1. Ano nga mga pagpakamaayo ang nangin posible bangod sang gawad?

MADAMO nga pagpakamaayo ang nangin posible bangod sang halad-gawad ni Jesucristo. Bangod sang gawad, nangin posible para sa tanan nga matarong nga mga anak ni Adan nga mangin bahin sang pamilya sang Dios. Bangod man sang gawad, may paglaum kita nga mabuhi sing dayon kag malipayon. Pero, indi lang maayo nga palaabuton para sa matinumanon nga katawhan ang nangin posible bangod sang gawad sang Cristo. Ang kahanda ni Jesus nga mapatay bilang pagsakdag sa kinamatarong ni Jehova sa paggahom nagasabat sa mga isyu nga nagadalahig sa bug-os nga uniberso.—Heb. 1:8, 9.

2. (a) Sa pangamuyo ni Jesus, ano ang mga ginsambit niya nga importante gid sa bug-os nga uniberso? (Tan-awa ang piktyur sa umpisa sini nga artikulo.) (b) Ano ang binagbinagon naton sa sini nga artikulo?

² Mga duha ka tuig antes sang kamatayon ni Jesus kag gin-aman ang halad-gawad, gintudluan niya ang iya mga disipulo nga mangamuyo: “Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa  duta subong sang sa langit.” (Mat. 6:9, 10) Para mas maapresyar pa gid naton ang gawad, binagbinagon naton kon paano ini naangot sa pagpakabalaan sang ngalan sang Dios, sa paggahom sang Ginharian sang Dios, kag sa katumanan sang katuyuan sang Dios.

3. Ano ang ginarepresentar sang ngalan ni Jehova, kag paano ginpasipalahan ni Satanas ining balaan nga ngalan?

³ Ang una nga ginpangabay ni Jesus sa iya modelo nga pangamuyo amo ang pagpakabalaan sang ngalan sang Dios. Ginarepresentar sang ngalan ni Jehova ang iya pagkagamhanan, pagkahalangdon, kag pagkabalaan. Sa isa pa ka pangamuyo ni Jesus, gintawag niya si Jehova nga “Balaan nga Amay.” (Juan 17:11) Bangod balaan si Jehova, balaan man ang tanan niya nga prinsipio kag kasuguan. Pero, sa hardin sang Eden, malimbungon nga ginkuestyon ni Satanas ang kinamatarong sang Dios sa paghimo sing kasuguan para sa katawhan. Bangod sang binutig ni Satanas parte kay Jehova, ginpasipalahan niya ang balaan nga ngalan sang Dios.—Gen. 3:1-5.

4. Paano ginpakabalaan ni Jesus ang ngalan sang Dios?

⁴ Sa pihak nga bahin, ginatahod gid ni Jesus ang ngalan ni Jehova. (Juan 17:25, 26) Ginpakabalaan ni Jesus ang ngalan sang Dios. (Basaha ang Salmo 40:8-10.) Ginpamatud-an sang kabuhi ni Jesus sa duta nga nagakaigo kag may kinamatarong maghimo si Jehova sing mga kasuguan para sa iya maalam nga mga tinuga. Bisan pa ginpahanabo ni Satanas nga mag-antos si Jesus sa masakit nga kamatayon, mainunungon gihapon si Jesus sa iya Amay sa langit. Ang pagkamainunungon ni Jesus nagpamatuod nga puede tumanon sing bug-os sang himpit nga tawo ang matarong nga mga kasuguan sang Dios.

5. Paano naton mapakabalaan ang ngalan sang Dios?

⁵ Paano naton mapakita nga ginatahod naton ang ngalan ni Jehova? Paagi sa aton paggawi. Gusto ni Jehova nga mangin balaan kita. (Basaha ang 1 Pedro 1:15, 16.) Buot silingon, si Jehova lang ang aton simbahon kag tumanon naton sia sing bug-os tagipusuon. Bisan pa ginahingabot kita, ginapanikasugan gid naton nga magkabuhi suno sa matarong nga mga prinsipio kag kasuguan sang Dios. Paagi sa paghimo sing maayo, ginapaiwag naton ang aton kapawa kag mahimaya ang ngalan ni Jehova. (Mat. 5:14-16) Bilang balaan nga katawhan, ginapamatud-an sang aton pagkabuhi nga maayo ang mga kasuguan ni Jehova kag butig ang mga panumbungon ni Satanas. Kon makasala kita, tinagipusuon kita nga nagahinulsol kag ginauntatan naton ang paghimo sang mga buhat nga nagapakahuya kay Jehova.—Sal. 79:9.

6. Bisan pa indi kita himpit, ngaa puede kita ipahayag nga matarong ni Jehova?

⁶ Pasad sa halad sang Cristo, ginapatawad ni Jehova ang mga sala sang mga nagatuo sa sini. Ginabaton niya bilang iya mga sumilimba ang mga nagdedikar sa iya. Ang hinaplas nga mga Cristiano ginapahayag niya nga matarong bilang iya mga anak, kag ang “iban nga mga karnero” ginapahayag niya nga matarong bilang iya mga abyan. (Juan 10:16; Roma 5:1, 2; Sant. 2:21-25) Gani bisan subong, ginapaposible sang gawad nga matigayon naton ang maayo nga kaangtanan sa aton Amay kag mapakabalaan naton ang iya ngalan.

7. Sa paggahom sang Ginharian, ano nga mga pagpakamaayo ang mangin posible bangod sang gawad?

⁷ Sa modelo nga pangamuyo, amo ini ang masunod nga ginpangabay ni Jesus sa Dios: “Magkari ang imo Ginharian.” Ano ang kaangtanan sang gawad sa Ginharian sang Dios? Ginpaposible sang gawad ang pagtipon sa 144,000 nga mangin kaupod sang Cristo sa langit bilang mga hari kag saserdote. (Bug. 5:9, 10; 14:1) Si Jesus kag ang iya kaupod nga  mga manuggahom amo ang nagahuman sang Ginharian sang Dios. Gamiton nila ang gawad para sa kaayuhan sang matinumanon nga katawhan sa sulod sang isa ka libo ka tuig. Ang duta himuon nga paraiso, ang tanan nga matutom nga katawhan mangin himpit, kag mahiusa na ang langitnon kag dutan-on nga bahin sang pamilya sang Dios. (Bug. 5:13; 20:6) Dugmukon ni Jesus ang ulo sang man-ug kag dulaon sing bug-os sa uniberso ang tanan nga nangin resulta sang pagrebelde ni Satanas.—Gen. 3:15.

8. (a) Paano ginbuligan ni Jesus ang iya mga disipulo nga mahangpan ang importansia sang Ginharian sang Dios? (b) Paano naton mapakita ang aton pagsakdag sa Ginharian subong?

⁸ Sang ari si Jesus sa duta, ginbuligan niya ang iya mga disipulo nga mahangpan ang importansia sang Ginharian sang Dios. Pagkatapos gid sang iya bawtismo, ginbantala niya “ang maayong balita sang Ginharian sang Dios” asta sa malayo nga mga lugar. (Luc. 4:43) Antes magbalik si Jesus sa langit, ginsugo niya ang iya mga disipulo nga mangin saksi niya “tubtob sa pinakamalayo nga bahin sang duta.” (Binu. 1:6-8) Paagi sa pagbantala sang Ginharian, may kahigayunan ang mga tawo sa bug-os nga duta nga matun-an ang parte sa gawad kag mangin sakop sang Ginharian sang Dios. Subong, ginapakita naton ang aton pagsakdag sa Ginharian paagi sa pagbulig sa mga utod sang Cristo sa pagtuman sang sugo nga ibantala ang maayong balita sang Ginharian sa bug-os nga duta.—Mat. 24:14; 25:40.

9. Ngaa makasalig kita nga tumanon ni Jehova ang iya katuyuan sa katawhan?

⁹ Ano ang buot silingon sang masunod nga ginsiling ni Jesus: “Matuman ang imo kabubut-on”? Si Jehova ang aton Manunuga. Kon may ginsiling sia nga himuon niya, himuon gid niya ini. (Isa. 55:11) Indi niya pagtugutan ang pagrebelde ni Satanas nga mag-upang sang Iya katuyuan sa katawhan. Sa umpisa pa lang, katuyuan na ni Jehova nga mapuno ang duta sing himpit nga mga anak nanday Adan kag Eva. (Gen. 1:28) Kon napatay sanday Adan kag Eva nga wala sing anak, indi matuman ang katuyuan sang Dios nga mapuno ang duta sang ila kaliwat. Gani, bisan pa nagpakasala sila, gintugutan ni Jehova nga magpanganak sila. Paagi sa gawad, ginhatagan sang Dios sing paglaum ang tanan nga nagatuo sa sini nga mangin himpit kag mabuhi sing dayon. Palangga ni Jehova ang katawhan, kag gusto niya nga mabuhi ang mga matinumanon suno sa katuyuan niya.

10. Paano makabenepisyo sa gawad ang mga napatay?

¹⁰ Kamusta naman ang binilyon ka katawhan nga napatay nga wala makilala kag maalagad si Jehova? Ginpaposible sang gawad ang pagkabanhaw sang mga patay. Buhion sila liwat sang aton mahigugmaon nga Amay kag hatagan sila sing kahigayunan nga matun-an ang iya katuyuan kag mabuhi sing wala sing katapusan. (Binu. 24:15) Gusto ni Jehova nga mabuhi ang mga tawo. Indi niya gusto nga mapatay sila. Bilang Tuburan sang kabuhi, si Jehova ang Amay sang tanan nga banhawon. (Sal. 36:9) Gani nagakaigo gid nga gintudluan kita ni Jesus nga mangamuyo: “Amay namon nga yara sa langit.” (Mat. 6:9) Ginhatagan ni Jehova si Jesus sing importante nga papel sa pagbanhaw sang mga patay. (Juan 6:40, 44) Sa Paraiso, tumanon ni Jesus ang iya papel bilang “ang pagkabanhaw kag ang kabuhi.”—Juan 11:25.

11. Ano ang kabubut-on sang Dios sa “daku nga kadam-an”?

¹¹ Ang kaayo ni Jehova indi lang para sa pila ka tawo, kay nagsiling si Jesus: “Ang nagatuman sang kabubut-on sang Dios amo ang akon utod nga lalaki, utod nga babayi kag iloy.” (Mar. 3:35) Kabubut-on sang Dios nga ang indi maisip nga “daku nga kadam-an”  halin sa tanan nga pungsod kag tribo kag hambal mangin iya mga sumilimba. Ang mga nagatuo sa gawad sang Cristo kag nagahimo sang kabubut-on sang Dios mahimo malakip sa mga nagasinggit: “Ang kaluwasan utang namon sa amon Dios, nga nagapungko sa trono, kag sa Kordero.”—Bug. 7:9, 10.

12. Suno sa modelo nga pangamuyo, ano ang nahibaluan naton parte sa katuyuan ni Jehova sa matinumanon nga katawhan?

¹² Suno sa mga ginpangabay ni Jesus sa modelo nga pangamuyo, nahibaluan naton kon ano ang katuyuan ni Jehova sa matinumanon nga katawhan. Nahisuno sa sini nga pangamuyo, panikasugan gid naton nga pakabalaanon ang ngalan ni Jehova. (Isa. 8:13) Ang aton kaluwasan paagi sa halad-gawad ni Jesus nagapadungog kag nagahimaya man sa ngalan ni Jehova. Ang ngalan gani mismo ni Jesus nagakahulugan sing “Si Jehova ang Kaluwasan.” Gamiton ang Ginharian sang Dios para matigayon sang matinumanon nga katawhan ang mga benepisyo sang gawad. Huo, ang modelo nga pangamuyo nagapasalig sa aton nga wala sing makapugong sa Dios sa pagtuman sang iya kabubut-on.—Sal. 135:6; Isa. 46:9, 10.

13. Ngaa nagapabawtismo kita?

¹³ Ang isa ka importante nga paagi nga mapakita naton ang aton pagpasalamat sa gawad amo ang pagdedikar sang aton kaugalingon kay Jehova pasad sa aton pagtuo sa gawad kag pagpabawtismo. Ang aton bawtismo nagapakita nga “kita iya ni Jehova.” (Roma 14:8) Paagi sini, nagapangabay kita sa Dios sing maayo nga konsiensia. (1 Ped. 3:21) Ginasabat ni Jehova ini nga pangabay paagi sa paggamit sang nagatinlo nga dugo sang halad sang Cristo. Makasalig kita nga ihatag niya sa aton ang tanan nga ginpromisa niya.—Roma 8:32.

14. Ngaa ginsugo kita nga higugmaon ang aton isigkatawo?

 ¹⁴ Ano pa ang isa ka paagi nga mapakita naton ang aton pagpasalamat sa gawad? Bangod ang gugma amo ang rason sang tanan nga ginahimo ni Jehova, kabubut-on niya nga ang tanan niya nga sumilimba magpakita sing gugma bilang ila nagapangibabaw nga kinaiya. (1 Juan 4:8-11) Mapakita naton nga gusto naton mangin ‘anak sang aton Amay nga yara sa langit’ kon higugmaon naton ang aton isigkatawo. (Mat. 5:43-48) Ang sugo nga higugmaon ang aton isigkatawo nagapangaduha sa pinakaimportante nga sugo nga higugmaon si Jehova. (Mat. 22:37-40) Ang isa ka importante nga paagi nga mapakita naton nga ginahigugma naton ang aton isigkatawo amo ang pagtuman sa sugo nga ibantala ang maayong balita sang Ginharian sang Dios. Kon higugmaon naton ang aton isigkatawo, ginapakita naton ang himaya sang Dios. Ang matuod, kon tumanon naton ang sugo nga higugmaon ang iban, ilabi na ang aton kauturan, ang aton gugma sa Dios ‘mangin himpit.’—1 Juan 4:12, 20.

15. (a) Ano nga mga pagpakamaayo halin kay Jehova ang ginabaton naton subong? (b) Ano nga mga pagpakamaayo ang mabaton naton sa palaabuton?

¹⁵ Posible ang bug-os nga kapatawaran kon magtuo kita sa gawad. Ang Pulong sang Dios nagapasalig nga “mapatawad” ang aton mga sala. (Basaha ang Binuhatan 3:19-21.) Suno sa ginbinagbinag naton kaina, ginpaposible sang gawad nga maadoptar ni Jehova bilang iya mga anak ang iya mga alagad nga ginhaplasan sang espiritu. (Roma 8:15-17) Para naman sa aton nga “iban nga mga karnero,” daw pareho lang nga naghimo si Jehova sing papeles nga adoptahon niya kita. Kon mangin himpit na kita kag makalampuwas sa katapusan nga pagtilaw, daw pareho lang nga ginpirmahan na ni Jehova ang papeles, kag malipay sia sa pag-adoptar sa aton bilang iya pinalangga nga mga anak sa duta. (Roma 8:20, 21; Bug. 20:7-9) Ang gugma ni Jehova sa iya pinalangga nga mga anak indi gid mag-untat. Ang mga benepisyo sang gawad wala sing katapusan. (Heb. 9:12) Ang balor sini nga regalo indi gid madula. Wala sing tawo ukon gahom ang makakuha sini sa aton.

16. Paano kita ginhilway sang gawad?

¹⁶ Wala sing mahimo ang Yawa para punggan nga mangin bahin sang pamilya ni Jehova ang tanan nga tinagipusuon nga nagahinulsol. Nagkadto si Jesus sa duta kag napatay “sing makaisa gid lang.” Paagi sini, ginbayad ang gawad kag indi na kinahanglan suliton. (Heb. 9:24-26) Gindula sini sing bug-os ang pagpakamalaut nga napanubli kay Adan. Nagapasalamat gid kita sa gawad sang Cristo, kay nahilway kita sa pagkaulipon sa kalibutan nga ginagamhan ni Satanas, kag nahilway kita sa kahadlok sa kamatayon.—Heb. 2:14, 15.

17. Ano ang masiling mo parte sa gugma nga ginpakita ni Jehova?

¹⁷ Masaligan gid ang mga promisa sang Dios. Ang mga kasuguan sang kinaugali nga ginhimo ni Jehova wala nagabag-o, gani makasalig kita nga indi gid sia magbag-o. Indi gid niya kita pagpaslawon. (Mal. 3:6) Indi lang regalo nga kabuhi ang ginhatag sa aton ni Jehova. Labaw sa tanan, ginhigugma niya kita. “Kita mismo nakahibalo kag nagapati sa gugma sang Dios para sa aton. Ang Dios gugma.” (1 Juan 4:16) Ang bug-os nga duta himuon nga matahom nga paraiso, kag mapakita na sang tanan ang gugma sang Dios. Kabay pa nga magbuylog kita sa matutom nga mga tinuga sang Dios sa langit sa pagsiling: “Ang kadayawan kag himaya kag kaalam kag pasalamat kag dungog kag gahom kag kusog mangin sa aton Dios tubtob sa wala sing katubtuban. Kabay pa.”—Bug. 7:12.