Kon Paano Mapalambo ang Balanse nga Pagtamod sa Trabaho

BANGOD sang daku nga kahuol sa patag sang merkado sa bug-os nga kalibutan sa karon, sang wala pasunaid nga kompetensiahanay, sang tigdamo nga paghimo sing mga produkto, wala na sing kalangkag ang mga tawo sa pagtrabaho adlaw-adlaw. Apang, dapat kita malipay sa aton trabaho. Ngaa? Bangod gintuga kita suno sa larawan sang Dios​​—⁠kag ang Dios nagakalipay sa iya hilikuton. Halimbawa, sang ginrepaso ang iya ginhimo sa katapusan sang anom ka “adlaw,” ukon malawig nga panahon sang pagpanuga, “nakita sang Dios ang tanan nga butang nga ginhimo niya kag, yari karon! tama gid ini kaayo,” suno sa Genesis 1:⁠31.

Ang gugma ni Jehova sa pagpangabudlay wala sing duhaduha nga amo ang isa ka rason kon ngaa gintawag sia nga “malipayon nga Dios.” (1 Timoteo 1:11) Indi bala makatarunganon, nian, nga kon labi pa nga ginailog naton sia, labi pa nga mangin malipayon kita? Tuhoy sa sini, si Hari Solomon sang dumaan nga Israel, nga isa ka maayo nga manunukod kag organisador, nagsulat: “Ang tagsa ka tawo man magkaon kag mag-inom kag makakita sing kaayuhan sa bug-os niya nga kinabudlayan. Dulot ini sang Dios.”​​—⁠Manugwali 3:⁠13.

Isa ka hangkat ang pagpalambo sing balanse kag nagakaigo nga pagtamod sa trabaho sa nagabag-o sing madasig nga ulubrahan karon. Apang ginapakamaayo ni Jehova nga Dios ang nagatuman sa iya mahigugmaon nga panuytoy. (Salmo 119:​99, 100) Ginapabaloran kag ginasaligan sila nga mga empleyado kag busa diutay ang posibilidad nga madulaan sila sing trabaho. Natun-an man nila nga binagbinagon ang ila kabuhi kag trabaho indi sa materyal nga pagtamod kundi sa espirituwal. Nakabulig ini sa ila nga makahimo sing maalamon nga mga desisyon sa kabuhi kag makita nga ang ila kalipay kag kalig-unan wala nasandig sa ila trabaho ukon sa wala sing kapat-uran nga ekonomiya. (Mateo 6:​31-​33; 1 Corinto 2:​14, 15) Nagabulig ini sa ila nga huptan ang balanse gid nga panimuot sa trabaho.

Palambua ang Panimuot sa Trabaho nga Nagapahamuot sa Dios

Ang iban nga mga tawo nagiyan sa pagtrabaho (workaholic), nga ginapakaimportante gid ang ila  trabaho. Ang iban naman ginabantayan lang nga matapos ang adlaw kag sa amo makauntat sila sa pagtrabaho kag makapauli. Ano ang balanse nga pagtamod? Ang Biblia nagasabat: “Maayo pa ang isa ka hakop sang kalinong sangsa duha ka hakop sang lakas nga pagpangabudlay kag pagpanikasog sa hangin.” (Manugwali 4:⁠6) Ang lakas gid kag malawig nga pagtrabaho, sa katunayan, may indi maayo nga resulta​​—⁠wala sing pulos nga “pagpanikasog sa hangin.” Ngaa? Bangod mahimo mahalitan naton ang ginatunaan sang aton pinakadaku nga kalipay: ang aton kaangtanan sa aton pamilya kag mga abyan, ang aton espirituwalidad, ang aton kapagros, kag bisan ang aton kabuhi. (1 Timoteo 6:​9, 10) Ang balanse nga pagtamod amo ang pagkakontento sa diutay nga materyal nga kita nga may paghidait sa baylo nga mabug-atan sang sobra nga pagpangabudlay nga may pagbinangig kag kasubo.

Sa pagpalig-on sining balanse nga pagtamod, wala ginasakdag sang Biblia ang katamad. (Hulubaton 20:⁠4) Ginapahuyang sang katamad ang pagtahod sa kaugalingon kag ang pagtahod sang iban sa aton. Ang malain pa, ginaguba sini ang aton kaangtanan sa Dios. Prangka ang Biblia sa pagsiling nga kon ang tawo indi luyag magtrabaho indi man sia dapat magkaon sa pinangabudlayan sang iban. (2 Tesalonica 3:10) Sa baylo, dapat bag-uhon niya ang iya mga dalanon kag magpangabudlay sing lakas, agod dungganon sia nga makaaman sa iya kaugalingon kag sa mga nagasandig sa iya. Paagi sa lakas nga pagpangabudlay mahimo makabulig sia sa tunay nga nagakinahanglan​​—⁠ang buhat nga ginapalig-on sang Pulong sang Dios.​​—⁠Hulubaton 21:​25, 26; Efeso 4:⁠28.

Ginhanas Kutob sa Pagkabata nga Pabaloran ang Trabaho

Ang maayo nga panimuot sa trabaho indi lamang natabuan; natun-an ini kutob sa pagkabata. Busa, nagalaygay ang Biblia sa mga ginikanan: “Hanasa ang bata suno sa dalanon nga para sa iya; bisan kon magtigulang na sia indi sia magtalikod sa sini.” (Hulubaton 22:⁠6) Luwas sa pagpahamtang sing maayo nga halimbawa subong mga manugpangabudlay, ang maalam nga mga ginikanan nagasugod sa paghanas sa ila kabataan paagi sa paghatag sa ila sing mga hilikuton sa sulod sang balay nga nagakabagay sa ila edad. Bisan pa mahimo maugot ang kabataan sa pila ka hilikuton, makabatyag sila nga ginapabaloran nga katapo sang pamilya​​—⁠labi na kon ginadayaw ni Tatay kag ni Nanay ang ila hinimuan. Makapasubo, ginapagustuhan lang sang pila ka ginikanan ang ila kabataan, mahimo bangod sang di-nagakaigo nga kabuot. Dapat binagbinagon sang mga ginikanan ang Hulubaton 29:​21, nga nagasiling: “Kon ginapagustuhan sang isa ang iya ulipon [ukon bata]  kutob sa iya pagkabata, sia mangin wala sing kabalaslan sa ulihi.”

Ang responsable nga mga ginikanan nagapakita man sang hanuot nga interes sa pag-eskwela sang ila kabataan, ginapalig-on sila nga magtuon kag magpangabudlay sing lakas samtang nagaeskwela. Makabenepisyo sa sini ang mga kabataan kon may sekular na sila nga trabaho sa ulihi.

Mangin Maalamon sa Pagpili sing Trabaho

Bisan pa wala ginasiling sang Biblia sa aton kon ano nga sahi sang trabaho ang aton pilion, nagahatag ini sa aton sing maayo nga panuytoy agod indi makompromiso ang aton pag-uswag sa espirituwal, pag-alagad sa Dios, kag iban pa importante nga mga responsabilidad. Halimbawa, si apostol Pablo nagsiling: “Ang tion nga nabilin ginpalip-ot. Kutob karon ang mga . . . nagagamit sa kalibutan [mangin] subong sang mga wala nagagamit sini sing bug-os; kay ang danyag sining kalibutan nagabalhin.” (1 Corinto 7:​29-​31) Wala sing bisan ano nga permanente ukon malig-on gid sa karon nga sistema sang mga butang. Ang paggamit sang aton tanan nga tion kag kusog sa sini kaangay sa paghinguyang sang aton bug-os nga kabuhi sa pagsalbar sa isa ka balay nga natukod sa ginabahaan nga duog. Binuang gid nga panikasog!

Ginbadbad sang iban nga Biblia ining prase nga “wala nagagamit sini sing bug-os” subong “wala nawili sa sini” kag “indi masako gid sa sini.” (The Jerusalem Bible; Today’s English Version) Ang maalam nga mga tawo wala nagakalipat sa kamatuoran nga “ginpalip-ot” ang tion sining sistema karon kag ang ‘mawili,’ ukon mangin “masako gid,” sa sini pat-od gid nga malugaw-an kag maghinulsol lamang sa ulihi.​​—⁠1 Juan 2:​15-​17.

‘Indi Gid Kamo Pagpatumbayaan sang Dios’

Mas nakahibalo si Jehova sang aton mga kinahanglanon sangsa aton mismo. Nakahibalo man sia kon sa diin na kita nga hut-ong sang tion sa katumanan sang iya katuyuan. Gani, sia nagapahanumdom sa aton: “Likawi ninyo ang gugma sa kuwarta, samtang kontento kamo sa mga butang karon. Kay [ang Dios] nagsiling: ‘Indi ko gid kamo pagbiyaan ukon pagpatumbayaan.’” (Hebreo 13:5) Makapalig-on gid ini nga mga pulong! Sa pag-ilog sa mahigugmaon nga pag-ulikid sang Dios sa iya katawhan, ginpatuhoy ni Jesus ang daku nga bahin sang iya bantog nga Sermon sa Bukid sa pagtudlo sa iya mga disipulo sang nagakaigo nga pagtamod sa trabaho kag sa materyal nga mga butang.​​—⁠Mateo 6:​19-​33.

Ginapanikasugan sang mga Saksi ni Jehova nga tumanon yadtong mga panudlo. Halimbawa, sang ginpangabay sang iya amo ang isa ka Saksi, nga isa ka elektrisyan, nga mag-overtime sing regular, ang empleyado namalibad. Ngaa? Bangod indi niya luyag nga agawon sang tion sang iya sekular nga trabaho ang tion nga ginahinguyang niya para sa iya pamilya kag sa espirituwal nga mga butang. Sanglit isa sia ka maayo kag masaligan nga trabahador, gintahod sang iya amo ang iya desisyon. Siempre pa, indi tanan may pareho sini nga resulta, kag mahimo ang isa magpangita sing bag-o nga trabaho agod mahuptan ang balanse nga estilo sang pagkabuhi. Busa, ang nagasalig sing bug-os kay Jehova masami makaeksperiensia nga ang ila maayo nga paggawi kag panimuot sa trabaho nagpahamuot sa ila mga amo.​​—⁠Hulubaton 3:​5, 6.

Kon ang Tanan nga Trabaho Mangin Makalilipay

Sa sining di-himpit nga sistema sang mga butang karon, ang trabaho kag ang palaabuton sang trabaho indi gid hilway sa mga problema kag pagkawalay kapat-uran. Ang matuod, mahimo mangin mabudlay ang mga kahimtangan samtang  ang kalibutan labi nga nagahuyang kag nangin indi malig-on ang mga ekonomiya ukon malusod pa gani ini. Apang temporaryo lang ini nga kahimtangan. Sa indi madugay, may trabaho na ang tanan. Kag dugang pa, ang tanan nga hilikuton makawiwili kag makalilipay. Paano ini matabo? Ano ang magahimo sini nga pagbag-o?

Paagi sa iya manalagna nga si Isaias, ginpahibalo ni Jehova ina nga tion. “Kay yari karon nagatuga ako sing bag-ong mga langit kag bag-ong duta,” siling ni Jehova, “kag ang nagligad nga mga butang indi na pagdumdumon, ni mag-utwas pa ini sa tagipusuon.” (Isaias 65:17) Nagahambal sia tuhoy sa iya bag-o nga gobierno, nga sa sini ang bag-o gid kag tuhay nga tawhanon nga katilingban mangin realidad.​​—⁠Daniel 2:⁠44.

Kon tuhoy sa pagkabuhi kag pagtrabaho sang mga katawhan sa amo nga tion, ang tagna nagapadayon: “Pat-od nga magapatindog sila sing mga balay kag magapuyo sa sini; kag pat-od nga magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo; indi sila magtanom kag iban ang magakaon. Kay subong sang mga adlaw sang kahoy mangin amo ang mga adlaw sang akon katawhan; kag ang akon mga pinili bug-os nga magapulos sa binuhatan sang ila mga kamot. Indi sila magpangabudlay sa walay pulos, ni magpanganak nga sa kalisdanan; bangod mga kaliwat sila nga ginahuman sang mga ginpakamaayo ni Jehova, kag ang ila mga anak upod sa ila.”​​—⁠Isaias 65:21-​23.

Tuhay gid ang bag-o nga kalibutan nga gindesinyo sang Dios! Indi mo bala luyag mabuhi sa isa ka kalibutan, nga indi ka na ‘mangabudlay sa walay pulos’ kundi maangkon mo ang bug-os nga “bunga” sang imo pinangabudlayan? Apang, talupangda kon sin-o ang magaagom sining mga pagpakamaayo: “Mga kaliwat sila nga ginahuman sang mga ginpakamaayo ni Jehova.” Mahimo ka man mangin isa sa “mga ginpakamaayo ni Jehova” paagi sa pagtuon nahanungod kay Jehova kag sa paghimo sang iya mga ginapatuman. Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Nalipay ang mga Saksi ni Jehova nga buligan ka nga matigayon ang nagahatag kabuhi nga ihibalo paagi sa isa ka sistematiko nga pagtuon sa Pulong sang Dios, ang Biblia.

[Kahon sa pahina 6]

“Pirme Ginapangita”

“Bisan ano ang inyo ginahimo, himua ninyo ini sing bug-os kalag subong nga kay Jehova, kag indi sa mga tawo,” siling sang Biblia. (Colosas 3:23) Sing maathag, ang isa nga may amo sini nga maayo nga prinsipio amo ang ginapangita gid nga empleyado. Bangod sini nga rason, si J. J. Luna, sa iya libro nga How to Be Invisible, nagpanugda sa mga amo nga nagapangita sing mga empleyado nga pangitaon ang aktibo nga mga miembro sang pila ka relihioso nga mga grupo, apang nagdugang sia: “Ang matuod, masami kita nagapamat-od nga kuhaon nga empleyado ang mga Saksi [ni Jehova].” Ang isa sa mga rason nga ginhatag niya amo nga kilala sila tungod sa ila pagkabunayag, kag naghimo ini sa ila nga “pirme ginapangita” para sa lainlain nga mga trabaho.

[Mga retrato sa pahina 5]

Nagapahalipay ang pagbalanse sang trabaho sa espirituwal nga mga hilikuton kag kalingawan