NAGPANIKASOG gid ang mga Cristiano sang unang siglo nga isugid sa madamo ang “maayong balita sang Ginharian.” (Mat. 24:14) Naglakbay pa gani ang pila sa ila sa iban nga pungsod. Halimbawa, nagkadto si apostol Pablo sa lugar nga ginatawag subong nga Turkey kag nagbantala sia didto bilang misyonero. * Pagligad sang mga 2,000 ka tuig, sang 2014, ginhimo liwat sa Turkey ang isa ka pinasahi nga pagbantala. Ngaa gin-organisar ini nga pagbantala? Sin-o ang nakigbahin sa sini?

Sobra 2,800 ang manugbantala sa Turkey, pero mga 80 ka milyon ang populasyon sini. Buot silingon, may isa ka manugbantala sa kada 28,000 ka tawo sa Turkey. Gani diutay pa lang ang nabantalaan sa sini nga pungsod. Gin-organisar ang pinasahi nga pagbantala para malab-ot ang mas madamo nga tawo sa malip-ot lang nga tion. Mga 550 ka utod nga nagahambal sing Turkish halin sa iban nga pungsod ang nagkadto sa Turkey para magbantala upod sa mga kauturan diri. Ano ang resulta sini?

Madamo gid ang napanaksihan. Ang isa ka kongregasyon sa Istanbul nagsulat: “Sang nakita kami sang mga tawo, namangkot sila: ‘May espesyal bala nga pagtilipon diri? Kadamo gid sang mga Saksi ni Jehova!’” Ang isa ka kongregasyon sa siudad sang Izmir nagsulat man: “Isa ka tawo nga nagaobra sa terminal sang taxi ang nagpalapit sa isa ka gulang kag namangkot, ‘Ngaa kadamo gid sa inyo? May ano kamo?’” Natalupangdan gid ini nga pagbantala.

Nalipay gid ang mga manugbantala halin sa iban nga pungsod. Si Steffen nga taga-Denmark nagsiling: “Kada adlaw, may mabantalaan ako nga wala pa makabati parte kay Jehova. Gani mapakilala ko gid ang ngalan ni Jehova.” Si Jean-David nga taga-France nagsulat: “Sa pila ka oras namon nga pagbantala, daw indi kami makahalin sa isa lang ka kalye. Tumalagsahon gid ini! Ang kalabanan wala makakilala sa mga Saksi ni Jehova. Sa halos tanan nga balay, may maistorya gid kami, mapakita namon ang aton video, kag makabilin kami sing publikasyon sa tagbalay.”

Ang 550 ka manugbantala nakapanagtag sing mga 60,000 ka publikasyon sa duha lang ka semana! Madamo gid ang napanaksihan bangod sini.

 Nangin makugi pa gid ang mga manugbantala. Napalig-on ang mga kauturan sa sini nga pungsod bangod sang pinasahi nga pagbantala. Madamo ang nagplano nga mag-alagad sing bug-os tion. Nag-uswag ang kadamuon sang regular payunir sa Turkey sing 24 porsiento pagligad sang 12 ka bulan.

Bisan pa nakapauli na ang mga nakigbahin halin sa iban nga pungsod, may epekto gihapon sa ila ang pinasahi nga pagbantala. Si Şirin, isa ka sister nga taga-Germany, nagsulat: “Nahapusan ang mga kauturan sa Turkey sa pagpanaksi sing indi pormal. Nabudlayan ako sa sini kay mahuluy-on gid ako. Pero bangod sang pinasahi nga pagbantala, sang halimbawa sang mga kauturan, kag sang pirme nga pagpangamuyo, nahimo ko ang indi ko mahimo sang una. Nakabantala pa gani ako sa estasyunan sang tren kag nakapanghatag sing mga tract! Subong, indi na ako masyado mahuluy-on.”

“May natun-an ako nga nagamit ko sa akon ministeryo,” siling ni Johannes nga taga-Germany. “Ginatinguhaan sang mga kauturan sa Turkey nga masugid ang kamatuoran sa madamo gid nga tawo. Nagapanaksi sila sa tanan nga tion nga may kahigayunan sila. Nagdesisyon ako nga sundon ang ila ginahimo sang magbalik ako sa Germany. Subong, mas madamo na ang mabantalaan ko kon ikumparar sang una.”

“May epekto gid sa akon ministeryo ining pinasahi nga pagbantala. Nadugangan ang akon kaisog kag pagsalig kay Jehova,” siling ni Zeynep nga taga-France.

Nangin suod ang mga manugbantala. May maayo nga epekto ang gugma kag paghiusa sang mga kauturan nga naghalin sa madamo nga pungsod. “Naeksperiensiahan namon ang pagkamaabiabihon sang mga kauturan,” siling ni Jean-David, nga ginsambit kaina. Nagsiling pa sia: “Ginkabig nila kami nga mga abyan kag miembro sang ila pamilya. Ginpadayon nila kami sa ila balay. Nabal-an ko nga internasyonal ang aton paghiliutod kay madamo nga beses ko na ini nga nabasa sa aton mga publikasyon. Pero subong, naeksperiensiahan ko na ini. Ginapabugal ko gid nga isa ako sa katawhan ni Jehova,  kag ginapasalamatan ko sia sa sining dalayawon nga pribilehiyo.”

“Isa lang kita ka pamilya, bisan pa naghalin kita sa Denmark, France, Germany, ukon Turkey. Daw ginpanas na sang Dios ang mga dulunan sang tanan nga pungsod,” siling ni Claire nga taga-France.

Nagsiling man si Stéphanie nga taga-France: “Bangod sang pinasahi nga pagbantala, natun-an namon nga indi ang kultura ukon lenguahe ang nagapahiusa sa aton kundi ang aton gugma kay Jehova.”

Madamo sa mga nagpakigbahin halin sa iban nga pungsod ang naghunahuna nga magsaylo sa Turkey para magbulig sa daku pa nga hilikuton didto. Madamo na ang nagsaylo. Ginapasalamatan gid ang bulig sini nga mga kauturan.

Halimbawa, may 25 ka manugbantala sa isa ka grupo sa isa ka malayo nga lugar. Madamo nga tinuig nga isa lang ang gulang diri. Handurawa ang kalipay sini nga mga manugbantala sang nagsaylo diri sang 2015 ang anom ka utod halin sa Germany kag Netherlands para buligan sila!

Ano ang ginsiling sang mga utod nga nagsaylo sa Turkey parte sa ila kabuhi didto? Matuod, may mga kabudlayan sila kon kaisa, pero malipayon gid sila. Binagbinaga ang ginsiling sang pila sa ila:

“Bangod diutay lang ang akon materyal nga pagkabutang, wala gawa ako sing ginakabalak-an kag makakonsentrar ako sa kon ano ang pinakaimportante,” siling ni Federico, halin sa Spain nga utod nga mga 40 anyos kag may asawa. Palig-unon man bala niya ang iban sa amo sini nga pag-alagad? “Huo!” siling niya. “Kon magsaylo ka sa iban nga pungsod para buligan ang mga tawo nga makilala si Jehova, ginasalig mo ang imo kabuhi sa iya. Mabatyagan mo gid ang pag-atipan ni Jehova.”

Si Rudy, halin sa Netherlands nga utod nga manug-60 anyos kag may asawa, nagsiling nga nalipay gid sia mag-alagad sa lugar nga daku ang  kinahanglanon “kag isugid ang kamatuoran sa madamo nga tawo nga wala pa makabati sini.” Nagsiling pa sia: “Nalipay gid ako kon makita ko ang kalipay sang mga tawo nga nagabaton sang kamatuoran.”

Si Sascha, halin sa Germany nga utod nga mga 40 anyos kag may asawa, nagsiling: “Kon nagabantala ako, masugilanon ko ang mga tawo nga wala pa makabati sang kamatuoran. Ang pagbulig sa ila nga makilala si Jehova nagapahalipay gid sa akon.”

Si Atsuko, halin sa Japan nga utod nga mga 35 anyos kag may bana, nagsiling: “Sang una, gusto ko na mag-abot dayon ang Armageddon. Pero sang magsaylo ako sa Turkey, nagapasalamat ako nga nangin mapinasensiahon pa si Jehova. Nagasuod pa gid ako kay Jehova bangod makita ko kon paano niya ginagiyahan ang hilikuton.”

Si Alisa, halin sa Russia nga utod nga mga 30 anyos, nagsiling: “Natilawan ko ang tanan nga kaayo ni Jehova sang nag-alagad ako sa iya sa sini nga paagi.” (Sal. 34:8) Nagsiling pa sia: “Indi ko lang Amay si Jehova, suod ko man sia nga Abyan nga mas nakilala ko pa gid sa bag-o nga mga kahimtangan. Madamo gid ako sing makalilipay nga mga handumanan, eksperiensia, kag pagpakamaayo!”

Bangod sang pinasahi nga pagbantala sa Turkey, madamo pa ang nakabati sang maayong balita. Pero madamo pa nga teritoryo ang wala mabantalaan. Kada adlaw, ang mga kauturan nga nagsaylo sa Turkey may masugilanon nga wala pa makabati parte kay Jehova. Gusto mo bala mag-alagad sa amo sini nga teritoryo? Kon huo, ginapalig-on ka namon: “Tuluka . . . kag tan-awa ang kaumhan. Maputi na ini kag alanihon na.” (Juan 4:35) Makabulig ka bala sa iban nga lugar nga “alanihon na” ang kaumhan? Kon huo, dapat mo ini handaan. Sigurado ini: Kon dugangan mo ang imo pagpakigbahin sa pagbantala sang maayong balita “tubtob sa pinakamalayo nga bahin sang duta,” indi gid maisip ang imo mga pagpakamaayo!—Binu. 1:8.