MANUGTAPOS na sadto ang Nobiembre sang 1932 sa Mexico City. Isa pa lang ka semana nga nabutangan sing mga traffic light ini nga siudad nga may sobra isa ka milyon ka pumuluyo. Pero daan na ini nga balita. May bag-o naman nga balita ang mga reporter sa siudad sa sini nga semana. Ara sila sa estasyunan sang tren kag handa na ang ila mga kamera sa pag-abot sang importante nga bisita, si Joseph F. Rutherford, ang presidente sadto sang Watch Tower Society. Nagahulat man ang mga Saksi didto sa pag-abiabi kay Utod Rutherford, nga magatambong sa ila kombension sa tatlo ka adlaw.

Nagsiling ang The Golden Age: “Ini nga kombension mangin importante gid nga bahin sang kasaysayan sang pag-uswag sang Kamatuoran sa republika sang Mexico.” Pero ngaa talalupangdon gid ini nga kombension nga gintambungan sang mga 150 lang ka tawo?

Antes sini, diutay lang ang manugbantala sa Mexico. Sugod sang 1919, may ginhiwat nga magagmay nga mga asembleya, pero nagdiutay ang mga kongregasyon sa masunod nga mga tinuig. Sang ginsugdan ang sanga talatapan sa Mexico City sang 1929, daw ginpaabot nga magauswag ang hilikuton. Pero may mga problema. Naghatag sing instruksion ang organisasyon sa mga colporteur, ang pagtawag sadto sa mga payunir, nga indi magnegosyo kon nagabantala. Naakig sa sini ang isa ka colporteur, gani nagbiya sia sa kamatuoran kag nagtukod sang iya kaugalingon nga grupo sa pagtuon sang Biblia. Sa sini man nga tion, ginpahalin ang manugtatap sa sanga talatapan bangod sang iya ginahimo nga supak sa Kasulatan. Kinahanglan gid sang matutom nga mga Saksi sa Mexico ang pagpalig-on.

Sang nagduaw si Utod Rutherford, ginpalig-on niya ining matutom nga mga kauturan paagi sa duha ka pamulongpulong sa kombension kag lima ka pamulongpulong sa radyo. Amo ini ang una nga tion nga gingamit ang mga estasyon sa radyo para mabantala ang maayong balita sa bilog nga Mexico. Pagkatapos sang kombension, may gintangdo nga bag-o nga manugtatap sa sanga talatapan kag gin-organisar niya ang hilikuton. Napabakod ang makugi nga mga Saksi nga magpadayon sa pagbantala kag ginpakamaayo sila ni Jehova.

Pagkadason nga tuig, duha ka kombension ang ginhiwat sa pungsod, isa sa Veracruz kag isa sa Mexico City. Ang makugi nga pagbantala sang mga kauturan may maayo nga resulta. Sang 1931, may 82 ka manugbantala. Pagligad sang napulo ka tuig, nagdamo sila sing napulo ka pilo! Mga 1,000 ang nagkadto sa Mexico City para magtambong sa Theocratic Assembly sang 1941.

Sang 1943, nagsuksok sing mga plakard ang mga Saksi para ipahibalo ang “Free Nation’s” Theocratic Assembly nga ginhiwat sa 12 ka siudad sa  Mexico. * Ginauribay nila ang duha ka plakard nga natabid, isa sa atubang kag isa sa likod. Gingamit sang mga Saksi ini nga pamaagi sang pagbantala sugod sang 1936.

Parte sa maayo nga resulta sini nga pagpahibalo gamit ang mga plakard sa Mexico City, nagsiling ang magasin nga La Nación: “Sa una nga adlaw [sang asembleya], ginpalig-on [ang mga Saksi] nga imbitahon ang madamo nga tawo. Pagkadason nga adlaw, naggutok na sila sa ila ginatipunan.” Wala nalipay sa sini ang mga Katoliko, gani ginpamatukan nila ang mga Saksi. Pero nagpadayon sa pagpahibalo ang maisog nga mga kauturan sa mga dalan. Ang isa pa ka artikulo sang La Nación nagreport: “Nakita sila sang bilog nga siudad.” Ginlaragway sini nga artikulo ang mga kauturan nga nagasuksok sing mga plakard. May piktyur man ini nga nagapakita sang mga kauturan sa mga dalan sang Mexico City. Amo ini ang kapsion sang piktyur: “Napuno ang mga dalan.”

Sang una, nagasakripisyo gid ang kalabanan nga Saksi para makatambong sa mga kombension sa Mexico. Madamo ang naghalin sa malayo nga mga baryo nga wala sing nagabiyahe nga tren ukon wala pa gani sing mga dalan. Gani nagasakay anay sila sa kabayo ukon nagalakat sing pila ka adlaw para makasakay sila sa tren nga nagabiyahe sa siudad nga ginahiwatan sang kombension.

Imol ang kalabanan nga Saksi kag halos indi nila masarangan ang inugplete bisan pakadto pa lang sa kombension. Kon makakadto sila, madamo ang nagadayon sa mga Saksi sa lugar sang kombension nga mahigugmaon nga nag-abiabi sa ila. Ang iban nagtulog sa mga Kingdom Hall. Isa ka bes, mga 90 ka kauturan ang nagdayon sa sanga talatapan, kag ginhimo nila nga hiligdaan ang mga karton sang mga libro. Nagsiling ang Yearbook nga nagapasalamat ang mga kauturan kay ini nga “mga hiligdaan indi pareho sa salog nga matig-a kag matugnaw.”

Nagapasalamat gid ini nga mga Saksi nga makaupod ang ila mga kauturan sa makalilipay nga pagtilipon amo nga balewala sa ila ang tanan nila nga ginsakripisyo. Subong, nagapasalamat gihapon ang halos isa ka milyon nga manugbantala sa Mexico. * Nagreport ang sanga talatapan sa Mexico sang 1949 parte sa mga kauturan: “Bisan pa may kabudlayan, wala gid madula ang ila kakugi sa kamatuoran bangod kon matapos ang isa namon ka asembleya, ginaistoryahan gihapon ini sang mga kauturan kag pirme sila nagapamangkot, San-o ang madason naton nga asembleya?” Matuod gihapon ini asta subong.—Halin sa amon archive sa Central America.