunyag ka kon nagapakigbahin ka sa isport ukon kalingawan. Apang, kon tuhoy sa espirituwal nga mga hilikuton mahimo nga indi subong sini ang imo ginabatyag. Posible bala nga kakunyagan ang espirituwal nga mga tulumuron? Binagbinaga ining pinamulong sang salmista: “Ang pahanumdom ni Jehova masaligan, nga nagapaalam sa isa nga indi eksperiensiado. . . . Ang kasuguan ni Jehova matinlo, nga nagapasanag sang mga mata.” (Salmo 19:​7, 8) Mahimo tuytuyan sang Pulong sang Dios ang “isa nga indi eksperiensiado” sa pagpanghikot sing maalamon, ‘nga nagapasanag sang iya mga mata.’ Huo, mahimo ka makunyag kag malipay sa espirituwal nga mga butang. Apang ano ang kinahanglan agod mabatyagan mo ini? Diin ka dapat magsugod?

Dapat Mapahulag nga Alagaron ang Dios

Una, dapat mapahulag ka. Binagbinaga ang kaso sang lamharon nga si Hari Josias sang Juda. Sang nakita ang tulun-an sang Kasuguan ni Jehova sa templo, ginpabasa ini ni Josias kag natandog gid sia sa iya nabatian. Bilang resulta, “ginkuha ni Josias ang tanan nga makangilil-ad nga mga butang gikan sa tanan nga kadutaan nga ila sang mga anak sang Israel.” (2 Cronica 34:14-​21, 33) Ang pagbasa sa Pulong sang Dios nagpahulag kay Josias nga himuon ang kapin pa sa pagpauswag sa putli nga pagsimba.

Mapalambo mo man ang handum nga alagaron si Jehova kon regular mo nga ginabasa ang Biblia kag ginapamalandungan ang imo nabasa. Amo ini ang nagpahulag kay Hideo. Nakig-upod sia sing suod sa isa ka may edad na nga payunir, isa ka bug-os tion nga ministro sang mga Saksi ni Jehova. Ang payunir isa ka maukod nga estudyante sang Biblia kag ginapanikasugan niya nga iaplikar ang mga panudlo sini sa iya kabuhi. Bangod napalig-on gid sa halimbawa sang payunir, ginhimo man ini ni Hideo kag napalambo niya ang mabaskog nga handum nga mag-alagad sa Dios kag sa iban nga mga tawo. Ang iya espirituwal nga pag-uswag nagresulta sa isa ka kabuhi nga may katuyuan.

 Ang pagbasa sing Biblia adlaw-adlaw makapahulag man sa mga pamatan-on. Si Takahiro nagapaathag: “Sa tion nga maghigda na ako kag madumduman ko nga wala pa ako makabasa sing Biblia sa amo nga adlaw, nagabangon ako kag ginabasa ini. Bilang resulta, nabatyagan ko ang panuytoy ni Jehova. Ang pagbasa sing Biblia adlaw-adlaw nakabulig sing daku sa akon pag-uswag sa espirituwal. Bangod determinado nga makapakigbahin sing dugang pa sa pag-alagad kay Jehova, nagregular payunir ako wala madugay paggradwar ko sa hayskul. Kag nalipay gid ako sa sini.”

Dugang pa sa pagbasa sing Biblia, ano pa ang makapahulag sa imo sa pagdayaw kay Jehova? Si Tomohiro gintudluan sang iya iloy sang kamatuoran sa Biblia. Sia nagsiling: “Sang natun-an ko lamang sing maid-id ang libro nga Life Does Have a Purpose sa edad nga 19 anyos nga natandog gid ako sang gugma ni Jehova kag sang halad gawad ni Jesus. Ini nga apresasyon sa gugma sang Dios amo ang nagpahulag sa akon nga himuon ang kapin pa sa pag-alagad kay Jehova.” (2 Corinto 5:​14, 15) Kaangay ni Tomohiro, madamo nga pamatan-on ang napalig-on nga mag-uswag sa espirituwal paagi sa maukod nga personal nga pagtuon sa Biblia.

Apang, ano kon wala ka gihapon sing tinagipusuon nga handum nga alagaron si Jehova? May mapangayuan ka bala sing bulig? Si apostol Pablo nagsulat: “Kay ang Dios . . . nagapanghikot sa sulod ninyo agod magbuot kamo kag magbuhat.” (Filipos 2:13) Kon mangamuyo ka sing bulig ni Jehova, hatagan ka niya sang iya balaan nga espiritu, nga magapabakod sa imo indi lamang sa ‘pagbuhat’ kundi sa ‘pagbuot’ man. Nagakahulugan ini nga pabaskugon sang balaan nga espiritu sang Dios ang imo handum nga himuon ang imo labi nga masarangan sa pag-alagad kay Jehova kag buligan ka nga magtubo sa espirituwal. Magsalig gid sa gahom ni Jehova kag pabakura ang imo tagipusuon!

Magpahamtang sang Imo mga Tulumuron

Sa tion nga determinado na ikaw nga alagaron si Jehova sing labi pa, kinahanglan magpahamtang ka sing personal nga mga tulumuron agod mag-uswag ka sa espirituwal. Ang Cristianong dalagita nga si Mana nagsiling: “Ang pagpahamtang sing mga tulumuron nakabulig gid sa akon. Sa baylo nga mag-isol, makaabante ako nga may kaisog. Ginahunahuna ang akon mga tulumuron, hanuot ako nga nagapangamuyo kay Jehova sing panuytoy, kag nag-uswag ako nga wala matublag.”

Ang imo mga tulumuron dapat mangin realistiko kag rasonable. Ang pagbasa sing isa ka kapitulo sang Biblia kada adlaw isa ka rasonable nga tulumuron. Makasugod man ikaw sing isa ka pagpanalawsaw. Sa pag-ilustrar sini sa isa ka publikasyon nga matigayon sa Ingles, mahimo mo tun-an ang mga kinaiya ni Jehova nga nalista sa idalom sang subtitulo nga “Qualities by Name” sa idalom sang tinaga nga “Jehovah” sa Watch Tower Publications Index. May yara mga 40 ka topiko nga mabinagbinag mo, kag wala sing duhaduha nga ang pagpanalawsaw magapasuod pa sa imo kay Jehova kag magapahulag sa imo nga himuon ang kapin pa para sa iya. Ang iban pa nga rasonable nga mga tulumuron nagalakip sang pagkomento sing bisan kis-a lang sa tagsa ka Cristianong miting nga nagakinahanglan sang pagpakigbahin sang nga tumalambong, pagkilala sing maayo pa sa di-magkubos sa isa ka katapo sang kongregasyon sa tagsa ka miting, kag wala ginapalipas ang adlaw nga indi makapangamuyo kay Jehova kag makahambal tuhoy sa iya sa iban.

Kon wala pa ikaw makapalista sa Teokratikong Eskwelahan Para sa Ministeryo, mangin isa ini ka maayo nga tulumuron para sa imo. Nagapakigbahin ka na bala sa ministeryo sa publiko? Kon wala pa, mahimo mo nga panikasugan nga mangin isa ka di-bawtismado nga manugbantala. Ang serioso nga pagbinagbinag sang imo kaangtanan kay Jehova kag pagdedikar sa iya mangin amo ang masunod nga tikang. Madamo nga pamatan-on ang nagapanikasog nga matuman ang ila dedikasyon paagi sa pagtinguha sa bug-os tion nga ministeryo.

 Bisan pa maayo nga may tulumuron ka sa kabuhi, mag-andam batok sa paglambo sing espiritu sang pagkompetensiahanay. Labi pa nga malipay ka sa imo ginahimo kon wala mo ginapaanggid ang imo kaugalingon sa iban.​—Galacia 5:​26; 6:4.

Ayhan sa pamatyag mo indi ka eksperiensiado kag nabudlayan sa pagpahamtang sing rasonable nga mga tulumuron. Kon amo, sunda ang laygay sang Biblia: “Ilingig ang imo igdulungog kag pamatii ang mga pulong sang mga maalam.” (Hulubaton 22:17) Mangayo sing bulig sa imo mga ginikanan ukon sa iban nga hamtong nga mga Cristiano. Sa pagkamatuod, ang mga ginikanan kag ang iban pa dapat nga mangin makatarunganon kag makapalig-on sa sining butang. Mahimo madula sang mga pamatan-on ang kalipay kon ginabatyag nila nga ginapilit sila sa paglab-ot sa isa ka tulumuron nga ginpahamtang sang iban para sa ila kag mahimo pa gani nga mangin wala sing pulos ang pagpahamtang sini. Natabo ini sa isa ka bata nga babayi, nga nagsiling: “Nagpahamtang sing madamo nga tulumuron ang akon mga ginikanan para sa akon, subong sang pagpalista sa Teokratikong Eskwelahan Para sa Ministeryo, pagpakigbahin sa pag-alagad sa latagon, pagpabawtismo, kag mangin isa ka payunir. Ginpanikasugan ko gid nga malab-ot ang kada isa sini. Kon malab-ot ko na ang isa ka tulumuron, wala ako ginahatagan sing komendasyon sang akon mga ginikanan kundi, sa baylo, ginahatagan nila ako sing isa pa ka tulumuron nga dapat lab-uton. Subong resulta, pamatyag ko pirme lang ako ginapilit nga maglab-ot sing mga tulumuron. Ginlapyo ako kag daw wala sing hinimuan.” Ano ang problema? Ang tanan nga tulumuron maayo, apang indi ini iya. Agod magmadinalag-on dapat mapahulag ka nga magmatumato sa pagpahamtang sing tulumuron para sa imo kaugalingon!

Hunahunaa si Jesucristo. Sang nagkari sia sa duta, nahibaluan niya kon ano ang ginapaabot sa iya sang iya Amay, si Jehova. Ang paghimo sa kabubut-on ni Jehova indi lamang isa ka tulumuron para kay Jesus kundi isa ka misyon nga dapat tumanon. Paano gintamod ni Jesus ang iya asaynment? Sia nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Nalipay si Jesus sa paghimo sing kabubut-on ni Jehova kag ginhimo niya ang ginapaabot sang iya Amay sa iya. Kaangay ini sang kalan-on para kay Jesus​—nalipay sia kag may kaayawan sa pagtapos sing hilikuton nga ginapaabot sa iya. (Hebreo 10:​5-​10) Malipay man ikaw kon mapahulag ka sing nagakaigo sa paghimo sa ginapalig-on sang imo mga ginikanan nga himuon mo.

Indi Mag-untat sa Paghimo sing Maayo

Kon may tulumuron na ikaw nga ginahunahuna, mangabudlay sing lakas agod matigayon ini. Ang Galacia 6:9 nagasiling: “Indi kita mag-untat sa paghimo sing maayo, kay sa nagakaigo nga dag-on magaani kita kon indi kita paglapyuon.” Indi magsandig sa imo kaugalingon nga kusog ukon ikasarang lamang. Mahimo gid nga makasumalang ikaw sing mga balagbag kag makabatyag kon kaisa sing kapaslawan. Apang ang Biblia nagapasalig sa aton: “Sa tanan mo nga dalanon talupangda [ang Dios], kag tadlungon niya ang imo mga banas.” (Hulubaton 3:6) Si Jehova magasakdag sa imo samtang ginapangabudlayan mo sing lakas ang paglab-ot sa imo espirituwal nga mga tulumuron.

Huo, paagi sa pagpalambo sing handum nga alagaron si Jehova kag sa pagtinguha nga lab-uton ang espirituwal nga mga tulumuron, ‘mapadayag mo ang imo pag-uswag sa tanan nga tawo.’ (1 Timoteo 4:15) Nian, maagom mo ang kabuhi nga may katuyuan sa pag-alagad sa Dios.

[Retrato sa pahina 9]

Ang pagbasa sing Biblia kag pagpamalandong sa imo nabasa magapahulag sa imo nga alagaron si Jehova

[Retrato sa pahina 10]

Ginhimo ni Jesus ang mga ginapaabot sang iya Amay