1, 2. Pagkatapos mangisda sa bilog nga gab-i, ano ang natun-an ni Pedro?

PITO sa disipulo ni Jesus ang bilog nga gab-i nga nagpangisda sa Dagat sang Galilea, pero wala sila sing nakuha. Ang ginbanhaw nga si Jesus nagatan-aw sa ila samtang yara sia sa higad sang baybay. Dayon nagsiling sia: “‘Iladlad ang inyo pukot sa tuo nayon sang sakayan kag may makuha kamo.’ Gani ginladlad nila ini, apang indi na nila ini mabatak bangod sa kadamuon sang isda.”—Juan 21:1-6.

² Pagkatapos sila mahatagan ni Jesus sing pamahaw, ginpamangkot niya si Simon Pedro: “Simon nga anak ni Juan, ginahigugma mo bala ako sing labi sa sini?” Ano ang ginapatuhuyan ni Jesus? Gusto gid ni Pedro ang pagpangisda. Gani mahimo nga ginpamangkot sia ni Jesus kon ano ang pinakaimportante sa iya. Mas importante bala sa iya ang isda kag ang negosyo sang pagpangisda sangsa kay Jesus kag ang tanan nga gintudlo niya? Nagsabat si Pedro: “Huo, Ginuo, nakahibalo ka nga ginapalangga ko ikaw.” (Juan 21:15) Ginpakita gid ini ni Pedro. Sugod sadto, ginpamatud-an  niya ang iya gugma sa Cristo paagi sa makugi nga pagtudlo sa mga tawo, kag nangin haligi sia sang Cristianong kongregasyon sang unang siglo.

3. Sa ano nga katalagman dapat maghalong ang mga Cristiano?

³ Ano ang matun-an naton sa ginsiling ni Jesus kay Pedro? Indi naton dapat pagpabay-an nga magbugnaw ang aton gugma sa Cristo kag indi na naton mauna ang Ginharian. Nahibaluan ni Jesus ang epekto sang kabalaka sa sining sistema. Sa ilustrasyon ni Jesus parte sa manugsab-ug, nagsiling sia nga ang iban magabaton sang “pulong sang Ginharian” kag magauswag, pero ‘ang kabalaka sa sini nga sistema sang mga butang kag ang limbong sang manggad magalumos sa pulong.’ (Mat. 13:19-22; Mar. 4:19) Huo, kon indi kita maghalong, ang mga kabalaka kada adlaw makaapekto sa aton tagipusuon kag magaluya ang aton espirituwalidad. Gani, ginpaandaman ni Jesus ang iya mga disipulo: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi.”—Luc. 21:34.

4. Ano ang makabulig sa aton nga mausisa ang aton gugma sa Cristo? (Tan-awa ang piktyur sa umpisa sini nga artikulo.)

⁴ Pareho sang ginhimo ni Pedro pagkatapos sia ginpalig-on ni Jesus, mapamatud-an man naton ang aton gugma sa Cristo paagi sa pag-una sa aton kabuhi sang hilikuton nga ginsugo niya. Paano naton masigurado nga padayon naton nga mahimo ini? Dapat naton pamangkuton ang aton kaugalingon: ‘Ano gid ang akon ginahigugma ukon pinakaimportante sa akon kabuhi? Nalipay bala ako sa pag-alagad kay Jehova ukon basi mas nalipay ako sa paghimo sang indi espirituwal nga mga hilikuton?’ Para mabuligan kita nga masabat ini, binagbinagon naton ang tatlo ka aspekto sang aton kabuhi nga mahimo makapaluya sang aton gugma sa Cristo kag sa espirituwal nga mga butang kon indi naton pag-ibutang sa nagakaigo nga lugar. Ini amo ang trabaho, kalingawan, kag materyal nga mga butang.

5. Suno sa Kasulatan, ano ang responsibilidad sang mga ulo sang pamilya?

⁵ Ang pagpangisda indi isa ka kalingawan para kay Pedro, iya ini palangabuhian. Suno sa Kasulatan, responsibilidad sang mga ulo sang pamilya nga iaman ang materyal nga kinahanglanon sang ila pamilya. (1 Tim. 5:8) Dapat sila magpangabudlay para mahimo ini. Pero, sa sining katapusan nga mga adlaw, ang trabaho masami nga ginahalinan sang kabalaka.

6. Ano ang indi maayo nga epekto sang trabaho?

⁶ Bangod mas madamo ang nagapangita sang trabaho sangsa mahatag nga trabaho, madamo ang napilitan nga mag-obra sing sobra sangsa kinaandan nga oras, bisan pa manubo ang sueldo. Subong man, gusto sang mga negosyante nga mas madamo ang mahimo nila nga produkto, bisan pa diutay ang ila trabahador. Bangod sini, ang mga empleyado nagaka-stress, ginakapoy, kag nagamasakit. Ang mga wala nagapataypatay obra para sa ila kompanya mahimo madulaan sing trabaho.

7, 8. (a) Sin-o ang dapat naton unahon nga unungan? (b) Ano nga importante nga leksion parte sa iya trabaho ang natun-an sang isa ka utod sa Thailand?

⁷ Subong mga Cristiano, mas mainunungon kita kay Jehova nga Dios sangsa aton amo. (Luc. 10:27) Nagatrabaho kita para maaman ang aton mga kinahanglanon kag masuportahan ang aton ministeryo. Pero kon indi kita maghalong, mahimo sini maupangan ang aton pagsimba. Halimbawa, ang isa ka utod sa Thailand nagsiling: “Nanamian ako sang akon trabaho nga pagpangay-o sang mga kompyuter, pero madamo nga oras ang kinahanglan sa sini. Gani, daw wala na  ako sing oras sa espirituwal nga mga butang. Sang ulihi, narealisar ko nga para mauna ko ang Ginharian, dapat ko islan ang akon trabaho.” Ano ang ginhimo sini nga utod?

⁸ “Pagkatapos magplano sing mga isa ka tuig,” paathag niya, “nagdesisyon ako nga magbaligya sing ice cream. Sa umpisa, indi maayo ang kita kag naluyahan ako sing buot. Sang maistorya ko ang mga upod ko sa trabaho sang una, ginhikayan nila ako kag ginpamangkot kon ngaa napamensaran ko kuno nga mas maayo ang magbaligya sing ice cream sangsa magkay-o sing mga kompyuter sa opisina nga may aircon. Nangamuyo ako kay Jehova nga buligan ako nga makapadayon kag mahatagan sing mas madamo nga tion ang espirituwal nga mga hilikuton. Wala magdugay, nag-ayo ang kahimtangan. Natun-an ko kon ano ang sabor sang ice cream nga gusto sang mga kostumer kag mas nagsagad ako maghimo sini. Sang ulihi, nagakaubos pirme ang akon baligya. Ang matuod, mas daku ang kita ko sangsa nagapangay-o ako sing kompyuter. Mas malipayon ako subong sangsa trabaho ko sang una kay wala ako nagaka-stress. Labaw sa tanan, mas nagsuod ako subong kay Jehova.”—Basaha ang Mateo 5:3, 6.

9. Ano ang dapat naton himuon para mangin balanse ang aton pagtamod sa trabaho?

⁹ Nalipay si Jehova kon mapisan kita, kag padyaan niya ang aton pagpangabudlay. (Hulu. 12:14) Pero, pareho sang natun-an sang utod nga ginsambit kaina, ang trabaho dapat ibutang sa nagakaigo nga lugar. Si Jesus nagsiling: “Gani, padayon ninyo nga unahon ang pagpangita sa Ginharian kag sa pagkamatarong sang Dios, kag ini tanan [materyal nga kinahanglanon] idugang sa inyo.” (Mat. 6:33) Para mahibaluan kon bala balanse ang aton pagtamod sa trabaho kag espirituwal nga mga hilikuton, pamangkuton naton ang aton kaugalingon: ‘Nanamian bala ako maghimo sang akon trabaho pero daw rutina lang para sa akon ang espirituwal nga mga hilikuton kag natak-an ako sa sini?’ Kon pamalandungan naton ini, mahibaluan naton kon ano ang aton mas ginahigugma ukon pinakaimportante sa aton kabuhi.

10. Ano nga importante nga leksion ang gintudlo ni Jesus?

¹⁰ Nagtudlo si Jesus kon paano balansehon ang trabaho kag espirituwal nga mga butang. Isa ka bes, nagbisita si Jesus sa mag-utod nga sanday Maria kag Marta. Samtang masako si Marta sa pagpreparar sang pagkaon, nagpungko si Maria sa tiilan ni Jesus kag nagpamati sa iya. Sang nagreklamo si Marta kay wala sia ginabuligan ni Maria, ginsilingan ni Jesus si Marta: “Ginpili ni Maria ang maayo nga bahin, kag indi ini pagkuhaon sa iya.” (Luc. 10:38-42) Gintudluan ni Jesus si Marta sing importante nga leksion. Para indi makaupang ang trabaho kag mapamatud-an naton ang aton gugma sa Cristo, dapat naton pilion “ang maayo nga bahin” nga amo ang pag-una sang espirituwal nga mga butang.

11. Ano ang ginatudlo sang Kasulatan parte sa pagpahuway kag paglingawlingaw?

¹¹ Bangod sang makakalapoy kag masako nga trabaho, dapat man kita magrelaks kag maglingawlingaw kon kaisa. Ang Pulong sang Dios nagasiling: “Ang pinakamaayo nga mahimo sang tawo amo nga magkaon sia kag mag-inom kag magkalipay sa iya ginpangabudlayan.” (Man. 2:24) Nahibaluan ni Jesus nga kinahanglan ang pagpahuway. Halimbawa, pagkatapos sang maid-id nga pagbantala, ginsilingan niya ang iya mga disipulo: “Dali kamo, makadto kita sa isa ka baw-ing nga lugar nga kitahanon lang kag magpahuway sing makadali.”—Mar. 6:31, 32.

12. Ano ang dapat halungan sa kalingawan? Maghatag sing halimbawa.

¹² Gani, ang kalingawan makabulig sa aton nga makapahuway. Pero makatalagam kon  amo na ini ang panguna sa aton kabuhi. Sang unang siglo, madamo ang may panimuot nga “Magkaon kita kag mag-inom, kay buas mapatay kita.” (1 Cor. 15:32) Madamo ang may amo man sini nga panimuot subong. Halimbawa, pila na ka tuig ang nagligad, isa ka pamatan-on nga lalaki sa Western Europe ang nagtambong sa Cristianong mga miting. Pero nawili gid sia sa mga kalingawan amo nga wala na sia nagpakig-upod sa katawhan ni Jehova. Sang ulihi, narealisar niya nga ang pag-una niya sang kalingawan nagresulta lang sa mga problema kag kapaslawan. Gani nagtuon sia liwat sang Biblia kag nakalipikar sia nga mangin manugbantala sang maayong balita. Pagkatapos sang iya bawtismo, nagsiling sia: “Ang ginahinulsulan ko gid amo ang madamo nga tion nga nauyang antes ko marealisar nga mas malipayon ang pag-alagad kay Jehova sangsa pag-una sang kalingawan sini nga kalibutan.”

13. (a) Iilustrar ang katalagman sang kalingawan. (b) Ano ang makabulig para mahibaluan kon balanse kita sa aton paglingawlingaw?

¹³ Nagalingawlingaw kita para marepreskuhan kag mabalik ang aton kapagsik. Para mahimo ina, daw ano kadugay kita dapat maglingawlingaw? Hunahunaa ini nga ilustrasyon: Madamo sa aton ang mahilig sa mga matam-is, pero nakahibalo kita nga kon pirme kita magkaon sang keyk kag dulse, makahalit ini sa aton lawas. Gani, mas madamo nga masustansia nga pagkaon ang aton ginakaon. Sing kaanggid, mahalitan ang aton espirituwalidad kon madamo nga tion ang ginaubos naton sa kalingawan. Para malikawan ini, regular kita nga nagapakigbahin sa mga hilikuton sang Ginharian. Paano naton mahibaluan kon balanse kita sa aton paglingawlingaw? Sa isa ka semana, mahimo naton ilista kon pila ka oras ang aton gingamit sa espirituwal nga mga hilikuton, pareho sang pagtambong sa mga miting, pagbantala, personal nga pagtuon, kag pangpamilya nga pagsimba. Dayon ikumparar naton ini sa oras nga gingamit naton sa sina man nga semana para sa kalingawan, pareho sang sports, paglantaw sang telebisyon, ukon mga video game. Ano ang ginapakita sang aton pagkumparar? May dapat bala bag-uhon?—Basaha ang Efeso 5:15, 16.

14. Ano ang dapat magtuytoy sa aton kon nagapili sang kalingawan?

¹⁴ Ang kada isa kag ang mga ulo sang pamilya may kahilwayan sa pagpili sang gusto nila nga kalingawan, basta nahisuno ini sa mga talaksan ni Jehova nga nabase sa mga prinsipio sang Biblia. * Ang maayo nga kalingawan ‘dulot sang Dios.’ (Man. 3:12, 13) Siempre, indi pareho ang kalingawan nga gusto sang kada isa. (Gal. 6:4, 5) Bisan ano man nga kalingawan ang pilion naton, dapat ini ibutang sa nagakaigo nga lugar. Si Jesus nagsiling: “Kon diin ang inyo bahandi, didto man ang inyo tagipusuon.” (Mat. 6:21) Gani, kon tinagipusuon ang aton gugma kay Jesus, dapat ang aton hunahuna, hambal, kag paggawi nagapamatuod nga ginauna naton ang Ginharian sangsa iban pa nga butang.—Fil. 1:9, 10.

15, 16. (a) Paano masiod sang materyalismo ang isa ka Cristiano? (b) Ano ang maalamon nga laygay ni Jesus parte sa materyal nga mga butang?

¹⁵ Madamo subong ang gusto magsunod sa uso, sang pinakabag-o nga estilo sang bayo, gadyet, kag iban pa. Gani, dapat regular nga usisaon sang kada Cristiano ang iya kaugalingon paagi sa pagpamangkot: ‘Mas importante na bala sa akon ang materyal nga mga butang amo nga mas madamo nga tion ang akon ginagamit sa pagpangita kag pagpamensar sang pinakabag-o nga salakyan ukon estilo sang bayo sangsa paghanda sa mga  miting sang kongregasyon? Nangin masako na bala ako sa adlaw-adlaw nga mga hilikuton amo nga diutay na lang nga tion ang ginagamit ko sa pagpangamuyo ukon pagbasa sang Biblia?’ Kon marealisar naton nga mas labaw na ang aton gugma sa materyal nga butang sangsa aton gugma sa Cristo, dapat naton pamalandungan ang ginsiling ni Jesus: “Mag-andam kamo sa tanan nga sahi sang kakagod.” (Luc. 12:15) Ngaa nagpaandam sini si Jesus?

¹⁶ Nagsiling si Jesus nga “wala sing tawo nga makapaulipon sa duha ka agalon.” Nagsiling pa sia: “Indi kamo makapaulipon sing dungan sa Dios kag sa Manggad.” Matuod gid ini kay gusto sang kada “agalon” nga sia lang ang alagdon. Mahimo “dumtan [naton] ang isa kag higugmaon ang isa, ukon unungan [naton] ang isa kag tamayon ang isa,” siling ni Jesus. (Mat. 6:24) Bangod indi kita himpit, dapat naton pakigbatuan ang “mga handum sang aton unod,” lakip ang materyalismo.—Efe. 2:3.

17. (a) Ngaa ang mga tawo nga mahunahunaon sa unod nabudlayan nga magpalambo sang balanse nga pagtamod sa materyal nga mga butang? (b) Ano ang makabulig sa aton nga madaug ang materyalistiko nga mga handum?

¹⁷ Ang mga tawo nga mahunahunaon sa unod nabudlayan nga magpalambo sang balanse nga pagtamod sa materyal nga mga butang. Ngaa? Bangod indi na maathag ang ila espirituwal nga paghantop. (Basaha ang 1 Corinto 2:14.) Kon magburon na ang ila ikasarang sa paghangop, mas ginabudlayan sila nga makilala ang maayo kag malain. (Heb. 5:11-14) Bangod sini, indi na makontrol sang pila ang ila handum sa materyal nga mga butang, ang handum nga indi gid mapaayawan. (Man. 5:10) Nagapasalamat gid kita kay may pangontra sa materyalismo: ang regular nga pagbasa sang Pulong sang Dios, ang Biblia. (1 Ped. 2:2) Subong nga ang pagpamalandong sa kamatuoran halin sa Dios nagpalig-on kay Jesus nga pamatukan ang pagsulay, ang pag-aplikar sang mga prinsipio sang Biblia makabulig man sa aton nga madaug ang materyalistiko nga mga handum. (Mat. 4:8-10) Kon himuon naton ini, ginapakita naton kay Jesus nga mas ginahigugma naton sia sangsa materyal nga mga butang.

18. Ano ang determinado mo nga himuon?

¹⁸ Sang ginpamangkot ni Jesus si Pedro: “Ginahigugma mo bala ako sing labi sa sini?” ginapahanumdom niya si Pedro nga dapat unahon ang espirituwal nga mga butang. Ang ngalan nga Pedro nagakahulugan sing “Isa ka Bato,” kag amo gid sini si Pedro kay ginpakita niya ang malig-on nga mga kinaiya nga mapaanggid sa bato. (Binu. 4:5-20) Subong, determinado man kita nga mangin malig-on sa aton gugma sa Cristo, kag sa pagbutang sang trabaho, kalingawan, kag materyal nga mga butang sa nagakaigo nga lugar sini. Kon himuon naton ini, daw pareho man kita kay Pedro nga nagsiling kay Jesus: “Ginuo, nakahibalo ka nga ginapalangga ko ikaw.”