Paano Karon Nagapanghikot ang Espiritu sang Dios?

LUPOG sia kutob pa sa taguangkan sang iya iloy. Adlaw-adlaw, nagapungko sia sa ganhaan sang templo nga ginatawag Matahom agod magpakilimos sa mga nagasulod sa templo. Apang sang isa ka higayon, ining may sablag nga manugpakilimos nakabaton sing dulot nga labaw pa sangsa pila ka diutay nga sensilyo. Gin-ayo sia!​—⁠Binuhatan 3:​2-8.

Bisan pa nga sanday apostol Pedro kag Juan ang “nagbangon sa iya” agod “ang dapadapa sang iya mga tiil . . . magalig-on,” wala nila gin-angkon ang kadayawan sa pagpang-ayo. Ngaa wala? Si Pedro mismo ang nagpaathag: “Mga tawo sang Israel, ngaa bala natingala kamo sa sini, ukon ngaa bala nagatan-aw kamo sa amon nga daw may gahom kami ukon diosnon nga debosyon nga napalakat namon sia?” Sa pagkamatuod, nahibaluan nanday Pedro kag Juan nga, indi paagi sa ila kusog, kundi paagi sa balaan nga espiritu sang Dios nga nahimo ina nga butang.​—⁠Binuhatan 3:​7-16; 4:​29-31.

Sadto nga tion, ining “gamhanan nga mga buhat” ginhatag agod ipakita nga ang bag-ong Cristianong kongregasyon ginasakdag sang Dios. (Hebreo 2:4) Apang sang natuman na sang gamhanan nga mga buhat ang katuyuan sini, “madula” ini, siling ni apostol Pablo.⁠ * (1 Corinto 13:8) Sa amo, indi na naton karon makita sa matuod nga Cristianong kongregasyon ang bisan anong ginsugo-sang-Dios nga mga pagpang-ayo, matagnaon nga mga mensahe, ukon pagpaguwa sang mga demonyo.

Apang, nagakahulugan bala ini nga ang balaan nga espiritu sang Dios wala na nagapanghikot? Indi gid! Binagbinagon naton ang pila ka paagi diin aktibo anay ang espiritu sang Dios sang unang siglo kag aktibo karon sa aton adlaw.

“Ang Espiritu Sang Kamatuoran”

Ang isa ka hilikuton sang balaan nga espiritu sang Dios amo ang magpahibalo, magpahangop, kag magpahayag sang mga kamatuoran. Wala madugay antes sang iya kamatayon, ginsilingan ni Jesus ang iya mga disipulo: “May madamo pa ako nga mga butang nga inugsiling sa inyo, apang indi ninyo ini madala karon. Apang, kon inang isa mag-abot, ang espiritu sang kamatuoran, tuytuyan niya kamo sa bug-os nga kamatuoran.”​—⁠Juan 16:​12, 13.

“Ang espiritu sang kamatuoran” ginbubo sang Pentecostes 33 C.⁠E. sang ginbawtismuhan sang balaan nga espiritu ang mga 120 ka disipulo nga nagtipon sa naibabaw nga hulot sa Jerusalem. (Binuhatan 2:​1-4) Lakip si apostol Pedro sa nagtambong sa sadtong tuigan nga selebrasyon. Napuno sang balaan nga espiritu, “nagtindog” si Pedro kag nagpasangkad, ukon nagpaathag, sang pila ka kamatuoran tuhoy kay Jesus. Halimbawa, ginsaysay niya kon paano si “Jesus nga Nazaretnon ginbayaw sa tuo nga kamot sang Dios.” (Binuhatan 2:​14, 22, 33) Ginpahulag man si Pedro sang espiritu sang Dios sa pagbantala sing maisugon sa iya Judiyo nga mga tagpalamati: “Hibaluon sing pat-od gid sang bug-os nga panimalay sang Israel nga ginhimo sia sang Dios nga Ginuo kag Cristo, ining Jesus nga ginlansang ninyo.” (Binuhatan 2:36) Bangod sang mensahe ni Pedro nga gin-inspirar sang espiritu, mga tatlo ka libo ka tawo ang “nagbaton sang iya pulong sing tinagipusuon” kag nagpabawtismo. Sa sining paagi, ang balaan nga espiritu sang Dios nagbulig sa pagtuytoy sa ila sa kamatuoran.​—⁠Binuhatan 2:​37-41.

Ang balaan nga espiritu sang Dios nangin manunudlo man kag manugpahanumdom. Si Jesus nagsiling: “Ang kabulig, ang balaan nga espiritu, nga ipadala sang Amay sa akon ngalan, ining isa magatudlo sa inyo sang tanan nga butang kag magapabalik sa inyo mga hunahuna sang tanan nga butang nga ginsiling ko sa inyo.”​—⁠Juan 14:⁠26.

Paano nagapanghikot ang balaan nga espiritu subong manunudlo? Ginabuksan sang espiritu sang Dios ang mga hunahuna sang mga disipulo sa mga butang nga nabatian nila anay kay Jesus apang wala mahangpan sing maayo. Halimbawa, nahibaluan sang mga apostoles nga sang pagkasaba sa iya, ginsilingan ni Jesus ang Romanong gobernador sang Judea, si Poncio Pilato: “Ang akon ginharian indi bahin  sining kalibutan.” Apang, sa tion sang pagkayab ni Jesus sa langit pagligad sang kapin sa 40 ka adlaw, may sayop gihapon nga pagtamod ang mga apostoles nga ang Ginharian pagatukuron diri sa duta. (Juan 18:​36; Binuhatan 1:6) Maathag nga wala mahangpan sing bug-os sang mga apostoles ang kahulugan sang mga pinamulong ni Jesus tubtob napasagahay ang balaan nga espiritu sang Dios sang Pentecostes 33 C.⁠E.

Nangin manugpahanumdom man ang espiritu sang Dios paagi sa pagdumdom sa nagkalainlain nga mga panudlo ni Jesus. Halimbawa, ang mga tagna tuhoy sa kamatayon ni Cristo kag pagkabanhaw, nakatigayon sing bag-ong kahulugan sa bulig sang balaan nga espiritu. (Mateo 16:​21; Juan 12:16) Ang pagdumdom sa mga panudlo ni Jesus nakabulig sa mga apostoles nga mapangapinan sing maisugon ang ila tindog sa atubangan sang mga hari, mga mahistrado, kag relihioso nga mga lider.​—⁠Marcos 13:​9-11; Binuhatan 4:​5-20.

Dugang pa, ang balaan nga espiritu sang Dios nagbulig sa pagtuytoy sa unang mga Cristiano sa mabungahon nga teritoryo sa ministeryo. (Binuhatan 16:​6-10) Ginpahulag man sang espiritu sang Dios ang una nga mga Cristiano sa pagsulat sang Pulong sang Dios, ang Biblia, para sa kaayuhan sang katawhan. (2 Timoteo 3:16) Busa, maathag nga ang balaan nga espiritu aktibo sa nagkalainlain nga paagi sang unang siglo. Wala lamang ini gin-aman agod maghimo sing mga milagro.

Ang Balaan nga Espiritu sa Aton Adlaw

Ang balaan nga espiritu nagapanghikot man karon para sa matuod nga mga Cristiano sa aton adlaw. Nangin maathag ini sa isa ka grupo sang mga  estudyante sang Biblia sa Allegheny, Pennsylvania, E.⁠U.⁠A., sa naulihi nga bahin sang ika-19 nga siglo. Ining sinsero nga mga estudyante sa Biblia nalangkag nga mahibaluan ang “kamatuoran.”​—⁠Juan 8:​32; 16:⁠13.

Ang isa ka miembro sini nga grupo, si Charles Taze Russell, nagsiling tuhoy sa iya pagpangita sa Makasulatanhon nga kamatuoran: “Nangamuyo ako . . . nga makuha ko sa akon tagipusuon kag hunahuna ang bisan ano nga may pagkamaynadampigan nga mahimo mangin sablag kag magpatuytoy sa iya espiritu sa nagakaigo nga paghangop.” Ginapakamaayo sang Dios ining mapainubuson nga pangamuyo.

Samtang si Russell kag ang iya mga kaupod makugi nga nagausisa sang Kasulatan, ang pila ka butang nangin maathag. “Nasapwan namon nga sa sulod sang mga siglo,” paathag ni Russell, “ang nagkalainlain nga mga sekta kag mga partido nagbahinbahin sang mga doktrina sang Biblia sa tunga nila, ginlakipan ini sing tawhanon nga bulubanta kag sayop.” Nagresulta ini sa gintawag niya nga “nagtalang nga kamatuoran.” Sa pagkamatuod, ang Makasulatanhon nga mga kamatuoran nalubong sa koleksion sang pagano nga mga panudlo nga nagsulod sa Cristiandad sa sulod sang mga siglo. Apang determinado si Russell nga mahibaluan kag mapahayag ang kamatuoran.

Paagi sa mga pahina sang Zion’s Watch Tower and Herald of Christ’s Presence, maisugon nga ginpakamalaut ni Russell kag sang iya mga kaupdanan ang butig relihioso nga mga doktrina nga nagahimutig sa Dios. Nahantop nila nga​—⁠kabaliskaran sa bantog relihioso nga pagpati​—⁠ang kalag mamalatyon, nga kon mapatay nagakadto kita sa lulubngan, kag nga si Jehova amo lamang ang matuod nga Dios kag busa indi bahin sang Trinidad.

Apang, subong sang mahunahuna mo, ining pagbuyagyag sa butig nga mga panudlo nagpaakig sa mga klero sang Cristiandad. Sa kalangkag nga mahuptan ang ila gamhanan nga mga posisyon, madamong Katoliko kag Protestante nga klero ang nag-organisar sing mga kampanya sa tuyo nga pakahuy-an si Russell. Apang sia kag ang iya mga kaupdanan wala mag-untat. Masinaligon sila nga nagdangop sa pagtuytoy sang espiritu sang Dios. “Ang pasalig sang Ginuo,” siling ni Russell, “amo nga . . . ang balaan nga espiritu sang Amay, nga ginpadala para sa kag sa pangabay ni Jesus nga aton Manunubos, Manugpatunga kag Ulo, mangin aton manunudlo.” Kag nagtudlo gid ini! Ining sinsero nga mga Estudyante sang Biblia nagpadayon sa pagkuha sang putli nga mga tubig sang kamatuoran gikan sa Biblia kag nagbantala sini sa bug-os nga kalibutan.​—⁠Bugna 22:⁠17.

Ang modernong-adlaw nga organisasyon sang mga Saksi ni Jehova nagpabilin nga sensitibo sa mga panuytoy sang balaan nga espiritu sang Dios sing kapin na karon sa isa ka siglo. Samtang progresibo nga ginapasanagan sang espiritu ni Jehova ang ila espirituwal nga panan-aw, kinabubut-on nga naghimo sing mga pagpasibu ang mga Saksi agod makapahisuno sa bag-o nga paghangop.​—⁠Hulubaton 4:⁠18.

“Mangin mga Saksi Ko Kamo”

Ginpakilala ni Jesus ang isa pa ka pagpadayag sang balaan nga espiritu sang Dios sang ginsilingan niya ang iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin mga saksi ko kamo . . . tubtob sa ukbong sang duta.” (Binuhatan 1:8) Nagsaad si Jesus nga hatagan sing “gahom” kag “balaan nga  espiritu” ang iya mga disipulo agod matuman nila ang ginhatag-sang-Dios nga hilikuton nga padayon nga naaplikar karon.

Subong isa ka grupo, kilala ang mga Saksi ni Jehova bangod sa ila pagbantala nga mga hilikuton. (Tan-awa ang kahon.) Sa pagkamatuod, ang mga Saksi ni Jehova nagahambal sang mensahe sang kamatuoran sa kapin sa 230 ka kadutaan kag grupo sang mga isla. Sa tagsa ka mahanduraw nga kahimtangan, lakip ang pagbutang sa katalagman sang ila kabuhi sa mga duog nga may inaway, maisugon nila nga ginabayaw ang ila mga tingog sa pagsakdag sa Ginharian sang Dios. Ang ila kakugi sa Cristianong ministeryo nagapamatuod sing makusog nga ang balaan nga espiritu nagapanghikot karon. Kag maathag nga ginapakamaayo ni Jehova nga Dios ang ila mga panikasog.

Halimbawa, sang nagligad nga tuig kapin sa isa ka bilyon ka oras ang ginhinguyang sa pagbantala sing maayong balita sang Ginharian sang Dios. Upod ang anong resulta? Mga 323,439 ka tawo ang nagsimbulo sang ila dedikasyon sa Dios paagi sa pagpabawtismo sang ila kaugalingon sa tubig. Dugang pa, 4,433,884 ka semanal nga pagtuon sang Biblia ang ginhiwat upod sa bag-ong mga interesado. Sa kabilugan, 24,607,741 ka libro, 631,162,309 ka magasin, kag 63,495,728 ka brosyur kag pulyeto ang napahamtang. Daw ano ka gamhanan nga pamatuod sa pagpanghikot sang espiritu sang Dios!

Ang Espiritu Sang Dios kag Ikaw

Kon ang indibiduwal maghulag sing paborable sa maayong balita, magpahisuno sang iya kabuhi sa mga talaksan sang Dios, kag magpabutyag sing pagtuo sa aman nga gawad, ginabuksan ang dalan sa isa ka matinlo nga tindog sa Dios. Sa sinang mga tawo si apostol Pablo nagsiling: “Ang Dios . . . nagbutang sang iya balaan nga espiritu sa inyo.”​—⁠1 Tesalonica 4:​7, 8; 1 Corinto 6:​9-11.

Nagaresulta sing madamo maayong mga pagpakamaayo ang pagtigayon sang espiritu sang Dios. Ano nga sahi sang mga pagpakamaayo? Una sa tanan, ang inspirado nga Pulong sang Dios nagasiling: “Ang bunga sang espiritu amo ang gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon.” (Galacia 5:​22, 23) Busa, ang balaan nga espiritu sang Dios isa ka gamhanan nga puwersa para sa kaayuhan, nagabulig sa isa nga mapadayag ang diosnon nga mga kinaiya.

Dugang pa, kon basahon mo ang Biblia kag iaplikar ang imo natun-an, ang espiritu sang Dios makabulig sa imo nga magtubo sa kaalam, ihibalo, paghantop, paghukom, kag ikasarang sa paghunahuna. Nakabaton si Hari Solomon sing “daku gid nga kaalam kag paghangop kag sing masangkad nga tagipusuon” bangod gintinguhaan niya nga pahamut-an ang Dios sangsa mga tawo. (1 Hari 4:29) Bangod ginhatag ni Jehova ang balaan nga espiritu kay Solomon, pat-od gid nga indi niya pag-idingot ang iya balaan nga espiritu karon sa sadtong nagatinguha nga pahamut-an sia.

Ang balaan nga espiritu sang Dios nagabulig man sa mga Cristiano sa pagpakig-away kay Satanas kag sa mga demonyo, sa sining malauton nga sistema sang mga butang, kag sa makasasala nga mga huyog sang ila di-himpit nga unod. Paano ina posible? Si apostol Pablo nagsabat: “Sa tanan nga butang may kusog ako bangod sa iya nga nagahatag sing gahom sa akon.” (Filipos 4:13) Mahimo nga indi madula sang balaan nga espiritu ang mga pagtilaw kag mga pagsulay; apang, magabulig ini nga mabatas naton ini. Paagi sa pagsandig sa espiritu sang Dios, makabaton kita sing “gahom nga labaw sa kinaugali” agod maatubang ang bisan ano nga problema ukon kahuol.​—⁠2 Corinto 4:​7; 1 Corinto 10:⁠13.

Kon binagbinagon mo ang tanan nga pamatuod, wala sing duhaduha nga ang balaan nga espiritu sang Dios nagapanghikot karon. Ginapabaskog sang espiritu ni Jehova ang iya mga alagad sa pagpanaksi tuhoy sa iya makalilipay nga mga katuyuan. Padayon sini nga ginapasilak ang espirituwal nga kapawa, kag ginapalig-on sini ang aton pagtuo, nagabulig sa aton nga magpabilin nga matutom sa aton Manunuga. Daku gid ang aton pagpasalamat nga nangin maminatud-on ang Dios sa iya saad paagi sa paghatag sing balaan nga espiritu sa iya matutom nga mga alagad karon!

[Nota]

[Kahon sa pahina 10]

Kon Ano ang Ginasiling Sang Iban Tuhoy sa mga Saksi ni Jehova

“Samtang ang iban nga mga relihion nagasuhol sing mga manuglaygay sa pagganyat sa mga tawo sa paglingkod sa mga bangko sang simbahan ukon sa pagpamatok sa modernong hulusayon karon subong sang homoseksuwalidad kag aborsion, ang mga Saksi wala nagakompromiso sa nagabaylo nga kalibutan. Padayon gihapon nila nga ginahimo ang ila hilikuton sa pagbantala sa bug-os nga duta.”​—⁠The Orange County Register sang Orange County, California, E.⁠U.⁠A.

“Kon tuhoy sa pagpalapnag sa pagtuo, diutay lamang nga denominasyon ang subong kakugi . . . sa mga Saksi ni Jehova.”​​—⁠The Republic sang Columbus, Indiana, E.⁠U.⁠A.

“Sila lamang ang nagapamalaybalay dala ang ‘maayong balita,’ nagaaplikar sang mga prinsipio sang Biblia.”​​—⁠Życie Literackie, Poland.

“Sa pinakadaku nga hilikuton sa pagbantala nga nahibaluan na, ang mga Saksi ni Jehova nagdala sang mensahe ni Jehova sa bug-os nga kalibutan.” ​​—⁠News-Observer, Tamaqua, Pennsylvania, E.⁠U.⁠A.

[Mga retrato sa pahina 9]

Ang balaan nga espiritu sang Dios nagapasanag sa aton sa espirituwal,

. . . nagapauswag sang maayong Cristianong mga kinaiya,

. . . kag nagasakdag sa aton sa bug-os kalibutan nga pagbantala nga hilikuton