Isa ka Leksion Gikan sa Tulabong

“BISAN ang tulabong sa langit​—⁠nakahibalo ini sang iya pinat-od nga mga tion . . . Apang tuhoy sa akon katawhan, wala sila makahibalo sang paghukom ni Jehova.” (Jeremias 8:7) Paagi sa sining mga pulong, ginpahibalo ni manalagna Jeremias ang paghukom ni Jehova batok sa apostata nga katawhan sang Juda, nga nagbiya kay Jehova nga ila Dios kag nagsimba sa iban nga mga dios. (Jeremias 7:​18, 31) Ngaa ginpili ni Jeremias ang tulabong agod maghatag sing leksion sa di-matutom nga mga Judiyo?

Para sa mga Israelinhon, ang tulabong, ilabi na ang bukay, pirme makita samtang nagasaylosaylo ini sa mga duog sang Biblia. Ang Hebreo nga ngalan sining daku, malaba sing tiil nga pispis amo ang pangbabayi nga termino nga nagakahulugan sing “isa nga mainunungon; isa nga may mahigugmaon nga kaayo.” Nagakaigo ini, kay indi kaangay sang iban nga mga pispis, wala nagabulagay ang sulog kag munga nga tulabong tubtob mapatay. Pagkatapos magpaligad sang tigtulugnaw sa mas mainit nga mga duog, ang kalabanan nga tulabong nagabalik kada tuig sa amo gihapon nga pugad nga ila gingamit anay.

Ang kinaugali nga batasan sang tulabong nagailustrar sang kinaiya nga pagkamainunungon sa tumalagsahon nga mga paagi. Nagabuslanay ang sulog kag munga sa paglumlom sang mga itlog sini kag pagpatuka sang mga piso. Ang libro nga Our Magnificent Wildlife nagapaathag: “Subong mga ginikanan, mainunungon katama ang mga tulabong. Isa ka sulog nga tulabong sa Alemanya ang nakoryente kag napatay. Ginlumluman sang munga ang mga itlog sa sulod sang 3 ka adlaw, diin kis-a lamang sia magbiya sing makadali sa pugad agod magtuka. . . . Sa isa ka kaso, sang natiruhan ang munga nga tulabong, ginsagod sang sulog ang mga piso.”

Sa pagkamatuod, paagi sa kinaugali nga pagpakita sini sing katutom tubtob buhi sa iya paris kag pag-atipan sang mga piso, ginpamatud-an gid sang tulabong ang kahulugan sang ngalan sini​—⁠“isa nga mainunungon.” Sa amo, nangin isa ka nagakaigo nga halimbawa ang mga tulabong sa di-matutom kag batinggilan nga mga Israelinhon.

Para sa madamo nga tawo karon, ang pagkamainunungon kag katutom kinaraan na nga mga ideya​—⁠makadalayaw apang indi praktikal. Ang paglapnag sang diborsio, pagpabaya, pagpangdaya, kag iban pa nga sahi sang paglimbong nagapakita nga ang pagkamainunungon wala na ginapabaloran. Sa kabaliskaran, ginapabaloran gid sang Biblia ang pagkamainunungon nga ginapahulag sang gugma kag kaayo. Ginapalig-on gid sini ang mga Cristiano nga “magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:24) Huo, ang bag-o nga personalidad nagabulig sa aton nga mangin mainunungon, apang makatuon man kita sing isa ka leksion tuhoy sa pagkamainunungon gikan sa tulabong.