Pagtabang sa Isla sang  Robinson Crusoe

ANG Robinson Crusoe isa sa tatlo ka isla sa Dagat Pasipiko nga nagahuman sang kapuluan nga ginatawag Juan Fernández, nga mga 640 kilometros ang kalayuon sa baybayon sang Chile. * Ginkuha sang 93-kilometros-kuwadrados nga isla ina nga ngalan sa bantog nga nobela sang ika-18 nga siglo nga natig-uluhan Robinson Crusoe, nga ginsulat sang Ingles nga awtor nga si Daniel Defoe. Maathag nga ang nobela ginpasad sa pagpasimpalad sang isa ka taga-Scotland, si Alexander Selkirk, nga nagpuyo sing isahanon sa isla sa sulod sang mga apat ka tuig.

Ang isa ka karatula nga kahoy sa isla nagasiling sing bahin: “Sa sining duog, adlaw-adlaw sa sulod sang kapin sa apat ka tuig, di-mahim-os nga ginatan-aw sang marinero nga taga-Scotland nga si Alexander Selkirk ang gintaipan para sa magatabang nga sakayan nga magahilway sa iya gikan sa iya pag-isahanon.” Sang ulihi, natabangan si Selkirk kag ginbalik sa iya dutang natawhan, sa isa ka kalibutan nga wala na nagpahalipay sa iya sa tapos nga nakapuyo sia sa iya magamay nga paraiso. Nagsiling sia kuno sang ulihi: “O, pinalangga ko nga isla! Kuntani wala ko ikaw ginbayaan!”

Sa pagligad sang tion, gingamit ang isla subong bilangguan nga kolonya, ginapuy-an sang pila nga nakahimo sang “krimen sa pagtuluuhan” batok sa Iglesia Katolika. Daw ano nga pagbag-o halin sa tulad-paraiso nga isla nga nakilal-an anay ni Selkirk! Apang, ang mga pumuluyo karon sang isla nagaagom sing mahidaiton nga kalinong nga wala sa madamo nga bahin sang kalibutan. Bangod sang matawhay nga estilo sang pagkabuhi, nga kinaandan sa madamo nga kultura sa isla, mahapos ang magsugod sing mga paghambalanay sa bisan kay sin-o lang.

Ang Robinson Crusoe may mga 500 ka pumuluyo, apang sa kalabanan nga bahin sang tuig, mga 400 ka tawo lamang ang yara sa isla. Ang isa ka rason amo nga ang iban nga mga iloy kag mga kabataan nila nagapuyo sa kadak-an sang Chile sa tion nga may klase, nagapauli lamang sa isla sa binulan sang bakasyon agod ihinguyang ang tion upod sa iban nga katapo sang pamilya.

Walay sapayan sang matahom tulad-hardin nga palibot sa Robinson Crusoe, nabatyagan sang iban nga tagaisla ang kakulangan sa espirituwal kag nagapangita sila sing mga sabat. Nabatyagan sang iban nga daw kinahanglan nga tabangan sila sa espirituwal.

Pagtabang sa Espirituwal

Ining hilikuton sa pagtabang sa espirituwal nagsugod sang mga 1979. Ang isa ka babayi nga nagtuon sing Biblia upod sa mga Saksi ni Jehova sa Santiago, Chile, nagsaylo sa isla kag nagsugod sa pagtudlo sa iban sang iya natun-an. Pagligad sang pila ka tion, ang isa ka gulang sa kongregasyon nga nagduaw sa isla bangod sang sekular nga rason nakibot nga makita ang diutay nga grupo sang mga estudyante sang Biblia nga nagauswag sa espirituwal sa bulig sinang babayi. Sang nagduaw liwat ang gulang sa isla pagligad sang tatlo ka bulan, ining nagaisahanon nga manunudlo sang Biblia kag ang duha sang iya mga estudyante handa na sa pagpabawtismo, gani gindumalahan sang gulang  ang ila bawtismo. Sang ulihi, ang isa sining bag-ong nabawtismuhan nga mga Cristiano nagpamana kag, upod sa iya bana, nagpadayon sa pagpangita sa iban nga nagakinahanglan nga tabangan sa espirituwal. Ginpangunahan sang iya bana ang pagtukod sing isa ka kasarangan nga Kingdom Hall, nga ginagamit gihapon sang magamay nga grupo sa isla. Sang ulihi, bangod sang kapigaduhon, nagbiya sila sa Robinson Crusoe kag nagsaylo sa isa ka kongregasyon sa sentral Chile, diin padayon sila nga aktibo sa pag-alagad kay Jehova.

Sing amat-amat, ang magamay nga grupo sa isla padayon nga nagdamo samtang ginatabangan ang iban pa gikan sa butig nga relihion. Apang, bangod ang mga estudyante nagasaylo sa kadak-an nga bahin agod mag-eskwela sa hayskul, ang grupo may yara na lamang nabilin nga duha ka bawtismado nga utod nga babayi kag isa ka bata nga babayi. Ang grupo nagadamo sa tion sang bakasyon kon ang iban nga mga iloy nagapauli sa isla. Nagapapagsik ini sa tatlo ka nabaw-ing nga Cristiano nga nagapabilin didto sa bug-os nga tuig. Subong resulta sang maukod nga pagpanghikot sining mga utod nga babayi, kilala gid ang mga Saksi ni Jehova sa Robinson Crusoe. Matuod, ang iban nga tagaisla nagapamatok sa ila hilikuton kag ginaipit ang iban nga sikwayon ang mensahe sang Ginharian. Walay sapayan sini, ang mga binhi sang kamatuoran nga gintanom sa sinsero nga mga tagipusuon padayon nga nagpanugdo.

Pagpabakod sa mga Natabangan Na

Makaisa sa isa ka tuig ginaduaw sang nagalakbay nga manugtatap ang isla. Kamusta ang pagduaw sa pila lamang ka Saksi sa nabaw-ing nga isla? Ginalaragway sang isa ka manugtatap sa sirkito ang iya nahauna nga pagduaw sa Robinson Crusoe:

“Makalilipay gid ini nga paglakbay. Nagsugod ini sa alas 7:00 s.a. sang naglakbay kami halin sa Valparaiso pakadto sa Cerrillos Airport sa Santiago. Nagsakay kami sa isa ka magamay pito-sing-pasahero nga eroplano. Pagkatapos sang 2 ka oras kag 45 minutos nga paglakbay, nakita namon sa malayo ang isa ka putukputukan sang bukid nga nagalusot sa mga panganod. Sang nagahinampot kami, kitaon na ang isla​—⁠isa ka dalayawon daku nga igang sa tunga sang dagat. Daw nagalutaw ini sa isa ka kalalawran, kaangay sa isa ka nagtalang nga barko sa dagat.

“Sa tapos maghugpa, nagsakay kami sa baroto pakadto sa minuro.  Sa lainlain nga lugar, ang mga igang nga nagaulhot sa dagat nagaporma sing magamay nga mga isla nga nangin palahuwayan sang mga fur seal sang Juan Fernández. Ang mga fur seal ginaamligan nga mga espesyi bangod nagdiutay gid ini. Sing hinali, may nagsibad sa kilid sang baroto kag naalimunaw sa dagat. Isa yadto ka flying fish, nga ang nagakulokulo nga mga sirik kaanggid sa mga pakpak. Daw nalipay ini sa paglukso sa tubig sa pagdakop sing mga insekto. Sa pagkamatuod, kon kaisa ang manugdakop nagakadakpan man; ang iya paglukso mahimo nga magganyat sang igtalupangod sang iban nga mga manunukob nga nakahanda sa pagtukob sa iya sa pagsalom niya.

“Nakalab-ot gid man kami sang ulihi sa minuro sang San Juan Bautista (St. John the Baptist). Madamo nga tagaisla ang nagatindog sa dulungkaan, ayhan nagahulat sa ila mga bisita ukon luyag lang mahibaluan kon sin-o ang nag-alabot sa sining tion. Nagdayaw gid kami sa matahom nga talan-awon​—⁠ang mataas kag kudolkudol nga bukid nga ginatawag El Yunque (Ang Landasan), nga ginkulapan sang daw madukot nga berde nga gamosa, kag sa likuran, amo ang masinaw, asul nga kalangitan nga ginaribitehan sang madamol nga puti nga mga panganod.

“Nakita namon gilayon ang isa ka grupo sang amon kauturan nga babayi kag ang ila kabataan nga nagahulat sa amon sa dulungkaan. Bakasyon sadto, gani ang grupo mas daku sangsa kinaandan. Pagkatapos sang mainit nga pagtamyawanay, gindala kami sa matahom nga payag nga matawag namon nga puluy-an namon sa sulod sang isa ka semana.

“Isa yadto ka pinasahi gid nga semana, kag narealisar namon nga magaligad ini sing madasig. Dapat namon gamiton sing maayo ang amon tion. Sadto gid nga adlaw, pagkatapos sang panyaga, ginduaw namon ang isa ka estudyante sa Biblia nga malapit na lang mangin amon espirituwal nga utod nga babayi kag bahin sang espirituwal nga paraiso sang Dios. Malipayon gid sia apang medyo ginakulbaan man. Ang madugay na niya ginahandum nga pagpabawtismo malapit na. Ginbinagbinag namon ang pila ka kinahanglanon nga impormasyon sa iya agod makalipikar sia subong isa ka manugbantala sing maayong balita. Pagkadason nga adlaw, nakigbahin sia sa pagbantala nga hilikuton sa nahauna nga tion. Sa ikatlo nga adlaw, ginsugdan namon ang pagbinagbinag upod sa iya sing mga kinahanglanon para sa bawtismo. Antes matapos ang semana, ginbawtismuhan sia.

“Ang mga miting nga ginhiwat sa amo nga semana ginsakdag sing maayo, nga may pinakamadamo nga tumalambong nga 14. Kada adlaw may mga kahimusan para sa pag-alagad sa latagon, mga pagduaw liwat, mga pagtuon sa Biblia, kag mga pagduaw sa pagbantay sa panong. Daw ano nga pagpalig-on para sa mga kauturan nga babayi nga nagahimo sang ila hilikuton sing silahanon lamang sa bug-os nga tuig!”

Mas mabudlay para sa mga lalaki sa isla ang pagbaton sang kamatuoran, ayhan bangod sang kasakuon sa ila sekular nga trabaho. Ang panguna nga trabaho nila amo ang pagpangdakop sing mga banagan (lobster), nga nagakinahanglan sing daku nga kaukod. Ang pagkamay-pinasulabi isa man ka rason sa negatibo nga reaksion sang madamo. Walay sapayan sini, ginalauman nga madamo pa nga tagaisla, mga lalaki kag mga babayi, ang magabaton sa palaabuton.

Tubtob karon, napulo ka indibiduwal ang natabangan sa isla paagi sa paghibalo sang kamatuoran kag sang mga katuyuan ni Jehova nga Dios. Ang iban sa ila naghalin na sa isla tungod sa lainlain nga rason. Apang magapabilin man sila ukon indi, ang pagtabang sa ila sa espirituwal napamatud-an nga kapin pa ka importante sangsa pagtabang kay Alexander Selkirk. Naagom nila karon ang espirituwal nga paraiso bisan diin man sila nagapuyo. Ang mga kauturan nga babayi nga nagapuyo gihapon sa isla kag ang ila mga kabataan nagaagom sing tulad-hardin nga palibot, apang kapin pa sa sina, may paglaum sila nga magkabuhi kon ang bug-os nga duta mangin isa ka matuod nga paraiso sa bug-os nga kasangkaron.

Ang Pagtabang nga Hilikuton Nagapadayon

Sing geograpiko, ining magamay nga grupo sang mga Saksi ni Jehova sa Robinson Crusoe nagapuyo sing tuman kalayo sa iban pa nila nga mga kauturan sa espirituwal. Apang, wala sila nagabatyag nga ginpabay-an, subong sang taga-Scotland nga si Selkirk. Paagi sa dalayon nga suplay sang teokratikong mga literatura, mga video sang mga asambleya kag mga kombension nga ginapadala sa ila halin sa sanga sang Watch Tower Society sa Chile sing tatlo ka beses sa isa ka tuig, kag sa tuigan nga pagduaw sang manugtatap sa sirkito, nahuptan nila ang suod nga kaangtanan sa organisasyon ni Jehova. Gani padayon sila nga nangin aktibo nga bahin sang ‘bug-os nga paghiliutod sang mga kauturan sa kalibutan.’​—⁠1 Pedro 5:⁠9.

[Nota]

[Mga Mapa/​Retrato sa pahina 9]

(Para sa aktual nga pormat, tan-awa ang publikasyon)

CHILE

Santiago

ROBINSON CRUSOE ISLAND

San Juan Bautista

El Yunque

PACIFIC OCEAN

SANTA CLARA ISLAND

[Retrato]

Kon malantawan na ang isla, makita sang isa ang dalayawon nga daku nga igang sa tunga sang dagat

[Credit Line]

Mapa of Chile: Mountain High Maps® Copyright © 1997 Digital Wisdom, Inc.

[Retrato sa pahina 8, 9]

Ang mataas kudolkudol nga bukid nga ginatawag El Yunque (Ang Landasan)

[Retrato sa pahina 9]

Ang minuro sang San Juan Bautista (St. John the Baptist)

[Retrato sa pahina 9]

Ang magamay nga mga pulo nangin mga palahuwayan sang mga “fur seal” kag mga “sea lion”

[Retrato sa pahina 10]

Nagsakay kami sa magamay nga eroplano halin sa Santiago, Chile

[Retrato sa pahina 10]

Ang batuhon nga baybayon sang Robinson Crusoe Island

[Retrato sa pahina 10]

Ang kasarangan nga Kingdom Hall sa isla