ANG GINASILING SANG IBAN

Ang mga Israelinhon nagasimba sa mapintas nga dios sang inaway.

ANG GINASILING SANG BIBLIA

Ang mga pungsod nga ginpierde sang mga Israelinhon tama gid kasingki kag nagahimo sing malain—lakip ang pagpakigsekso sa mga sapat, paghulid sa malapit nga paryente, kag paghalad sang mga bata. Pagkatapos sila hatagan sing ginatos ka tuig para magbag-o, ang Dios nagsiling: “Bangod sini nangin indi matinlo ang mga pungsod nga ginatabog ko sa inyo atubangan.”—Levitico 18:21-25; Jeremias 7:31.

“Bangod malaut ini nga mga pungsod amo nga tabugon sila ni Jehova nga inyo Dios sa inyo atubangan.”—Deuteronomio 9:5.

MAHIMO NATALUPANGDAN MO

Sa madamo nga inaway, ang mga lider sang relihion sang tagsa ka grupo nagapangangkon nga ginadampigan sila sang Dios. “Pirme gid nadalahig ang relihion sa tagsa ka inaway nga natabo,” siling sang libro nga The Causes of War.

ANG GINASILING SANG BIBLIA

Wala ginatugutan ang mga Cristiano nga makig-away sa ila mga kaaway. Si apostol Pablo nagsulat sa iya pareho nga mga Cristiano: “Himua ang masarangan ninyo sa pagpakighidait sa tanan nga tawo. Indi kamo magtimalos.”—Roma 12:18, 19.

Imbes nga ipadala ni Jesus ang iya mga sumulunod sa inaway, ginsilingan niya sila: “Padayon nga higugmaa ang inyo mga kaaway kag padayon nga ipangamuyo ang mga nagahingabot sa inyo, agod mangin anak kamo sang inyo Amay nga yara sa langit.” (Mateo 5:44, 45) Bisan pa may inaway sa lugar nga ginaistaran sang mga Cristiano, dapat sila magpabilin nga neutral, nga “indi . . . bahin sang kalibutan.” (Juan 15:19) Gusto sang Dios nga higugmaon sang iya mga sumilimba sa tanan nga pungsod ang ila mga kaaway kag indi sila mangin bahin sang kalibutan, gani wala gid sia sing may ginadampigan sa mga inaway subong.

“Ang akon Ginharian indi bahin sini nga kalibutan. Kon ang akon Ginharian bahin sini nga kalibutan, ang akon mga alagad nakig-away kuntani agod indi ako madakop sang mga Judiyo. Apang, ang matuod, ang akon Ginharian indi halin sa sini.”—Juan 18:36.

ANG GINASILING SANG IBAN

Indi gid malikawan ang inaway. “Asta san-o may inaway gid,” siling sang libro nga War and Power in the 21st Century. “Daw indi gid matabo ang dayon nga paghidait sa bilog nga kalibutan sa sini nga siglo.”

ANG GINASILING SANG BIBLIA

Mauntat ang mga inaway kon wala na sing gusto makig-away. Gani sa indi madugay, dulaon sang Ginharian sang Dios—ang matuod nga gobierno nga nagagahom sa langit—ang tanan nga armas sa aton planeta kag tudluan ang mga tawo nga mangin mahidaiton. Ginapasalig kita sang Biblia nga “tadlungon [sang Dios] ang mga butang para sa kaayuhan sang gamhanan nga mga pungsod, bisan malayo kag malapit. Salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas. Ang pungsod indi na makig-away sa iban nga pungsod, kag indi na sila magtuon sa pagpakig-away.”—Miqueas 4:3.

Ginatudlo sang Biblia nga sa paggahom sang Ginharian sang Dios wala na sing gobierno sang mga pungsod nga nagapakigbato sang ila interes, indi makatarunganon nga mga pagsulundan nga ginabangdan sang pagrebelde sang mga pumuluyo, ukon diskriminasyon nga nagaresulta sa pagbinahinbahin. Gani wala na sing inaway. “Indi sila manghalit ukon mangguba,” promisa sang Dios, “bangod ang duta mapuno sang ihibalo tuhoy kay Jehova kaangay sang tubig nga nagahil-ob sa dagat.”—Isaias 11:9.

“Ginapauntat niya ang mga inaway sa bug-os nga duta. Ginabali niya ang pana kag ginautod ang bangkaw; ginasunog niya ang mga kangga sang mga hangaway.”—Salmo 46:9.